CORREO
RSS
Ti estás aquí > Inicio / música en galego
Música en galego
Som do Galpom lanza a súa Galinha de Troia
Xénero: | 28 / 11 / 2013
Catro anos despois do seu último lanzamento, e logo dunha campaña de Crowdfunding, Som do Galpom presentaban esta mesma semana Galinha de Troia, o seu terceiro disco. O novo traballo da banda mantén a mestura de sons característica do grupo, cunha destacada presenza de hip hop e funk. A Sala Capitol acollía onte un concerto no que o conxunto estivo acompañado de Anfibia, Quico Cadaval e outros convidados.
Kalandraka edita o proxecto Corasons
Xénero: | 27 / 11 / 2013
Comezou cunha convocatoria nas redes sociais, seguiu cunha exposición de fotografías de Isabel Leas e continuou con varios recitais nos que artistas galegos e de diferentes países da lusofonía compartían escenario. Agora, CoraSons, o proxecto que coordina Uxía Senlle ve a luz na forma dun libro-CD-DVD no que participan 29 músicos e creadores e que achega ademais as fotografías do proxecto e un documental que amosa o proceso de xestación do mesmo.
Inquedanzas Sonoras presente un novo Karaoke popular
Xénero: | 20 / 11 / 2013
A seguir a senda do Galeoke, Inquedanzas Sonoras acaba de publicar Karaoke popular. Un DVD que convida a interpretar temas da nosa tradición como A Rianxeira, Catro Vellos Mariñeiros, A saia da Carolina, O Sancristan De Coimbra. ou mesmo o Himno Galego. O proxecto, desenvolvido pola editora Ton e Son, conta con arranxos de Rafa Crespo, Rubén Troitiño e Suso Atanes e inclúen instrumentos como acordeón, ukelele, flautas, gaitas ou tamboril que, segundo a discográfica, facilitan a interpretación dos temas. O volume sairá á venda a partir do 1 de decembro a un prezo de 10,95 euros.
2naFronteira musican poemas en Alma
Xénero: | 19 / 11 / 2013
Textos de Paz Andrade, Lorca, Curros Enríquez, Manuel Rivas, Pessoa, Rosalía de Castro e Celso Emilio Ferreiro atópanse en Alma o segundo disco de 2naFronteira. O dúo composto por Carmen Penim e o pianista Maurizio Polsinelli versionan con sons clásicos e ritmos tirados da tradición textos destes autores. O dúo está a presentar o álbum, editado por Inquedanzas Sonoras, en diferentes lugares do país. Para o vindeiro 21 de novembro está prevista a súa actuación na libraría viguesa Andel e o día 30 darán un recital no Liceo de Ourense.
A danza das moscas arrinca con forza
Xénero: | 18 / 11 / 2013
Lanzouse o pasado 12 de novembro e o pasado día 15 era declarado como un dos tres finalistas dos Premios da Música de Galicia na categoría de folk. A danza das moscas, o disco debut de Caxade en solitario arrinca con forza. O volume, do que xa se adiantaran varios singles como Gente pota ou Sr. Xorda achega un total de once temas nos que se funde a música de raíz con sons indies, explorando as sonoridades dos metais e unha grande importancia do acordeón. O disco gravouse nos estudios A Ponte de Compostela e sae editado da man da plataforma Discos da Máquina a un prezo de dez euros.
Dez bandas colaboran no primeiro libro-disco dos Bolechas
Xénero: | 14 / 11 / 2013
Da música tradicional ao rap a pasar polo pop. O primeiro libro-disco dos Bolechas, que se presentou esta semana, toca todos os estilos da man de dez grupos galegos. Pandeiromus, O Sonoro Maxín, Novedades Carminha, Ataque Escampe, Sés, Transilvanians, The Homens, Eladio y los Seres Queridos, Álex Casanova e AID achegan ao proxecto cadanseu tema inédito. Os Bolechas fan unha banda foi editado por Bolanda, e inclúe ademais un libro ilustrado por Pepe Cararreiro sobre os irmáns máis coñecidos polas crianzas do país.
O grupo UN denuncia a situación social en Estado de shock
Xénero: | 13 / 11 / 2013
UN é o proxecto dun músico anónimo que se sumou en 2011 a outros cinco, asimesmo descoñecidos. Agora, a iniciativa presenta Estado de shock, un CD no que recollen dez temas nos que denuncian diferentes aspectos do sistema capitalista e da crise financeira que estamos a vivir. Temas como Evasión, o seu primeiro single, Banqueiro indultado ou Flechazo na cola do paro amosan a liña do grupo, que centra as súas composicións na denuncia social e nas relacións persoais. O disco, autoeditado, xa está á venda, e os responsables do proxecto anuncian vindeiras actuacións ao vivo nas que se coñecerá a identidade dos seus compoñentes.
VerSons amosa a versatilidade de Abe Rábade
Xénero: | 12 / 11 / 2013
Once versións de temas do máis variado, desde a tradición galega ata composicións barrocas e temas de jazz. A Carolina, No niño novo do vento ou Four in one son algúns dos temas que Abe Rábade se atreve a reinterpretar en VerSons, o seu novo disco. Desta volta, o pianista acompáñase de Pablo Martín Caminero, ao contrabaixo e de Bruno Pedroso na batería. O disco, coeditado por Nuba e Karonte Records, presentarase o vindeiro 13 de novembro no Círculo de Belas Artes de Madrid e no Teatro Principal de Compostela o 22 de decembro.
Xerais lanza A miña primeira Rosalía
Xénero: | 7 / 11 / 2013
O pasado 1 de novembro presentábase no Teatro Principal de Compostela A miña primeira Rosalía. O disco editado por Xerais, segue a senda de O meu primeiro Celso Emilio e, como aquel está coordinado por Xosé e Xiana Lastra. Interpretacións de Mini, Mero, Xiana Lastra e María Manuela danlle son aos versos da poeta de padrón en doce temas como No ceo, azul crarísimo, O forno está sin pan, Negra sombra e A xusticia pola man.
Cé Orquestra Pantasma debuta con Do meu
Xénero: | 4 / 11 / 2013
Logo de anos a percorrer festivais, feiras e eventos por todo o país, Cé Orquestra Pantasma, o proxecto unipersoal de César Freiría, presenta o seu primeiro álbum. Do meu achega once temas de composición propia que manteñen o ton festeiro dos directos deste artista. No entanto, o home orquestra incorporou nas sesións do estudio A Lagharteira de Arcade colaboradores como o "coro trangalleiro das Bocas Neghras", o "Coro Miudo de Ghamusinos" ou Arantxa do Mundo, que achega a voz solista a varios dos temas. Logo da presentación o pasado 12 de outubro en Vigo, a vindeira cita co artista será o dia 31 no magosto de Meira.