CORREO
RSS
Noticias
Preséntase un disco conxunto de Treixadura gaiteiros e Orfeón Treixadura
Xénero: | 15 / 6 / 2006
No seu cuarto traballo discográfico, “Unha semaniña enteira” (PAI música), o consolidado grupo Treixadura Gaiteiros presenta a xuntanza de dúas concepcións da música popular: o canto e a gaita. O Orfeón Treixadura, creado ex profeso para a gravación dunha das cancións do anterior disco “Unha noite non é nada”(2003) engade aquí a forza das súas voces ás melodías dos gaiteiros incidindo no pouso que o canto popular foi deitando na historia da música galega. Dos once temas do disco, gravados entre os estudos Casa de Tolos e Edisco a finais do 2005, tan só un é unicamente instrumental. Este é o terceiro disco de Treixadura que leva por título un dos versos da cantiga popular “Unha noite no muíño” e os compoñentes do grupo xa anunciaron durante a presentación do disco no Consello da Cultura Galega a próxima realización dun disco que se chamará “Esa si que é muiñada”.
Máis información en Consello da Cultura Galega
Os vigueses Ectoplasma presentan en La Fábrica de Chocolate o seu primeiro disco
Xénero: | 15 / 6 / 2006 + VIDEO
Co veterano músico vigués Nicolás Pastoriza á fronte a banda viguesa Ectoplasma presenta agora o seu primeiro disco “Amor por lo paranormal” que aínda tardará uns meses en saír ao mercado da man do selo POP & CO. Ectoplasma está liderado por Nicolás Pastoriza, compositor e voz do grupo que formou parte de moitas outras bandas como “Bromea o qué?” ou La Marabunta, entre outras. Xunto a el no grupo están tamén os ex- Piratas Paco Serén e Hal 9000, así como David Rodríguez, Andrea Montes e Saúl Puga. O disco está producido polo guardés Pablo Iglesias e gravado baixo o seu selo Pop&Co Grabaciones. O traballo reúne 10 cancións en castelán con temáticas do fantástico, a ciencia ficción e os límites da realidade. Na festa de presentación do disco este venres en La Fábrica de Chocolate Club sortearanse ademais entradas para o FIB.
Máis información no sitio de Ectoplasma
A mestizaxe, a danza e grupos consolidados conforman a aposta da nova edición do Festival de Ortigueira
Xénero: | 12 / 6 / 2006
O 6 de xullo comeza unha nova edición do Festival Celta de Ortigueira. O evento musical de Galicia que concentra a un maior numero de visitantes e que este ano promete cun programa “mais ousado ca nunca” como se atreveu a dicir o director artístico, Fran Rivera, na presentación do festival. Solas, Four Men and a Dog e Gwendal son algunhas das bandas que participan nun programa no que haberá un sitio destacado para a danza. Ademais, “Galicia & outras músicas” é o nome do plato forte, un singular proxecto dirixido polo produtor Javier Limón que repasará todo o repertorio tradicional galego.
Máis información no web do Festival, e en La Voz de Galicia, El Correo Gallego e na nosa hemeroteca
Dez anos despois do seu anterior álbum Magin Blanco saca novo disco
Xénero: | 6 / 6 / 2006 + VIDEO + IMAXES
O veterano músico rués, Magín Blanco ten un novo disco gravado na Casa de Tolos e producido por Segundo Grandío. “Ella” é o disco deste músico que gravou os seu primeiros temas en 1987 e que en 1988 tivo o seu primeiro disco propio “La Rosa” (Edigal). O anterior traballo de Magín Blanco fora o disco “En el arco iris” gravado en 1994 coa discográfica Sons Galiza; nesta ocasión Blanco consegue a colaboración de músicos como Uxía Senlle, Nacho Novo ou Gloria Van Aersen, compoñente de Vainica Doble, para algúns dos once temas do disco. O álbum presentouse oficialmente hoxe nas instalacións do estudo de gravación Casa de Tolos, en Gondomar nun acto no que a discográfica PAI música presentou as súas novidades discográficas da tempada primavera- verán. nos que tamén están os discos do grupo Treixadura, Augusto Canário & Amigos, El Cubo e Queno.
O programa Extrarradio e Vieiros organizan un concurso na procura da canción galega do verán
Xénero: | 6 / 6 / 2006
A Radio Galega, a través do programa Extrarradio, e o diario electrónico Vieiros veñen de abrir en colaboración a convocatoria para un concurso que durará ata setembro e que ten como obxectivo proclamar cal é a canción do verán do 2006 en galego. O concurso “A polo ghit!” está aberto a todos os músicos que queiran con cancións gravadas en galego, que serán difundidas pola rede en Vieiros con licenza Creative Commons. Un xurado composto por xente do mundo da música e da comunicación elixirá en setembro o tema gañador, que será premiado coa gravación profesional dun videoclip e a actuación en programas da Televisión de Galicia. A cancións poden escoitarse e descargarse en Vieiros, e mesmo facer de xeito paralelo unha votación con comentarios engadidos.
