CORREO
RSS
Ti estás aquí > Inicio / Xéneros / Folk
Música Folk
O Festival do Mundo Celta de Ortigueira presenta programa
Xénero: | 19 / 5 / 2017
O Concello de Ortigueira ven de presentar a programación da que será a 33ª edición do Festival do Mundo Celta. Entre o 13 e o 16 de xullo case vinte agrupacións folk de diferentes partes do mundo pasarán polo Escenario Estrella Galicia entre as 21 horas e a madrugada. A fase final do Proxecto Runas abrirá o festival coas actuacións das tres bandas seleccionadas para esta competición na que se decidirá cal delas volverá para a seguinte edición do evento. As formacións finalistas son: os xaponeses Koji Koji Moheji, os eslovenos Noreia e o irlandés Gabriel G. Diges. Un deles gañará un posto no cartaz do Festival de Ortigueira 2018 e un premio en metálico de 3.000€. Entre as novas liñas do festival destaca que as actuacións da tarde do domingo serán exclusivamente a cargo de formacións galegas, neste caso Gamelas e Anduriñas; Os Carecos e Amigos; Treixadura e Cantigas e Agarimos e A Roda. Pero a presenza musical galega non estará limitada a esta tarde xa que no resto do programa tamén están a banda Crebinsky,a Escola de Gaitas de Ortigueira, o gaiteiro Óscar Ibáñez &Tribo e os galego-iralnadeses Böj. Compartíndo as táboas con eles o cartel deste ano ofrece as actuacións de outros músicos de primeiro nivel internacional no escenario Estrella Galicia coma Usher’s Island; Harmonica Creams; Sckerryvore; Scoot Wood Ban; The California and District Pipe Band; Michael McGoldrick Band e os asturianos Tejedor. Así mesmo, presentáronse o concurso internacional de cuartetos tradicionais e os obradoiros de baile tradicional.
Xulio Lorenzo presenta o seu primeiro traballo en solitario 'Cantos da ialma'
Xénero: | 15 / 5 / 2017
O gaiteiro e compositor Xulio Lorenzo presentará en concerto o vindeiro sábado en Vigo o seu primeiro disco en solitario Cantos da ialma. Doce temas de composición propia xurdidos en distintos momentos da súa extensa traxectoria tanto no país como nas súas experiencias internacionais desde 2011 e nos que Lorenzo lúcese cos súas composicións na gaita, na frauta ou no whistle. Foi ao rematar 2015, despois de dúas xiras por Brasil cona agrupación Gaiteiros de Lume (coa que participa na gravación do segundo álbum) e polo sur de Italia da man do grupo Napolitano Brigan, cando Xulio Lorenzo, natural de Mos, decide comezar a deseñar o seu primeiro traballo discográfico que este mes presenta en concerto aínda que xa leva un tempo dispoñible en tendas. Para a elaboración deste disco Lorenzo rodeouse dunha banda formada por Paco Dicenta (baixo eléctrico), Ioana Pérez (violín), Diego Bea (guitarra), Roberto Comesaña (acordeón), David Outumuro (percusións)e Alberto Vilas (piano). Pero ademais no álbum conta con importantes colaboracións nalgúns temas como Bieito Romero (Luar na Lubre), Marcos Campos ( Crema de Gaita, Riobó), Pedro Fariñas (Trim, Transilvanians), Noelia Alvarez Rodriguez-Osorio ( Two in the Mirror, Aretha Franklin Tribute Band), Marisé Balado (Arume, Orquesta folk Sondeseu), Francesco Di Cristofaro (Brigan Italia), Alberto Vilas ( Tangata, Alberto Vilas Quartet) e a Banda de gaitas Xarabal. O vindeiro sábado día 20 Xulio Lorenzo e compañía estará presentando en directo Cantos de ialma Teatro Afundación Vigo ás 21 horas.
Rafael Quintía e João Bieites presentan A Pedra do Fundamento
Xénero: | 7 / 4 / 2017
Unha escolma de dez anos de traballos musicais compoñen A Pedra do Fundamento, o álbum que acaban de presentar o antropólogo Rafa Quintía e o músico João Bieites. En total son vinte e nove temas inspirados na mitoloxía galega nos que se combinan pezas compostas para documentais con traballos inéditos. O proxecto, audoeditado, mestura sons folk e tradicionais e contou con colaboracións como as de Francisco Sutil, Antonio Vázquez, Alexandre Leiro, Xosé Feijoo, Rosalía Rodríguez ou César Martínez. Guitarras e outros instrumentos de corda mestúranse con gaitas, teclados e diferentes percusións no álbum, cuxos temas fan referencias a lugares como A cruz do Seixo ou A fonte da prata e a elementos e lendas como Labirintos, O Alicornio ou O demo asubiador, que fan parte da nosa cultura tradicional.
