CORREO
RSS
Noticias
O colectivo Dios Ke Te Crew reúne todas as artes vencelladas ao hip hop nun proxecto único en Galicia
Xénero: | 1 / 6 / 2005
A unión de vinte persoas de disciplinas coma a danza, a música e a pintura nun único grupo non é unha iniciativa que se vexa habitualmente na nosa cultura e ata pode semellar difícil encontrar un nexo que poida xuntalas todas. Un colectivo asi, sen embargo, existe. Leva o nome de Dios Ke Te Crew e atopa no hip hop o cemento que une todas estas artes.
Un volume recompila a música tradicional composta e interpretada polos músicos de A Limia
Xénero: | 23 / 5 / 2005
“Catálogo de músicos da Limia” é o título que recompila a música popular que veciños anónimos e cunha formación autodidacta contribuíron a crear o patrimonio musical. O volume é froito de dez anos de traballos coordinados por Castor Castro no que se pretendeu unha recompilación exhaustiva tanto das partituras, como dos instrumentos como dos músicos que tocaban. É a segunda publicación do Museo de A Limia, dentro do seu obxectivo de recuperar e por en valor a cultura da comarca.
Máis información en La Opinión e en La Región
O grupo lucense Islabikini saca o seu segundo traballo 'Photographs' gravado e producido nos estudos de Arturo Vaquero
Xénero: | 10 / 5 / 2005
O grupo lucense Islabikini presenta este mes o seu novo e segundo disco “Photographs”, un álbum de once temas gravado e producido nos estudos que Arturo Vaquero dirixe en Abrigueiro (Friol). O produtor ven acompañando ao grupo desde os seus comezos e é co-produtor neste traballo editado pola discográfica Falcatruada. Neste álbum a formación pretende transmitir “a secuencia visual e sonora dun día chuvioso, dun día en aparencia triste, pero iluminado por descargas de intensidade e emoción”, Islabikini pretende ofrecer unha manchea de cancións atemporais, cancións sinceras e sen máis pretensións que “capturar a intensidade dunha instantánea, dun momento que non volverá”. O grupo presentará o seu novo disco en varios concertos, os dous primeiros serán o venres 13 de maio na Sala Xoldra (Guitiriz) e o venres 27 de maio na Sala Strass de Lugo.
Máis información no sitio de Islabikini
A subvención da deputación de Pontevedra á Banda de Gaitas volve a enfadar á Asociación de Gaiteiros
Xénero: | 9 / 5 / 2005
O chamado conflicto das gaitas ten un novo capítulo. A Deputación de Pontevedra vén de conceder unha subvención por importe de 90.000 euros para a Banda de Gaitas da Provincia de Pontevedra. Un feito que vén de alimentar o lume entre a entidade e a Asociación de Gaiteiros que acusa de fomentar a penetración da gaita escocesa no noso país. No comunicado remitido polos gaiteiros cuestiónase que esa partida “sexa o camiño axeitado para o ensino da música tradicional”. O novo comunicado chega logo de que os gaiteiros romperan coa tregua pactada hai dúas semanas.
Máis información na edición de hoxe de La Opinión e sobre o conflicto na nosa hemeroteca
Cómprese o Centenario do nacemento do compositor e crítico lucense Jesús Bal y Gay
Xénero: | 9 / 5 / 2005
Se repasaramos a memoria musical do país apreciaremos que Galicia non tivo un Mozart nin un Beethoven, ou un Manuel de Falla. Pero hai moitos nomes que contribuíron a crear a historia musical do país e que teñen certa entidade e relevancia. Entre todos eles destaca o de Jesús Bal y Gay do que se cumpren cen anos do seu nacemento e que foi autor do “Cancioneiro Galego”. A súa é outra das historias que deixou o exilio galego e que cómpre non esquecer.
O proxecto Meniños Cantores recolle nun disco as voces de quiñentos nenos a cantar temas tradicionais das dúas bandas da raia
Xénero: | 3 / 5 / 2005
Encontrar un disco no que participan quiñentos intérpretes non é sinxelo. Se ademais é un proxecto realizado desde centros de ensino de dous países veciños celebrando un patrimonio oral común estamos sen dúbida ante un proxecto único no mundo. Por se fose pouco, este proxecto desenvólvese aquí mesmo, entre o Sur de Galicia e o Norte de Portugal, a partir da iniciativa “Ponte... Nas Ondas”.
Nace en Vigo un festival que dedicará quince días a encher de Jazz europeo Vigo
Xénero: | 2 / 5 / 2005
O Festival Internacional de Jazz de Vigo, "imaxina Sons", nace coa intención de cubrir un baleiro e satisfacer a demanda respecto ao ámbito europeo do Jazz, intentando mostrar tendencias descoñecidas desta música no noso país que no resto de Europa si están presentes. Trátase principalmente de dar información sobre o Jazz actual do noso entorno: dende Galicia, ata España e Europa. Este festival desenvolverase desde o 16 de xuño ata o 3 de xullo e conta cun orzamento de 300.000 euros achegado polo Concello e Caixanova. O músico Baldo Martínez ocupa o posto de director artístico do evento. O festival desenvolverá os seus obxectivos a través de diversas actividades alén dos concertos en teatros e auditorios. Haberá Jazz na rúa, actuacións nocturnas en locais, exposicións, mesas redondas, debates, conferencias e clases maxistrais.
Máis información e programa no Xornal do Concello de Vigo
A OSG celebra un concerto para promover a declaración da Torre de Hércules a Patrimonio da Humanidade
Xénero: | 27 / 4 / 2005
Esta fin de semana o Teatro da Ópera da Coruña acollerá un dos concertos máis numerosos da súa historia. Non só porque encherá o aforo (xa están vendidas todas as localidades) senón porque no escenario haberá ata catrocentos músicos para interpretar a Oitava Sinfonía de Mahler. Acompañan á Orquestra Sinfónica de Galicia neste concerto, a Xove Orquestra Sinfónica, o Orfeón Donostiarra, o Coro de Cámara do Palau, os Nenos Cantores e o Coro da OSG. O concerto inclúese dentro do programa de actos promovido para apoiar a declaración da Torre de Hércules a Patrimonio da Humanidade.
Máis información en Galicia Hoxe e no web da Sinfónica
O vinte de maio o público e un xurado escollerán o Primeiro disco pop do ano de solistas galegos
Xénero: | 27 / 4 / 2005
¿Imaxinan un disco galego do ano? Pois moi pronto será unha realidade. Unha empresa, un compositor musical e nove mozos que acaban de editar o seu primeiro disco veñen de embarcarse nesta aventura. Unha iniciativa na que o público vota cal será o disco do ano. O resultado saberémolo o vindeiro día 20 de maio no transcurso dunha gala en Santa Cristina.
A metamorfose de Doa en Cantigalia inclúe a Rosa Cedron no proxecto musical
Xénero: | 20 / 4 / 2005
A incertidume sobre o futuro da ex-Luar na lubre, Rosa Cedrón, xa rematou coa última nova que a sitúa como parte dun novo grupo de nome Cantigalia xunto aos membros de Doa. Cedrón deixou en xaneiro Luar na lubre despois de nove anos nesa formación para “facer algo diferente”. Cantigalia supón unha aposta pola música folk medieval na que a cantante traballará xunto aos membros de Doa, un grupo que se creou nos anos setenta e que aínda seguía en activo. Os veteranos músicos Xoán Piñón, Bernardo Martínez e Xaquín Blanco fornecen a formación coa voz e o violonchelo de Cedrón buscando a interpretación anovadora da música popular e medieval.
Máis información en El Ideal Gallego