CORREO
RSS
Ti estás aquí > Inicio / Xéneros / Pop
Música Pop
Xoel López retorna con Paramales
Xénero: | 27 / 5 / 2015
Unha colección de trece cancións con diferentes temas e influencias compoñen Paramales, o novo disco de Xoel López. O músico coruñés achega desde sons acústiscos con acompañamento de acordeóns ata pop con tintes electrónicos, a pasar por toques brasileiros e inclúe un tema en galego, A serea e o mariñeiro. O proxecto, que saíu á luz onte da man de Esmerarte Servizos Artísticos está xa dispoñible en formato físico e en plataforma dixitais. Pamplona acolle esta noite o comezo da xira de presentación, que continuará en vindeiras datas por Madrid (4 de xuño), o Festival Contempopránea de Badajoz (5 e 6) ou Valladolid (17 de xuño). A primeira visita a Galicia está prevista para o 18 de xullo no marco do Festival PortAmérica Rias Baixas.
Sés comeza a Tronzar os valos
Xénero: | 11 / 3 / 2015
O vindeiro 24 de marzo sae á venda da man de Fol Música o novo disco de María Xosé Silvar Sés. Tronzar os valos propón doce novos temas nos que se atopan blues, rock e ritmos latinoamericanos coa voz inconfundible e comprometida da cantante. De xeito previo ao lanzamento, están a se facer públicos os tres primeiros singles. Así, a Tronzar os valos e Opio barato, xa dispoñibles nas redes, seguirá o vindeiro 17 de marzo 2000 anos máis. A xira de presentación comezará o vindeiro día 27 no teatro Afundación de Vigo, e continuará o 28 no Pazo da Cultura de Narón.
Os 80 voltan con Alex Casanova
Xénero: | 10 / 12 / 2014
Electropop puro no estilo dos anos 80, con Tino Casal ou Javiera Mena como referentes confesos. Esta é a proposta que fai Alex Casanova nos oito temas do seu primeiro traballo. Antagonasia sae á luz da man dun novo selo, Crispis Records e mestura melodías luminosas con letras que, segundo o seu autor, tenden ao escuro. Todos os temas están en castelán agás o último, Xeado de limón, que xa fixera parte do álbum colectivo Bababum. Os interesados en coñecer o proxecto teñen unha oportunidade hoxe na sala Sonar de Santiago de Compostela, onde se fará unha presentación do proxecto.
Is It In You? é o prometedor debut de Puma Pumku
Xénero: | 26 / 11 / 2014
Con preestrea en Rockdeluxe o quinteto compostelán Puma Pumku debuta da man de Matapadre con Is it in you?. Logo do seu EP de presentación e de completar unha exitosa campaña de crowdfunding, o grupo lanza agora unha colección de temas nos que a psicodelia e as atmósferas con ecos dos anos sesenta continúan a predominar. O álbum preséntase en dúas edicións, unha para os patrocinadores do proxecto, en vinilo de cor con dez temas, e outra baixo o selo Matapadre, que unicamente recolle nove. A gravación realizouse da man de Roberto Mallo e Rodrigo Caamaño de Triángulo de Amor Bizarro no seu propio estudio. O grupo inicia agora a xira de presentación do traballo, que os levará o 28 de novembro a sala madrileña Siroco, o 12 de decembro á Fundación SGAE de Compostela, e o 3 de xaneiro a El Pueblo (Ourense).
Guadi Galego sae do folk en Lúas de outubro e agosto
Xénero: | 24 / 11 / 2014
Dez temas de letras reflexivas e maduras nos que a voz de Guadi Galego sae do rexistro folk. Esta é a aposta que ex-cantante de Berrogüetto fai con Lúas de outubro e agosto, o seu segundo álbum, que sae á venda mañá, 25 de novembro a coincidir co Día contra a Violencia de Xénero. Arranxos eléctricos con aires jazz, baixos e baterías conviven co acordeón de Santi Cribeiro e o clarinete de Pablo Pascual no que supón un achegamento da cantante ao pop melódico. A maior parte dos temas do volume foron compostos pola propia Galego e graváronse nos estudios Alis Records de Baeza. O álbum sae á venda da man de Fol Música, e o seu primeiro single, Matriarcas acadou un éxito fulminante en Youtube, co preto de 15.000 visualizacións en só dous días.
