CORREO
RSS
Ti estás aquí > Inicio / música en galego
Música en galego
O disco Nordestin@s sitúase entre os cen máis vendidos do Estado
Xénero: | 20 / 12 / 2006 + VIDEO
Aínda que ben lonxe do éxito de Alejandro Sanz, un grupo galego conseguiu situar o seu disco entre os cen máis vendidos en todo o Estado durante o Nadal. Nordestin@s, o proxecto de Uadi galego, Ugia Pedreira e Abe Rábade entrou nesta prezada lista, segundo informan deste a discográfica Falcatruada. Desde a súa saída o pasado once de decembro e en vinte días, o proxecto conseguiu vender xa máis de dúas mil copias, unha respectable cifra a nivel galego.
Máis información en Falcatruada e en La Voz de Galicia
Compostela acolle a segunda edición da Noite de música e palabra solidaria
Xénero: | 7 / 12 / 2006
A ONG Implicadas no Desenvolvemento celebra por segundo ano "Implícate! Noite de música e palabra solidaria". Será o vindeiro dezaseis de decembro, as oito da tarde no compostelán Auditorio de Galicia. Deluxe, Avalon, Rosa Cedrón, María Reimóndez, Carlos blanco, Chévere, Lucía Aldao e Rosa Aneiros entre outros intervirán nun espectáculo que quere unir a expresión artística co apoio a proxectos de desenvolvemento. A gala estará presentada por Yolanda Castaño e Paco Lodeiro.
Máis información en Galicia Hoxe ; e no de Implicadas
A Universidade de Granada lembra a figura de Bal y Gay nas súas Xornadas de Cultura Galega
Xénero: | 28 / 11 / 2006
Jesús Bal y Gay (1905-1993) é un dos músicos desa xeración perdida que truncou a Guerra Civil. Foi compositor, crítico, musicólogo, mestre, impulsor de revistas e editoriais e desenvolveu, tanto no Estado como no seu exilio en México, un labor comprometido coa construcción dunha infraestructura musical inexistente. Sobre a súa figura fálase nesta edición das Xornadas de Cultura Galega que se desenvolven ata o xoves na Universidade de Granada.
Máis información sobre as xornadas no web da Universidade de Granada e sobre Bal y Gay na nosa hemeroteca
Lume presenta o seu novo disco “Folk Express”
Xénero: | 27 / 11 / 2006
Once temas conforman o novo traballo do quinteto Lume que estes días comezan a presentar en concerto. “Folk express” é o segundo disco da formación e nel aseguran non perder “o sabor orixinal” do seu concepto musical. Cinco músicos curtidos en grupos como Mutenrohi, Quempallou, Cinnamon Gum, Kerkennai ou tocando con Cristina Pato conforman esta banda, eles son: David González Outumuro na percusión; Roi Maceda, acordeonista; Carlos Campo Seijo no Violín; Diego Fortes a cargo de gaita e frauta e Juan Carlos Fernández Fasero na guitarra acústica. A súa discográfica, Zouma Records, tamén está de actualidade xa que ven de renovar o seu sitio web. A compañía ourensá pon na rede gran cantidade de información actualizada sobre os seus artistas, así como música e vídeos cos que poder coñecer máis o seu son e os seus concertos. Os temas do disco “Folk Express” de Lume poden escoitarse xa na rede no sitio do grupo ou no da discográfica.
Máis información en Zouma Records
A música tradicional galega está presente no festival Popkomm de Berlín a través dunha colección de Ouvirmos
Xénero: | 20 / 9 / 2006
Hoxe comeza en Berlín o “Popkomm” un dos festivais de música máis importantes de Europa que ofrece tres tipos de actividades: exhibición, congresos e festival. Nesta feira, á que asisten uns 15.000 visitantes, haberá un expositor “Sounds from Spain” no que haberá representación galega. A música do país que estará presente na capital alemana chega da man do selo Sarriá Ouvirmos que levará a colección A Tiracolo, na que recupera gravacións de música tradicional galega.
