Arquivo

Unha función de narración oral e música para dar a coñecer a figura de Begoña Caamaño ao alumnado de ensino primario. Esta é a proposta que realizan Vero Rilo e Luís Iglesias en Chaves invisibles, espectáculo que comeza a súa andaina ao abeiro do Día das Letras Galegas. A iniciativa constrúese a partir do libro Bego e o mundo do revés, de Iria Collazo López, con ilustracións de Alba Stinson, que achega a infancia de Begoña Caamaño e a súa relación coa lectura.

A Xunt adxudicou as obras de restauración e posta en valor da sancristía e do coro alto da igrexa monástica de Oia, cun orzamento de 390.000 euros, ao que se suma outra intervención xa adxudicada dos vindeiros meses para restaurar elementos artísticos do mosteiro por importe de 193.000 euros. O obxectivo é "incorporar á visita cultural espazos de gran valor como o coro, a torre barroca, a sala capitular e elementos artísticos relevantes". As tarefas afectan á corrección de filtracións, drenaxe, carpintería, arranxos da bóveda e no caso do coro alto, traballos no cadeirado do coro, os catro relevos policromados do centro e a pintura dos escudos. Tamén se vai traballar na restauración e montaxe das pezas do impactante retablo do mosteiro e a restauración do facistol do coro, é dicir, o soporte central dos libros de canto. 

Este mércores 25 de marzo a Real Academia Galega de Ciencias celebra o acto de ingreso na entidade de María Martinón. A paleoantropóloga, actual directora do Centro Nacional de Investigación sobre a Evolución Humana e codirectora das escavacións de Atapuerca, intégrase como membro correspondente da Academia na sección de Bioloxía e Ciencias da Saúde. O compostelán Pazo de San Roque acolle a partir das 18:30 horas o evento, no que o catedrático de Medicina Legal Ángel Carracedo será o encargado de realizar a laudatio da nova académica.  

O Diario Oficial de Galicia publica hoxe as bases que rexerán durante este ano para subvencionar proxectos de creación, produción, promoción e difusión musical. Con esta liña de axudas, a Xunta investirá 150.000 euros na industria da música de Galicia a través do impulso ás traxectorias profesionais de 10 artistas ou grupos que desenvolvan a súa actividade habitual na Comunidade autónoma. 

En rolda de prensa posterior á reunión do Consello da Xunta de Galicia, o presidente, Alfonso Rueda, destacou hoxe que a administración autonómica trasladará ao Goberno central "a intención da Xunta de facerse cargo da xestión do Pazo de Meirás”. Así se recolle no informe avaliado polo Consello, no cal figuran os próximos pasos que vai dar a Xunta de Galicia en relación con este inmoble localizado no concello coruñés de Sada. 

O músico Carlos Lijó puña na rede este 21 de marzo Breogán VSTi, unha gaita virtual que permite reproducir sons da nosa música tradicional no computador. Este plugin, dispoñible de balde, inclúe tamén simulacións doutros instrumentos de vento tradicionais como o pito galego, a requinta e o asubío.

A Deputación da Coruña homenaxea este 23 de marzo a compañía teatral Tespis, referente das artes escénicas galegas durante os anos 70 e 80. Unha gala no Teatro Colón lembrará o traballo deste colectivo, do que entre 1965 e 1984 participaron nomes como Manuel Lourenzo, Francisco Pillado, Víctor L. Mosqueira ou María Pujalte.

A Real Academia Galega de Ciencias daba a coñecer este 23 de marzo o fallo do seu  VII Premio de Divulgación Científica. A institución acordou recoñecer nesta xeira o neurocientífico Xurxo Mariño polo seu labor neste campo. Mariño, nado en 1969, leva anos a desenvolver un constante labor de cara a popularizar a investigación.

