CORREO
RSS
Ti estás aquí > Inicio / Xéneros / Cantautor
Música Cantautor
Sés amosa boa saúde en 'Liberar as arterias'
Xénero: | 21 / 2 / 2020
Un poema de Luz Fandiño dá título ao sétimo álbum de María Xosé Silvar "Sés", que hoxe mesmo sae ao mundo da man de Altafonte. Liberar as arterias é tamén a única das doce cancións do disco homónimo cuxa letra non é da propia Sés, no resto dos temas a cantautora asina letras e músicas. Como se agarda dela, Sés, mantén viva e saudable a súa mensaxe de denuncia social ao longo de todo o álbum que, de novo bebe musicalmente do legado dos cantautores latinoamericanos que desde os anos 60 marcaron a historia musical da conflitividade política tanto nos países americanos como na España da ditadura e a transición. Coherente con esta liña que estaba tan presente no anterior Rabia ao silencio(Altafonte, 2019) están cancións como a que dá titulo ou Quen son os meus, O silencio non marcha e Na fronteira, por exemplo. Pero ademais nesta ocasión Sés ofrece ao longo do disco cortes nos que teñen sitio con bo resultado – como xa fixera en anteriores discos- sons do rock máis electrico, o soul, o blues ou o jazz funk coma en Para a curación, Trampa de odio, Mafia, na que semella saldar contas pendentes moi concretas, ou esa contundente Espiña sen rosa no que se declara con forza: "prefiro ser herba mala que camelia pra lucir". As presentacións en directo en na América do Sul xa tiveron lugar durante este mes de febreiro e agora comeza a súa xira peninsular o vindeiro día 28 na sala barcelonesa Luz de Gas. O primeiro concerto en Galicia terá lugar o 6 de marzo no teatro Afundación de Vigo. Na Coruña e Pontevedra tamén hai previstas actuacións.
Paco Montero musica oito poemas de Carballo Calero nun libro CD
Xénero: | 4 / 2 / 2020
Logo de o presentar o pasado dez de xaneiro no Teatro Jofre de Ferrol, está a chegar ás tendas o libro CD Paco Montero canta a Lumieira Poética de Carvalho Calero. O que foi cantante dos Tamara musica oito poemas do homenaxeado no Día das Letras deste 2020 nun volume que conta con prólogo de Vicente Araguas e no que colaboran intérpretes como Francisco Teixido (Treisi), Jesús Fernández, Frank Rodríguez, Carlos Godel, Ramiro Cartelle e mais Belén García e Ana Buche, que interpretan A Canzón das Lavandeiras. O álbum complétase con catro temas do propio Montero nos que homenaxea a Pucho Boedo, a cidade de Ferrol, o atleta Javier Gómez Noya e mais o actor Javier Gutiérrez. O disco gravouse nos estudios Penteo de Ferrol.
Pablo Bicho finaliza un parón discográfico de 16 anos con 'Aires nuevos'
Xénero: | 3 / 2 / 2020
O cantautor estradense afincado na Coruña, Pablo Bicho, ven de presentar na sala Garufa o seu novo traballo en solitario Aires nuevos (autoeditado), un disco con oito temas propios que supón unha volta do artista na busca do seu espazo musical de clara predominancia de jazz latino. Pablo Bicho ten unha ampla traxectoria previa tanto en solitario como formando parte de outros proxectos como Los Bichos ou Radio Océano e chegou a ter un gran alcance na radiofórmula grazas ao seu disco Las cosas llegan cuando tiene que llegar (Arcade Music Company, 1998) co que estivo durante algún tempo na listas de éxitos. Aires nuevos é o seu primeiro traballo de longa duración tras dezaseis anos, o anterior foi Las Alegres Coplillas (autoeditado, 2003). Para este traballo, impulsado a través dunha campaña de micromecenado, o autor rodeouse dun grupo de colaboradores destacados pola súa calidade na escena musical do jazz e do funk, que ademais contribuíron cos seus propios arranxos nos temas. O batería Miguel Lamas, Octavio Vargas (baixo), Iago Muriño (teclados), Paúl Alvarez (guitarra) e Tony Gonzalez (percusión latina), ademais de Antonio Constela (percuisións), irmán de Pablo Bicho son os que participan na gravación baixo produción de Miguel Lamas e con mestura e master a cargo de Miguel Martos. Nos seus temas de Aires nuevos, Pablo Bicho dá saída aos sons latinos e tropicais que ven escoitando desde a súa infancia pasada en Venezuela na liña dun jazz latino alegre con letras para ser compartido en comunidade, cantado e bailado como é o caso en temas como Hablo con las plantas, La vara ou El marajá.
