CORREO
RSS
Ti estás aquí > Inicio / Xéneros / Rock
Música Rock
Os composteláns Radio Zapa! presentan 'Demasiado'
Xénero: | 30 / 3 / 2022
Desde 2015 Martín Zapata (Ruxe-Ruxe, La Maldita Blues Band, The Fabulous Resaca Brothers), Fran Facal (Dr. Gringo, Bakin Blues Band) e Jacobo García (Sinestesia, Néboa) veñen traballando como Radio Zapa!. O trío ofrece un rock potente e denso, transitando por sons que van desde a psicodelia dos anos 70 á escena stoner actual pero no que aparecen moitas fontes que podemos relacionar con case todas esas bandas polas que pasaron ou aínda están os tres músicos, tamén no caso das letras combativas e con crítica social.
Heredeiros da Crus deixan gravada a súa versión acústica nun novo disco
Xénero: | 11 / 3 / 2022
As restricións derivadas da alerta sanitaria tiveron diferentes tipos de impacto sobre a escena musical, cando se puideron levar a cabo os primeiros concertos unha das limitacións era que o público tiña que estar sentado e quieto. Esa circunstancia pegaba ben pouco cos habituais concertos enerxéticos de Heredeiros da Crus pero a experimentada banda de rock do Barbanza foi quen de ofrecer aos seus seguidores un formato axeitado ao momento, revisando o seu repertorio en acústico na que foi denominada "Xira Angústica" coa que recorreron Galicia. Froito desa experiencia, chega unha nova gravación do grupo, recollida en directo o pasado ano no Palexco de A Coruña no que foi o seu derradeiro concerto neste formato. 'Xira Angústica. Live in A Coruña' (Dotbeat, 2022), é un traballo que recolle esa proposta atípica do grupo, amosando unha faciana descoñecida. En total este disco, o duodécimo da súa discografía e o segundo que recollen en directo tras "All right Chicago [Rock'n'roll] (BOA Music, 2000)", ofrece 13 melodías espidas de fogos de artificio que crean novas escoitas do seus himnos a escribir na historia da música en Galicia no momento en que a incombustible formación celebra os seus 30 anos de actividade. O disco está dispoñible xa nas plataformas dixitais.
Grampoder publica hoxe o seu novo disco 'PM'
Xénero: | 4 / 3 / 2022
O dúo compostelán Grampoder, conformado por dous terzos do trío que foran The Homens, ven de poñer final oficial ao "tempo indeterminado de reflexión e renovación de fondo de armario" co que se despediron en 2015 tras a publicación do seu mini EP 'Tigerland'. A banda xa se deu por "resucitada" dando algúns concertos desde 2019 pero agora é cando esa volta plásmase na forma dunha nova gravación de estudo. O álbum longo 'PM' é a súa nova carta de presentación musical, con este disco de 10 novos temas volven cunha versión máis enérxica, máis eléctrica e máis escura do seu rock portátil. A banda regresa para presentar novas cancións nas que exploran as texturas do pop psicodélico, a rabia do hardcore e a densidade do post-punk, mantendo un formato escénico mínimo.
Siniestro Total sáese das estradas pero non para a música
Xénero: | 24 / 2 / 2022
Para Siniestro Total non era o mesmo durmir que estar durmindo (como dicían en 'Camino de la cama') e agora non é o mesmo deixar de facer concertos que deixar de facer música. Nunha rolda de prensa celebrada onte en Madrid, unha das máis grandes e prolíficas bandas de rock da historia de España aclaraba (ou non) os termos do que será o seu derradeiro concerto, o de despedida dos escenarios coincidindo co seu 40 aniversario de existencia. Julián Hernández e Javier Soto acudían ao encontro cos medios acompañados de Miguel Costas, ex-vocalista da banda (deixouna en 1994) para promocionar e contar o que vai pasar o vindeiro 6 de maio no Wizink Center da capital española, que se presente coma o "derradeiro concerto" baixo o nome "40 Años sin pisar a Audiencia Nacional".
O Resurrection Fest completa o seu cartel e pon á venda as entradas de 2022
Xénero: | 25 / 11 / 2021
Mastodon, The Raven Age, Ciclonautas e Bourbon Kings son as últimas incorporacións ao cartel da que será a edición 15+2 do Resurrection Fest. A organización do festival anunciou que este venres 26 de novembro porá a venda as entradas para cada un dos cinco días que vai durar o evento. A manter a maior parte do cartel anunciado para a última edición presencial, a de 2019, Viveiro acollerá entre o 29 de xuño e o 3 de xullo pesos pesados do mundo do rock duro como son Judas Priest, Korn, Sabaton, Avenged Sevenfold, Rage Against, Sepultura, Jinjer ou Bring me de Horizon.
