CORREO
RSS
Noticias
A Sinfónica de Galicia interpreta a suite dunha ópera inédita de Andrés Gaos
Xénero: | 19 / 12 / 2008
Amor vedado é o título dunha ópera inédita de Andrés Gaos que a Sinfónica de Galicia recupera no Teatro Colón da Coruña. A suite desta peza fai parte do programa dos concertos de Nadal que a formación ofrece hoxe e máis mañá e que contará coa presenza da soprano vasca Ainhoa Arteta. A peza abre os actos de conmemoración do 50 aniversario da morte dun dos compositores galegos máis recoñecidos. Descúbreo neste dosier.
Dez grupos dos 60 volven tocar xuntos para recuperar a memoria do Vigo Ye-yé
Xénero: | 19 / 12 / 2008 + VIDEO
A vigorosa escena musical de Vigo dos anos sesenta queda representada agora no CD, DVD e libreto editados por PAI Música baixo o título Vigo Ye-Ye. Corenta anos e pico despois, aquela xeración de adolescentes volveron reunirse para colaborar na creación dun traballo discográfico que rende tributo a toda unha época. Los Condors, Los German´s, Los Golpes, Los Lejanos, Los Stags, Los Temples, Los Watios, Los Zuecos, Carlos Mateo e o grupo que integran compoñentes dos anos 60 e que seguen activos actualmente, La Comisaría, pasaron polo estudio coas súas formacións completas ou non para deixar pegada musical nun CD con vinte temas orixinais de diversa cor musical, e un DVD con dez vídeoclips. O traballo presentarase hoxe ás 13 horas na cervexería Estrella Galicia na Plaza Compostela da cidade olívica, mentres que ás 19:30 terá lugar a presentación do libro Crónicas de un Vigo Ye-Yé de Fernando Ferreira no Museo do Mar (Alcabre). O CD- DVD distribuirase este domingo co xornal Faro de Vigo e unha parte dos beneficios xerados polo disco serán destinados a AMENCER-ASPACE (Asociación de Parálisis Cerebral). O vindeiro luns á tarde en El Corte Ingles de Vigo terán lugar sinaturas do disco e unha charla, e posteriormente un “guateque” na Sala A!
O Arquivo Nacional dixitalizará os fondos de Roxelio Groba
Xénero: | 18 / 12 / 2008
Un acordo entre a Consellaría de Cultura e a Fundación Roxelio Groba permitirá dixitalizar os fondos bibliográficos e musicais deste compositor. A iniciativa enmárcase no Programa de Dixitalización de Fondos do Arquivo Nacional e contará cun investimento de 56.000 euros a cargo da Fundación Cidade da Cultura. Entre as 534 composicións a dixitalizar inclúense algunhas tan destacadas coma a ópera Floralba, as cantatas Xacobea e Un pobo sen destino ou o Concerto Confidencias entre outros.
O Festival de Zarzuela chega á oitava edición incorporando novos xéneros
Xénero: | 16 / 12 / 2008
Todo lírica é o lema baixo o que se presenta unha nova edición do Festival de Zarzuela de Santiago. Un programa que este ano incorpora outros xéneros musicais como o tango ou o musical americano. A encargada de abrir o certame será a mezzosoprano italiana Manuela Custer, que interpretará obras de Mariano Castelnuovo Tedesco e Xavier Montsalvage. O certame que se desenvolve ata o 3 de xaneiro permitirá debutar en Compostela ao barítono coruñés Borja Quiza quen, pese a súa xuventude, ten un lugar destacado no panorama lírico internacional.
Publícase o segundo disco dos coruñeses Guru Deva
Xénero: | 11 / 12 / 2008 + IMAXES
O grupo Guru Deva presenta cun concerto na Sala Mardi Gras este sábado o seu novo disco Vago, baixo o selo coruñés Wonderland . O disco ten once temas cantados en castelán e foi gravado nos estudios Mobilette Sound de Cecebre. Guru Deva está formado por Félix Arias, Fernando Esclusa, o batería Mecha e o baixista Bieito. Todos eles integrantes de outros coñecidos proxectos musicais anteriores como Viuda Gómez ou simultáneos como Los mecánicos e Lovely Luna. Vago supón o seu segundo disco, cinco anos despois de After All (Rock Indiana, 2003) e segue a liña do grupo nacido en 2001, sons pop-rock dos anos 60. O da coruña será o primeiro dunha serie de dez concertos cos que proximamente percorrerán toda Galicia presentando este traballo.
