CORREO
RSS
Ti estás aquí > Inicio / música en galego
Música en galego
A cultura galega en París homenaxea o gaiteiro Ramiro Rodríguez
Xénero: | 14 / 3 / 2008
O 78 aniversario de Ramiro Rodríguez vai ser moi especial. Este gaiteiro, integrante do grupo Aires da Terra, leva máis de cincuenta anos difundindo a música tradicional galega en Francia. Un feito polo que a Casa de Galicia en París, o Centro de Estudos Galegos da Universidade da Sorbona e o Círculo Cultural Galego da capital parisina lle renderán unha homenaxe este sábado.
Unha exposición permanente amosa en Lugo 400 instrumentos tradicionais
Xénero: | 13 / 3 / 2008
O Centro de Artesanía e Deseño que depende da Deputación Provincial de Lugo abre esta tarde unha exposición permanente sobre música tradicional. Na mesma pode verse unha selección de 400 instrumentos entre os que hai mostras do século XVIII que constitúe, segundo Lara Méndez, vicepresidenta desta institución, “a única exposición de instrumentos musicais catalogada e baseada en criterios científicos que existe en Galicia”. Segundo explicou a responsable, este catálogo quere servir como base para futuras investigacións e análises do patrimonio musical.
Abe Rábade reivindica a actualidade de Rosalía en chave de jazz
Xénero: | 11 / 3 / 2008 + AUDIO + IMAXES
Desde hoxe estará nas tendas o disco “Rosalía 21” (Falcatruada) saído do espectáculo multimedia co mesmo nome que se presentou no Teatro Mella da La Habana o pasado 23 de febreiro. O espectáculo, dirixido musicalmente por Abe Rábade e literariamente polo poeta Anxo Angueira, proporciona unha visión contemporánea da poesía de Rosalía de Castro (1837 – 1885). O disco conta con dez temas con textos da poeta compostelá e un corte extra cun fragmento do prólogo de Cantares Gallegos. A declamación dalgunhas das obras de Rosalía na voz de Angueira vaise mesturando coa música en chave de jazz composta por Rábade e a poesía cantada por Guadi Galego. O proxecto procura “unha renovación estética da temática rosaliana adaptada aos novos tempos:melodía, timbre, harmonía e ritmo.” No disco participan Abe Rábade (piano e composición), Anxo Angueira (voz recitada), Guadi Galego (voz), Jesús Santandreu (saxo tenor), Nelson Cascais (contrabaixo) y Bruno Pedroso (batería).
O IGAEM publica os datos definitivos da Rede Galega de Música ao Vivo do 2007
Xénero: | 10 / 3 / 2008
Setenta e cinco grupos ou solistas percorreron o país durante o 2007 actuando en corenta e oito salas ao abeiro do programa da Rede Galega de Música ao Vivo no que o erario público corría con parte dos gastos do pago aos artistas. O boletín e_scena do IGAEM publica no seu número de marzo os datos dos resultados en funcións, facturación e asistencia. O balance total é de 798 funcións, unha facturación de 94.181 euros e máis de 37.000 persoas asistindo aos concertos. As cifras detalladas debullan significativas diferenzas de éxito entre as diferentes propostas e salas. Así o grupo que conseguiu unha mellor facturación por concerto foi a formación feminina Faltriqueira que acadou unha media de 387,70 euros, séguena os grovenses Nadadora e Dios Ke te Krew con algo menos de trescentos euros de media. No outro lado do espectro sitúanse os solistas Xoán Curiel e Diego Massimini con 38,10 euros e 40 euros de media por concerto respectivamente. Desde o lado das salas tamén pode verse que foron a Sala Aturuxo de Bueu e a Sala Ache de Marín as mellor paradas cunha media de 298,30 euros e 228,68 euros de facturación media por concerto, mentres que a Sala Badulake de Ordes foi a que menos recadou cunha estimación de 24,60 euros por concerto. No que a asistencia se refire o Forum Celticum de Culleredo conseguiu unha media de 132,72 espectadores por concerto, a cifre máis alta en contraposición aos 15, 53 de La casa de Arriba en Vigo. A ocupación media das salas foi do 35,92 por cento.