O filme 'Antes de nós' que narra un dos episodios da vida de Alfonso Daniel Rodríguez Castelao e a súa muller, Virxinia Pereira, foi a produción gañadora indiscutiblemente no reparto dos XXIV Premios Mestre Mateo do audiovisual galego. Pero non foi o mellor filme, iso quedoulle a Sirât, cuxo director Oliver Laxe, presente na cerimonia, foi o protagonista da noite, tanto durante a entrega coma nos espazos exteriores do festexo e no photocall.

A Xunta Directiva da Asociación de Actores e Actrices de Galicia (AAAG) acordou conceder o Premio de Honra Marisa Soto dos Premios María Casares 2026 á actriz ferrolá Luma Gómez, en recoñecemento a unha traxectoria exemplar e ao seu compromiso sostido co desenvolvemento do teatro galego. O Premio de Honra Marisa Soto, creado en 1997 pola AAAG, distingue traxectorias consolidadas e de especial relevancia para o desenvolvemento das artes escénicas en Galicia. Trátase dun recoñecemento á contribución sostida de figuras clave do noso teatro, como é o caso de Luma Gómez. A entrega do galardón terá lugar o 8 de abril no Teatro Rosalía Castro durante a gala de celebración dos XXX Premios de Teatro María Casares.

O pleno da Real Academia Galega (RAG) aprobou o ingreso da escritora María Xosé Queizán (Vigo, 1939) como académica de honra da institución. A RAG reivindicou a escritora "que puxo os alicerces do pensamento feminista en Galicia, conta cunha sólida traxectoria que abrangue todos os xéneros: narrativa, teatro, poesía e unha vizosa produción ensaística na que afondou cunha ollada sempre propia en campos ben diversos, desde a sociolingüística, formulando a relación entre a discriminación das mulleres e da lingua galega, á necesaria conciliación das ciencias e das humanidades".  María Xosé Queizán ingresará proximamente na RAG nunha cerimonia na que dará lectura ao seu discurso de entrada. No pleno tamén se elixiu ao escritor Pere Tobaruela como membro correspondente. Tobaruela, de orixe catalá, ten publicado máis de medio cento de libros en galego, a súa "lingua de adopción". 

O Diario Oficial de Galicia recolle hoxe a resolución pola cal a Axencia galega de Industrias Culturais resolve e adxudica a nova liña de axudas a programación musical en salas privadas. Estas subvencións supoñen un cambio no modelo anterior, que estaba directamente relacionado co programa da Rede Galega de Música ao Vivo. En total AGADIC reparte case 360.000 euros entre nove proxectos. Outras dez solicitudes quedaron excluídas ou desistiron.

A Federación de Librarías de Galicia recoñeceu o traballo de comunicación da libraría coruñesa Moito Conto, outorgándolle o premio Follas Novas á labor libreira desde 2026. O premio recoñece a capacidade do establecemento para "conectar cun público amplo e diverso, combinando ferramentas de marketing tradicional co uso eficaz das novas tecnoloxías. Esta estratexia de comunicación, sostida no tempo, converteuse nun exemplo de visibilización e dinamización que beneficia ao conxunto da rede de librarías independentes". A Federación de Librarías de Galicia está constituída por 149 librarías de todo o país e entregará o galardón, decidido por unanimidade, na gala Follas Novas do libro galego. 

Este vindeiro luns, 23 de marzo, no Consello da Cultura Galega, as facetas de Begooña Caamaño como xornaliste escritora serán o punto de apoio sobre o que se construirá a xornada Non hai fronteiras (ou si?): xornalismo e literatura nas letras galegas. Ao longo do día serán varios os autores tanto de narrativa coma de poesía, moitos tamén xornalistas, que tomarán parte neste programa que explora e cuestiona as interseccións e comunicación entre a literatura e o xornalismo, coordinado pola xornalista e profesora Marta veiga Izaguirre. 

