CORREO
RSS
Noticias
Espectáculos, o premio Andrés Gaos e a homenaxe a Rogelio Groba marcan a celebración do Día da Música
Xénero: | 21 / 6 / 2005
O Día Europeo da Música enche a actualidade de novas sonoras. En Santiago, o Instituto Galego de Artes Escénicas e Musicais (IGAEM), o Casino e o Estudio Escola de Música organizan unha serie de actuacións na rúa que, entre as once da mañá e as once da noite, encherán dos ritmos máis variados os espazos abertos da cidade. Coincidindo con esta data tamén coñecemos o gañador da sexta edición do premio Andrés Gaos de composición musical que organiza a Deputación da Coruña. O arxentino José Luís Campana fíxose co galardón pola obra “Nuestro Tiempo”, feita para catro voces, coro mixto e orquestra. Finalmente, con ocasión desta data, a Sociedade Xeral de Autores e Editores (SGAE) presenta un CD co que homenaxe ao compositor Rogelio Groba, que fai este ano o seu setenta e cinco aniversario.
Máis información en Galicia Hoxe sobre a música na rúa en La Opinión sobre o premio Andrés Gaos; sobre a homenaxe a Groba, na edición de hoxe de Diario de Pontevedra
Víktor Flores representa a Galicia no Festival Sónar mentres Cristina Pato se traslada a Nova Jersey
Xénero: | 16 / 6 / 2005
O Dj da sala viguesa Vademecwm, Víktor Flores representará a Galicia no Festival Sonar que se celebra en Barcelona entre hoxe e o vindeiro día dezaoito. Esta mesma noite Flores terá a súa sesión neste evento, onde tamén coordina o escenario da Red Bull Music Academy. Simultaneamente, noutro estilo, chéganos a noticia de que Cristina Pato iniciará en agosto o doutoramento de Artes Musicais en Nova Jersey, especializándose en piano. A actividade académica manteráa afastada do mundo discográfico galego ata o ano 2007.
Máis información en Faro de Vigo sobre Víktor Flores, sobre Cristina Pato; máis sobre Víktor Flores nos nosos arquivos
Os Diplomáticos emprenden a súa xira de despedida logo de quince anos de actividade
Xénero: | 14 / 6 / 2005
O grupo por excelencia do rock bravú despídese logo de quince anos de actividade. Os Diplomáticos de Monte Alto iniciarán no vindeiro festival de Ortigueira, o día dez de xullo, a súa xira de despedida, que rematará o vindeiro mes de setembro na Coruña logo de percorrer boa parte do país.
Máis información en Vieiros
Leilía distribuirá o seu novo disco Son de Leilía exclusivamente en Internet
Xénero: | 13 / 6 / 2005
O grupo Leilía demostra unha vez máis a modernidade da súa proposta coa distribución exclusiva a través da rede do seu novo disco. As pandeireteiras composteláns presentarán neste traballo, de nome “Son de Leilía” como o espectáculo que veñen facendo en directo, unha recompilación de temas inéditos da formación en colaboracións en discos colectivos que non se chegaron a distribuír en España, temas de bandas sonoras e colaboracións con outros músicos e grupos. O disco estará dispoñible na rede a mediados de xullo. O grupo ten actualmente no seu sitio web o tema “Mil camiños” dispoñible para a súa descarga de balde.
Máis información en La Voz de Galicia
e no sitio web de Leilía
Un acordo pon fin á “guerra das gaitas” que enfrontaba a Asociación de Gaiteiros Galegos coa Deputación de Pontevedra
Xénero: | 7 / 6 / 2005
Semella que desta vez si. Logo do anterior amago de acordo, e de numerosas reunións, o delegado de cultura da Administración Provincial, José Juan Durán e o representante da Asociación de Gaiteiros Galegos, Santiago Caneiro, anunciaban onte o acordo que pon fin á chamada “guerra das gaitas”. O pacto consiste nun convenio que asinarán en breve as dúas partes polo que a Asociación de Gaiteiros Galegos creará unha escola de música tradicional dentro da que se integrarán os polémicos cursos da Asociación de Bandas de Gaitas da Provincia de Pontevedra que foran a base da confrontación ao empregar gaitas escocesas. O proxecto, que conta cun orzamento de cen mil euros, porase en marcha o vindeiro mes de outubro.