Os Bar Ban Sónicos presentan o seu primeiro disco 'Químicamente impuro'
Xénero: | 24 / 11 / 2021
Desde hoxe xa está dispoñible nas plataformas dixitais o que é o primeiro disco de longa duración da banda de garaxe punk Os Bar Ban Sónicos. O trío da Pobra do Caramiñal presentan 14 temas en galego neste 'Químicamente impuro' (Rock CD Records) gravado no Herztcontrol Studio en Seixas, Portugal. Contundentes sonoridades punk e de rock de garaxe son as bases deste traballo que estivo adiando a súa saída para ver a posibilidade de apoialo coas actuacións en directo da banda conformada por Manel Casal (guitarra e voz), Abel Cores (batería) e Amroth Lopez (baixo e coros). O lanzamento veu precedido pola saída do EP "Alimentando o nervio" o pasado 2020. O deseño gráfico do traballo é obra de Guillotina Estudio. O grupo tomou o seu nome da unión "dun posible xentilicio comarcal, Barbansós", co grupo do que fixeron as primeiras versións, The Sonics.
Cancións recupera as letras de Xela Arias para Desertores
Xénero: | 4 / 11 / 2021
As letras que Xela Arias, homenaxeada no Día das Letras Galegas de 2021, escribiu para o grupo Desertores voltan á vida. A formación reuniuse este mes de xullo para gravar nun único álbum todos os seus temas con textos da autora e este venres cinco de novembro presenta nun concerto en Vigo Cancións, o libro-CD que publica Edición Xerais a compilar este material.
Los Eternos xa pasean o seu novo disco "Sonora"
Xénero: | 29 / 10 / 2021
A banda de Cedeira, Los Eternos, ven de sacar o seu terceiro traballo longo, "Sonora" (Milana Música / Ferror Records), unha nova incursión nas sonoridades da música americana, tras daquel "Vientos Solitarios" (Ferror Records / Cascaballo Records, 2019) co que regresaban tras un longo silencio de 9 anos. Nesta ocasión a formación ofrecen un disco máis sofisticado e rico en matices, avanzando na súa aposta, que transita desde o pop ao country, nunha evocación de paisaxes típicas do son "western".
Cita co rock galego para o outono na Estrada
Xénero: | 29 / 9 / 2021
Un novo festival ven de sumarse ao circuíto galego destes eventos e faino deslocalizándose temporal e xeograficamente , colocándose no calendario de outono escaso destes eventos, centrándose no rock de artistas e bandas galegas e ademais convocando desde a Galicia interior, na Estrada, unha localidade que xa tivo algúns intentos previos de organizar este tipo de evento, sen resultado ata agora. A primeira edición do festival Son dos arrieiros da Estrada, organizada desde a produtora Dotbeat! ofrece un programa que se desenvolverá na Fundación de Exposicións e Congresos desta localidade pontevedresa na fin de semana do 29 e 30 de outubro. A proposta de O son dos arrieiros, ideada como un festival de mediano formato e cunha capacidade fixada inicialmente nunhas 550 persoas, está fundamentada no rock, dentro do que abrangue moi diferentes estilos, ademais de ter en conta a perspectiva de xénero con bandas integramente femininas como Bala e Agoraphobia e a sesión de Señora DJ, quen picará música feita, cantada e tocada por mulleres. O cartel. Xa presentado, inclúe tamén nomes como Novedades Carminha, Heredeiros da Crus e Terbutalina.
A Sala Karma reabre este sábado para os concertos
Xénero: | 25 / 8 / 2021
Tras 552 días pechados o emblemático local de Pontevedra Sala Karma volverá este sábado á actividade cultural que lle é propia: os concertos. O espazo situado na rúa Marqués de Riestra da capital provincial acollerá dúas bandas cos seus directos a partires das 22 horas: Thee Blind Crows e mascada. As condicións para esta volta á actividade tras máis de ano e medio pechados inclúen unha capacidade de público do 50 por cento (80 persoas) e ademais a obrigatoriedade da asistencia sentados e con máscara en todo momento, pero aínda así a volta á actividade é un fito que sabe a reinauguración. O responsable da sala, Marcos Rivas, declarou ao dixital Pontevedra Viva que o festival Surfing The Lerez, do que é organizador, non se levará xa a cabo este ano e terá que agardar ata o vindeiro 2022 para ver unha nova edición.
REPORTAXE
Campamento Compostela
Data.Os Concertos do Novo do Milenio atraeron a Compostela milleiros de afeccionados à música
