Arquivo

O dúo Unto Vello constrúe o seu repertorio a partir das recollidas de música tradicional galega realizadas polos seus integrantes, ás que aplican arranxos propios con voz e instrumentación tradicional. No seu primeiro ano de traxectoria pasaron por escenarios como a Foliada da Fonsagrada ou o Ponte Farruca, ademais de seren finalistas nos Premios Martín Códax da Música na categoría de Música Tradicional. Agora o dúo formado por Bieito Pereira e Xabi Gómez veñen de estrearse na edición discográfica coa publicación de Inmaterial, un álbum que recompila cantares tradicionais recollidos por todo o país. 

O xurado do XXXVIII Premio de Novela Manuel García Barros (Ken Keirades), reunido o 14 de abril de 2026 na Casa do Concello da Estrada, acordou por unanimidade conceder o galardón á obra A espera. Dúas historias de amor, que resultou ser da autoría de Iria Collazo López (Barro, 1981). O xurado estivo composto por Ánxela Rodríguez Rodríguez, Laura Paz Fentanes, Marcos Calveiro e Armando Requeixo, actuando como secretario Carlos Loureiro Rodríguez. Ogalardón ten unha dotación de 9.000 euros e a publicación da novela por Editorial Galaxia.

A Real Academia Galega de Belas Artes, na Coruña, acolle este 14 de abril ás 19:30 horas a presentación de Tras a mirada de José Suárez. Olaia Sendón asina este álbum ilustrado dedicado ao fotógrafo que protagoniza o Día das Artes Galegas deste 2026. A editorial Galaxia publica esta obra na que a autora reinterpreta imaxes do homenaxeado a propor novas lecturas das mesmas e a reflexionar obre o propio feito fotográfico.

A praza do Pracer de Tui segue a dar sorpresas, amosando a boa conservación dalgunhas áreas da poboación romana baixo o casco vello de Tui.  A aparición dun pozo e unhas escaleiras na praza do Pracer engádense ás estruturas aparecidas previamente no mesmo lugar. 

O Museo de Belas Artes da Coruña, dependente da Xunta de Galicia, ven de mudar de dirección. Tras da recente xubilación de Ángeles Penas, será Manuel Mosquera Cobián quen tome agora o mando da institución. 

O festival Dansa València acolle, este 16 de abril, a primeira presentación pública do catálogo dixital Danza Galicia. A Xunta publicaba o día 13 a terceira edición deste inventario dixital que recolle un total de 137 espectáculos que manteñen en cartel 55 compañías e artistas. O proxecto pretende favorecer a visibilidade do sector galego das artes coreográficas de cara á súa contratación. 

'Aventura da mirada' é título co que a Galería LUISA PITA de Santiago de Compostela presenta ata o 28 de maio unha nova exposición de Antón Patiño. Na mostra, que ven a coincidir coa clausura da máis recente 'Auga e soño' do artista no Palexco da Coruña, presenta 17 pinturas sobre tela realizadas no período máis recente do artista, entre os anos 2023 e 2026. 

A edición galega reforza a súa proxección internacional na Feira Internacional do Libro Infantil e Xuvenil de Boloña da man da Asociación Galega de Editoras (AGE), do 13 ao 16 de abril, onde contará cun espazo propio dentro do posto da Federación de Gremios de Editores de España. BBF, de carácter exclusivamente profesional, está considerada como a feira internacional máis importante para a industria editorial en compra e venda de dereitos de literatura infantil e xuvenil. 

A Asociación Española de Críticos Literarios daba a coñecer este 11 de abril o fallo dos galardóns anuais que recoñecen as mellores obras publicadas no Estado. Na categoría de propostas en lingua galega foron seleccionadas a novela O lanzador de coitelos, de Fernando Castro Paredes e publicado por Galaxia, e mais o poemario Exuvia e saliva, escrito por Lorena Souto e que viu a luz da man de Chan da Pólvora.

Segundo se achega a data, multiplícanse tamén as publicacións arredor da figura de Begoña Caamaño polo Día das Letras Galegas. Nesta altura, son tres os novos lanzamentos ilustrados orientados a público infantil e xuvenil os que se incorporan aos andeis das librarías do país.