Máis información en Vieiros
Volve o grupo de cantareiras Faltriqueira ao panorama discográfico con Efffecto
Xénero: | 6 / 6 / 2006
As catro cantareiras de Pontedeume presentan o seu segundo disco “Effecto” (Resistencia, 2006) no conflúen unha variedade de estilos musicais alén dos temas tradicionais. Ana Leira, Carolina Ródriguez, María López e Teresa García foron alternando concertos e xiras cos ensaios onde seleccionaron e prepararon o repertorio do seu novo álbum. Faltriqueira (Resistencia, 2002), o seu primeiro traballo levounas á portada da revista Folk Roots, referente da música con raíces, e conseguiulles a aceptación da crítica especializada, como o demostra o ter sido escollido entre os 10 mellores álbums do 2003 na World Music Charts Europe (lista europea de músicas do mundo). O segundo disco busca a confirmación musical do grupo e, na busca da variedade, alternan as recreacións de temas tradicionais, a cantiga medieval, os ritmos do leste europeo o da Senegal e mesmo a adaptación dun tema folk estadounidense que interpretaran Emmylou Harris, Linda Ronstadt e Dolly Parton. Tamén está presente o “Canto libre” de Víctor Jara. e dous cancións representativas da discografía galega dos anos setenta: “Meu amor mariñeiro” de Fuxan Os Ventos e “Corpiño xeitoso” de Andrés do Barro.
Máis información La Opinión
O Xacobeo presenta os 43 concertos “Vía Stellae”, o festival que substitúe ao Festival de Música de Galicia
Xénero: | 2 / 6 / 2006
A formación “Europa Galante” (Auditorio de Galicia, 5 de xullo, 21:00 horas) é a encargada de abrir a primeira edición do Festival de Música de Compostela e os seus Camiños Vía Stellae 2006. Trátase do programa organizado pola Xunta, a través do Xacobeo, que substitúe ao anterior Festival Internacional de Música de Galicia. 43 concertos de música barroca e antiga compoñen un programa que rematará o 25 de xullo. O evento, que pretende converterse no gran festival de música de Galicia, celebrarase en Santiago e en diferentes localidades polas que transcorren as rutas xacobeas.
Máis información sobre o programa en La Voz de Galicia e El Correo Gallego, en La Opinión e máis información na nosa hemeroteca sobre o Festival Internacional de Música de Galicia
O primeiro festival de hip-hop da Coruña pretende reunir a tres milleiros de afeccionados ao xénero
Xénero: | 31 / 5 / 2006
No Coliseum da Coruña, e coa presentación do actor Serxio Pazos, o espectáculo “Bombos,caixas e cristais” reunirá este sábado día 3 de xuño unha representación do movemento hip-hop en todas as súas variantes. Este festival reunirá a seis grupos nacionais, dous deles galegos –Dios ke te crew e Low & Overground Orkesta- e aos ingleses Foreign Beggars. Tamén haberá espazo e tempo dentro das seis horas para a exhibición de graffiti e o espectáculo de break dance. Serxio Pazos incorporará á súa presentación a interpretación de un rap dedicado ao político Francisco Vázquez. Os promotores do festival, a produtora Gabba Gabba Hey, demandaron un apoio das institucións para converter o festival nun referente galego e nacional.
Máis información no Programa do Festival
Abe Rábade, Quatro D abril, Xavier Blanco e Santi Santos presentan os seus novos traballos
Xénero: | 31 / 5 / 2006
A musica galega está estes días en plena efervescencia xa que catro grupos diferentes están a piques de presentar os seus traballos. Un dos primeiros en facelo é o pianista de jazz Abe Rábade, que presentará o vindeiro domingo “Playing on light”, o seu terceiro traballo discográfico que mestura a poesía da súa irmá, María do Cebreiro, con fotografías de diferentes autores. Por outra banda, os pontevedreses “Quatro D abril” (antes Amigos de Blas) lanzarán ao mercado o vindeiro 13 de xuño o seu primeiro traballo, que se chama igual que o propio grupo. Polo demais, Los Limones presentan “Palabra” o oitavo disco da súa traxectoria discográfica e que conta coa colaboración de Antonio Vega. Por último, a consellaría de Cultura presenta este venres “Gaitas troncais”, o terceiro disco de Xavier Blanco e no que fai un repaso polos distintos tipos destes instrumentos ao longo da historia.
Máis información nos webs de Abe Rábade e no de Quatro D Abril; sobre Los Limones en Diario de Ferrol e sobre “Gaitas troncais” en Atlántico Diario
A discográfica Ouvirmos estrea co primeiro disco de Galegoz un selo dedicado a novos creadores
Xénero: | 30 / 5 / 2006 + VIDEO
Co disco "Galician Chimpanzee" do grupo Galegoz iníciase o novo selo Vir dentro da discográfica lucense Ouvirmos. O selo nace para abrir o camiño da co-produción de novos creadores galegos como é o caso deste primeiro disco da banda Galegoz formada por músicos procedentes doutras bandas do panorama musical galego: Xenreira, Nenos da revolta, Matraca Perversa, Jarbanzo Negro, Diplomáticos de Monte-alto, Mutantes Metálicos Band, A Compañía do ruído, etc. Dez temas e 2 videoclips conforman este disco. Bases electrónicas mesturadas con ska, funk,… e salpicadas por letras combativas, irreverentes e surrealistas. Despois de formarse virtualmente ao estilo dos Gorillaz agora dan o paso á gravación e posterior posta en escena do seu primeiro traballo discográfico.
Máis información no sitio de Galegoz