CORREO
RSS
Ti estás aquí > Inicio / Xéneros / Rock
Música Rock
Dakidarría presentan o directo da súa conmemoración de vinte anos
Xénero: | 12 / 3 / 2024
Os Dakidarría colléronlle gusto a gravar os seus directos conmemorativos. Se fai agora 8 anos a banda presentaba o disco en directo en formato CD-DVD 'De cuncas e de mar' (2016), co que celebraban os seus 13 anos de traxectoria agora o motivo foi a celebración o pasado ano do seu vinte aniversario que celebraron sobre os escenarios en cun concerto conmemorativo o 9 de setembro no marco do festival Revenidas en Vilaxoán de Arousa. Daquela noite sae agora "XX"( El Garaje Producciones), a gravación do directo onde inmortalizan aquela noite na que contaron coa colaboración de máis de 50 artistas, nun percorrido sonoro de vinta cancións e máis de dúas horas a través dos vinte anos de vida deste grupo do Val Miñor, referente na defensa da cultura popular e contestataria. Entre as colaboradoras deste traballo destacan figuras como Xurxo Souto, Tanxugueiras, Boikot, La Raíz, Mondra, ou High Paw.
Factoría de Subsistencia presenta 'Respirando...Sempre!'
Xénero: | 3 / 1 / 2024
Co ano aínda por estrear a banda Factoría de Subsistencia dá comezo sacando o que é o seu terceiro disco longo "Respirando...Sempre!". Nove temas novos presentan a formación encabezada polo actor Josito Porto e Sabela Dacal, xunto aos que nesta ocasión estarán Rafa Otero ao baixo e Adrián Ríos na batería. O disco chega 5 anos despois do seu anterior traballo "Amores Fratricidas" (2019). En clave de rock and roll, Factoría de Subsistencia ofrece neste terceiro disco letras cargadas de humor negro, reflexión filosófica e crítica social. Aí están eses temas que xa foron presentándose quincenalmente como 'Non quero ser feliz' ou 'Esperta'. Todos eles poden escoitarse xa en YouTube e a banda presentará en concerto o novo disco na Casa das Crechas de Santiago de Compostela o vindeiro 13 de xaneiro. Tamén está prevista unha actuación o día 20 de xaneiro no espazo do Estudo Aldeaglobal de Vilagarcía onde ser realizou a gravación do disco.
Zënzar celebra no escenario "35 anos bourando"
Xénero: | 22 / 12 / 2023
A banda cercedense Zënzar celebra este sábado os seus 35 anos ininterrompidos facendo rock en galego. "35 anos bourando", din, desde o seu debut o 23 de decembro de 1988 no disco-pub Non Sei de A Silva. A formación soprara as candeas deste aniversario tamén nun escenario, o da Sala Capitol de Santiago que entón non existía. E para tal ocasión, estarán rodeados de case unha ducia de amizades que estarán presentes en varios temas, desde os clásicos ata os máis novos.
Nova cita festivaleira en Lugo co Valadouro Rock
Xénero: | 21 / 12 / 2023
Á lista nada pequena de festivais musicais de Galicia ven de unirse un novo nome: o Valadouro Rock. A Mariña lucense, onde ten lugar un dos festivais máis coñecido de Galicia e do Estado, o Resurrection fest de Viveiro, engade unha nova cita a poucos quilómetros dalí e tamén en clave de rock duro. A primeira edición deste Valadouro Rock terá lugar o 22 de xuño en Ferreira do Valadouro e ofrece unha experiencia de rock de todos os tipos a base de bandas de todo o Estado. Das nove bandas que ofrecerá o seu caertel hoxe mesmo veñen de desvelar as tres primeiras confirmacións. Un dos nomes máis coñecidos é o dos valencianos Gigatrón, unha formación que leva 25 anos percorrendo o país coa súa peculiar proposta paródica. Tamén hai sitio para o rock máis local coa confirmación de Materia Muerta, unha banda de hardcore Ribadeo cun disco publicado e outro a piques de saír. Completa a lista de primeiros nomes do cartel o grupo asturiano de heavy, SKÜLD. Aínda faltan outros seis nomes para completar o cartel desta primeira edición que sacou hox á venda as primeiras entradas.
