02/11/2021
O festival do imaxinario repartiu o seu palmarés internacional
O público da 49ª edición do festival audiovisual CURTAS FESTIVAL DO IMAXINARIO decantouse pola produción galega para seleccionar as gañadoras do seu Premio "Planet horror". A ópera prima de Javi Camiño "Jacinto", que fixo aquí a súa estrea en terras galegas, foi a premiada no formato de longametraxes; " O que queda de nós", de Miguel Gómez Abad foi a premiada polo público no formato de curtametraxes. O festival tamén premiou a unha realizadora local, Coral Piñeiro (Vilagarcía, 1998) , co premio ao mellor documental por 'Dores' dentro da Sección Oficial 'Outros xéneros'. Ademais diso na sección transversal "Feito en Galicia" outorgáronse tamén dous galardóns , o Premio do xurado á mellor curte, que foi para 'La metafísica del asesino', de Rubén Méndez e o Premio a mellor director/a que recaeu en Sergio Pereda polo seu traballo en 'Sombra do mar'. Os premios honoríficos deste ano foron para os realizadores Joe Dante, Daniel Monzón, Nacho Vigalondo, e os escritores Elia Barceló e o `pontevedrés Manel Loureiro..
Amplía a nova>>
29/10/2021
'Jacinto' estréase hoxe en Galicia tras gañar un premio en Austin
O filme 'Jacinto' ven de saír do Austin Film Festival en Texas cun novo premio que engadir ao seu crecente palmarés propio. O xurado da sección internacional Dark Matters de películas de horror e suspense concedeulle o seu premio á ópera prima do santiagués Javi Camiño, protagonizada por Pedro Brandariz e Anxela Baltar entre outros, unha historia que se define como "a mestura perfecta entre a 'Matanza de Texas' e 'Forrest Gump'". Ademais hoxe a longametraxe estréase en Galicia, no marco do Curtas, Festival do Imaxinario de Vilagarcía de Arousa..
Amplía a nova>>
25/10/2021
Catro producións galegas están presentes na 66ª Seminci
A Semana Internacional de Cine de Valladolid - Seminci acolle este ano na súa 66ª edición a proxección de catro proxecións galegas, tres delas como estreas. Dentro da sección DOC.España do veterano encontro presentaronse os documentales 'Escribir o imposible' de Simone G. Saibene , e 'A Virxe roxa' de Marcos Nine Bua, que xa se exhibiron estea fin de semana pero aínda Terán outros pases. Na sección de Proyecciones Especiales', xa tivo lugar a da longametraxe documental autobiográfica 'A cero.5', de Gonzalo Suárez. Ademais destas estreas, o certame acolle na sección Spanish Cinema a curtametraxe 'A comuñón da miña prima Andrea' de Brandán Cerviño..
Amplía a nova>>
22/10/2021
O LAV.Mov retorna a Vedra
Despois da ausencia do pasado ano por mor da pandemia, a Asociación Senunpeso celebra entre o 29 e o 31 de outubro unha nova edición do seu LAV.Mov. O Laboratorio Audiovisual de Vedra, centrado na formación e a creación audiovisual, inclúe no seu programa un obradoiro de formación centrado no uso de
found footage para crear unha peza audiovisual a partir de imaxes de arquivo da man de Javier Trigales. Un segundo obradoiro a cargo de Fernando Alfonsín abordarán os fluxos de traballo con imaxe dixital desde o set de rodaxe, pasando pola postprodución ata o produto final.
.
Amplía a nova>>
18/10/2021
Margarita Ledo Premio CREA de Honra
A Asociación Galega de Profesionais da Realización e da Dirección (CREA) ven de recoñecer a aqueles dos seus colegas que destacaron nos traballos de dirección no pasado ano. Os VI Premios CREA entregáronse o 17 de outubro de 2021 recaendo o Premio de Honra na cineasta e académica Margarita Ledo, o de Mellor Dirección de Longametraxe de Ficción en Fon Cortizo por '9 Fugas' e o de Mellor Dirección de Serie de televisión en Jorge Coira por 'Hierro' (Tempada 2). .