Muxicas leva o X premio Andaina Senlleira
Xénero: | 27 / 3 / 2017
A piques de cumprir catro décadas de traballo, a banda viguesa Muxicas acaba de ver recoñecido o seu traballo co premio Andaina Senlleira. O galardón honorífico dos Premios Opinión de Música Folk valoran a traxectoria deste grupo, que ten sete discos ás costas nos que foron explorando diferentes camiños dentro da tradición. Entre os títulos que marcaron este percurso, destacan de xeito especial o álbum duplo Muxicas e Naturalmente, de 1998. O galardón entregarase o vindeiro 12 de maio na Gala dos Premios Opinión, na Coruña, un evento que contará coa actuación de TRIM, do dúo Anxo Lorenzo e Germán Díaz e mais das cantareiras de Algarada.
Oscar Ibáñez presenta un disco de homenaxe a Ricardo Portela o Gaiteiro de Viascón
Xénero: | 23 / 3 / 2017
Co gallo dos 25 anos do pasamento do gaiteiro Ricardo Portela (Viascón, 1920-Pontevedra-1992) Oscar Ibáñez presenta un novo disco baixo o título Aires de Pontevedra. Homenaxe a Ricardo Portela, 25 Anos Pasamento no que homenaxea ao Gaiteiro de Viascón cunha selección do seu repertorio máis característico interpretado coa súa propia gaita de dixitación pechada. A efeméride incluirá ademais diversos actos este venres nos concellos de Cerdedo-Cotobade, cunha ofrenda floral ante o busto dedicado ao músico, e en Pontevedra co descubrimento dunha placa na rúa Laranxo e unha posterior gala musical no Teatro Principal. No disco colaboran na percusión destacados artistas que gravaron ou tocaron con Ricardo Portela na década dos 80 fundamentalmente como Xosé V. Ferreirós (Milladoiro), Chuco Estevez Gonzalez (E-Trad), Gonzalo Caride (artesán-músico), Wenceslao Cabezas "Polo" (Escola Municipal de Danza do Concello de Vigo), Antón López "Toniño" (Treixadura), Manuel Solla (Os Cruceiros), Xosé Carlos V. Bouza e Jesus Corral Fernandez (Xarabal), Miguel Souto (O Fiadeiro), Alberto Costas (PelePau), Manuel Alonso e Xosé María Gutiérrez (Noitarega). O álbum foi gravado, mesturado e masterizado en Chispún! Estudio (Vigo) por Rubén Troitiño, edita e distribúe Inquedanzas Sonoras baixo licenza de Oscar Ibáñez. Non é a primeira vez que Ibáñez rende tributo a este mestre da gaita, xa en 2008 impulsou unha homenaxe en forma de dobre CD editado por Edicións do Cumio baixo o título Foliada nas Rías Baixas. Homenaxe a Ricardo Portela, o Mestre.
Talabarte fai pleno en todas as candidaturas aos Premios Opinión
Xénero: | 10 / 3 / 2017
A XVIª edición dos Premios Opinión da Música de Raíz, vencellados ao xornal La Opinión de Coruña, ven de desvelar as candidaturas finalistas que optarán a galardón. Sete discos lograron obter un lugar entre algunha das candidaturas elaboradas polo xurado, composto por oito persoas que falan sobre música de raíz en diferentes medios de comunicación. O disco Fake de Talabarte conseguiu ser o único presente nas tres categorías dos premios por mellor álbum, mellor tema orixinal e lograr Pedro Pascual os votos necesarios para ser finalista na categoría de mellor artista. Ademais dalgúns nomes que xa concorreron en edicións anteriores cos seus proxectos musicais outros artistas, mesmo con anos de carreira logran por vez primeira entrar nas candidaturas, é o caso de Rosa Cedrón e Xoán Curiel. Caxade consegue dous nomeamentos entre a lista de finalistas, pola canción Nábia e como artista. Nesta última categoría é a terceira vez que aparece na historia dos galardóns, dos que xa resultou gañador na décimo terceira edición.