Máis información en Diario de Pontevedra; e nos nosos arquivos
O IGAEM financia a recuperación da primeira ópera galega escrita por Marcial del Adalid
Xénero: | 7 / 6 / 2005
“Inés e Bianca” é o título da primeira ópera galega. Pero a súa peculiaridade non vén só en que sexa a primeira, senón que conta a historia de personaxes galegos e usa material autóctono do folclore galego. Juan Durán e Margarita Viso rescataron o manuscrito orixinal do compositor coruñés Marcial del Adalid dos arquivos da Real Academia Galega (RAG), montaron un equipo para recuperar os catro fragmentos que faltaban e o IGAEM custeou a edición dunha ópera cargada de anécdotas.
A discográfica Ouvirmos recupera gravacións do principal gaiteiro da emigración galega
Xénero: | 6 / 6 / 2005
Un dos gaiteiros máis destacados da historia da música galega, Manuel Dopazo, desenvolveu toda a súa carreira na emigración a partir dos anos da posguerra. Agora, unha selección de dezaoito temas recuperados de antigos discos comerciais, está a disposición do público grazas á colaboración entre a discográfica Ouvirmos, especializada na recuperación de gravacións antigas, e do Arquivo Sonoro de Galicia do Consello da Cultura Galega. O pasado venres a sede desta institución en Compostela acollía a presentación do CD que permitirá coñecer no noso país a obra deste intérprete.
Máis información en El Correo Gallego e en La voz de Galicia e no web do Consello da Cultura
O Festival Internacional de Ortigueira presenta o programa logo de ser declarada festa de interese turística internacional
Xénero: | 2 / 6 / 2005
O Festival Celta de Ortigueira preséntase máis forte que nunca. Non só porque recupera os catro días de evento, senón porque desde o pasado mes de abril foi declarado Festa de Interese Turístico Internacional. Pero esta edición, a vinte e unha, é especialmente significativa porque renderá unha homenaxe á Galicia exterior, terá como invitada a música mediterránea e será un punto de encontro para todo aquelo que leve a etiqueta celta. As citas: do 7 ao 10 de xullo.
Máis información en La Voz de Galicia enEl Progreso e no seu web
A Real Filharmonía de Galicia prepara o décimo aniversario cun programa de actividades
Xénero: | 2 / 6 / 2005
Aínda non rematou a temporada e a Real Filharmonía de Galicia xa está pensando na seguinte. A temporada 2005-2006 será cando a formación musical cumpra unha década de existencia e vaino celebrar con música. No avance que dos actos do décimo aniversario figuran dúas estreas (unha encargada a Xoán Trillo e outra a unha compositora francesa), a colaboración de Paul Daniel e Franz Brüggen, entre outros. No programa haberá referencias a obras de Schuman, Shostakovich e Bocherini. Pero iso será para a temporada que vén, polo pronto a Filharmonía deberá rematar esta temporada o 17 de xuño e, en agosto participará dentro do Festival Internacional de Piano de La Roque D’Antheron.
Máis información en El Correo Gallego
O Coro Lonxe da Terra do Centro Galego de Barcelona presenta o CD Froita Madura
Xénero: | 2 / 6 / 2005
En activo desde 1934, a formación coral Lonxe da Terra da emigración galega en Cataluña leva con este catro traballos editados, o primeiro deles a banda sonora da película "Niebla al sol" en 1952. Nun acto celebrado o domingo 29 de maio no CGB presentouse esta gravación, "Froita madura", de catorce temas divididos en catro bloques temáticos: Terra, Mar, Ar e Alén. Nestas categorías insírense cinco obras do músico Ángel Barja (Ourense, 1938 - León, 1987); cantigas dos trobadores medievais (obras de Xohán de Requeixo, Don Dionís, Martín codax e Mendinho); unha obra de Roxelio Groba; arranxos corais sobre obras de Lennon/McCartney, James Hudson/Robert Sund, e un espiritual negro; unha peza tradicional raiana de Galicia, León e Asturias; e a popular "brincando no ar". As imaxes do libreto que acompaña ao disco son do pintor noiés Alfonso Costa e mailo fotógrafo Fco. Javier Alonso Peláez. Na presentación interviron Luis Lamas, presidente do CGB, César del Caño, director do coro, Xosé Aviñoa, Catedrático de Musicoloxía da UB, Basilio Losada, Catedrático de Filoloxías Galega e Portuguesa da UB e Alfonso Costa, pintor.
Máis información no Centro Galego de Barcelona