Ángeles Penas e Manuel Mosquera Cobián no Museo de Belas Artes Fot: Xunta de Galicia
O Museo de Belas Artes da Coruña, dependente da Xunta de Galicia, ven de mudar de dirección. Tras da recente xubilación de Ángeles Penas, será Manuel Mosquera Cobián quen tome agora o mando da institución.
Mosquera Cobián era ata o de agora o segundo no organigrama do museo, encargándose directamente do departamento de Difusión e Acción Cultural. Funcionario de carreira e traballador da institución desde fai case trinta anos, a súa traxectoria estivo vencellada ao museo pasando por diversas áreas coordinando exposicións, xornadas e publicacións, tamén participou do deseño do actual proxecto museolóxico.
Do procedemento levado a cabo para o nomeamento non hai documentación publicada no Diario Oficial de Galicia (DOG) nin en outros boletíns oficiais, foi a través das edicións locais dos xornais que hoxe se deu a coñecer esta designación. En resposta a consulta deste medio sobre a publicación da documentación relativa a este procedmento, desde a Consellería de Cultura. Lingua e Xuventude contestaron que "estes nomeamentos non teñen a obriga de ser publicados en ningún boletín". Esta designación no Museo de Belas Artes da Coruña coincide no tempo coa apertura dun procedemento para a designación da nova dirección do Centro Galego de Arte Contemporánea (CGAC), tamén dependente da Xunta, cuxa convocatoria e bases para a elección por libre designación dun profesional pertencente aos corpos de funcionarios sí foron publicadas no DOG e difundidas a través de comunicados de prensa da propia Consellería de Cultura, Lingua e Xuventude.
