CORREO
RSS
Ti estás aquí > Inicio / Xéneros / Folk
Música Folk
Dorothé Schubarth leva o premio Andaina Senlleira de La Opinión
Xénero: | 14 / 2 / 2014
O traballo da musicóloga suíza Dorothé Schubarth na elaboración do Cancioneiro popular galego acaba de ser recoñecido co VII Premio Andaina Senlleira. Esta galardón que recoñece toda unha traxectoria de traballo a prol da nosa música está organizado polo xornal La Opinión e entrégase en paralelo aos Premios Opinión de Música Folk. O xornal adianta hoxe que a gala da XIII edición destes galardóns celebrarase o vindeiro 30 de maio no Teatro Rosalía da Coruña. Pablo Devigo, Saiva Nova, PeldeNoz e Anxo Pintos con Serxo Ces serán as acutacións que acompañarán o evento.
Berrogüetto sepárase
Xénero: | 4 / 2 / 2014
O grupo que é considerado de xeito unánime como un referente do noso folk a nivel internacional, Berrogüetto, disólvese. Así o anunciaron os seus compoñentes nunha mesaxe no Facebook da banda no cal non apuntan os motivos do abandono da súa actividade musical. Segundo sinalan na mensaxe, Isaac Palacín, Anxo Pintos, Quico Comesaña, Quim Farinha, Santi Cribeiro, Guillerme Fernández, Xabier Díaz despídense "cun sorriso, satisfeitos polo traballo realizado e polos obxectivos acadados". Foron 18 anos de carreira, unha candidatura ao Grammy Latino, cinco discos e un libro disco que agora rematan "conscientes e orgullosos do compromiso mantido sempre coa música e a cultura do país, guiándonos únicamente polo noso afán creativo e o noso propio e inconformista universo musical". A agradecer o apoio de seguidores e amigos, o grupo anuncia que anunciará en vindeiras datas unha xira de despedida polas principais vilas e cidades do país. Boa parte dos membros do grupo participan desde hai anos en proxectos musicais paralelos.
Milladoiro encabezará o cartel do XXX Festival de Ortigueira
Xénero: | 24 / 1 / 2014
O Festival Internacional do Mundo Celta de Ortigueira quere iniciar unha nova etapa a coincidir coa súa trixésima edición. Segundo anunciou onte en FITUR o alcalde da vila, Rafael Girón, Milladoiro voltará ao evento este ano como un dos pratos fortes do cartal. Ademais, o festival muda a súas datas e celebrarase entre o 17 e o 20 de xullo con vistas a se adaptar ao calendario universitario. Sen concretar máis novidades, o alcalde sinalou que o evento manterá a gratuidade, o "espírito libertario" e a calidade musical que o caracterizan.
Budiño e A Banda das Crechas visitan o Celtic Connections
Xénero: | 23 / 1 / 2014
Galicia conta un ano máis con representación no festival de música Celtic Connections de Glasgow. Budiño acode a este encontro para presentar o seu último traballo Sotaque con dous concertos os días 23 e 25 deste mes. Precisamente a revista World Music Central seleccionou o disco do gaiteiro como un dos dez mellores do mundo. Canda a el, a Banda das Crechas actúa no evento o vindeiro día 31.
Carlos Núñez repasa o legado celta no seu novo disco
Xénero: | 22 / 1 / 2014
Un repaso pola música dos países celtas nun duplo CD. Esta é a proposta que fai Carlos Núñez en Inter-Celtic, o novo disco que acaba de lanzar e que presentará cunha xira por trinta cidades de Estados Unidos entre febreiro e marzo. O traballo conta con colaboracións de músicos como The Chieftains, Altan, Alan Stivell ou Ry Cooder, e achega dezaseis temas entre pezas galegas (Muñeira de Chantada), bretoas Tro Breizh ou irlandesas.
Nelson Quinteiro debuta con Orquesta Gharbo!
