CORREO
RSS
Noticias
A OSG grava un disco monográfico dedicado a Joaquín Rodrigo coa guitarrista nipona Kaori Muraji
Xénero: | 17 / 7 / 2007
A Orquestra Sinfónica de Galicia dirixida por Víctor Pablo Pérez grava esta semana na Coruña un disco dedicado á música para guitarra do mestre Joaquín Rodrigo coa guitarrista xaponesa Kaori Muraji (Tokio, 1978). Muraji está considerada como unha das máis brillantes intérpretes de guitarra clásica no panorama internacional. Gañadora do Concurso Internacional de Guitarra Leo Brower en 1992, a artista nipona traballa habitualmente con orquestras do prestixio da Japan Philharmonic Orquestra, Orquestra Sinfónica Nacional da RAI, Shanghai Symphony ou a NHK Symphony Orchestra. O disco, que editará a discográfica DECCA, incluirá o documental “Kaori Muraji in Spain” que un equipo de Universal Xapón filma toda esta semana na Coruña.
Máis información no web da OSG
A agrupación Os Folerpas gaña o VIII Memorial Ricardo Portela de Pontevedra
Xénero: | 16 / 7 / 2007
En homenaxe a un dos mestres gaiteiros máis afamados celebrouse en Pontevedra a oitava edición do certame que leva o seu nome. No Memorial Ricardo Portela participaron seis agrupacións de música tradicional chegadas de toda Galicia. Na final, celebrada o sábado na Praza da Verdura, a agrupación compostelá Os Folerpas, na que milita Pablo Carpintero, acadou o primeiro premio desta edición. O segundo e terceiro premios foron para Rédea Solta de Pontevedra e Contracocheno de Vigo respectivamente. O premio especial Seivane foi para a agrupación Os Enxebres de Cacheiras mentres que o especial Ricardo Portela á mellor interpretación dunha peza do gaiteiro homenaxeado foi para os Rédea Solta.
Máis información no blog Malmequer
Preséntanse as novidades do concurso Constantino Bellón e o disco coas gravacións da edición do 2006
Xénero: | 13 / 7 / 2007
O presidente do Ateneo Ferrolán, Eliseo Zaera, e o organizador do certame de gaita Constantino Bellón, Víctor Gabeiras, presentaron as novidades da edición 2007 deste consolidado concurso de gaiteiros e o disco dobre que recolle as interpretacións do ano pasado. Un dos compactos leva a gravación en directo das catro pezas que gañaron o concurso de composición e o outro leva as interpretacións do concurso de solistas gañado por Daniel Bellón. O disco ten unha tiraxe de un milleiro de exemplares que se poñerán á venda e se distribuirán por ateneos e centros galegos no exterior. A décimo sétima edición do certame trae como novidade un aumento importante dos premios en metálico grazas ao apoio conseguido por parte da Consellaría de Cultura, a deputación da Coruña e o Concello de Ferrol.
Máis información no Diario de Ferrol
e sobre as bases do XVII Concurso Constantino Bellón
A Xunta gastará ata sesenta mil euros en gaitas para enviar ás organizacións de emigrantes galegos
Xénero: | 13 / 7 / 2007
Ata o venres da semana que ven teñen todos os fabricantes de gaitas para presentar á Xunta as súas ofertas para o subministro de 55 gaitas. O Diario Oficial de Galicia de onte, xoves 13 de xullo, anuncia o concurso público por procedemento aberto e tramitación urxente, para a contratación dunha subministración de 55 gaitas tradicionais galegas pola Secretaría Xeral de Emigración. A adquisición ten un orzamento base de 60.000 euros, o que suporía un máximo de 1.091 euros por gaita e todas deberán entregarse antes do 30 de novembro deste ano.. Segundo informa La Voz de Galicia estes instrumentos están destinados como agasallos ás organizacións de emigrantes galegos no exterior para fomentar entre elas a querenza á nosa música.
Máis información en La Voz de Galicia
O alcalde de Lalín reclama a Cultura que participe no financiamento do Conservatorio Folque
Xénero: | 12 / 7 / 2007
Xosé Crespo, alcalde de Lalín, solicitou onte por segunda vez á Dirección Xeral de Creación e Difusión Cultural a coparticipación da Xunta de Galicia nos gastos de financiamento do Conservatorio Folque da localidade, fundado no ano 2000. Segundo Crespo, "resúltanos cada vez máis complicado manter un centro único en Galicia no ensino da música tradicional galega". A alcaldía solicita da Consellería de Cultura unha achega de 24.000 euros, que corresponderían ao financiamento da metade do custe anual dos docentes.
