CORREO
RSS
Noticias
Oscar Ibáñez presenta un disco de homenaxe a Ricardo Portela o Gaiteiro de Viascón
Xénero: | 23 / 3 / 2017
Co gallo dos 25 anos do pasamento do gaiteiro Ricardo Portela (Viascón, 1920-Pontevedra-1992) Oscar Ibáñez presenta un novo disco baixo o título Aires de Pontevedra. Homenaxe a Ricardo Portela, 25 Anos Pasamento no que homenaxea ao Gaiteiro de Viascón cunha selección do seu repertorio máis característico interpretado coa súa propia gaita de dixitación pechada. A efeméride incluirá ademais diversos actos este venres nos concellos de Cerdedo-Cotobade, cunha ofrenda floral ante o busto dedicado ao músico, e en Pontevedra co descubrimento dunha placa na rúa Laranxo e unha posterior gala musical no Teatro Principal. No disco colaboran na percusión destacados artistas que gravaron ou tocaron con Ricardo Portela na década dos 80 fundamentalmente como Xosé V. Ferreirós (Milladoiro), Chuco Estevez Gonzalez (E-Trad), Gonzalo Caride (artesán-músico), Wenceslao Cabezas "Polo" (Escola Municipal de Danza do Concello de Vigo), Antón López "Toniño" (Treixadura), Manuel Solla (Os Cruceiros), Xosé Carlos V. Bouza e Jesus Corral Fernandez (Xarabal), Miguel Souto (O Fiadeiro), Alberto Costas (PelePau), Manuel Alonso e Xosé María Gutiérrez (Noitarega). O álbum foi gravado, mesturado e masterizado en Chispún! Estudio (Vigo) por Rubén Troitiño, edita e distribúe Inquedanzas Sonoras baixo licenza de Oscar Ibáñez. Non é a primeira vez que Ibáñez rende tributo a este mestre da gaita, xa en 2008 impulsou unha homenaxe en forma de dobre CD editado por Edicións do Cumio baixo o título Foliada nas Rías Baixas. Homenaxe a Ricardo Portela, o Mestre.
O Ciclo 'Música Actual Galega II' estreará en Ourense obras de cinco compositores
Xénero: | 22 / 3 / 2017
A Fundación SGAE e a Asociación Galega de Compositores convocan a segunda edición do ciclo Música Actual Galega , unha serie de concertos que ten como obxectivo incentivar a programación do repertorio clásico galego dos séculos XX e XXI. Na cita ourensá interpretaranse a piano e voz as obras Na Xanela de Luis Carro; Sós de Juan Durán; MariNana de Julio Montero; Nouturno deLuis Carro; Romance de Arlequín de Julio Montero; Amor de Gloria R. Gil; Eu ben quixera de X. Comesanha e Le cimetière marin de Xan Viaño. Case todas a sobras son de estrea absoluta neste concerto que terá lugar no Liceo de Ourense, con acceso gratuíto, o sábado 25 de marzo (19:30 horas) coa participación das voces de Patricia Rodríguez e Gabriel Alonso e o piano de José Manuel Yáñez. Está é a terceira cita deste evento itinerante que xa comezara en Santiago en decembro e tamén tivo outra cita en Vigo. O pianista José Manuel Yáñez, foi fundador do Trío Groba e integrante da Orquestra de Cámara Galega, tocará este repertorio con dúas grandes voces. Patricia Rodríguez é titulada profesional en Piano e titulada superior en Canto; colaborou co coro da Orquestra Sinfónica de Galicia e co coro da Ópera de Oviedo, entre outros. Gabriel Alonso é titulado profesional en Canto e Saxofón; foi representante galego no concurso Intercentros da Fundación Orfeo e Mellor Intérprete de Zarzuela no concurso Amigos da Ópera de Santiago de Compostela.
Sés e Quinta do Bill fanse cos premios de música Ari(t)mar
Xénero: | 22 / 3 / 2017
A segunda edición do certame Ari[t]mar, que convoca Escola Oficial de Idiomas de Santiago de Compostela, ten xa gañadores na súa categoría musical. Do reconto dos 5.043 votos que se emitiron saiu como mellor canción galega de 2016 A paz esquiva, do álbum Oporse á extinción de Sés. A mellor canción portuguesa foi para Faz bem falar de amor, do disco Todas as estações de Quinta do Bill. Nesta ocasión, ademais da comunidade educativa da EOI de Compostela, participaron tamén no certame dez centros de ensino de primaria e secundaria así como o Conservatorio Profesional de Música de Santiago de Compostela, as Escolas Oficiais de Idiomas de Lugo e de Pontevedra e a Facultade de Filoloxía da Universidade de Santiago de Compostela.