Terbutalina volve coas pilas cargadas con 'Era cabra'
Xénero: | 3 / 11 / 2023
Regresa a formación de Esteiro, Terbutalina, cun novo álbum completo que desde hoxe está dispoñible en plataformas dixitais, "Era cabra" (Dotbeat, 2023). Fai agora 4 anos que a banda presentaba o seu último traballo "Espabila Gallego" (Folc records, 2019) e con este novo traballo presentado hoxe do que xa se foron presentando cancións en avance os Terbutalina culminan un proceso catártico para voltar "máis fortes ca nunca". Neste contexto 'Era cabra' revélase como o regreso á orixe "tras unha revisión dos seus principios máis esenciais e unha etapa de coñecemento e fortalecemento interno", aseguran desde a banda. Este novo elepé está composto por oito temas nos que podemos atopar esa banda punk rock moi aberta a influenzas históricas como o psichobilly e con letras traballadas, retrousos que enganchan e contundencia sonora. O disco foi gravado e producido nos estudios 'A Ponte' por Tomás Axeitos e masterizado por Robin Schmidt nos estudios '24-96' e terá O unha edición física en formato vinilo editado por Folc Records. A banda presentará este novo disco sobre o escenario da Sala Malatesta, en Santiago de Compostela, o vindeiro 8 de decembro.
O festival Castañazo de Chantada volve tras tres anos desaparecido
Xénero: | 27 / 10 / 2023
Disque foi en Chantada no 1994, na segunda edición do que entón era chamado o Castañazo Rock, onde naceu o termo 'Rock bravú'. Nunha cea coas bandas presentes na cantina de Viana. Dende entón esta é unha cita especial para a o rock en galego e só a pandemia conseguiu parala, ata agora. Tras dunha anterior edición, a 17, que se celebrou en 2019 o evento supera hoxe un parón de tres anos e volve coa súa XVIIIª edición cun lixeiro cambio de denominación quu non afecta á súa liña de programación, como Castañazo, a secas. Hoxe venres comeza e seguirá tamén mañá no mercado gandeiro de Chantada, reunindo unha ducia de artistas que representan a parte da actualidade da música en galego. Fillas de Casandra, Narco, Tremenda Jauria, Lágrimas de Sangre, Rastreros e Grande amore enchen o cartel do venres. O sábado estarán en Chantada Dakidarría, Mafalda, Tropa do Carallo, Sons of Aguirre, Arritmia e Rebeliom do Inframundo. A veterana cita ofrece tamén actividades como os cantos de Taberna e un festival paralelo de música infantil de balde no auditorio municipal.
Grupos en Loita denuncia o incumprimento de Caballero co festival Rock in Vigo
Xénero: | 16 / 6 / 2023
No marco do arrevesado conflito polo patrocinio público frustrado do concerto da banda californiana Guns N' Roses en Vigo engádese desde a escena musical viguesa outro motivo de controversia en dirección ao responsable do consistorio olívico. A plataforma de artistas musicais Grupos de Vigo en Loita denuncia que o Concello de Vigo incumpriu a súa promesa de organizar e celebrar o festival Rock in Vigo de bandas viguesas e galegas que o propio alcalde, Abel Caballero, anunciou para facerse na Porta do Sol os días 9, 10, 11 e 12 de xuño, coincidindo cos días previos ao concerto de Guns N' Roses en Balaídos. Porén desde a plataforma lembran que o evento non se celebrou, sen que se dese ningunha información ao respecto e sen que se tivese contactado con ningunha banda viguesa ou galega para participar en dito festival. Grupos de Vigo en Loita anuncia que levará a cabo accións nas próximas semanas para continuar a reivindicar a celebración do festival Rock in Vigo e en xeral a participación de bandas locais na programación musical do Concello. Anuncian que seguirán "esixindo ao Concello que celebre o evento tal e como o prometeu ante todas as viguesas e vigueses en Televigo", xa que "só mantendo a loita e a protesta de xeito continuado é como se conseguen as cousas con este Goberno municipal, como xa demostramos co tema das salas de ensaio".
