Ir ao contido directamente.


Noticias

Nace un festival de rock como froito da edición do disco “Gallaecian Metal Compilaton”

Xénero: Rock | 2 / 7 / 2007

not_10267.jpg

En febreiro do 2007 saíu ao mercado o duplo disco “Gallaecian Metal Compilation” editado polo selo Falcatruada. O disco reunía unha escolma de temas de 26 grupos galegos de “hard” e “metal” rock. O proxecto foi organizado polos propios grupos coa intención de dar a coñecer a vizosa saúde do “metal” no país e tan boa semella ser esa saúde e tanta unión creou entre os grupos que agora o proxecto segue a funcionar e pasa a converterse no festival “Gallaecian Metal Fest” no que durante dous días dez destes grupos tocarán en directo a súa música. O evento terá lugar os vindeiros días 13 e 14 de xullo na Carballeira da Guía, en Vigo e a entrada será de balde.

Máis información en Gallaecian Metal Fest
e sobre o disco en Gallaecian Metal Compilation

Simone Kermes inaugura o festival de música Vía Stellae

Xénero: Clásica/Lírica | 2 / 7 / 2007

not_10264.jpg

O festival de Música de Compostela abre mañá a súa segunda edición con Simone Kermes. A soprano alemá repite outra vez neste programa que malia nacer como evento de música antiga e barroca, amplía xa a súa variedade incorporando case todos os xéneros. Ata o 26 de xullo, o Auditorio de Galicia, o Teatro Principal, Salón Teatro e as igrexas de Bonaval e da Universidade serán algúns dos escenarios deste festival que se achegará a trinta e tres concellos das oito rutas xacobeas.

Máis información en La Voz de Galicia, no web do Festival e na nosa hemeroteca

Sumrrá gravará tres noites de directo na Sala NASA para o seu vindeiro disco

Xénero: Jazz/Blues | 29 / 6 / 2007 + VIDEO

not_10248.jpg

O trío formado por LAR Legido, Xacobe Martínez e Manuel Gutiérrez ofrecerá na Sala NASA de Santiago os vindeiros 4, 5 e 6 de xullo tres noites de música en directo que serán gravadas para dar forma a un novo disco. Contando coa loxística da sala e do estudio Soyuz o trío de jazz gravará así ante público o que será o seu terceiro traballo discográfico despois de “Sumrrá” (Madame Mir, 2003) e “2” (2006) e que ademais neste caso tamén levará a gravación audiovisual para un DVD. A idea da gravación do directo xurdiu despois do concerto ofrecido por Sumrrá en xaneiro pasado na NASA. Sumrrá nace no verán do 2001, como consecuencia dunha serie de contactos dos tres implicados en numerosas “jam sessions”. Sumrrá traballa basicamente sobre composicións orixinais.

Máis información na Sala NASA

Ana Belén Monís gaña o concurso de cantantes “Son de estrelas” da TVG

Xénero: Melódica | 28 / 6 / 2007

imaxe non dispoñible

Cunha cota media de pantalla de 16,8 % e 145.seguidores rematou a primeira edición co concurso de cantantes “Son de estrelas” da TVG. A verinense de 25 anos Belén Monís resultou a gañadora deste certame de voces, impoñéndose no reconto de chamadas á outra finalista, María Chenlo, de Caldas. Na gala final Monís, que leva máis de cinco anos actuando con orquestras, interpretou os temas “Voa alto” e Lela. A resolución do concurso estivo marcada por un empate porcentual moi axustado das dúas finalistas que tivo que resolverse co reconto das chamadas gañando Belén Monís por 3.403 fronte ás 3.363 de María Chenlo. A gañadora gravará un disco e leva ademais un coche e unha viaxe ao Caribe.

Máis información en La Voz de Galicia

Quempallou mesturan o folk con hip-hop no seu terceiro traballo discográfico

Xénero: Folk | 27 / 6 / 2007 + IMAXES

not_10229.jpg

O terceiro disco de Quempallou rompe un silencio relativo da banda, xa que aínda que xa van tres anos desde a gravación de “Estremonías”(2004) o grupo non deixou en ningún momento as actuacións en directo. Na gravación de “Polo aire” (Zouma Records) a banda contou con diversos colaboradores. Unha das propostas musicais máis atípica chega da colaboración co colectivo de hip-hop Dios ke te Crew co que asinan o tema “Ninguén”, nunha mestura á que dan en chamar “hip-folk” con letra de reivindicación social. Os dezaoito temas do disco son, maiormente, composicións propias de Guillerme Ignacio e Roi Maceda e abundan os arranxos de corda grazas á integración de Xulio Abal despois de tres anos dentro da banda. O disco tira dunha estética radiofónica incluíndo cortes con eses son característico da radio e introducións dos locutores Xurxo Souto e Emilio Espadañedo da Radio Galega.