Milesios continúa Indoevindo no seu novo traballo
Xénero: | 22 / 2 / 2017
Catro anos despois daquel Alén mar, Milesios publica o seu segundo traballo discográfico. Indoevindo continúa a senda de mestura entre a música galega e irlandesa en once temas que beben das dúas tradicións e que integran sons tradicionais con composicións propias. O septeto formado por Maite Veiga, Marta Portela, Manuel María Veiga, Manuel do Moucheiro, Noelia Fersán, Paula Veiga e Senén Montero integra percusións, baixos, guitarra, batería, violíns gaitas, bouzouki, mandolina, acordeóns, bodhran e mesmo gadañas nuns arranxos complexos e coidados. Arturo Vaquero foi o responsable da gravación do álbum nos estudios Abrigueiro. O proxecto, autoeditado, ve a luz en formato libro-CD, nun volume con 52 páxinas e fotos orixinais de Daniel Díaz Trigo e que inclúe ademais unha paisaxe sonora e dúas músicas extras. A Casa do Saber en Lugo acolle este venres 24 de febreiro o concerto de presentacion.
Pesdelán pon a bailar o Entroido
Xénero: | 6 / 2 / 2017
A agrupación Pesdelán presenta estes días o seu segundo traballo editado, o DVD Entroidanzas . Mantendo o seu obxecto de espectáculo e proxecto didáctico Pesdelán pretende con este traballo achegar os xeitos en que distintas zonas do mundo celebran con música e danza os seus entroidos. Tras unha pesquisa global e un traballo de documentación importante a agrupación seleccionou once temas con músicas e danzas que se puidesen reproducir nos seus espectáculo e sempre cos parámetros de poder ser bailadas por xentes de todas as idades. Italia, Grecia, Colombia, Arxentina, Perú Brasil e Venezuela están representadas nesta compilación de celebracións do carnaval tradicional deses países. Do folclore galego Pesdelán seleccionou dúas pezas: a Mazurca-Valse de Meira (Moaña) e os Folións de Ourense. No DVD, xa a venda en puntos de venda físicos e a través de Internet, Pesdelán amosa cada danza explicando didacticamente o xeito no que se leva a cabo, contando co aparticipación de máis de 50 persoas que tomaron parte nestas gravacións. Para aqueles interesados só na parte musical o grupo tamén pon á venda as pistas en MP3 do DVD a través do correo electrónico. Con este traballo Pesdelán estará presente este ano no Entroido ofrecendo obradoiros e actuacións en vivo, en Lugo e Compostela inicialmente.
Luar na Lubre inicia a xira de 30 aniversario con nova vocalista
Xénero: | 31 / 1 / 2017
O concerto co que comezou da xira de trinta aniversario de Luar na Lubre, este 28 de xaneiro en Compostela, foi tamén o de despedida de Paula Rey como vocalista logo de seis anos. O conxunto que capitanea Bieiro Romero acaba de anunciar a remuda do cantante. A coruñesa Belém Tajes será a quinta voz no conxunto folk, e estrearase de xeito oficial no concerto que a banda ten previsto para este venres 3 de xaneiro en Almería. Sevilla, Granada, Madrid, Ponferrada e Porto serán as seguintes etapas dun tour que prevé recalar na Coruña a coincidir coas vindeiras festas de María Pita e en Pontevedra o vindeiro mes de xullo. Guanajuato, Miranda de Ebro, Valladolid, Barcelona, Lisboa,Barakaldo, Cáceres, Albacete, Castelló e Logroño son outras paradas xa confirmadas nesta xira. Tajes, especialista en musicoterapia, ten participado en formacións como Voodoo e Sisters in the House, e o pasado ano participou no proxecto de intercambio entre músicos en linguas minorizadas Tosta Cultural Cargo.
Primordiais dá a coñecer o seu primeiro álbum
Xénero: | 26 / 1 / 2017
A promoción de Droguería Moderna, o seu primeiro álbum, está a mobilizar o dúo Primordiais. Acaban de subir á rede o vídeo do seu single Por ti moreno e preparan concerto para o vindeiro 18 de febreiro no marco da Rede de Músicas Soltas de Redondela. Luis Martíns e Marcelo DoBode combinan arpa, voz e percusión nunha orixinal reinterpretación da tradición do país con aires improvisados, e toques jazz que denominan "músicas de OrTa" e "musicas en crecemento". O álbum ve a luz da man de Mada Producións
novidades discográficas
Alvela
FAIA
Feira
De Ninghures
Tradimensional
Ailá
Vinde todas
Carmela
BâNZô
Os do Fondo da Barra
REPORTAXE
Aprender das cantigas
Data.Antón Castro aproveita a nosa música tradicional para ensinar solfexo aos seus alumnos