A torre de Aez xa se atopaba en estado ruinoso e parcialmente derrubada, pero as chuvias dos últimos meses contribuíron a que unha nova parte do lenzo deste inmoble de orixes medievais e renacentistas se viñera abaixo. En concreto, máis da metade dun ventanal que incluía o escudo heráldico dos Castro e dos Gaioso. A torre atópase na parroquia de Camoira (Lugo) e o seu mal estado é ben coñecido, ao figurar en diferentes listas de patrimonio en perigo. 

A sétima edición do Premio O Garaxe Hermético de Banda Deseñada, convocado pola escola profesional do mesmo nome e a editorial Galaxia, trae este ano como novidade a posibilidade de concorrer en dúas categorías. Neste concurso poden participar todas as persoas matriculadas no 3º Curso Profesional de O Garaxe Hermético ou exalumnos/as que rematasen a súa formación nos 4 anteriores, que presenten narracións en banda deseñada escritas en lingua galega, inéditas e non premiadas en ningún outro concurso ou certame. Se ata agora o cómic para adultos era o que primaba entre os traballos presentados e premiados o certame ofrece por separado unha categoría de cómic "infantil e xuvenil" de outra de "adulto", pera posibilitar a publicación de obra destinada a un público máis novo e crear lectores para este formato narrativo. Ademais, no caso da categoría para adultos as bases requiren que as obras a presentar sexan adaptación do libro 'Merlín e familia' de Álvaro Cunqueiro. Os premios inclúen a publicación dos traballos vencedores pola editorial Galaxia.

O escritor Xosé de Cea fíxose co IV Premio de Novela da Galicia Rural coa novela Nacional 547. Segundo o autor, "Nacional 547 máis que unha estrada, é a vea aberta pola que se desangra en hemorraxias de arela e frustración a vida dun adolescente na Palas de Rei dos anos oitenta. O mozo retorna dende Barcelona cos seus pais a unha vila rural que para el será un territorio de exilio cuxas coordenadas lle resultan incomprensibles. Atoutiñante e desorientado, irá descifrando a existencia na procura de redención grazas aos códigos achados na amizade e na traizón, no sexo e no desamor, nas drogas, na violencia, na soidade, na literatura, no rock… Un relato iniciático adubado con pornografía, heavy metal e Goma 2 que non deixará indiferente a ninguén". O certame está convocado polo concello de san Xoán de río, co patrocinio da Secretaría Xeral de Lingua da Xunta e a colaboración da editorial Galaxia. 

Artistas consagrados como Antón Pulido, Francisco Leiro, Manolo Moldes, Xaime Quessada ou Acisclo Manzano e outros noveis, son os e as autoras das preto de 300 obras de pintura, escultura, gravado e fotografía, e ás que tamén se sumarán vídeos, instalacións e audios, que integran a día de hoxe o Museo de arte da Universidade de Vigo, MAUVI. 

Xa está dispoñible o novo número da emblemática publicación de pensamento crítico A trabe de ouro. O volume abre o seu bloque de Cuestións coa profunda reivindicación da figura de Isaac Díaz Pardo. A través do artigo de Xosé Mª Lema Suárez, a publicación explora a loita constante do intelectual pola dignificación de Galicia, poñendo o foco nesta ocasión na súa relación coa música. Esta sección de pensamento complétase coas achegas de Antón Capelán sobre Álvaro Cunqueiro e os Xogos Florais, así como unha reflexión de Manuel Outeiriño que conecta a saudade coa tradición republicana portuguesa.

O Casino Ferrolán acollía na mañá deste 18 de marzo a cesión ao Consello da Cultura Galega (CCG) dos fondos musicais do crego Javier Méndez. A familia do sacerdote entregoulle á institución un legado que comprende decenas de partituras e unhas 200 bovinas de audio nun avanzado estado de deterioro nas cales se recolle grande parte da produción musical de Méndez, considerado un nome fundamental na renovación da liturxia en galego na segunda metade do século XX. O CCG encargarase de dixitalizar e dar a coñecer este patrimonio a través do Arquivo Sonoro de Galicia.