Amplía a nova>>
18/10/2021
AMAL volve servir de vía de entrada do cine euroárabe
A decimo novena Semana de Cinema Euroárabe AMAL 2021 organizada pola Fundación Araguaney-Puente de Culturas celebrarase entre os días 25 e 29 de outubro no Teatro Principal de Santiago. A programación deste ano inclúe unha ampla representación do mundo árabe, con películas de Palestina, Sudán, Marrocos e Europa. Proxectaranse cinco cintas –tres ficción e dous documentais– que se poderán ver nun pase único por día ás 21:00 horas. Treas das proxeccións serán premieres en España e outra delas o será en Galicia. Así as longametraxes documentais "Gods of Molenbeek ( Aatos ja Amine)" e "Lift like a girl" e a ficción "200 metros (200 METERS)" será a primeira vez que se vexan en territorio español e a ficción "You will die at 20 ( Satamoto Fel Eshreen)", será premiere en Galicia. .
Amplía a nova>>
18/10/2021
Premio do público de Sitges para 'Jacinto' de Javi Camiño
O público da 54ª edición do Sitges Festival Internacional de Cine Fantástico de Catalunya ven de darlle a súa máxima valoración na sección Panorama Fantástico á longametraxe
Jacinto (ronda o demo), do realizador santiagués Javi Camiño, protagonizada por Pedro Brandariz. A ópera prima de Camiño, unha historia que se define como "a mestura perfecta entre a 'Matanza de Texas' e 'Forrest Gump'" resultou gañadora na súa estrea nacional neste apartado dos premios do público do festival dirixido a títulos de toda as nacionalidades, inéditos en España e de temática fantástica e de terror feitos con vocación independente.
Jacinto xa acadara previamente dous premios no festival GenreBlast en Winchester, Virginia (EE.UU)..
Amplía a nova>>
15/10/2021
O Premios Mestre Mateo miran máis alá da televisión
O disparo de saída da que será a vixésima edición do Premios Mestre Mateo do Audiovisual Galego ven de darse coa publicación das bases de presentación e a apertura do prazo, onte mesmo. A Academia Galega do Audiovisual fixo para a ocasión unha renovación de determinadas condicións das bases "atendendo ás demandas do sector e aos novos hábitos de consumo dos espectadores". Os cambios sinalan a unha apertura de determinados premios (Mellor Programa, Mellor Realización e Mellor Comunicador/a) máis alá dun formato puramente de emisión televisiva, incluíndo contidos xerados e difundidos por Internet nas redes sociais ou calquera outro medio ou plataforma audiovisual. .
Amplía a nova>>
11/10/2021
Xacio Baño gaña o Premio Galiza do Curtocircuíto con 'Augas abisais'
O relato audiovisual de Xacio Baño na curtametraxe 'Augas abisais' acadou o Premio Galiza da rematada edición do festival Curtocircuíto, en Santiago de Compostela. 'Augas abisais' crea un paralelismo entre mergullarse no fondo do océano e na propia historia, partindo dunhas lembranzas e correspondencia de tempos moi pasados pero aínda presentes. O xurado decantouse por esta cinta valorando o seu logro a través de "técnicas cinemáticas orixinais para falar do pasado mentres se escava o presente, por atopar un camiño metafórico cara a narración que pode destapar e rexistrar a procura dese propio camiño, e por iluminar unha experiencia persoal que lanza luz sobre o colectivo". O filme acadou ademais un Premio AGAG ao mellor guión galego, concedido ex aequo coa curta 'Homeless Home', de Alberto Vázquez. Esta última tamén acadou o premio CREA á mellor dirección dunha produción galega. O xurado considerou que Alberto Vázquez "foi quen de construír un mundo dunha natureza gráfica e sonora única", e concedeulle ese galardón tamén á súa cinta "polo uso dun trasfondo social duro, porque non todos os retornos a casa son unha apoteose como na Odisea". .
Amplía a nova>>
11/10/2021
'Eles transportan a morte' sae de Cinespaña con dous galardóns
O festival Cinespaña de Toulouse ven de recoñecer á longametraxe 'Eles transportan a morte' con dous dos premios no palmarés da súa 26ª edición. O tándem de dirección formado por Helena Girón e Samuel M. Delgado acadou o premio á Mellor Realización, mentres que o traballo feito no son e a música por Carlos García e Camilo Sanabria, respectivamente, foi recoñecido tamén co premio técnico desa categoría, traballo que xa foi tamén premiado previamente pola Semana da Crítica de Venecia, que recoñeceu a achega técnica do filme en canto ao traballo coas atmosferas sonoras..
Amplía a nova>>
