MeGA

Heredeiros volven para quentar o outono

Xénero: Rock | 11 / 10 / 2019

Case seis anos separan este Derretidos (Dotbeat) do anterior Jard rock con fe(Airapro Producións, 2013) dos Heredeiros da Crus. Pode semellar moito pero hai que lembrar que dando un paso máis atrás na memoria xa teríamos que remotarnos 19 anos ata aquel All right Chicago [Rock’n’roll] (BOA Music, 2000) que semellaba ser o derradeiro capítulo da banda no seu momento. Despois dunha traxectoria que xa é historia do rock en galego (como relatábamos na reportaxe Unha epopeia rock desde o Barbanza) e xa consolidada a súa volta, cumplidos en 2017 os 25 anos de vida da formación con dez disco gravados nas costas, os Heredeiros chegan agora con este Derretidos ampliando o seu xa enorme repertorio cun feixe de 12 temas de puro rock and roll contundentes, de descarga guitarreira protagonista e coa marca sonora impecable da producción de Iago Lorenzo. Os integrantes da banda rondan xa a cincuentena pero seguen a dar voltas nas letras dos seus temas as mesmas cousas choqueiras coas que fixeron gran parte dos seus primeiros discos de xuventude. O sexo, a violencia, a escatoloxía e algunhas situacións dos seus entornos cotiáns seguen a ser a fonte da inspiración chea da súa habitual sorna nos temas compostos por Toño Novo "Tuchiño", non é así o caso da canción de peche do disco Soñei, unha balada asinada polo vocalista Javi Maneiro que resulta máis intimista e ancorada nos sentimentos. A banda lanzaba onte o seu primeiro videosingle, Esquimales, asinado por Xaime Miranda, que marca xa unha liña de ánimo de quentar ao persoal co seu característico espírito controvertido e provocador. HDC non defraudan nese sentido con Derretidos prometendo novos himnos para os seareiros máis acérrimos, algúns deles fillos dos seus primeiros siareiros da época do Xabarín Club. Heredeiros presentará o seu novo álbum hoxe xa no Arrecife en Vivo e posteriormente adentrarase nunha intensa xira por Europa e a Península: Londres (02/10), Barcelona (09/10), Madrid (23/10), Santiago de Compostela (30/10) e Xenebra (07/12). Derretidos xa está dispoñible nas principais plataformas dixitais.

Agoraphobia non se poñen límites co rebelde 'Unaligned'

Xénero: Rock | 8 / 10 / 2019

Fai dous anos as Agoraphobia daban un golpe na mesa presentando Incoming Noise (Dotbeat, 2017) ao tempo que facían unha declaración de intencións vital de coller profesionalmente o camiño da música centradas neste proxecto. Dous anos e moitos escenarios despois presentan agora Unaligned (Dotbeat) que é unha exploración sen autolimitacións de todos os paos que están dispostas a tocar na súa expresividade. Dez cancións de rock alternativo para as que unha única etiqueta non chega -talvez de aí o "non aliñamento" do título- xa que as do Barbanza dan saída en composicións conxuntas aos demos internos de cada unha das catro actuais compoñentes oficiais da banda e iso conduce e unha variedade de sons que poden ir desde o stoner ao rock industrial pasando polo nu metal ou o grunge. A enerxía e a potencia mantéñense como bandeira do grupo, contundentes e salvaxes riffs acompañados polo caudal de voz dunha Susana que neste caso ofrécenos aínda máis rexistros en todas as direccións nunha evolución de perfeccionamento que tamén se pode percibir en todas as execucións instrumentais de cada unha das integrantes da formación. Temas como It´s all about you, ou Smokescreen, Remain unchanged ou We own us seguen dando esas puñadas de rabia no peito que son características da banda pero ademais enriquecidas con xiros de clara evolución e madurez.

System of A Down, Judas Priest e Korn abren o cartel do vindeiro Resurrection Fest

Xénero: Rock | 23 / 9 / 2019

A organización do Resurrection Fest de Viveiro arrincaba con forza os anuncios sobre a vindeira xeira do evento o pasado venres a adiantar a presenza de System of A Down como cabeza de cartel. O festival de Viveiro contará coa única actuación da banda a nivel estatal durante o ano. A este adianto sumábase na mañá deste 23 de setembro o anuncio dunha longa lista de confirmacións que visitarán Viveiro entre os vindeiros 1 e 4 de xullo. Os veteranos Judas Priest, canda a Korn, Meshuggah, Heaven Shall Burn, Sepultura, Madball, Jinjer, Dark Funeral ou Amenra súmanse á proposta de saída como principais nomes internacional. A estes engádense propostas como os españois Hamlet, Blowfuse ou Onza entre moitos outros. As entradas poranse á venda o vindeiro 1 de outubro.

