CORREO
RSS
Ti estás aquí > Inicio / música en galego
Música en galego
A Real Academia Galega catalogará o fondo musical de Marcial del Adalid
Xénero: | 19 / 5 / 2008
Foron os descendentes do compositor Marcial del Adalid os que, en 1928, depositaron na Real Academia Galega preto dun millar das súas partituras. Este material leva desde entón sen catalogar, o único traballo feito sobre el foi un inventario a cargo de Margarita Viso, pero disto hai máis dunha década. Por este motivo, Xosé Ramón Barreiro Fernández, presidente da Real Academia Galega, acaba de afirmar que asinará un convenio coa Deputación da Coruña, que achegará 37.000 euros para analizar toda esa documentación.
Xarín volven á actualidade discográfica oito anos despois do primeiro disco
Xénero: | 15 / 5 / 2008 + AUDIO
Despois de máis de 8 anos de silencio discográfico a formación de gaiteiros das terras bravas do Incio, Xarín, presentan o seu segundo traballo discográfico “Galaguech”. Unha ducia de temas que beben da máis pura tradición musical do seu entorno conforman este disco, que axeitadamente toma o nome dunha voz usada na Pobra de Brollón para mandarlles beber ás vacas. Malia o seu marcado carácter tradicionalista nove das pezas son composicións dos membros da banda e só tres pertencen ao repertorio popular. Xarín demostran así a súa habelencia na composición creando pezas que engaden ao sabor tradicional a frescura da súa contemporaneidade. Como xa pasara no primeiro disco, o sexteto segue amosando a alma máis alegre da festa galega en todo o seu esplendor. O disco está editado por Zouma Records e foi gravado nos estudios Desfase Sound de Ourense.
Sete festivais de música galegos únense nunha marca para aumentar a súa repercusión
Xénero: | 15 / 5 / 2008
Teñen en común que son festivais musicais e úneos o interese por aumentar a súa forza e solucionar problemas conxuntamente. E desde onte que teñen a marca “Galicia Escoita”. Os sete festivais de música do país que crearon esa alianza son: “Día da Música” (Santiago, 21 de maio), FAX 08 (A Limia, 27 e 28 de xuño), Cultura Quente (Caldas de Reis, 11 e 12 de xullo), Mar de Fondo (Noia, 18 e 19 de xullo e 1 e 2 de agosto), Sonearte (Viveiro, 8 e 9 de agosto) e Reperkusión (Allariz do 19 ao 21 de setembro).
Un disco recolle unha selección do patrimonio musical da provincia de Pontevedra
Xénero: | 14 / 5 / 2008
A Deputación de Pontevedra presentou esta semana o primeiro disco dunha nova liña editorial dedicada á difusión do patrimonio sonoro do seu Servizo de Patrimonio Documental e Bibliográfico. “Pontevedra en Música” é o título do CD que, realizado en colaboración con Edicións Do Cumio, recolle una selección de diferentes agrupacións e estilos da música tradicional. Gaiteiros solistas, grupos de gaitas, bandas de gaitas, pandereiteiras, grupos de música tradicional, grupos de música folk, masas corais, bandas de música e canción galega está presentes neste CD. Nomes como os de Iván Costa, Óscar Ibáñez, Os Alegres, Xistra de Coruxo, Ardentía Pai da cana, O Fiadeiro, Crema de Gaita, Liorna, Coral Casablanca ou a Banda Artística de Merza entre outros representan á musica da provincia nas 22 pezas deste volume.
Xosé Constenla presenta o seu segundo disco con temas unidos por un sentimento de entusiasmo
Xénero: | 14 / 5 / 2008
"Olladas dun entusiasta" (Setestrelo Editora) constitúe o segundo traballo discográfico do cantautor compostelán Xosé Constenla, despois de “Quen fixo berrar ao silencio” (autoedita, 2005). Este álbum de 13 composicións propias é unha produción do propio Xosé Constenla en colaboración con Ramón Feáns (arranxos e dirección musical) para o selo de nova creación Setestrelo Editora. Gravado e misturado nos estudios PINK de O Milladoiro (Ames) conta con moitas colaboracións, entre as que destaca a presenza do cantautor madrileño Javier Bergia. Ramón Feáns (guitarras, bouzouki, baixo e programacións), Paulo Gacio(frauta traveseira e saxo soprano), Paco Nogueiras (acordeón) e Javier Rodríguez (teclados) foron os músicos que gravaron os distintos instrumentos que aparecen no traballo. O artista presentará o seu traballo este xoves no Pub Tarasca de Santiago e a distribución do disco correrá da man de Lonxa Cultural.