Máis información en La Opinión

A banda folk Kérkennai saca o seu segundo traballo con renovación musical e da formación

Xénero: Folk | 26 / 6 / 2007 + IMAXES

not_10225.jpg

Neste segundo traballo da banda nacida na Limia en 1999 volve a integrarse un dos músicos fundadores, o violinista Felipe Rodicio. A formación que presenta “Nas beiras do Lethes” está integrada por Pepe Quintas, ó baixo e guitarra; Sindo Otero, ás guitarras e voz; Pepa Rodríguez ó clarinete e voz; Felipe Rodicio, ó violín e viola; Juan Seara, á gaita, flautas e voz. O disco presenta dez temas e está editado pola discográfica ourensá Zouma Records, igual que o primeiro disco do grupo “Vía nova” (2003). "Nas Beiras de Lethes" conta coas colaboracións de David González Outumuro na batería e percusións e Sabela Dacal ao acordeón.

O Festival da Ópera cumpre 55 anos homenaxeando a Giacomo Puccini

Xénero: Clásica/Lírica | 22 / 6 / 2007

imaxe non dispoñible

NO 2008 cúmprense cento cincuenta anos do nacemento de Giacomo Puccini. Unha efeméride que se está a preparar en todo o mundo. Pero a Asociación de Amigos da Ópera adiantarase á celebración ao programa dentro do Festival anual que organiza na Coruña. Do 25 de agosto ao 28 de setembro representaranse dúas óperas “La Boheme” e “Don Pasquale”, e haberá ópera en familia, dous recitais e varias galas líricas.

Máis información no web da Asociación de Amigos da Ópera e na prensa en La Voz de Galicia e en La Opinión. Sobre edicións anteriores na nosa hemeroteca

Flook, Kroque, Kepa Junkera e Mercedes Peón encabezan o programa do Festival de Ortigueira

Xénero: Folk | 22 / 6 / 2007

imaxe non dispoñible

Aínda que os grupos galegos terán unha importante presenza no Festival de Ortigueira, as cabezas de cartel serán os anglo-irlandeses Flook, os polacos Kroque e mais o vasco Kepa Junkera. Canda a eles, Mercedes Peón, Milladoiro, Daniel Bellón e Diego Maceiras, Os Zarambeques ou Pepe Vahamonde Grupo compartirán escenario con outras formacións internacionais. O espectáculo "Vacuo", do Centro Coreográfico Galego, tamén estará presente no evento.

Máis información en La Voz de Galicia; e no web do Festival, e nos nosos arquivos

Crema de Gaita presenta o seu primeiro disco no selo VIR de Ouvirmos

Xénero: Folk | 21 / 6 / 2007 + AUDIO + IMAXES

not_10194.jpg

Na mesma semana en que confirmou a súa presenza no Festival de Ortigueira, o grupo vigués Crema de Gaita o seu primeiro disco “TanGalego” (Ouvirmos). Editado no selo VIR, que Ouvirmos reserva para novos creadores, este disco presenta quince temas nos que a formación folk achégase a ritmos latinos e versións de música tradicional, buscando amosar as múltiples posibilidades que ofrece a gaita como instrumento versátil. A formación leva existindo desde 1994 e Ernesto Campos, membro da banda e compositor das pezas ten composto temas para Carlos Núñez, Budiño ou Susana Seivane. O disco conta tamén con colaboracións de outros músicos como Kin García, Marcos Valcárcel, Ioana Pérez e a Banda de Gaitas Xarabal. O CD contén unha pista de datos coas partituras dos temas e un karaoke para voz e gaita.

Comeza a terceira edición do festival Imaxina Sons que presenta doce días de actividades diversas

Xénero: Jazz/Blues | 21 / 6 / 2007

not_10189.jpg

Coa actuación do saxofonista noruegués Jan Garbarek hoxe ás 22 horas, no Centro Cultural Caixanova inaugurarase esta cita co jazz en Vigo. O festival prolongarase ata o vindeiro domingo 1 de xullo, día na que a actuación da Imaxina Jazz Orquestra, dirixida por Nani García, clausurará esta edición. Ao longo destes doce días, o festival celebrará numerosos concertos e actividades paralelas como exposicións, clases maxistrais, pasarrúas, mesas redondas e conferencias e os concertos que se desenvolverán en horario nocturno nos clubs, dentro do ciclo denominado "Jazz na Noite". A Imaxina Jazz Orquestra é unha produción propia do festival e unha clara aposta por reafirmar o valor dos músicos galegos de jazz. Os concertos que ofrecerá o festival son moi variados e inclúen todos os formatos, desde solistas, dúos ou tríos ata formacións de gran dimensión. No festival hai destacada presenza de músicos galegos.

Máis información en Imaxina Sons

<< Inicio / Anterior . 3241 a 3250 de 3564 . Seguinte \ Fin >>

BUSCADOR