A Deputación salienta que ao proceso de selección concorreron varias persoas pero só dúas aspirantes, a propia Tilve e Nuria Serrano, cumpriron os requisitos formais establecidos nas bases. Segundo apunta a entidade provincial, "a elección de Tilve como directora titular reforza a continuidade institucional do Museo de Pontevedra, ao tempo que consolida o acceso ao cargo mediante o modelo empregado nos principais museos nacionais e internacionais: concurso público, procedemento transparente e selección por criterios profesionais". O tribunal cualificador estivo integrado polo secretario da Deputación de Pontevedra, o xefe do Servizo de Cultura e a xefa do Servizo de Recursos Humanos e Formación.
Tilve Jar é licenciada en Xeografía e Historia, especialidade en Historia da Arte, pola Universidade de Santiago de Compostela, e está vinculada ao Museo de Pontevedra de 1987. Desde entón, desenvolveu na entidade "tarefas de documentación, investigación, conservación e coordinación técnica, foi conservadora de fondos xerais e responsable da área de Coleccións, e participou na organización de máis de medio cento de exposicións temporais", segundo apunta a Deputación.
