CORREO
RSS
Ti estás aquí > Inicio / música en galego
Música en galego
A actualidade do pop e o rock consegue un espazo na TVG co novo programa BANDA CURTA
Xénero: | 26 / 1 / 2009 + VIDEO + IMAXES
A Televisión de Galicia estreará na tarde do sábado 31 de xaneiro “BANDA CURTA”, un novo programa musical que terá como característica principal as actuacións de grupos en directo e ante público. O programa de unha hora de duración , dirixido por Alfonso pato e presentado por Luis Pardo, gravarase na sala Lp 45 de Ordes. “BANDA CURTA” nace con vocación de dar a coñecer o amplo panorama da música pop e rock en Galicia, os grupos emerxentes ou as bandas que usan da rede de locais de ensaio. Para o primeiro programa estarán actuando os vigueses The Blows e os granadinos Lori Meyers. Ademais de música en directo, en “BANDA CURTA” haberá reportaxes e entrevistas sobre todos os estilos musicais, as novidades do mercado ou a axenda de concertos.
No primeiro programa tamén haberá unha sección dedicada a saber que foi dos grupos que emerxeron coa chamada “Xeración Xabarín”, como o caso dos Heredeiros da Crus, ou unha sección chamada Adn, no que personaxes populares como Luis Piedrahita darán a coñecer os seus gustos musicais. Unha reportaxe amosará as peculiaridades de Don Ramiro, unha aldea de Lalín na que hai ata catro grupos punkies, ou o grupo Agoraphobia, xurdido no local de ensaio de Boiro, formado por catro rapazas moi novas. Polo plató do programa tamén pasará nesta ocasión Janite, fotógrafo especializado en retratar ás estrelas do rock. Este sábado ás 4 da tarde comeza na Televisión de Galicia.
Comeza a edición invernal do programa cultural Vai de Camiño
Xénero: | 22 / 1 / 2009
O programa “Vai de Camiño” 2009, organizado pola Sociedade Anónima de Xestión do Plan Xacobeo, inicia mañá venres unha nova edición, a cuarta, coa novidade da incorporación dunha programación específica para o inverno. Esta programación dá cabida a propostas artísticas adaptadas aos espazos cubertos dispoñibles nos concellos polos que transcorren as diversas rutas xacobeas. A oferta constará basicamente de grupos de danza, canción de autor e concertos de pequeno formato. Lugo, Ribadeo e Ferrol acollen esta fin de semana as primeiras actuacións a cargo do grupo de danza contemporánea “Thomas Noone Dance”. Tomarán parte da programación de inverno compañías de danza como Nova Galega de Danza e novos intérpretes como Andrés Suárez, Samuel Leví ou Roberto Sobrado, que contarán co apoio dun amplo abano de artistas consagrados neste xénero como Xoán Rubia, Xoán Eiriz, María Manuela, Miro Casavella, Joaquín Lera ou Xurxo Mares, entre outros.
Quiosco: Música ao Vivo
Xénero: | 21 / 1 / 2009
Chega o Girl Power. As mulleres toman o mando no pop, rock e o hip hop nos últimos proxectos musicais do país. Esta é a reportaxe central do último número de Música ao vivo, a revista de Agadic que se distribúe de balde nos locais da Rede Galega de Música ao Vivo. A rapeira Aíd; Isa Cea, baixista de Triángulo de Amor Bizarro; Efi Arias de Fanny+Alexander son algunhas das protagonistas deste número que tamén fala de La Fábrica de Chocolate e de Sugar Mountain ademais de recuperar en imaxes os mellores concertos do 2008.
Lino Braxe e Rómulo Sanxurxo presentan Avenida Atlántica
Xénero: | 16 / 1 / 2009
Unha proposta poético-musical ao abeiro das relacións entre Cuba e Galicia é a proposta que achega o Teatro Colón da Coruña esta noite. Avenida Atlántica é un espectáculo artellado por Lino Braxe e Rómulo Sanxurxo no que se mesturan sons das dúas beiras do océano. O espectáculo chega da man da Deputación da Coruña e mais da Fundación Caixa Galicia, e xa se puidera ver en Cuba no acto de irmandamento da Torre de Hércules co Faro do Morro da Habana.