Furious Monkey House confírmanse con Love, scum & dust

Xénero: Rock | 16 / 9 / 2019

A afondar a súa aposta polo rock de guitarras, a banda pontevedresa Furious Monkey House presentaba o pasado venres 13 de setembro Love, scum & dust, o seu segundo álbum de estudio. Cinco anos despois do seu debut con Run, e coa incorporación dun segundo mono furioso, o grupo achega nove temas nos que mantén a súa esencia rockeira cun son máis complexo e achegamentos ao indie-rock británico ou ao rock alternativo estadounidense. Publicado por Universal Music Spain, Esmerarte y Atresmúsica, o álbum gravouse nos Estudios Bonobo e Planta Sónica entre decembro de 2017 e agosto de 2018, e presentouse con dous singles, Echoes e Lluvia, que con No lo ves é o primeiro tema cantado en español do conxunto.

O festival Revoltallo de Valladares abre hoxe a súa XXVIª edición

Xénero: Rock | 6 / 9 / 2019

O místico 'Colorama' de Basanta Premio POP-Eye a Mellor disco de rock 2019

Xénero: Rock | 5 / 9 / 2019

O primeiro disco de debut da banda viguesa Basanta, Colorama, ven de ser recoñecido como Mellor disco de rock nacional nos premios POP-Eye da Música e a Creación Independente organizados desde a Asociación Cultural Bon Vivant, de Estremadura e vencellados aos Premios Nacionais da Música e das Artes que este ano celebran a súa 14ª edición. A criterio do xurado Colorama é un primeiro disco que "deixa entrever a esixencia dunha intencionalidade que intenta apuntar á intimidade ou, máis ben, rodeala e descubrir de que trata". Para eles o disco dos vigueses "aposta por recoñecer e explotar a sombra, o lado escuro. o translúcido". Colorama xa conseguira comezar a destacar o pasado ano tras a súa publicación aparecendo nalgunha das listas nacionais das revistas especializadas a finais de ano. O premio entregarase en Plasencia os vindeiros días 8 e 9 de novembro no marco Premios Nacionais da Música e das Artes. O xurado dos premios Pop-Eye xa recoñecera en 2016 o traballo de Novedades Carminha.dándolles o premio a mellor disco do ano por Campeones del mundo (Ernie Records, 2016).

Los Eternos volven co son americano en 'Vientos solitarios'

Xénero: Rock | 4 / 6 / 2019

Los Eternos non desaparecen, o levan no nome e son coherentes con el. A banda de country rock de Cedeira que levaba 9 anos sen gravar temas e cunha actividade musical bastante intermitente nos últimos tempos, sacan disco de novo demostrando a súa vitalidade. Con Vientos Solitarios (Ferror Records / Cascaballo Records, 2019) a veterana formación que comezou a dar os primeiros pasos en 2003 comeza a cantar en castelán presentando nove temas propios e unha adaptación de Four strong winds de Ian Tyson. Os anteriores traballos da formación foron Back on the Road (Warner / Miña Terra Galega, 2010) e o vinilo de sete polgadas Chris Masuak & Los Eternos (H-Records, 2013) e os dous estaban cantados en inglés, neste caso o grupo pasa a traducirse a sí mesmo e amosan a lírica das súas composicións en castelán cun son máis “americana” ca nunca apoiado dun xeito inequívoco na potente steel guitar de Álvaro Lamas (ex-Los Limones). A banda conta coa produción e masterización a cargo de Hendrik Röver (Los DelTonos) para este novo disco que este vindeiro día 15 estarán presentando para os seus veciños na súa localidade de orixe, Cedeira, no auditorio municipal cun concerto de balde.