Silvia Penide presenta o seu sétimo disco 'El efecto boomerang'
Xénero: | 2 / 5 / 2019
Tras da súa publicación en plataformas dixitais Silvia Penide presenta en concerto este venres, 3 de maio, no auditorio de Arteixo o seu novo traballo discográfico El efecto boomerang (El niño de la Hipoteca Records, 2019) e xa estará dispoñible con formato físico en CD. A artista presenta seis cancións de pop fieis á súa traxectoria con letras de intimidade e poesía que ademais, neste caso parecen cada unha delas consignadas no libreto como unha canción para unha situación concreta, como recursos sonoros para acompañar momentos ou situacións da vida. Así, por poñer algúns exemplos, a que abre o disco El Salto aparece como "Canción para recapitular" e a que o pecha Outro día que chega, cantada en dúo con Ugia Pedreira é como unha canción de nana que aparece como "Canción para levantarse". Polo medio a canción que dá nome ao disco El efecto boomerang ofrécese como "Canción para decir adiós cuando no se quiere decir adiós pero hay que hacerlo". O disco está dedicado pola autora "ás persoas que me faltan , ás que teñen que despedirse e a todo o gremio de Auxiliares de enfermería".
SÉS salda contas coa canción de autor latinoamericana en 'Rabia ao silencio'
Xénero: | 15 / 3 / 2019
Agarrando a guitarra coma se dun fusil se tratase aparece unha muller que ben podería ser María Xosé Silvar "SÉS" no debuxo de Lidia Cao para a portada do seu sexto disco Rabia ao silencio (Autoeditado). O traballo, defendido meramente en acústico a guitarra e pouco máis, presenta unha ducia de cancións, todas elas versións e case todas de autores latinoamericanos, destacados na década dos anos sesenta e setenta polas súas letras de denuncia, combativas e reivindicativas de fonda carga social. Un tema do arxentino Atahualpa Yupanqui dá nome ao álbum, no que tamén hai sitio para Carlos Puebla, Mejía Godoy ou Zeca Afonso entre outros autores destacados da canción latina de autor. O disco conta coas colaboracións de Sabela Galbán (voz, acordeón e frauta) e Tito Calviño (guitarra) na gravación e de Xosé Lois Rivas "Mini" en arranxos das versións, ademais de incluír dous temas seus da etapa de Fuxan os Ventos: Brazos para a seitura e Muller, tema no que Sés dá mostra do seu bo facer no cantar tradicional das cantoras galegas. Sons que van desde a zamba Arxentina aos EUA (Raro froito, do poeta americano Abel Meeropol), pasando polo corrido mexicano de autoría anónima A Chamuscada. Todas elas cancións que Sés fai súas e defende desde as tripas con convicción da súa vixencia. O disco está dispoñible xa nas plataformas dixitais e hoxe mesmo comeza unha xira en auditorios e teatros que se prevé longa e con grandes cheos. Así será hoxe no Teatro Rosalía d'A Coruña que ten todas as entradas vendidas e nas vindeiras citas xa feitas públicas nas que comezan a escasear os billetes. Pontevedra o vindeiro 30 de marzo e Rianxo o 5 de abril, Vigo o 6 de abril e chegará a Santiago o 13 de abril. As entradas xa están á venda para todas as citas confirmadas.
Sepárase o histórico dúo musical Mini e Mero
Xénero: | 28 / 11 / 2018
Logo de 46 anos de proxectos musicais conxuntos, o histórico dúo conformado por Xosé Luis Rivas, Mini e Baldomero Iglesias, Mero, sepárase. Segundo apunta hoxe Santiago Jaureguizar en El Progreso, as ruptura débese "diferenzas persoais" e a "un desencontro" entre os dous compoñentes do proxecto, sumados ao cansazo e á dificultade de atender a actividade musical por parte de Mini, inmerso na súa carreira política. Aínda que é agora cando se fai oficial o final da formación, o xornal lucense sitúa a separación hai máis dun ano. Os dous foron membros fundadores de formacións históricas da música galega como Fuxan os Ventos ou A Quenlla, e desenvolveron unha intensa carreira como dúo.