Dúas óperas de Puccini e Donizetti amplían a colección de iniciación infantil de Kalandraka
Xénero: | 14 / 1 / 2009
A editorial Kalandraka ven de engadir no pasado mes de decembro dúas novas publicacións á súa colección de libro-discos de iniciación á opera para nenos. Os dous novos rexistros corresponden ás obras Turandot, de Giacomo Puccini (1858-1924) e O elixir do amor de Gaetano Donizetti (1797-1848). Esta colección de divulgación infantil da lírica impulsada por Kalandraka en colaboración co selo especializado HIPÓTESI contén una adaptación do libreto, ilustracións dalgunhas pasaxes, indicacións oa longo do relato que corresponden cos pistas do CD de audición e una breve biografía do compositor. Turandot é un drama lírico situado na corte imperial chinesa; a adaptación corre a cargo de Joan de Déu Prats e a interpretación musical da Orchestra & Coro do Teatro Comunale dell´Opera di Genova, dirixido por Daniel Oren. A ópera O elixir do amor é una das poucas incursións do compositor no xénero bufo e o seu argumento xira arredor dun triángulo amoroso nun entorno vilego. A adaptación é de Stefanía Fantauzzi e a interpretación musical corre a cargo da Hungarian State Opera Choir and Orchestra dirixidos por Pier Giorgio Morando.
A recuperación de cantares de reis enche as rúas de música
Xénero: | 5 / 1 / 2009
A tradición dos cantares de reis está a demostrar unha vizosa recuperación no noso país. Sexa coa denominación de ranchos, cantares ou mesmo na forma de danzas, múltiples localidades están a levar estes días estas composicións populares ás rúas. Deste xeito, Mondariz acolle o vindeiro día 11 o III Encontro de Ranchos de Reis. Mañá mesmo localidades coma Riofrío ou Salceda de Caselas celebrarán os seus propios, mentres o día sete en Ponteareas haberá unha danza de reis. Pola súa banda, Boimorto fallaba onte o V Certame de Cantares de Reis, unha cita fundamental para os interesados por este tipo de pezas.
Nsaio Xeral porá en contacto industria e grupos musicais emerxentes
Xénero: | 26 / 12 / 2008
Nsaio Xeral é un encontro entre diferentes empresas da música galega e representantes de grupos musicais que pretenden dar os primeiros pasos na súa carreira artística. Celebrarase o 17 de xaneiro no IES Rosalía de Castro e será unha xornada completa con obradoiros, castings e concertos. Segundo Rubén Cela, director Xeral de Xuventude -departamento que organiza o encontro- do que se trata é de "consolidar o papel de Nsaio como unha ponte entre os grupos e as industrias musicais", papel do que, asegurou, deuse o primeiro paso no cultur.gal.
O Arquivo Nacional dixitalizará os fondos de Roxelio Groba
Xénero: | 18 / 12 / 2008
Un acordo entre a Consellaría de Cultura e a Fundación Roxelio Groba permitirá dixitalizar os fondos bibliográficos e musicais deste compositor. A iniciativa enmárcase no Programa de Dixitalización de Fondos do Arquivo Nacional e contará cun investimento de 56.000 euros a cargo da Fundación Cidade da Cultura. Entre as 534 composicións a dixitalizar inclúense algunhas tan destacadas coma a ópera Floralba, as cantatas Xacobea e Un pobo sen destino ou o Concerto Confidencias entre outros.
María do ceo pon música e voz aos poetas de Celanova
Xénero: | 9 / 12 / 2008
A cantante ourensá de orixe portuguesa María do Ceo chega ao seu décimo disco editado cun traballo que, co gallo do centenario da morte de Curros Enríquez no ano 2008, canta a este e outros poetas das terras de Celanova. O luxoso libro-disco edítase co apoio de numerosas institucións como o Concello de Celanova, a Fundación Curros Enríquez, a Deputación Provincial de Ourense, a Mancomunidade Terra de Celanova, “la Caixa”, o Ministerio de Cultura e a Xunta de Galicia. Os 17 cortes do disco No bico un cantar, gravado e mesturado nos estudios Desfase de Ourense, achegan oito poemas de Curros Enríquez ademais de letras xurdidas dos poemarios de Celso Emilio Ferreiro (1912-1979), Castor Elices (1847-1886), Serafín Marqués, Armando González e Méndez Ferrín, este último ademais asina un prólogo da obra.
O colectivo Sinsal presenta no Cultur.gal un proxecto educativo para divulgar a música
Xénero: | 4 / 12 / 2008
¿Cál foi a primeira gravación galega?¿Que eran as maquetas? ¿Onde naceron os picadiscos? ¿Cómo se fabrica un vinilo? ¿Deseñou Picasso portadas de discos? ¿Que é o Backspin?. Estas son as preguntas que pretende respostar o Colectivo Sinsal co seu proxecto Escola Sinsal: a historia da música enlatada. Un proxecto educativo que o colectivo vigués presenta hoxe no marco do Cultur.gal, o Salón das Industrias Culturais, que se desenvolve na Coruña ata o vindeiro domingo. O proxecto adapta as súas actividades, que van desde obradoiros, montaxes e actuacións, para ir descubrindo de xeito práctico outras formas de ver a música.