Máis información en La Voz de Galicia
Santiago e Vigo presentan os programas de dúas das festas patronais máis importantes de xullo
Xénero: | 11 / 7 / 2007
As Festas do Cristo da Victoria en Vigo e as Festas do Apóstolo en Santiago xa teñen programa oficial e pechado. Os dous concellos fixeron público onte cadanseu programa de festexos e celebracións. A aposta polos grandes concertos está moi presente nos dous casos. En Vigo as estrelas do cartel son os británicos Artic Monkeys, Paulina Rubio, Nacha Pop, Manu Chao, Le Punk e os galegos Deluxe e Fon Román. A cantante Soraya abrirá as festas en Santiago nas que tamén actuará a mexicana Julieta Venegas, os cubanos Orishas, Andrés Calamaro acompañado de Fito & Fitipaldis, Estrella Morente, Susana Seivane e tamén actuarán The Ellas, Brath, Álvaro Costas & Hot Band entre a representación galega. Vigo gastará case 900 mil euros nos seus festexos que chegarán ata o día 12 de agosto, mentres que a capital ten un orzamento superior aos 600 mil euros para a súa programación que remata co mes de xullo.
Máis información no Concello de Vigo
e no Concello de Santiago
Os concertos pechan esta fin de semana a décima edición do “Cultura Quente” de Caldas
Xénero: | 11 / 7 / 2007
Levan case quince días de actividades pero o prato forte do “Cultura Quente” aínda ten lugar esta fin de semana. Será cando a carballeira desta vila pontevedresa se encha de música con grupos como Asian Dub, Fancy, Sex Museum ou Gong Gong. En total uns vinte grupos ofrecerán o mellor do seu repertorio para animar un festival que cumpre este ano dez edicións.
Máis información no sitio web
Jacobo Paz presenta o seu segundo disco “Chico de marca” editado por Wonderland Discos
Xénero: | 10 / 7 / 2007 + VIDEO
O músico coruñés Jacobo Paz presentou ante os medios hoxe na Fnac da cidade herculina o seu novo disco “Chico de marca”, editado polo selo galego Wonderland. No mesmo espazo, este venres ás 20 horas fará un pequeno concerto de mostra dos temas do album. Jacobo Paz, ex compoñente de formacións como Mario Bronx, principiou a súa andaina en solitario a finais da década pasada e debutou discograficamente con “Buscando pistas”. Dende aquela, este roqueiro e autor ten compartido cartel con nomes tan coñecidos como M Clan, Deluxe, Barón Rojo, Burning, Australian Blonde, Los Deltonos, O Funkillo ou Heredeiros da Crus. En “Chico de marca” Jacobo Paz conta coa colaboración musical de Ángel Venancio, guitarrista de Manolo Tena, e do actor Daniel Huarte, habitual na serie “Al salir de clase”, que protagoniza o clip que da nome ao disco.
A convocatoria para A Rede Galega de Música ao Vivo 2008 suprime a selección previa e a distinción en categorías
Xénero: | 9 / 7 / 2007
O prazo de apuntarse á Rede Galega de Música ao Vivo 2008 xa está aberto para as salas e músicos desde o día 5 de xullo ata o 3 de agosto a través da páxina web de Galescena. As bases deste programa do IGAEM destinado a favorecer unha programación de concertos en salas privadas estable e de calidade traen numerosos cambios respecto ao vixente ano. Desaparecen nesta convocatoria dous elementos que suscitaron numerosas controversias anteriormente como foron as dúas categorías nas que se dividía aos artistas e a fase de selección previa por parte dunha comisión designada. A convocatoria do 2008 deixa liberdade para fixar o caché aos artistas, impondo un máximo de 800 euros por actuación e un mínimo de seis concertos para estar na rede, o programa inclúe tamén actuacións no mes de setembro. As salas asumirán o 15 % dos cachés e a recadación que supere a inversión repartirase a partes iguais entre músicos e salas.
Máis información en Galescena
e sobre a RGMV nos nosos arquivos
Ortigueira comeza o seu macro-evento musical agardando máis dun cento de milleiros de asistentes
Xénero: | 5 / 7 / 2007
A partir de hoxe agárdanse en Ortigueira a máis de 100.000 persoas, segundo as cifras estimadas pola organización da vixésimo novena edición do Festival de Ortigueira. A presente edición deste evento que cada ano acada o primeiro posto na lista de citas musicais con máis afluencia de público comeza hoxe cun cartel no que hai sitio para as novas promesas do folk galego e para artistas consagrados tanto do país como internacionais durante os vindeiros catro días. A organización habilitou un espazo na praia de Morouzos para o campamento pudendo acoller máis de 10.000 tendas de campaña. O festival está declarada Festa de Interese Turístico Internacional e conta cun orzamento de 670.000 euros.
Máis información en Festival de Ortigueira