CORREO
RSS
Noticias
O XIV Zona da Zanfona amplía o seu programa
Xénero: | 28 / 6 / 2018
Coas prazas esgotadas chega a Rianxo, os vindeiros 6,7 e 8 de xullo, a XIV edición de Zona da Zanfona. O encontro de zanfonistas conta este ano co sueco Johannes Geworkian Hellman que ofrecerá un concerto solista e un curso para especialistas. Canda a el, Óscar Fernández impartirá o curso de iniciación, e como novidades o programa incluirá un de improvisación oral con Alba María e Benito Lobariñas e outro de bailes do mundo con Mercedes Prieto e Sergio Cobos.
A quinta edición de +QueJazz da Coruña ofrece 14 actuacións
Xénero: | 27 / 6 / 2018
O quinto festival +QueJazz da Coruña terá lugar do 4 ao 27 de xullo en dous dos lugares emblemáticos do jazz desta cidade, o Garufa Club e no Jazz Filloa. Esta edición do evento ofrecerá 14 concertos de jazz, swing e R&B. +QueJazz arrancará o 4 de xullo no Garufa co Andrea Alvergue Trío e concluirá o 27 dese mesmo mes coa Garufa Blue Devils Big Band. Entre as 14 actuacións que compoñen o cartel desta quinta edición, destacan así mesmo dúas das voces femininas máis interesantes do panorama actual: o 13 de xullo Trudy Lynn, unha das grandes divas do blues, actuará por primeira vez na Coruña no Garufa Club, que acollerá a La Negra o 21 de xullo. Pola súa banda, o Jazz Filloa ofrecerá os directos do Alejandro Vargas Trío ou do Roberto Somoza Quartet, entre outros. As entradas para os concertos nesta sala poderán adquirirse de xeito anticipado mediante reserva por correo electrónico, mentres que para os do Garufa estarán dispoñibles a través da plataforma Notikumi.
A música inglesa protagonizará a nova temporada da Filharmonía de Galicia
Xénero: | 27 / 6 / 2018
O Auditorio de Galicia en Compostela acollía onte a presentación da nova temporada da Filharmonía de Galicia. Baixo o lema de Arquipélago de sons, os compositores ingleses protagonizarán os concertos de abono. Nomes como Ralph Vaughan Williams, Cecil Coles, Edward Elgar, William Walton, Frederick Delius, Malcolm Arnold ou Jonathan Rathbone, canda ás Sinfonías Londres de F. J. Haydn soarán nos 21 recitais de abono da orquestra. Canda a estes, a formación desenvolverá un total de 23 concertos en diferentes localidades galegas, con 10 actuacións en Vigo, 4 en Ferrol, 2 na Coruña, 2 en Ourense, 2 en Lugo e 1 en Pontevedra, así como un concerto en outubro no Auditorio Nacional de Música de Madrid.
La Casa de los Ingleses sacan brillo ao pop no seu primeiro LP
Xénero: | 27 / 6 / 2018
A banda pontevedresa La Casa de los Ingleses xa ten dispoñible á venda e en plataformas dixitais o que é o seu primeiro longa duración, La Tierra es plana (2018). O grupo autoedita o seu traballo que ven recoller a estela daquel primeiro EP de 2015
Pablo Castaño Quartet achégase ás fontes tradicionais desde o jazz con 'A-la-láa'
Xénero: | 25 / 6 / 2018
Músico de enorme experiencia e curtido ao longo de 20 discos nos que interveu na súa carreira, o saxofonista Pablo Castaño formou un cuarteto á volta da súa estadía neoiorquina de 6 anos. É con esta formación, Pablo Castaño Quartet, coa que saca o primeiro disco co seu nome á fronte. A-la-láa (aCentral Folque, 2018) foi gravado por Pablo Barreiro ao vivo durante dúas sesións de improvisación musical en xaneiro de 2018 e masterizado en Nova York polo produtor Kastuhko Naito. Castaño está acompañado na gravación de dous nomes relevantes da escena galega, como son o pianista Yago Vázquez, residente en Nova York, e o batería Iago Fernández. A eles súmase o contrabaixista arxentino Demian Cabaud e a cantante Ugia Pedreira, que está presente en dous dos temas do disco: Alalá do vento e Alalá da estrela e da Lúa. Dez temas conforman este traballo que desde o jazz aproxímase á música tradicional galega toma e como punto de partida os cantos libres como os alalás e as coplas. O álbum parte de fontes históricas como o Cancioneiro Musical de Galicia, de Casto Sampedro, e tamén de recollidas contemporáneas coma o Cancioneiro Popular Galego da etnomusicóloga suíza Dorothé Schubart. O disco xa está dispoñible para a venda e en plataformas dixitais.