Escuchando Elefantes presenta o seu terceiro disco 'Hope'
Xénero: | 21 / 3 / 2017
O dúo Escuchando Elefantes presentará este venres en concerto no Playa Club da súa cidade, Coruña, o seu novo disco Hope, o terceiro do seu currículo. O disco xa está en formato dixital en todas plataformas desde o pasado venres e algúns dos seus temas foron adiantándose en vídeos desde hai meses, como Anyway. A base de percusión e guitarras Silvia Rábade e Carlos Tajes defenderan os seus temas nos escenarios na xira que agora comezan e que en parte farán como teloneiros do irlandés Glen Hansard na súa xira española. Os dez temas de Hope están cantados en inglés e preséntanse cun aire máis eléctrico que os anteriores traballos do dúo coruñés, algo máis achegado ao rock que ao folk americano como nos anteriores. Tras este concerto Escuchando Elefantes irán aGranada e non será ata o primeiro de abril cando poidamos escoitalos de novo en terras galegas en Ferrol. O disco en formato CD pode adquirirse a través da súa páxina web.
IGMIG presenta o seu disco 'Ai, que lío'
Xénero: | 20 / 3 / 2017
O dificilmente clasificable trío IGMIG, formado por por Mig Seoane (voz e guitarra), Nacho Muñoz (voz e teclados) e Suso Feixón (batería),veñen de presentar o seu novo traballo, o segundo que publican e que xa está dispoñible nas plataformas dixitais. Ai, que lío reúne de novo toda a capacidade ecléctica da banda de mesturar estilos e buscar resultados creativos sen concesións nos seus 15 temas "multiculturais" cunha liña de desenfado festivo sempre presente. Rock psicodélico, electrónica, funky rock progresivo , folk e case calquera influencia ten cabida na oferta musical de IGMIG. A xira de presentación deste traballo promete como sempre postas en escena teatrais e directos explosivos. Este é o seugo traballo despois do EP Shaishakarrascaishe !! en 2014. A banda presentou un videoclip do tema Ostiá! gravado en o club El Náutico, de San Vicente e coa actuación protagonista do Leo Arremecághona. IGMIG é unha das bandas que fan parte do colectivo Metamovida. A gravación do disco contou coas colaboracións de María de Mallou,Elena Vazquez (Trilitrate), Macarena Montesinos, Carlos Castro, Olalla Vidal López, Gonzalo Castro, Iago Carballo Alonso, José Antonio López López, Mercedes Peón, Lúa Gándara e João Paulo.
Emilio José publica na rede os 64 temas de Nativos digitais
Xénero: | 17 / 3 / 2017
O Bandcamp de Emilio José está que ferve estes días. O mércores 15 de marzo o músico de Quins publicaba neste espazo Nativos digitais, un proxecto que comprende nada menos que 64 cancións. O traballo preséntase como un mixtape, é dicir, unha gravación na que se recombinan fragmentos de audio, efectos e bases rítmicas sobre as que o compositor introduce os seus persoais recitados de hip-hop. Moita experimentación, crítica social, poesía electrónica e o intenso mundo persoal de Emilio José danse cita neste proxecto con pistas como Referentes culturais, 15-M, Hail Errejón!, Second Life ou eucalyptus. Todos os temas foron compostos entre xullo de 2016 e pasado mes de febreiro, segundo asegura o artista no seu Bandcamp. Emilio José está ao vivo na Casa do Pobo de Cangas mañá, 18 de marzo.
O Festival SonRías Baixas ofrece 15 bandas no seu 15º aniversario
Xénero: | 16 / 3 / 2017
Co cartel xa pechado chegará á primavera o festival de verán SonRías Baixas. A cita que se celebrará en Bueu entre o 3 e o 5 de agosto deu a coñecer esta semana os últimos nomes que completan a súa oferta musical. O Festival SonRías Baixas celebra a súa 15ª edición por todo o alto, con 15 bandas galegas, españolas e internacionais. O evento ofrece a delirante combinación de ska, punk, reggae, dub e folclore dos bosnios Dubioza Kolectiv; o dub do rei da remestura Mad Professor; a descarga enerxética dos valencianos Zoo; o ska combativo dos Dakidarría; o blues experimental dos Guerrera e o tributo aos Extremoduro dos cacereños Pedrá. Todos estes súmanse aos xa anunciados Todos Tus Muertos, Estopa, Amparanoia, SES, Narco, ao proxecto persoal do cantante de El Puchero del Hortelano, ARCO, nun cartel amplo e diverso que completarán as bandas gañadoras do concurso Sonidos Mans e máis o Dj SonRías. Rock, punk, rumba, rap, reggae, ska, dub, blues, e música de raíz conforman así un menú musical en todo caso cheo de enerxía, que vai do máis popular ao máis alternativo e co que o SonRías Baixas celebrará a súa 15ª edición tras o éxito acadado o pasado ano no que conseguíu un novo record de asistencia reuníndo a 16.500 persoas, que supuxeron para Bueu unha inxección económica de 1.200.000 euros. As entradas para esta edición do Festival están á venda na web e máis nos puntos de venda físicos por 35,5 € máis gastos.