María do ceo pon música e voz aos poetas de Celanova
Xénero: | 9 / 12 / 2008
A cantante ourensá de orixe portuguesa María do Ceo chega ao seu décimo disco editado cun traballo que, co gallo do centenario da morte de Curros Enríquez no ano 2008, canta a este e outros poetas das terras de Celanova. O luxoso libro-disco edítase co apoio de numerosas institucións como o Concello de Celanova, a Fundación Curros Enríquez, a Deputación Provincial de Ourense, a Mancomunidade Terra de Celanova, “la Caixa”, o Ministerio de Cultura e a Xunta de Galicia. Os 17 cortes do disco No bico un cantar, gravado e mesturado nos estudios Desfase de Ourense, achegan oito poemas de Curros Enríquez ademais de letras xurdidas dos poemarios de Celso Emilio Ferreiro (1912-1979), Castor Elices (1847-1886), Serafín Marqués, Armando González e Méndez Ferrín, este último ademais asina un prólogo da obra.
Vintecatro orquestas seguidas actuarán durante cincuenta horas
Xénero: | 5 / 12 / 2008
Todo este longo fin de semana a música soará sen parar na discoteca Nova Exágono de Lugo na procura da marca de actuacións en local pechado e cuberto. O establecemento quere celebrar o seu cuarto aniversario reunindo a 24 das formacións musicais que amenizan as festas do país para tocar durante 50 horas seguidas. Comezando o sábado ás oito da tarde o tempo de actuación de cada formación será de dúas horas con apenas un intervalo de 10 minutos entre elas. A Orquesta Olympus, posuidora da marca Guinnes de actuación ininterrompida será unha das moitas formacións que pasen pola discoteca.
O colectivo Sinsal presenta no Cultur.gal un proxecto educativo para divulgar a música
Xénero: | 4 / 12 / 2008
¿Cál foi a primeira gravación galega?¿Que eran as maquetas? ¿Onde naceron os picadiscos? ¿Cómo se fabrica un vinilo? ¿Deseñou Picasso portadas de discos? ¿Que é o Backspin?. Estas son as preguntas que pretende respostar o Colectivo Sinsal co seu proxecto Escola Sinsal: a historia da música enlatada. Un proxecto educativo que o colectivo vigués presenta hoxe no marco do Cultur.gal, o Salón das Industrias Culturais, que se desenvolve na Coruña ata o vindeiro domingo. O proxecto adapta as súas actividades, que van desde obradoiros, montaxes e actuacións, para ir descubrindo de xeito práctico outras formas de ver a música.
A Sinfónica de Galicia participa no proxecto de YouTube para crear na rede unha orquestra
Xénero: | 3 / 12 / 2008
“A música clásica só ocupa o 1% dos contidos dixitais en Internet” afirmaba David Robles, un dos responsables de Google en España. Unha situación que pretenden mudar coa creación dunha orquestra na rede a través do portal de vídeos YouTube. Por iso, ata o 28 de xaneiro están dispoñibles as distintas partes da partitura que, os que queiran participar, deberán interpretar e gravar. Os vídeos que se suban a Youtube serán seleccionados por un xurado que seleccionará os cen membros do conxunto. Aproveitamos que a Orquestra Sinfónica de Galicia participa no proceso de selección dos músicos, para revisar os diferentes proxectos desta entidade.
Milladoiro une musicalmente o eixo atlántico
Xénero: | 2 / 12 / 2008 + AUDIO
Milladoiro presentou o pasado 25 de novembro no Teatro Colón de A Coruña o seu novo traballo discográfico, A Quinta dás lágrimas nun concerto con motivo da conmemoración do día Internacional para a eliminación da violencia contra as mulleres. O novo disco presenta a conxugación musical conxunta de Galicia e Portugal collendo como inspiración os amores de Don Pedro de Portugal e Dona Inés de Castro, galega que foi raíña de Portugal despois de morta. O disco, editado pola discográfica PAI Música dirixida por Segundo Grandío, xurde das sinerxias entre a produtora do grupo, Cormorán, e o Eixo Atlántico. Este disco fai o número vinte e tres da historia do grupo máis importante da música folk galega e coincide coa saída do disco ensolitario do seu arpista Roi Casal. Os oito temas de A Quinta das Lágrimas van desde o medioevo representado polas Cantigas de Alfonso X ata a o contemporáneos José Afonso os poemas de Manuel Antonio, Cunqueiro ou Pessoa pasando polo folclore popular das dúas beiras do Miño.