A Asociación Española de Críticos Literarios daba a coñecer este 11 de abril o fallo dos galardóns anuais que recoñecen as mellores obras publicadas no Estado. Na categoría de propostas en lingua galega foron seleccionadas a novela O lanzador de coitelos, de Fernando Castro Paredes e publicado por Galaxia, e mais o poemario Exuvia e saliva, escrito por Lorena Souto e que viu a luz da man de Chan da Pólvora.
O xurado, composto por 21 nomes da critica literaria estatal, destacou do traballo de Castro "a súa capacidade para combinar a tensión narrativa propia do xénero cunha prosa de gran forza literaria e unha fonda dimensión psicolóxica" que o fan ser "delicioso e duro á vez”. O fallo apunta tamén ecos de autores como Fernando Pessoa, William Faulkner ou Eça de Queirós nunha obra que "constrúe unha proposta que transcende os códigos do suspense para situarse nun territorio literario de maior ambición e profundidade".
Encol da obra de Souto, a resolución apunta "a súa madurez literaria e o seu xeito de habitar un medio rural en constante cambio". A obra achega, segundo a editora, " unha ollada de microscopio sobre o contexto rural, fixada no detalle a nas estruturas internas, que foxe de idealizacións para formular preguntas abertas e procurar unha comprensión íntima da experiencia vital nesa realidade". Os galardóns non contan con dotación económica.
