Segundo se achega a data, multiplícanse tamén as publicacións arredor da figura de Begoña Caamaño polo Día das Letras Galegas. Nesta altura, son tres os novos lanzamentos ilustrados orientados a público infantil e xuvenil os que se incorporan aos andeis das librarías do país.
Ilustracións de Tania Solla e textos do colectivo Polo Correo do Vento compoñen Begoña Caamaño. Pequena biografía, o volume co que Lela Edicións se suma aos lanzamentos arredor da homenaxeada polo Día das Letras Galegas. O volume repasa a traxectoria da escritora dentro da colección Mulleres Galegas.
Tamén se incorpora á listaxe de lanzamentos pola efeméride Edicións Embora. Ao igual que en 2025, é o dúo conformado por Icía Varela e Xosé Luís Varela quen corre cos textos de Begoña Caamaño. Nerea Gómez achega as ilustracións a esta obra que se presenta como "unha experiencia visual e pedagóxica a toda cor que percorre, ao longo das súas 44 páxinas, a vida, a obra e a acción social dunha das voces máiss singulares e necesarias da nosa literatura do século XXI".
Finalmente, Bolanda Editora, súmase á celebración con Begoña Caamaño : Os bolechas. Pepe Carreiro asina este álbum ilustrado que fai unha aproximación da figura ao público máis novo en 19 páxinas e que se publica no marco da colección As miñas primeiras letras galegas.