A igrexa parroquial de Carboeiro (Silleda) sufriu o afundimento de parte do seu tellado na noite do venres ao sábado, sen afectar a persoas. A trabe máis antiga do teito venceu, provocando un derrubamento sobre parte da nave que non afectou o altar maior ou ao caro, nin á colección de canzorros románicos que ten a nave no exterior. A igrexa parroquial non é o mosteiro de Carboeiro, tamén na mesma parroquia e curiosamente afectado por accións vandálicas na súa inscrición fundacional recentemente. As imaxes do interior xa foron postas a resgardo e o edificio precintado. 

O grupo de investigación dx5 da Universidade de Vigo promove as xornadas Autoedición etc. A Facultade de Belas Artes de Pontevedra acolle este encontro que repasará os días 13 e 14 de abril o estado desta actividade no noso país, cunha especial atención ás propostas vencelladas á banda deseñada e á ilustración. Esta é a primeira edición dunha iniciativa para afondar na escena do fanzine en Galicia, que segundo a organización "é realmente potente" no conxunto do Estado.

No seu segundo LP o trío integrado por Antía Vázquez, Eloy Vidal e Pablo Castro explora os ritmos da tradición oral, sen perder a súa xa característica base electrónica e pop, nun disco de evolución, ritmicamente diverso. O título serve de homenaxe ao saber popular das señoras, as informantes nas recollidas de tradición oral, buscando sempre non perder de vista esas raíces. A Sala Capitol de Compostela acollerá o concerto de presentación deste disco de Alana o sábado, 18 de abril, ás 21.30hrs.

Damián Varela Pastrana e Alba López Álvarez asinan a dirección e o guión de Begoña Caamaño: navegar no pracer do azul, o documental co que a Real Academia Galega conmemora a homenaxeada polo Día das Letras Galegas. Realizado por Miramemira, o filme repasa a traxectoria e o legado da autora a través de testemuños de persoas que a acompañaron. A peza inclúe ademais recreacións de pasaxes de obras da autora.

Os premios Follas Novas do Libro Galego renovan imaxe e formato de xurado nesta nova edición. Corenta obras son finalistas dos premios ata o vindeiro 9 de maio no que se darán a coñecer as obras gañadoras en cada unha das categorías. Como ven sendo tradicional, coñeceranse na gala de entrega que terá lugar no Teatro Principal de Santiago. 

Co gallo do cincuentenario do pasamento de Ramón Otero Pedrayo, o Consello da Cultura Galega pon á disposición do público seis documentos sonoros até agora inéditos coa voz do escritor ourensán. Os audios, custodiados polo Arquivo Sonoro de Galicia, corresponden á viaxe que Otero Pedrayo realizou á Arxentina no verán de 1959, onde foi o convidado de honra do Centro Galego de Bos Aires con motivo das Xornadas Patrióticas Galegas.

Unha reportaxe sobre a vaga de lumes forestais que asolou Galicia en 2025 valeulle ao fotógrafo ourensán Brais Lorenzo facerse cun prestixiosos galardóns World Press Photo. O galego foi seleccionado como un dos sete gañadores na rexión europea por este traballo na categoría de reportaxe gráfica, e opta a se facer co galardón mundial canda a 41 profesionais máis das seis rexións en que se organiza o certame. En total presentáronse a esta edición do concurso 3.747 fotógrafos de 141 países.

Logo de varios anos centrado no mercado estadounidense, o pontevedrés Tirso Cons volta ao panorama da BD estatal con Abandonados. A editora vasca Astiberri publica esta obra con guión de David Muñoz que, ao longo de 232 páxinas, narra a historia dunha anciá que ten que coidar do cadelo do seu fillo cando este morre.

Os prazos xa están a correr desde hoxe para a elección da persoa que dirixirá o Centro Galego de Arte Contemporánea. O Diario Oficial de Galicia publicaba onte a resolución pola que se daba comezo ao proceso de designación nos termos que xa estaban confirmados desde a Xunta de Galicia, de funcionarización do posto e elección por libre designación, malia o visible malestar do sector galego da arte, tanto en opinións colectivas como individuais.

A Xunta de Galicia ven de resolver a concesión das subvencións a festivais profesionais de artes escénicas, polas que a través da AGADIC distribúense este ano 290.000 euros entre 13 citas. A convocatoria de 2026 incrementou nun 3,5 % a dotación destinada a estes eventos respecto da partida disposta en 2025 e mantivo entre os seus requisitos a celebración de cando menos dúas edicións anteriores, a programación mínima de seis compañías e unha aposta significativa pola contratación artística galega, entre outros criterios.