Emilio Rúa presenta hoxe novo disco 'Duetos' un traballo de plenitude
Xénero: | 21 / 9 / 2018
O cantautor ourensán Emilio Rúa presenta o seu novo disco, Duetos, hoxe no Museo Centro Gaiás da Cidade da Cultura. Este oitavo álbum de Rúa tivo unhas condicións excepcionais respecto ao resto da súa carreira xa que foi gravado a dúo con dezaseis grandes nomes da música, como Pablo MIlanés, Victor Manuel, La Shica, Javier Álvarez, Rebeca Jimenez, Carmen Paris, Josele Santiago, Rozalén, Carlos Goñi, Vicky Gastelo, Soledad Gimenez, Rosa Cedrón, Javier Ojeda, Mercedes Ferrer, Luis Pastor e Dolo Beltrán. Na presentación do seu oitavo álbum no auditorio da Cidade da Cultura contará coa presenza de Victor Manuel, Rosa Cedrón e Vicky Gastelo. Segundo o autor, este disco é un paso moi importante na súa carreira e tamén para a música galega, "pois leva a artistas moi importantes do panorama estatal e internacional a cantar comigo en galego de forma maioritaria". En palabras do ourensán, este traballo é "un punto e aparte, neste momento no que cumpro a maioría de idade editando discos e compondo cancións". As entradas para o evento, que terá lugar ás 21 horas están á venda en Ticketea desde 6 euros.
Luís Fercán presenta en Compostela o seu álbum debut
Xénero: | 15 / 6 / 2018
O Salón Teatro de Santiago colle esta noite o concerto de presentación en Galicia de Grieta, o álbum de debut de Luís Fercán en solitario. O compostelán, que iniciou a súa carreira en Persé, comeza con este lanzamento un proxecto como cantautor no que mestura letras poéticas con sons elaborados e toques indies e pop. Un total de dez temas publicados por EO!Música poderán escoitarse hoxe a partir das 21 horas nun recitais nos que o cantante estará acompañado por toda a súa banda.
Falece Benedicto, membro fundador de Voces Ceibes
Xénero: | 4 / 6 / 2018
Mestre, sindicalista pero por riba de todo coñecido como cantautor. Benedicto García Vilar, cofundador do movemento de cancións protesta Voces Ceibes en 1968, faleceu a pasada noite en Compostela aos 71 anos por mor da enfermidade dexenerativa que viña padecendo desde hai tempo. O seu labor a prol da cultura do país fora recoñecido nos últimos anos con concertos homenaxes como os que se lle tributaron en Compostela en 2014 e na Illa de Arousa, de onde era orixinario, en 2015. No seu haber, fitos como a gravación de diferentes discos, un longo traballo como sindicalista en Comisións Obreiras, grande cantidade de colaboracións en medios galegos como articulista ou o libro Sonata de amigos.
Sés revisa o seu primeiro traballo con 'Readmirando a condición'
Xénero: | 29 / 11 / 2017
En xullo de 2011 irrompía na escena musical galega María Xosé Silvar, de nome artístico Sés, co seu primeiro disco Admirando a condición baixo o selo e produción da discográfica Airapro e ofrecendo once temas de rhythm & blues, jazz, rock, ritmos latinos e son big band en galego. Sés partía dunha banda anterior, Chámalle Xis!, un dos grupos gañadores do concurso Acoruna Son, apadriñado por Santiago Auserón. Aínda que paseniñamente a artista foi acadando recoñecemento e un lugar propio a base de sorprender cun directo potente e contestatario que a levou por todos os recunchos do país con este traballo e cos posteriores Co xenio destrozado (Fol Música, 2013), Tronzar os valos (Fol Música, 2015) e Opoñerse á extinción (Fol Música, 2016), talvez o seu álbum máis traballado e combativo ata o de agora e co que se elevou como referente claro dun novo xeito de canción-protesta reivindicativa en temas de liberdades, igualdade e defensa da lingua. Este venres a artista presentará no marco feira Culturgal de Pontevedra o que será o seu quinto disco Readmirando a condición. Entre o Admirando e o Readmirando entrarán as diferencias propias dun traballo autoproducido e independente no que se refai o seu primeiro disco desde a súa perspectiva e experiencias actuais e facendo del un traballo aínda máis persoal, se cabe co que implica que ela mesma tome as responsabilidades de produción e executivas. Readmirando a condición é tamén o tema combativo na súa liña co que abre o disco, que está composto por doce tracks escritos, musicados e arranxados pola propia Ses, que exerce nel de produtora musical e executiva. O disco só estará dispoñible á venda nos concertos de Sés e na súa web www.ses.gal. Este sábado e o domingo a partir das 17:00h a música estará asinando discos no seu propio posto.
