CORREO
RSS
Ti estás aquí > Inicio / Xéneros / Rock
Música Rock
Homenaxe en clave de rock
Xénero: | 21 / 1 / 2013
Se gravar un disco de homenaxe xa supón un desafío a nivel de coordinación e traballo, conseguir facelo no máis absoluto secreto, cuns homenaxeados aínda en activo ten máis mérito. Pois é o que acaban de conseguir dezaoito grupos galegos con Vai polos padriños, un disco que quere celebrar os vinte e cinco anos en activo de Zënzar. A iniciativa súmase a unha lista en crecemento de discos tributo e amosa que a nosa música olla para referentes propios.
Holywater lanza Wasteland
Xénero: | 17 / 1 / 2013
Dous anos depois do seu anterior traballo, Holywater retornan ao mercado discográfico con Wasteland, o seu quinto disco. Once temas orientados ao rock máis clásico, achegándose ao son de Neil Young e Crazy Horse. Un traballo gravado en Ultramarinos Costa Brava por Santi García, que tamén actúa como coprodutor, e que sae á luz da man de Ernie Records. O álbum está dispoñible en tendas, no web de Ernie Records e mais en plataformas dixitais como Spotify. Os interesados en coñecer o traballo en directo teñen unha opción o vindeiro 23 de xaneiro na Sala C de Santiago de Compostela.
Esquíos presenta un disco ao vivo
Xénero: | 11 / 1 / 2013
O primeiro disco de Esquíos ao vivo está xa dispoñible para descarga na rede. Esquíos ao vivo!(Capitol) recolle o concerto que o grupo deu o 19 de maio de 2010 nesta sala compostelá, para presentar Galician carraxe on garaxe. A obra recolle 22 temas propios e mais unha versión de Radio Océano, e foi gravada pola Radio Galega e emitido no programa Planeta Furancho. O grupo pon agora na rede o traballo íntegro para a súa descarga de balde como un agasallo de reis.
Patricia Moon lanza Oxytocin
Xénero: | 22 / 11 / 2012
Coa definición de rock lunático, a viguesa Patricia Moon lanza Oxytocin, o seu segundo traballo discográfico. Da man de Dulcimer Songs e Emi Music, achega dez temas nos que se achega ao rock americano e aposta por un son máis eléctrico sen abandonar o violín que a caracteriza. O volume cantado integramente en inglés, achega tamén unhas letras máis íntimas, e preséntase como o resultado da experiencia da cantante en Estados Unidos.
Telephones Rouges lanzan o seu primeiro disco
Xénero: | 16 / 10 / 2012
Xa se pode escoitar íntegro Disenso o primeiro disco da banda Telephones Rouges, en Bandcamp. Once temas de rock escuro con fortes toques de punk que manteñen o estilo cheo de enerxía que xa deron a coñecer nos seus directos e mais en colectáneas como Galician Bizarre. O disco sairá a venda en formato vinilo o vindeiro 5 de novembro da man de Mama Vynila Records e Matapadre, e estará dispoñible para libre descarga a partir da mesma data. O grupo gravou este traballo nos estudios A Ponte, e mesturouno en Círculo Polar Estudio.
Medomedá debuta con Mellorando pa peor
Xénero: | 19 / 9 / 2012
Logo de catro anos de actividade, Medomedá lanza o seu primeiro disco, co título de Mellorando pa peor. O CD achega doce cancións e mais unha introdución, incluíndo temas como Quero ver como te ris, que se presentara ao certame Apologhit! canda a outros coñecidos dos seus directos como Vas de guai e non chegas a chachi ou Un polbo botábao. O grupo mantén o seu estilo habitual, con fortes influencias do rock de Heredeiros da Crus. Ademais, Medomedá publicou no web Soundcloud extractos dos seus temas para o seu uso como tons de chamada de teléfonos. O disco foi gravado no estudio Pousada Son de Ames, e sae autoeditado baixo licenza Creative Commons.
Manic Street Preachers e The Hives encabezan o cartel de Music Way
Xénero: | 31 / 8 / 2012
Toma o relevo do Rock in Way e pretende ser unha cita relevante do rock en Galicia. Music Way ten os coñecidos Manic Street Preachers e The Hives como principais reclamos dun cartel que inclúe tamén a bandas como The Courteeners, Layabouts ou os galegos Heredeiros da Crus, Holywater, Maryland, Munich e The Cornelius. O programa, que xa ten o seu abono á venda, tamén se reserva algunha sorpresa internacional. Ademais, destaca unha sesión especial pensada para nenos. Brodas, Alondra Bentley, Mamá cabra e diferentes obradoiros (de dj, contrucción de instrumentos reciclados, customización de camisetas, taller de fotografía musical…) para que os máis pequenos se inicien neste xénero musical. A cita será o 28 e 29 de setembro, no recinto feiral de Amio en Santiago.
Aberta a convocatoria para participar na segunda edición de Woodstock a nuestro gustok en Teo
Xénero: | 7 / 8 / 2012
A macro-jam session , ou “Xan sesión” como eles din, ao aire libre Woodstock a nuestro gustok volverá celebrarse un ano máis no Concello de Teo e xa está aberto o prazo dos músicos para inscribirse. O evento que colle o nome dese mítico concerto de 1969 consiste nun concerto “improvisado” pero organizado, no que cada músico ofrécese para interpretar algunhas das cancións elixidas pola organización co seu instrumento ou na voz e é a propia organización a que vai xuntándoos en formacións diversas. Trinta e catro temas saídos directamente das listas anglosaxoas do rock e rhythm & blues dos anos sesenta e setenta serán o repertorio para este encontro que o pasado ano celebrouse na parroquia de Francos en Teo, onde previsiblemente volverán este vindeiro 22 de setembro.
Chega ás tendas o DVD ao vivo de Heredeiros da Crus
Xénero: | 12 / 7 / 2012
Os fans de Heredeiros da Crus xa poden gozar na casa de vinte e cinco temas do concerto que reuniu o grupo na discoteca LP-45 de Ordes o pasado 3 de marzo. O DVD Heredeiros da Crus - 20 aniversario, que recolle boa parte desta actuación, está xa nas tendas da man de Airapro Producións, e inclúe ademais os vídeos promocionais deste evento. O álbum, que supón o noveno lanzamento do grupo, pode adquirirse por 15 euros nas principais librarías, discográficas e centros comerciais de Galicia.
Jabon Blue volta con Niña de las manos frías
Xénero: | 3 / 7 / 2012
O cuarto disco de Jabon Blue, Niña de las manos frías, está xa dispoñible na rede en diferentes plataformas. A banda que capitanea Javi Manero lanza álbum a coincidir co retorno do seu líder a Heredeiros da Crus. Dez temas en castelán nos que o son do grupo amosa tons máis pop do que en traballos anteriores e que chega de man da discográfica Indies Traicioneros. A presentación oficial será o vindeiro seis de xullo na sala Plaza de Ribeira e chegará as tendas en días posteriores.
novidades discográficas
Xabral
Ruxe Ruxe
O círculo das formigas
Os John Deeres
Malkeda
Malkeda
XX
Dakidarría
Rematou o simulacro
Loita Amada
REPORTAXE
Campamento Compostela
Data.Os Concertos do Novo do Milenio atraeron a Compostela milleiros de afeccionados à música