Comeza a xira do musical “Galleciae” que mestura tradición galega coa sinfónica
Xénero: | 6 / 3 / 2008
A soprano Susana de Lorenzo, o tenor Alberto Cunha, o grupo folk Liorna, as cantareiras e o grupo de baile da agrupación “Trompo ós pés” mais a Orquestra Sinfónica de Melide son os artistas que participan en “Galliciae”, un variado espectáculo musical galego. Malia que a obra se estreou o pasado mes de agosto, agora comeza a xira que a levará por Santiago, Ferrol e A Coruña.
Os Premios Opinión premiarán traxectorias sobranceiras a prol do folk
Xénero: | 3 / 3 / 2008
Na súa vindeira edición os Premios Opinión de música folk incluirán un novo galardón para premiar o apoio persoal, empresarial ou institucional á música tradicional. O novo galardón que presenta esta sétima edición dos premios convocados polo xornal coruñés servirá para recoñecer e homenaxear a figuras que resultaron de especial importancia para a evolución artística e industrial do folk no país. O premio non ten dotación económica sendo puramente honorífico. Ata o de agora estes premios só premiaban traballos discográficos de folk galego editados no ano anterior.
Preséntase publicamente o primeiro punteiro afinable para gaita
Xénero: | 3 / 3 / 2008
Hai oito anos de traballo, o artesán Lis Latas comezaba os traballos para crear un punteiro afinable para gaitas. Canda a el, o intérprete Pepe Vaamonde presentaba o pasado sábado a versión final desta peza, un útil que permite afinar por primeira vez o instrumento sen necesidade de mudarlle pezas nin modificar a textura da palleta e que mantén o son malia a mudanzas ambientais. A maiores, a peza amplía a versatilidade do instrumento con dúas novas notas, ata o punto de que, na presentación, interpretouse un Preludio de Bach para demostrar as posibilidades do mesmo.
O Concello de Vigo presenta o proxecto da nova Escola de Música Tradicional
Xénero: | 3 / 3 / 2008
A concelleira de Educación de Vigo, Laura López presentaba o pasado xoves o proxecto da E-Trad, a nova Escola de Música Tradicional e Folk que se vai pór en marcha nesta cidade. O centro, que dirixirá Rodrigo Romaní, achegará dous itinerarios formativos (afeccionado e profesional) e contará con oito profesores, dous máis dos que ata o de agora participaban na aula de música tradicional. A maiores, incrementarase tamén en dous o número de especialidades, que pasan a nove, a cantidade de horas lectivas, (sesenta e cinco máis, ata sumar 200) e o orzamento, que ascenderá a 221.000 euros.
A Regueifa presenta as novidades discográficas de Ataque Escampe e Vale Tudo
Xénero: | 28 / 2 / 2008 + VIDEO + AUDIO
“Galicia es una mierda” é o segundo disco do grupo compostelán Ataque Escampe formado por Roi Vidal, Marco Gelpi, Samuel Solleiro, Miguel Mosqueira e Alex Charlón, o disco gravouse no estudio Pousada Son de Ames. Con trece cancións, 47 minutos de musica, o grupo de rock pretende acoller “todas as contradicións existentes na Galiza, no mundo e na historia da música. De Manuel Antonio aos Tonechos, de John Wayne a Lenin, e de Neil Young aos Panchos.” Por outra banda os lucenses Vale Tudo estréanse cun disco homónimo de seis temas. Vale Tudo nace en 2003 a partires de ideas que non tiñan cabida en Triquinoise grupo do que formaban parte, Rafael Mallo e Oscar Vilariño, os dous membros de Vale Tudo. O grupo fai unha revisión de estilos como o blues e o folk americanos pasados por un filtro de experimentación e aderezados con letras “concretas, suxerintes e esqueléticas.” Como é habitual o netlabel A Regueifa Plataforma publica os discos completos na rede baixo licencia Creative Commons 2.5, tamén estarán dispoñibles copias á venda.
A segunda edición do Circuíto Cultura Vai 4x4 achegará os seus concertos aos concellos galegos entre abril e xuño
Xénero: | 25 / 2 / 2008
Canción de autor, fusión, tradición e jazz son os catro bloques que compoñen a segunda edición do Circuíto Cultura Vai 4x4 que acaba de presentar a Consellaría de Cultura. Ata o vindeiro vinte de marzo os concellos interesados poden contratar as actuacións, que pagarán a medias co departamento autonómico. Carmen Dor, Silvia Penide, Narf, Treixadura, Mercedes Peón, Víctor Aneiros Band, Quempallou, Abe Rábade Trío ou Xacobe Martínez Fernández Quinteto serán algúns dos dezaseis grupos que participan do programa.