Falece Toñito Pedreira o cantante e fundador do grupo Riff-Raff

Xénero: Rock | 8 / 5 / 2019

Hoxe pola mañá falecía no seu domicilio do barrio ferrolán de Canido o vocalista e fundador do grupo Riff-Raff, Toñito Pedreira Santiago. A banda comunicaba a través das redes sociais a triste nova a media mañá e algúns medios de radio locais, como a emisora da cadea COPE xa se facían eco. A banda ferrolá formada en 1997 acadou un oco na última década tanto en escenarios de salas como de festivais ofrecendo a modalidade de "banda tributo" sobre o repertorio dos australianos AC/DC. A honestidade e da súa proposta e o seu bo facer fixeron dela un referente na escena de "tributos" que transcendeu os límites de Galicia e compartiron cartel con grandes grupos como Whitesnake, para os que actuaron como abreconcertos na Coruña. A noticia causou un fondo pesar tanto no seu entorno máis próximo como entre o resto da escena musical coa que ten compartido escenarios. A repentina morte de Pedreira causou ademais unha gran sorpresa toda vez que a banda tiña previsto un concerto este venres no Forum Cñelticum da Coruña e recentemente confirmara a súa participación no solidario Festival de la Luz de Boimorto onde xa eran uns fixos no cartel.

Nace na Coruña o festival REC Fest de rock

Xénero: Rock | 11 / 4 / 2019

Rock en Coruña REC Fest é un novo encontro musical na cidade herculina. Un festival que xurde aspirando a converterse en referencia a nivel estatal para os amantes da música de guitarras na súa versión máis enerxética. A primeira edición do evento xa ten data, hora e cartel, terá lugar o sábado 23 de novembro de 2019, a partires das 19.00 horas, no Coliseum d’A Coruña. Seis horas de sons incendiarios e música combativa. Co propósito de ser ecléctico dentro do xénero do rock, no cartel do REC Fest teñen cabida sons coma o Punk, o Ska, o rock clásico, o Metal, o Hardcore, os ritmos urbanos, a fusión, etc. Na cita non faltan figuras de alcance nacional e internacional e bandas con acento galego. No cartel da súa primera edición dánse cita Ska-P, Dakidarría, La Regadera, Bastards On Parade, Machete en Boca e Ezetaerre. As entradas do REC Fest estarán dispoñibles a partires do vindeiro luns 15 de abril a través das plataformas online Ticketea e Ataquilla e, físicamente, no Quiosco da Praza de Ourense. O REC Fest (Rock En Coruña) é un festival organizado pola promotora de eventos Galicia Vella, coa colaboración do Concello de A Coruña.

ISIUS presenta o seu disco de debut en Vigo

Xénero: Rock | 11 / 4 / 2019

A sala La Fábrica de Chocolate de Vigo acollerá mañá venres 12 a presentación en concerto do álbum debut de ISIUS, Songs from Everywhere (Ernie Records, 2019). Tras dous temas de adianto (Moving On e The Hollow Side) saía o pasado 1 de marzo en plataformas dixitais o álbum completo con sete temas, todos eles cantados en inglés e compostos por José Viqueira (ex- Free Serena) a metade do proxecto ISIUS xunto a Nuria Moreu. Para defender o traballo en directo contan con Eduardo Romero (baixo), Carlos Gil (guitarra) e Alberto Iglesias (batería). Os temas de ISIUS parten das vivencias da parella e son un retrato sonoro do seu devir vital, unha crónica de varios anos e experiencias compartidas. Para iso a banda usa un repertorio de composicións propias que nos sitúa nos ecos do folk-rock americano, a discográfica apunta referencias como Death Cab for Cutie ou Nada Surf e serían de engadir outras como Nick Mulvey, The Oh Hellos e, xa máis cerca, Pajaro Sunrise. O "mapa sonoro" como crónica das vivencias da parella preséntase á prensa xa delimitado e sinaladas as fases: o paso da parella por Madrid (The Hollow Side, GWG, Chasing Time), Holanda (Moving On, De Pijp), o regreso a Galicia e nacemiento da súa filla (Ana's Lullaby). A gravación e produción do disco levouse a cabo no estudio do produtor Paco Loco en Cádiz coa batería de Rafa Camisón e a participación de numerosos músicos que pasaron pola casa durante a gravación. Despois desta presentación a banda estará o vindeiro día 18 actuando de abreconcertos para os escoceses Teenage Fanclub na Sala Capitol de Santiago de Compostela.