Máis información no web do evento (en inglés e en alemán) e no web de Ouvirmos
O coro Toxos e Froles presenta un novo disco nun mes cargado de actividade cultural
Xénero: | 19 / 9 / 2006
“Camiño do centenario” é o título do próximo disco do Coro Toxos e Froles. Un CD editado pola Deputación Provincial da Coruña(dentro do seu programa “Outra+outra”) e no que recolle pezas habituais do seu repertorio. A gravación do quinto traballo da súa traxectoria é unha máis de todas as actividades previstas para este mes e derivadas de inaugurar a súa nova sede na rúa Magdalena. A vindeira cita será o xoves, cun acto de homenaxe ao tecido asociativo da cidade que se inclúe dentro das súas xornadas culturais de outono.
Máis información en Diario de Ferrol e no web de Toxos e Froles
“In the ocean” de Pulpiño Viascón é a canción do verán
Xénero: | 11 / 9 / 2006 + VIDEO
Despois duns meses de dura pugna entre as 38 cancións presentadas no concurso “A polo ghit” organizado por Vieiros e a Radio Galega o xurado composto por Nonito Pereira, Xil Ríos, Mónica Ares e Pía de Tolomei decidiuse pola canción “In the ocean” de Pulpiño Viascón como gañadora e canción galega do verán 2006. O tema ten o retrouso en inglés pero o resto da letra está en galego como se pedía nas bases, e levará o premio da gravación do video clip que emitirá a TVG. Nas votacións do xurado as seguintes con máis votos foron Kalindra Xida, da Banda Potemkin; A ruta do colesterol, da Banda da señorita e Tomasa; Sandra Dee, de The Homens e A das festas, de Guezos. Esta última foi a gañadora da votación popular a través de Internet.
Máis información en Vieiros
A coñecida cantiga "A rianxeira" contará cun museo propio na localidade que lle dá nome
Xénero: | 4 / 9 / 2006
O Concello de Rianxo quere homenaxear a composición musical que máis publicidade lle fai. A cantiga "A rianxeira" contará en breve cun museo dedicado exclusivamente a ela. A corporación local realizaba onte este anuncio, cando van facerse sesenta anos da composición da peza por Xesús Frieiro Dourado e mais Anxo Romero Lojo. A intención é que no museo se amose a partitura orixinal da obra, canda a unhas cincuenta versións da canción e mais diferentes documentos.
Máis información en La Voz de Galicia
Rosa Aneiros, Daniel Bellón e Xerardo Neira reciben estes días varios premios
Xénero: | 1 / 9 / 2006
Setembro chega con moitos premios. Comezamos en Ferrol, onde o mozo Daniel Bellón fíxose coa déximosexta edición do premio de solistas de gaitas Constantino Bellón. Un premio dotado con 1.800 euros e que o gaiteiro gaña por terceira vez consecutiva. De Ferrol imos ao Valadouro, onde o concello fallou onte o certame de novela. O gañador, que recollerá o premio dotado con 1.000 euros o vindeiro día 7, foi o biólogo Xerardo Neira pola súa obra “Da Terra de Deus”. En Palas de Rei entrégase mañá o premio literario Monte Careón que recaeu na escritora Rosa Aneiros.
Máis información sobre o Daniel Vellón en La Voz de Galicia e o de Xerardo Neira en Galicia Hoxe
O folk volve ser o xénero máis programado en Galicia despois do baixón do 2004
Xénero: | 28 / 8 / 2006
Os datos do último anuario da SGAE, que analiza a actividade cultural do 2005, recolle a recuperación do folk no noso país. Segundo estes datos, música tradicional recupérase do baixón acontecido no 2004 (cuxos datos se recolleron no anterior anuario) e encabeza cun 19’2% a porcentaxe da música que programa no país. Séguelle o jazz cun 12.7% e, de lonxe, o pop-rock (31.5%) que é o xénero estrela no resto do Estado. Ademais, o anuario da SGAE revela outro dato máis, que o macroconcerto folk por excelencia, o Festival de Ortigueira, é o evento con maior afluencia en todo o Estado.
Máis información na edición de hoxe de La Voz de Galicia e no web da SGAE