Triángulo de Amor Bizarro e Novedades Carminha finalistas e competidores nos Premios MIN
Xénero: | 16 / 3 / 2017
A música independente feita en Galicia segue demostrar a súa forza e bo momento. Proba diso é Triángulo de Amor Bizarro (TAB) que segue a colocar o seu disco Salve Sumeria en todos so referentes de éxito da música independente. Neste caso o grupo e o seu disco optan con sete candidaturas como finalistas nos Premios MIN da Música Independente, só o rapeiro Kase.O iguala ao grupo do Barbanza en candidaturas. Ademais deles tamén Novedades Carminha con Campeones del mundo recibe o recoñecemento como finalista en catro candidaturas conseguindo así ter pasado as fases de votación populares a inicial do xurado. As dúas bandas galegas competirán entre elas en con outras tres finalistas nos Premios ao Mellor disco do ano, Mellor artista e Mellor Deseño Gráfico. Ademais TAB competirá tamén con Xoel López na categoría de Mellor directo do ano 2016. O coruñés levantou o pasado ano dous destes premios polo seu disco Paramales. Alén disto o trío colocase como finalistas nas categorías de Mellor Canción, por Baila Sumeria, Mellor Álbum de Rock e Mellor Produción Musical para Carlos Hernández polo traballo feito con Salve discordia. Pola súa banda Novedades Carminha buscarán levar o premio ao Mellor Album Pop. Tanto TAB como Novedades carminha xa foron recoñecidos a primeiros do ano aparecendo so seus traballos de xeito moi destacado nas listas elaboradas polos principales medios de comunicación sobre música independente.
The Soul Jacket presenta 'VOL.III' o seu traballo máis sureño
Xénero: | 13 / 3 / 2017
The Soul Jacket VOL. III o novo traballo da banda viguesa xa está dispoñible en formatos dixitais e esta semana preséntase en concerto coincidindo coa súa saída en formato CD digipack e nunha edición limitada en vinilo. Once temas tras unha enigmática portada sen título nin referencia,cantados en inglés e gravados en directo nos estudios Guitar Town en Cantabria coa asistencia de Hendrik Rover como nos anteriores dous traballo da banda. O álbum foi masterizado nos estudios Golden Mastering de California. Neste VOL. III a banda achégase máis aos sons sureños do folk e blues americanos psicodelia e country rock, máis afastados de outras influencias funk que estaban presentes nos traballos anteriores. Á saída á venta do disco físico será o venres 17 de marzo en Discos Elepé e esa mesma noite comeza a xira de presentación en La Iguana Club onde estarán dúas noites tras das que irán facer un concerto en Londres. Será a finais de abril, o 28, cando volverán a estar en terras galegas actuando en Lugo, A Coruña, Santiago, Ferrol e Ourense presentando este novo traballo.
Talabarte fai pleno en todas as candidaturas aos Premios Opinión
Xénero: | 10 / 3 / 2017
A XVIª edición dos Premios Opinión da Música de Raíz, vencellados ao xornal La Opinión de Coruña, ven de desvelar as candidaturas finalistas que optarán a galardón. Sete discos lograron obter un lugar entre algunha das candidaturas elaboradas polo xurado, composto por oito persoas que falan sobre música de raíz en diferentes medios de comunicación. O disco Fake de Talabarte conseguiu ser o único presente nas tres categorías dos premios por mellor álbum, mellor tema orixinal e lograr Pedro Pascual os votos necesarios para ser finalista na categoría de mellor artista. Ademais dalgúns nomes que xa concorreron en edicións anteriores cos seus proxectos musicais outros artistas, mesmo con anos de carreira logran por vez primeira entrar nas candidaturas, é o caso de Rosa Cedrón e Xoán Curiel. Caxade consegue dous nomeamentos entre a lista de finalistas, pola canción Nábia e como artista. Nesta última categoría é a terceira vez que aparece na historia dos galardóns, dos que xa resultou gañador na décimo terceira edición.