Dioivo lanza o seu novo traballo 'Cara os Ceios Incrementes'
Xénero: | 9 / 6 / 2023
O dúo vigués de metal en galego Dioivo vén de lanzar o seu novo álbum 'Cara os Ceios Incrementes', editado polo selo discográfico grego Sleaszy Rider Records. Como é habitual no grupo, o traballo inclúe diversas adaptacións de coñecidas obras da literatura galega, de autores como Darío Xohán Cabana, Florencio Delgado Gurriarán ou Xosé Luís Méndez Ferrín. Tamén inclúe cancións con letras orixinais, sempre escritas en galego. O álbum comeza precisamente coa súa adaptación de "Que importa que nos craven as cadeas", poema de Darío Xohán Cabana incluído no seu libro de 1970 'Verbas a un Irmao'. Os vigueses escolleron este reivindicativo poema escrito durante o franquismo para homenaxear ao autor lugués logo do seu falecemento a finais de 2021. O álbum propiamente dito ten unha duración de 48 minutos en 8 cancións, pero o lanzamento inclúe tamén 3 temas extra adicionais, cos que a duración elévase aos 67 minutos. O primeiro deles é precisamente outra adaptación dunha obra da literatura galega, 'Retorno a Tagen Ata' de Xosé Luís Méndez Ferrín, lanzado previamente polo grupo no 50 aniversario desta célebre e influínte novela de 1971. No tema, Dioivo contan coa colaboración do propio Méndez Ferrín, que narra varios pasaxes da obra sobre a música da banda.
Maneiro volve en solitario co álbum "Un Bonito Despertar"
Xénero: | 30 / 5 / 2023
Javi Maneiro presenta este vindeiro domingo na Sala Capitol de Santiago o seu novo traballo discográfico en solitario. "Un bonito despertar" (Sorte Discos, 2023) é o seu cuarto disco asinado co seu nome propio e chega nun momento moi especial da súa carreira e da súa vida. Tras dun accidente cerebrovascular que obrigouno a afastarse de todas as actividades e frear en seco a xira que estaba a facer coa súa banda Heredeiros da Crus, Maneiro pode agora volver ´actividade con datas xa confirmadas coa súa banda para este verán e subirá ao escenario por vez primeira este domingo para presentarse con este disco, que xa estaba preparado antes do incidente pero cuxa saída tamén tivo que ser adiada ata agora. En "Un bonito despertar" Javi Maneiro ofrécenos 10 temas da súa autoría e por vez primeira en todos eles usa o galego. O ton de pop rock domina o álbum, indo dese as baladas intimistas como "Non quero bicos sen lingua" ata os himnos máis electrizantes como "A morte non me enjaña". Con un son de estudio profesional elegantemente producido por Fran Gude, e que conta co músico ribeirense Rubén Cores, como director musical e encargado dos arranxos. As letras de Maneiro, son sempre profundas, vitalistas, románticas e íntimistas, sentidas sen renunciar a unha linguaxe achegada e sinxela, unha marca do autor no que ten que ver coa súa música asinada en solitario e que reivindica no sinxelo de lanzamento "Son un romántico". O disco xa está en todas as plataformas e este domingo na Sala Capitol da capital galega o artista do "corazón de carballo" subirá ao escenario por vez primeira en todos estes meses para recoller o calor dos seus seguidores e transmitirlles a súa vitalidade.
O disco 'Ferro e Pedra: Homenaxe aos precursores' reivindica os legados do rock galego
Xénero: | 23 / 5 / 2023
Saíu o mesmo Día das Letras Galegas, o pasado 17 de maio, en principio só dispoñible para a súa escoita en formatos dixitais a través de YouTube e algunha outra plataforma, pero xa está prepararse a dispoñibilidade no resto das plataformas dixitais e unha edición física con algunhas outras sorpresas engadidas. "Ferro e Pedra: Homenaxe ós Precursores" é unha recompilación na que 10 bandas galegas actuais de rock renden tributo a outras tantas formacións históricas, a maioría de rock duro, metal e hardcore (aínda que hai excepcións) xa extintas pero que consideran que foron clave na escena musical das nosas cidades e vilas. As formacións que asinan as versións son Aquelarre, Amenaza de Muerte, Barbarian Prophecies, Dioivo, Mileth, Pneura, Schwarzenegger, Somos Nos, Xerión e Xhamain. Mentres os grupos cuxas cancións son obxecto de versións son Desvirgheitors, Mutant Squad, Épsilon, Nordés, Consumatum Est, Mol, Detestor, Nowhere, unha versión do famosos "Esta vida me va a matar" de Los Suaves e inclúese ademais unha revisión do clásico "Años 80" de Los Piratas. A maioría dos temas está en galego e, no reparto, as bandas foron escollendo para homenaxear a algunha formación da súa propia zona. A portada do mesmo foi realizada por Trönner Graphics.
novidades discográficas
Deleiba
III
Grande Amore
Trankimasín
Heredeiros da Crus
Xabral
Ruxe Ruxe
O círculo das formigas
Os John Deeres
REPORTAXE
Campamento Compostela
Data.Os Concertos do Novo do Milenio atraeron a Compostela milleiros de afeccionados à música