Xénero: | 20 / 1 / 2014
A partir do seu traballo no espectáculo Gharbo! e noutros proxectos musicais, Nelson Quinteiro lanza o seu primeiro disco. Orquesta Gharbo! chega da man de Inquedanzas sonoras con nove temas nos que se atopa unha mestura de "tangos, muñeiras e pasodobles con alalás e con jotas", segundo explica a discográfica, sen esquecer toques pop e mesmo bravú. Reinterpretacións coloridas da tradición que contan con colaboracións a cargo de Pulpiño Viascón, Silvia Penide, Diego Ameixeiras, Alex Lorenzo e o coro de homes "Os estalotes". A presentación oficial deste traballo será no Teatro Colón da Coruña o vindeiro 7 de febreiro. O álbum, que se financiou parcialmente mediante unha campaña de crowdfunding foi gravado nos estudios da Fundación Autor SGAE de Santiago de Compostela.
A Orquestra Sondeseu estrea as súas Danzas brancas
Xénero: | 16 / 12 / 2013
O Centro Cultural Novacaixagalicia de Vigo acolle o vindeiro mércores 18 de decembro a estrea de Danzas Brancas. A Orquestra Folk Sondeseu protagoniza co seu cuarto traballo o Concerto de Nadal da Universidade de Vigo, nun concerto que contará coa presenza de Rushad Eggerson, Kepa Junquera e a ACD O Fiadeiro. O disco, que ve agora a luz da man de Fol Música, reinterpreta o patrimonio das danzas gremiais galega da man desta formación de corenta instrumentistas con temas propios de Anxo Pintos, Xaquín Xesteira, Xosé Liz ou Rodrigo Romani.
Fin de semana de tradición en Vigo
Xénero: | 26 / 11 / 2013
O Teatro-Cine Salesianos acolle o vindeiro 30 de novembro a partir das 19 horas a primeira edición de DeRaíz. A asociación Traspés organiza a primeira Mostra de Música e Baile Tradicional. Na mesma os seus grupos de baile, pandereteiras, pandereteiros e charanga farán un percorrido polo patrmionio musical de toda a xeografía galega e amosarán o traballo de recollida que fai o colectivo. En paralelo, o Centro Social NovaCaixaGalicia acolle a partir das 19 horas a VI Homenaxe ao Gaiteiro. Abóbriga e o Grupo Etnográfico A Buxaina, que organiza o evento, actuarán nesta cita.
A asociación Retrousos escolmará 15 anos de recollida nun disco
Xénero: | 25 / 11 / 2013
A 24 días de fechar o prazo, a asociación Retrousos de Cela (Bueu) ten xa 2.556 euros fronte aos 1.600 que solicitaba na plataforma de crowdfunding Verkami. O colectivo cumprirá así o seu obxectivo, editar Elelelos, un traballo discográfico que escolmará 15 anos de traballos de recollida de tradición oral no concello. O álbum, que sairá o vindeiro mes de febreiro e para o que aínda se poden achegar fondos, inclúe as gravacións orixinais con fichas dos informantes sobre estes temas canda a 12 temas deste patrimonio interpretados por membros da propia asociación.
Josep Martí: “Hai cen anos a música tradicional era a única opción. Hoxe é unha parcela entre outras moitas”
Xénero: | 21 / 11 / 2013
O Consello da Cultura Galega acolle esta tarde a xornada A música tradicional hoxe: perspectivas e retos. Entre os relatores, un convidado de excepción. Josep Matí, antropólogo catalán especializado en etnomusicoloxía e catedrático do Departamento de Arqueoloxía e Antropoloxía do CSIC abordará a cuestión A música tradicional ante o reto da globalización. Na súa intervención, o investigador achega a súa perspectiva sobre unha situación na que ve inevitable a evolución destes sons.
REPORTAXE
Aprender das cantigas
Data.Antón Castro aproveita a nosa música tradicional para ensinar solfexo aos seus alumnos
