CORREO
RSS
Ti estás aquí > Inicio / Xéneros / Folk
Música Folk
A danza das moscas arrinca con forza
Xénero: | 18 / 11 / 2013
Lanzouse o pasado 12 de novembro e o pasado día 15 era declarado como un dos tres finalistas dos Premios da Música de Galicia na categoría de folk. A danza das moscas, o disco debut de Caxade en solitario arrinca con forza. O volume, do que xa se adiantaran varios singles como Gente pota ou Sr. Xorda achega un total de once temas nos que se funde a música de raíz con sons indies, explorando as sonoridades dos metais e unha grande importancia do acordeón. O disco gravouse nos estudios A Ponte de Compostela e sae editado da man da plataforma Discos da Máquina a un prezo de dez euros.
Xerais lanza A miña primeira Rosalía
Xénero: | 7 / 11 / 2013
O pasado 1 de novembro presentábase no Teatro Principal de Compostela A miña primeira Rosalía. O disco editado por Xerais, segue a senda de O meu primeiro Celso Emilio e, como aquel está coordinado por Xosé e Xiana Lastra. Interpretacións de Mini, Mero, Xiana Lastra e María Manuela danlle son aos versos da poeta de padrón en doce temas como No ceo, azul crarísimo, O forno está sin pan, Negra sombra e A xusticia pola man.
O CGAC acollerá as II xornadas arredor da Música Tradicional
Xénero: | 15 / 10 / 2013
Logo do éxito da pasada edición, a Asociación de Gaiteiros Galegos recunca no Centro Galego de Arte Contemporánea coas II xornadas arredor da Música Tradicional. O encontro, que se celebrará os días 16 e 17 de novembro centrará boa parte da súa atención na música de gaita. Así, a presenza deste instrumento na música barroca ou de cámara, as súas versións en León ou Portugal ou a evolución das formacións de gaiteiros en Galicia protagonizarán diferentes relatorios.
Tiruleque di Mu!!
Xénero: | 7 / 10 / 2013
Pezas da música popular para bailar, que incorporan metais ou baixo e non rexeitan toques de swing ou de ritmos cubanos. Mu!!,o segundo traballo de Tiruleque afianza a liña de folk festeiro que o grupo apuntaba no seu primeiro disco. En total son once temas gravados nos estudios Bonham da Coruña os que interpretan os sete membros da formación, que sofreu mudanzas desde o seu primeiro traballo. O grupo presentou o álbum o pasado 27 de setembro no Club Do Mar San Amaro da Cidade Herculina.
TVG prescinde de Alalá! para a nova temporada
Xénero: | 3 / 9 / 2013
O programa de música tradicional Alalá! presentado por Pilar García Rego despedirase este vindeiro domingo dos espectadores da Televisión de Galicia coa súa entrega número 210. Segundo veñen de confirmar a través do seu perfil de Facebook o popular programa deixa de existir cun capítulo dedicado á Asociación de Gaiteiros Galegos. O programa Alalá! foi recoñecido no ano 2008 co premio Gaita de Ouro “Constantino Bellón” outrogado polo Ateneo de Ferrol, ademais de outros importantes premios conseguidos anteriormente como o galardón ao mellor programa de Tradición musical outorgado pola Academia das Ciencias e das Artes de Televisión en 2007 e o Premio Galicia Comunicación da Xunta no mesmo ano. O cambio de horario de emisión do programa en 2010, entre outras cousas, motivou daquela un comunicado da Asociación de Gaiteiros Tradicionais denunciando a diminución de tempos e presenza para a música tradicional nos medios de comunicación públicos, recalamación que fixeron chegar aos grupos parlamentarios.
Pablo Devigo recunca no premio Constantino Bellón
Xénero: | 2 / 9 / 2013
Está a amosar ser un dos gaiteiros máis importantes do país. Pablo de Vigo, de Castro Caldelas, impúxose por cuarta ocasión no Premio Constantino Bellón de gaita, dotado con 3.000 euros. Canda a el, Raquel García, desde Valencia, acadou o premio Gaiteiro de Soutelo, dirixido á Galicia Exterior. O lucense Daniel Fernández López e o vasco Daniel Lumbreras obtiveron cadanseu accésit na gala que se celebrou o pasado sábado no Teatro Jofre de Ferrol Canda a estes galardóns, o Ateneo Ferrolán fallou tamén o premio para composicións para a gaita, que foi para a peza Fantasía concertante para gaita e banda de Daniel Romar.
Pablo Carpinteiro recibe a Gaita de Ouro do Constantino Bellón
Xénero: | 28 / 8 / 2013
O Constantino Bellón é o certame máis importante para a defensa e difusión da gaita galega. Alén do concurso de composición, anualmente concede a Gaita de Ouro para recoñecer o traballo neste campo. Este ano, o gañador desta mención honorífica e Pablo Carpinteiro (Lugo, 1969) polo “labor desenvolvido como gaiteiro, investigador e artesán”. O premio de composición fallarase o sábado tras unha gala que se organiza no teatro Jofre, entidade organizadora deste certame.
Bicos, abrasos e apalpasos é o debut de Ludovaina
Xénero: | 9 / 8 / 2013
Logo de dez anos de actuacións e ensaios, o grupo de Cangas Ludovaina acaba de presentar o seu primeiro disco. Bicos, abrasos e apalpasos presenta trece temas de composición propia pero que interpretados polo cuarteto ao xeito máis tradicional. Segundo sinala a banda "queremos chamar a atención de ouvintes doutros estilos musicales e dar un aire novo á música tradicional galega". Os seus animados temas poden escoitarse este verán nos diferentes festivais polos que están a xirar.
Unha nutrida delegación galega participa no Festival de Lorient
Xénero: | 5 / 8 / 2013
Anxo Lorenzo, Edelmiro Fernández, Pablo Seoane Méndez, Taghaitai, Linho do Cuco, Asociación Cultural Traspés e a Banda de Gaitas de Forcarei marcan o desembarco galego do Festival Intercéltico de Lorient. Canda a eles, Tremuiños, Trécolas, Tromentelos ou Os D`abaixo actuarán no posto de 200 metros cadrados que leva a Xunta ao evento a través de Turismo de Galicia. Ismael García e Xesús Rodríguez participarán no Trofeo MacCrimmon pola súa banda, mentre Rodrigo Romaní caeu da delegación galega por mor dun accidente doméstico. O evento, que comezou o pasado venres día 2, desenvólvese na cidade bretoa ata o vindeiro 11 de agosto.
O Festival de Pardiñas homenaxea a Díaz Castro
Xénero: | 1 / 8 / 2013
Os Minhotos, Susana Seivane, Coanhadeira ou Dios ke te Crew son algúns dos grupo que compoñen o cartel da 34 edición do Festival de Pardiñas, que arrinca mañá nesta localidade de Guitiriz. O clásico encontro adquire esta xeira un especial significado pola dedicatoria a Xosé María Díaz Castro co Día das Letras Galegas de 2014. Así, a asociación Xermolos, que organiza a cita, lembrará a figura deste poeta, ademais de artellar unha homenaxe a Xosé Seivane, pregoeiro da primeira mostra de artesanía que se celebrou no seo o Festival. Como novidade, o vindeiro sábado celebrarase por vez primeira en Guitiriz un encontro de Cantos de Taberna, que se suma a propostas habituais como a mostra de instrumentos de música tradicional, a de artesanía ou a carreira popular.
REPORTAXE
Aprender das cantigas
Data.Antón Castro aproveita a nosa música tradicional para ensinar solfexo aos seus alumnos
