CORREO
RSS
Noticias
Cinco agrupacións representarán á música galega no Festival Intercéltico de Lorient
Xénero: | 29 / 7 / 2008
As melodías do grupo Quempallou serán a primeira mostra da música galega en soar no escenario da importante cita bretoa que se inicia este venres na pequena cidade de Lorient. Durante os dez días do evento representantes musicais do países celtas pasarán polo escenario que xa é un referente internacional xunto con outros da nos aterra como Ortigueira ou Moaña, co que coincide este ano. Os outros que tamén estarán en Bretaña será a Banda de gaitas Xarabal, de Vigo; Cantigas e Agarimos, de Santiago; os ourensáns Mutenrohi e as cantareiras Leilía, que actuarán no día do peche do evento que este ano alcanza a súa trixésima oitava edición.
O grupo Pesdelán debuta en concerto buscando poñer a todos a bailar
Xénero: | 24 / 7 / 2008
Practicamente cada un dos sete compoñentes do grupo que se presenta en concerto o vindeiro luns foi ou é parte doutro proxecto musical coñecido do panorama galego. Berrogüetto, Leilía, Alfolíes, Xochilmica, Almáciga ou a banda de Susana Seivane son algúns destes grupos dos sete artistas que integran Pesdelán, que buscan nesta nova aposta recuperar a cultura participativa das festas e poñer á xente a bailar cun repertorio que abrangue temas tradicionais galegos e portugueses, arranxados dun xeito divertido e orixinal. Pesdelán son Guadi Galego, Uxía Cribeiro, Montse Rivera, Mercedes Prieto, Xan Pampín, Carlos Freire e Miguel Flores. A súa presentación terá lugar cun concerto aberto na Praza do Toural de Compostela ás 23 horas do luns 28 de xullo, na mesma praza estarán desde as 20:30 horas ofrecendo un obradoiro de danzas galegas e portuguesas para ir quentando os pés do persoal.
O quinteto Som do Galpom publica o seu primeiro disco
Xénero: | 23 / 7 / 2008 + AUDIO
O netlabel A Regueifa Plataforma ven de editar o primeiro EP dos composteláns SOM DO GALPOM, un quinteto de rap-funk formado hai tres anos na aldea d´A Moniña, unha formación que desde os seus comezos buscou apoiarse en tres estilos de música diferentes: o funky, o reggae e o rap. Neste tempo xa levan dado moitos concertos por toda a xeografía, acadaron o segundo premio no certame GZcrea 2007 e gañaron o IV Concurso Galego do Foundation Reggae Festival. Som do Galpom son Gael Bassave (voz e letras), Brais Bassave (violín e composición), Xurxo Climent (guitarras clásica e eléctrica), Jano Castro (baixo) e Aitor Garcia (batería). O disco, de seis temas, esta editado baixo licenza Creative Commons e pode ser descargado de balde.
A Filharmonía dará trinta concertos na súa nova temporada
Xénero: | 23 / 7 / 2008
A Novena Sinfonía de Beethoven dirixida por Ros Marbá abrirá o vindeiro 26 de setembro na Catedral de Santiago a nova temporada da Filharmonía de Galicia. En total serán trinta concertos, con directores convidados coma Paul Daniel, Maximino Zumalave, David Atherton, Anne Manson, Tuomas Ollila-Hannikainen, Frans Brüggen, Theodor Guschlbauer, Max Valdés e Juanjo Mena entre outros. Tamén se abrirán oito ensaios ao público e están previstas actuacións no Festival da Ópera da Coruña, en Madrid, en Sevilla e mais en Barcelona.
Educación presenta novas liñas para a promoción dos estudos musicais
Xénero: | 17 / 7 / 2008
Educación convocará dez bolsas de dez mil euros cada una para a realización de estudos de especialización no estranxeiro destinadas a titulados superiores de especialidades instrumentais de música polos conservatorios superiores de música de Galicia. Esta é unha das accións de promoción do ensino musical presentadas pola Conselleira de Educación, Laura Sánchez Piñón, que avanzou tamén que para o vindeiro curso académico, por primeira vez, os Conservatorios Profesionais de Vigo e de A Coruña impartirán o bacharelato de Artes na vía de música, danza e artes escénicas. Outra novidade avanzada pola titular da carteira é unha páxina web que contará cun buscador de recursos musicais de autores galegos, unha base de datos con máis de 2.000 fichas de obras de autores galegos. O buscador, ademais de dar acceso ao catálogo das súas obras, nalgúns casos permitirá incluso descargar partituras.