Os versos de Álvarez Blázquez saltan á música no DVD “Palabras liberadas”
Xénero: | 13 / 5 / 2008
O Concello do Porriño presentaba onte o proxecto "Palabras liberadas" para Xosé maría Álvarez Blázquez. A iniciativa inclúe a presentación dun DVD no que se recitan e se presentan versións musicadas de textos do autor, con estilos coma o rock, o rap ou a música coral a cargo de El Cubo, Kedro ou Uxía. Os recitados corren por conta de poetas e escritores coma Luz Pozo, Xavier Rodríguez Baixeras ou Manuel Forcadela. A iniciativa conta co apoio da Consellaría de Cultura, que presenta outras propostas no web 17demaio.org.
O Xacobeo levará a organización artística do festival de Ortigueira
Xénero: | 6 / 5 / 2008
Aínda que xa participara en outras edicións como patrocinador do Festival Internacional do Mundo Celta a S.A. de Xestión do Plan Xacobeo entrará este ano directamente na organización do evento. O conselleiro de Innovación e Industria, Fernando Blanco, asinou hoxe un convenio asumindo a contratación e produción dos espectáculos e actividades paralelas, así como o deseño da publicidade e imaxe corporativa a cargo do Xacobeo. A parte da organización artística do prestixioso festival quedará así enteiramente nas mans do Xacobeo. O alcalde de Ortigueira, Rafael José Girón, tamén asinou o convenio polo que o Concello comprométese en cuestións loxísticas, de vixilancia, limpeza, transporte, servizos sanitarios, licencias e autorizacións, etc.
Berrogüetto e Malvela exportan concertos para os dous hemisferios de América
Xénero: | 24 / 4 / 2008
As cantareiras Malvela inician este días a súa primeira xira transoceánica partindo o sábado cara Arxentina onde actuarán presentando as cancións do seu disco “Da miña xanela á túa “ (PAI, 2007). As cantoras de Sanguiñeda, con idades entre os 26 e os 82 anos, actuarán no Coñexio Santiago Apostol, no Centro de Residentes de Mos e no Teatro bambalinas de Buenos Aires. Na súa xira estarán acompañadas pola cantante Uxía. E entrando polo Norte do continente tamén inician xira internacional os Berrogüetto coa súa renovada formación. En México actuará nun dos teatros con máis solera do país: o Teatro Degollado na cidade de Guadalajara; será o 1 de maio. A continuación participará durante dous días na Feira de San Marcos, en Aguascalientes, o día 3 de maio no Teatro del Pueblo e o día 4 no Pabellón de España ubicado na citada feira. A seguinte parada neste periplo será Irlanda, país ó que acudirá para presentar o seu traballo en dúas cidades: Ennis, no Glòr Music Center o día 9 de maio, e Baltimore, dentro do Baltimore Fiddle Festival o 10 do mesmo mes.
Premio de investigación para un estudo sobre a música en Pontevedra
Xénero: | 18 / 4 / 2008
Un traballo sobre a situación da música pop e rock na provincia de Pontevedra pasada a época da “movida” foi o gañador do premio á investigación convocado pola Deputación de Pontevedra. O xurado reunido onte achou a Susana Rodríguez Barcia e Rubén Suárez Sousa merecedores do máximo galardón da convocatoria polo estudio da evolución da cultura musical na provincia no período comprendido entre 1997 e 2007. O galardón está dotado con 6.000 euros.
Lamatumbá saca o disco “Paraugas universal”
Xénero: | 18 / 4 / 2008 + IMAXES + AUDIO + VIDEO
Desde hoxe xa está nas tendas “Paraugas universal” (PAI – Música) o novo disco da multitudinaria banda Lamatumbá. Esta saída marca discográficamente a nova etapa do grupo despois dos cambios na formación e polo cambio de editora, malia que os actuais integrantes xa levan un ano subindo aos escenarios e mesmo formaron parte da embaixada musical galega na feira Popkomm de Berlín no pasado ano. Se con “Lume!” (Falcatruada, 2005) chegaron a vender máis de tres milleiros de discos con “Paraugas universal” a festeira banda agarda repetir o éxito. O disco, que inclúe un DVD con cinco pezas audiovisuais entre as que hai videoclips e outros documentos, conta con colaboracións de luxo como as de Guadi Galego, Paulo Borges ou Uxía Senlle. Lamatumbá están negociando xa futuras actuacións en escenarios tan importantes como a Expo de Zaragoza, o Festival de Ortigueira, o Parque de Castrelos de Vigo ou o San Froilán de Lugo. Quince temas propios co habitual son de Lamatumbá conforman o disco gravado e mesturado por Segundo Grandío en Casa de Tolos.