CORREO
RSS
Ti estás aquí > Inicio / Xéneros / Folk
Música Folk
Que non falten ideas para a gaita
Xénero: | 7 / 3 / 2013
¿Acabóuseche o repertorio de pezas no medio da festa? Non te preocupar. O web Folkoteka galega achega á rede un amplo catálogo de partituras tradicionais. Este proxecto colaborativo permite descargar as pezas en PDF ou en formato MusicXml, pensado para traballar con elas mediante programas informáticos específicos. Os interesados poden acceder a danzas, alalás, foliadas, mazurcas ou pasodobles, e realizar ao tempo as súas propias achegas. Non saber máis pezas xa non é excusa para parar.
Birimbao presenta Nena do mare
Xénero: | 6 / 3 / 2013
Catro anos despois da súa primeira gravación, os coruñeses Birimbao acaban de presentar Nena do mare. O disco presenta oito temas nos que se mesturan as melodías tradicionais con temas de composición propia, apostando por un son no que se deixan sentir as influencias do fok celta. A voz de Mabell Castro acompaña seis dos temas do disco, que están dispoñibles baixo licenza Creative Commons. O traballo, autoeditado, gravouse nos estudios Paz & Records. Birimbao está formado por Pepe Mato, Chema Lorenzo, Manolo Gesto, Manuel Caridad, Mabell Castro e Alberto Camba.
Coñécense os finalistas aos XII Premios Opinión
Xénero: | 22 / 2 / 2013
Os XII Premios Opinión de música folk amosan unha grande concentración das súas candidaturas nuns poucos artistas. Así, Rodigo Romaní opta a premios nas tres categorías, Mellor Premio Orixinal, Mellor Artista e Mellor disco, o que dá fe da aceptación que o seu último disco, Arpas de Breogán está a ter entre os críticos. Detrás del, están con dúas candidaturas cada un, a Mellor Artista e Mellor Canción, Pancho Álvarez e mais Óscar Fernánez, dos Cempés. Pola súa banda, Alonso Caxade, tamén candidato a mellor artista, tamén recunca na categoría Mellor Disco dentro do grupo Peldenoz, con Jazz&Trad.
Os músicos tradicionais homenaxean a Rosalía
Xénero: | 13 / 2 / 2013
A Asociación de Gaiteiros Galegos convoca aos músicos do país a participar nunha Alborada para Rosalía. A idea é que cada grupo ou persoa participante se grave interpretando unha peza da súa elección en honra da poeta. Todas as compiladas publicaranse en Youtube na mañá do día 24 de febreiro, a coincidir co 150 aniversario da publicación de Cantares Gallegos. A iniciativa fai parte das propostas que desenvole a Real Academia, a Fundación Rosalía e mais a Universidade de Vigo en honra da poeta.
Milesios presenta 'Alén Mar'
Xénero: | 11 / 2 / 2013
O grupo folk Milesios editou o seu primeiro disco, Alén mar. O disco recolle pezas de raíz tradicional combinadas con outras creadas directamente polo grupo. Dúas delas incluirán por primeira vez voz: unha versión musical dun poema de Darío Xohán Cabana interpretada por Pilocha Martínez e unha peza tradicional de Carolina Vázquez Castro. A presentación oficial do disco terá lugar en Lugo o próximo día 22 de febreiro ás 20:00 no auditorio de Novacaixagalicia na Praza de Santa María.
Pablo Barreiro gaña o Premio Opinión Andaina Senlleira
Xénero: | 1 / 2 / 2013
A VI Edición do Premio Opinión Andaina Senlleira foi para un técnico de son. A carreira de Pablo Barreiro neste campo, e a súa contribución á gravación de multitude de músicos do noso país valeulle este recoñecemento, outorgado anualmente polo xornal La Opinión. O xurado desta xeira estivo formado por Xoán Manuel Estévez, Xosé Manuel Budiño e Sonia Lebedynski.
Carlos Núñez inicia unha xira de seis concertos polo Reino Unido
Xénero: | 28 / 1 / 2013
Comeza an Chipping Norton (29 de xaneiro) e remata en Basingtoke(6 de febreiro). Polo medio, Londres, Manchester ou Birmingham. O gaiteiro Carlos Núñez e o músico Philip Pickett, xunto co conxunto Musicians of the Globe ofrecerán o espectáculo Two Pipers Piping. Un proxecto no que unen folk e música antiga, unha concesión a unha fusión de sons que tiveron moito éxito no Londres do século XVII.
Os Melidaos lanzan Axudádeme a cantar
Xénero: | 24 / 1 / 2013
Logo de máis de dez anos de carreira, o grupo Os Melidaos acaban de presentar o seu segundo disco. Axudádeme a cantar incorpora voces á formación de gaitas, percusión, clarinete e acordeón, e achega catorce temas tradicionais e de composición propia, como Pasodobre de Marcelino ou Pasando pola vila de Arzúa, sempre cun marcado respeto ao legado musical galego. O álbum foi gravado nos estudios Abrigueiro, en Friol, e logo de se presentar en Melide, o vindeiro sábado 26 a partir das 20:30 horas poderá escoitarse na sede do Coro Toxos e Froles de Ferrol. O concerto é de balde.
Os Minhotos presentan Pinga D'auga
Xénero: | 18 / 1 / 2013
O pub Clavicémbalo de Lugo acolle esta noite, a partir das 23:30 horas a festa-concerto coa que o quinteto Os Minhotos dá a coñecer o seu disco Pinga D'auga. Doce temas que mesturan composicións propias e temas tradicionais, mesturando gaitas e a percusión tradicionais conzanfona, acordeón, requinta e clarinete. No concerto e hoxe, o grupo estará acompañado por algún dos colaboradores que participaron na gravación do disco.
Pedraquetiña presenta Cantares
Xénero: | 2 / 1 / 2013
Tres xeracións de cantareiras de Toutón (Mondariz) danse cita en Pedraquetiña, un proxecto musical que pretende recuperar os sons dos seráns. Logo de varios anos de traballo, agora tiran á luz Cantares, un disco gravado no estudio Casa de Tolos no que o grupo amosa o seu bo facer con 14 temas que mesturan as melodías e letras tradicionais con composicións propias. En total son dez cantareiras, dúas gaitas, tambor, bombo e acordeón que dan un son centrado na percusión (pandeiretas, cunchas e tarrañolas). O álbum sae á luz da man de Treixadura Gaiteiros Música.
REPORTAXE
Aprender das cantigas
Data.Antón Castro aproveita a nosa música tradicional para ensinar solfexo aos seus alumnos