O 14º ImaxinaSons presenta programa con gran presenza de jazz americano e galego
Xénero: | 19 / 6 / 2018
O Festival de Jazz de Vigo ImaxinaSons inicia a súa nova etapa baixo a dirección artística dos músicos Yago Vázquez e Felipe Villar e coa presentación onte a cargo do alcalde da cidade Abel Caballero manifestando o obxectivo de "fabricar" nunha década "un certame de ámbito europeo". Así o dixo na presentación da 14ª xeira desta iniciativa cultural que o Concello dota para esta edición con 150.000 euros. O festival, que nas anteriores etapas servía de xa de centro da difusión da creación jazzística europea contemporánea, ofrece este ano un programa máis achegado á fonte americana do jazz. Formacións galegas como Manolo Gutiérrez Trío, The Alley Stompers ou Comando Radar comparten un importante cartel de actuación coas propostas de reputados artistas estadounidenses como o Kenny Garrett Quintet, Charenée Wade, Glenn Zaleski Trío, Kurt Rosenwinkel Caipi Band ou o espectáculo Equality de Drewes, Lee & Hirshfield no peche desta edición. O Concerto de Apertura o próximo venres, 29 de xuño, no Auditorio Municipal vén da man do británico Soweto Kinch en trío, saxofonista, MC e compositor multipremiado que se especializa nun estilo de marca rexistrada de jazz, rap e spoken word, a diferenza de calquera outro intérprete no mundo. O 14 ImaxinaSons contará con 19 formacións e solistas internacionais, nacionais e galegos Os espazos nos que se vai desenvolver esta edición, que tamén ten un importante número de jam sessións, son o Auditorio Municipal de Vigo, A Casa das Artes, o Conservatorio Superior de Música ou lugares ao aire como a rúa Londres ou a Praza da Princesa.
Pauliña preséntase no panorama musical con De-Xeneración
Xénero: | 18 / 6 / 2018
Desde Cambados chega Paula Chave, Pauliña a engrosar a listaxe de músicas que traballan na nosa lingua. Os oito temas de De-Xeneración son a carta de presentación desta artista que mestura country, folk, blues, pop e soul en galego. Cancións que apostan pola enerxía e a reivindicación e que ven a luz da man de Xoinx Records. Gravado nos estudios desta firma en Bandeira, o tema de presentación, Non é ficción contou coas colaboracións de Heredeiros da Crus e Os Diplomáticos de Monte Alto, entre outros. Lolo Arinción, Francisco Montoto, Julián Gullón e Iago Jorge compoñen a banda que acompaña a Pauliña neste primeiro lanzamento.
A Sinfónica de Galicia aposta por Shostakóvich para a súa nova temporada
Xénero: | 15 / 6 / 2018
A música rusa, e en particular Shostakóvich centrarán a programación da Orquestra Sinfónica de Galicia para a temporada 2018/2019. A formación presentaba onte a súa programación, na que inclúe cinco sinfonías deste compositor (nº 1, 6, 7, 11 y 12), canda a obras de Rachmáninov (Sinfonía nº 2, Conceerto para piano nº 3 e A illa dos mortos), Chaikovski, Lyadov, Stravinski e Gubaidulina. No programa inclúense tres estreas mundiais e dúas estreas en España ata un total de veinte novos títulos que se incorporarán ao repertorio da formación.
Luís Fercán presenta en Compostela o seu álbum debut
Xénero: | 15 / 6 / 2018
O Salón Teatro de Santiago colle esta noite o concerto de presentación en Galicia de Grieta, o álbum de debut de Luís Fercán en solitario. O compostelán, que iniciou a súa carreira en Persé, comeza con este lanzamento un proxecto como cantautor no que mestura letras poéticas con sons elaborados e toques indies e pop. Un total de dez temas publicados por EO!Música poderán escoitarse hoxe a partir das 21 horas nun recitais nos que o cantante estará acompañado por toda a súa banda.
Nicolás Pastoriza ofrece valor musical engadido co disco 'PyME'
Xénero: | 14 / 6 / 2018
O músico vigués Nicolás Pastoriza volve á carga con PyME, un novo traballo autoeditado que presenta este sábado en concerto no Museo do Mar e que sae á venda en formato de dobre vinilo con edición limitada. O novo disco, que aparece coa fasquía dunha declaración de I.V.E. como portada, ábrese co tema Ovnis entre Cíes y Nigrán no que o músico fai homenaxe á temática da ciencia ficción que xa ten explotado en outros traballos anteriores e mesmo na súa época á fronte do grupo Ectoplasma, na mesma liña tamén está no álbum o tema Poltergeist. Para Ovnis entre Cíes y Nigrán, primeira mostra escoitable do disco, Pastoriza conta coa colaboración nas voces de Iván Ferreiro, quen foi produtor do disco Poetas & Motocicletas (autoeditado) que Nicolás Pastoriza presentou en 2013. Os dezaseis temas de PyME son da autoría do músico vigués e graváronse no seu estudio doméstico, mentres que a mestura e masterización levouse a cabo nos Estereoarte estudios da cidade olívica. Ao longo deste traballo, o quinto da súa carreira en solitario, o vigués ofrece un pop elegante e traballado, tanto nas letras como nas melodías, que fuxe de simplismos sen rexeitar a sinxeleza necesaria do xénero pero presentando un resultado sofisticado e algo melancólico ás máis das veces. A presentación está prevista ás 20:30 horas e contará tamén coa colaboración de Brais Iriarte, Sergio Martínez Puga e Marcos Rivera no directo.