Lucía Pérez volta con Quitapenas
Xénero: | 14 / 7 / 2014
Quitapenas é o sexto disco da cantante do Incio Lucía Pérez, e o primeiro que lanza logo da súa participación en Eurovisión en 2011. Gravado nos estudios Montepríncipe de Madrid, o proxecto supón un punto de inflexión na carreira da artista, coa aposta por temas pop e con toques latinos. Aínda que cantado en castelán, mesmo cunha versión do Moonlight Shadow de Mike Olfield, o álbum inclúe tamén o tema Sete chorares en galego. A edición en CD do álbum está dispoñible en exclusiva con La Voz de Galicia ata o vindeiro 21 de xullo, e distribuirase posteriormente polas tendas. A versión dixital está xa á venda nas principais plataformas internacionais.
The Lost Omelette-makers chegan a Discos da Máquina
Xénero: | 27 / 5 / 2014
O segundo LP de The Lost Omelette-makers viu a luz este mes como o novo lanzamento de Discos da Máquina. Daniel Santos é o único membro do grupo e asina os temas de A calor dun corpo estraño, o seu segundo LP con este alias. Pop lo-fi con letras desquiciadas e arranxos traballados amosan a creatividade deste proxecto, que está a facer a súa xira de presentación. Canda a sete cancións de composición propia, Santos inclúe Romeo&Cuneta, curiosa versión da Romeo y Julieta popularizada por Karina que ambienta nas obras das compostelá rúa de San Pedro.
Ataque Escampe retornan con O disco vermello
Xénero: | 23 / 5 / 2014
A emigración, a contradición entre a evasión e o compromiso, historias universais contadas desde uns puocos. Ataque Escampe apostan por un son cunha maior presenza de bases electrónicas e presentan O disco vermello. Letras coidadas e reivindicativas nas que se mesturan ritmos como "o pop e o dub e o rap de mentira e o soul de Filadelfia", segundo eles mesmos explican no texto de presentación. Once temas dispoñibles en Bandcamp e que en breve sairán en formato CD. O álbum foi gravado por Arturo Vaquero nos estudios Abrigueiro e que ven a luz da man de Discos da Máquina.
Villanueva debuta con Viajes de ida
Xénero: | 13 / 5 / 2014
Villanueva é o nome do novo proxecto musicaldo vigués Josete Diaz, antigo membro de Martynez. Co título Viajes de ida lanza o seu primeiro disco en solitario, un volume de 10 cancions que estará dispoñible a partir do vindeiro 20 de maio en formato físico e dixital da man de Esmerarte. Nesta nova etapa o músico oscila entre o rock e o pop con colaboracións como as de Ramiro Nieto, Carlos Sosa, Javier Doria e Oscar García nos instrumentos e con Ángel Luján á produción. A Sala Costello de Madrid acollerá a presentación do proxecto o mesmo día 20.
O Festival Brincadeira volve celebrarse este ano e será en Compostela
Xénero: | 21 / 4 / 2014
O Festival Brincadeira, tamén coñecido como Brincadeira-Rock, volve das súas cinsas dous anos despois da súa anterior edición. O festival nacido en Ordes en 2010 pasou a celebrarse en Cambre en 2012 e viu cancelada a súa prevista volta a Ordes en 2013 pola baixa recadación prevista. Agora os organizadores veñen de confirmar que este ano volverán levantar os escenarios, desta ocasión no recinto do Monte do Gozo en Santiago de Compostela entre o 7 e o 9 de agosto. Ademais, malia que o resto do cartel aínda non se coñece, puideron avanzar unha das actuacións estelares: a cantante Gloria Gaynor, diva da música disco-soul dos anos 70 e mundialmente famosa por temas como I will survive, que xa enviou un saúdo para os “brincadeiros”. Hoxe mesmo saen á venda os primeiros abonos con acampada ao prezo de 29 euros.
Información actualizada 17:30:
Xa se coñece o resto do cartel do Festival Brincadeira 2014 que inclúe entre outros moitos grupos e artistas a Bad Manners, Georgie Dann, The Zombie Kids, Fangoria, Lory Money, Guadalupe Plata, Fluzo, Los Chavales, Familia Caamagno, Ruxe-Ruxe, Tony Lomba, Mad Professor e mesmo a Ultranoite no país dos ananos de Chévere.
REPORTAXE
Disco con etiqueta
Data.O vinte de maio o público e un xurado escollerán o Primeiro disco pop do ano de solistas galegos