Xavier Valiño mestura eventos consolidados coas novas propostas na súa axenda de festivais
Xénero: | 15 / 7 / 2008
O seu nome está asociado en grande medida ao rock. O seu traballo coma escritor, con obras coma Todo en nombre del Rock and Roll ou Rock Bravú mestúrase cunha impresionante carreira coma crítico e locutor radiofónico. No entanto, Xavier Valiño aposta na súa axenda de festivais por unha mestura de citas consolidadas con propostas novas na que o teñen cabida o jazz e o pop.
O grupo Combo Dinamo triunfa nos premios Inframundo da Música
Xénero: | 14 / 7 / 2008
Mellor canción e mellor videoclip polo seu sinxelo "Más de lo mismo", mellor álbum por Decencia y Buen Gusto e mellor banda foron o gran palmarés que conseguiu o grupo Combo Dinamo na gala de entrega dos I Premios Inframundo, dedicados á música alternativa coruñesa, entregados o venres na Fundación Caixa Galicia, na Coruña. Ademáis, na gala tamén foron galardoados Los Santos, que levaron o premio á mellor posta en escena, The Orange Soap obtivo o premio á mellor banda revelación e Los Crueles fixéronse co galardón a mellor directo. Chamito el Flaco, que actuou durante a gala, gañou o premio a mellor solista e Álvaro Muras fíxose co de mellor instrumentista. O premio honorífico levouno o compositor Félix Arias. Loretta Martin, Grasa e Silvia Penide foron algúns dos nominados que non acadaron ningunha estatuíña.
Máis de trinta músicos homenaxean ao mestre gaiteiro Ricardo Portela
Xénero: | 11 / 7 / 2008
O Teatro Principal de Pontevedra acolle hoxe ás 21 horas a presentación do disco Foliada nas Rías Baixas. Homenaxe a Ricardo Portela, o mestre. O traballo consiste nun duplo CD con corenta e dous cortes musicais. Máis de trinta artistas do mundo da música tradicional renden homenaxe ao desparecido gaiteiro de Viascón no disco editado por Do Cumio grazas á iniciativa da Asociación Toque Pechado de Pontevedra, encabezada por Oscar Ibáñez. Os músicos reinterpretan o repertorio de Portela e engádense fragmentos de conversas con amigos e alumnos do gaiteiro de Viascón. A edición complétase cun libriño onde se recollen os textos de cada un dos participantes a modo de semblanza do mestre. O acto, de entrada libre, será conducido por Xurxo Souto e contará con actuacións de algúns participantes no disco como Álvaro Novegil, Os Trazantes de Tenorio, Enrique Otero, Airiños do Parque de Castrelos ou Juanjo Fernández entre outros. A gala desenvolverase dentro dos actos do IX Memorial Ricardo Portela.
Los Piratas reúnen todo o seu legado nunha caixa recompilatoria
Xénero: | 11 / 7 / 2008
Catro anos despois da súa desaparición como banda o grupo vigués Los Piratas volve estar de actualidade pola presentación esta semana dun recompilatorio. Co título de Disco Duro sae a venda unha caixa que reúne os seis discos oficiais do grupo nos seu doce anos de carreira ademais de outros materiais como fotografías, videoclips, maquetas e temas inéditos, textos xornalísticos e un documental sobre o grupo realizado polo guitarrista, Paco Serén, de máis de dúas horas no que descobre as interioridades do grupo dentro do estudio de gravación. Simultaneamente sae tamén unha edición reducida de Disco Duro cun CD e un DVD, nos que está unha selección das súas cancións máis coñecidas e os videoclips. Mentres a caixa está pensada para seguidores e coleccionistas a versión resumida aparece como alternativa a aqueles que queren ter unha visión panorámica da traxectoria do grupo.
Folclore para a verbena
Xénero: | 10 / 7 / 2008
Pasaron os tempos no que as actuacións de música e danza tradicional consistían nun grupo de rapaces e rapazas bailando nun palco a medio día. Nos últimos anos están a suceder propostas de colectivos folclóricos nos que a danza comparte espazo coa dramatización, os contos tradicionais e outros recursos escénicos, converténdose en auténticas alternativas aos concertos nas programacións de vilas e festas. De xeito semellante, grupos folk están a artellar propostas escénicas complexas que amosan outros xeitos de se achegar á música de raíz. Espectáculos coma O camiño, Esta noite hai unha fía ou Prestixio amosan as posibilidades do xénero.