CORREO
RSS
Noticias
Sesenta e oito grupos subirán ao Castro a tocar nos Castroconcertos deste ano
Xénero: | 30 / 4 / 2008
O vindeiro venres 2 de maio, ás 23 horas no parque de O Castro en Vigo, dará comezo a sexta edición dos Castroconcertos, evento que forma parte do programa de ocio alternativo xuvenil da Concellería de Xuventude, "Súbete ao Castro". Nesta edición, serán 68 as agrupacións musicais participantes, que ofrecerán un total de 34 concertos con entrada de balde entre os meses de maio e setembro. A meirande parte dos grupos musicais que participan neste programa son usuarios dos locais de ensaio do Concello de Vigo. O programa quere servir de plataforma de lanzamento da creación musical da mocidade viguesa, ofrecéndolles un espazo onde presentar as súas creacións. No primeiro concerto desta temporada actuará Track Asedio, Duke Sam, Sikeity, Dr. Valda, Dj B-neil, Dj Fabio e Antuán. Nas últimas cinco edicións deste evento, realizáronse unha media de 16 concertos por edición, e de 31 grupos participantes, cunha asistencia total de 5.719 persoas.
Berrogüetto e Malvela exportan concertos para os dous hemisferios de América
Xénero: | 24 / 4 / 2008
As cantareiras Malvela inician este días a súa primeira xira transoceánica partindo o sábado cara Arxentina onde actuarán presentando as cancións do seu disco “Da miña xanela á túa “ (PAI, 2007). As cantoras de Sanguiñeda, con idades entre os 26 e os 82 anos, actuarán no Coñexio Santiago Apostol, no Centro de Residentes de Mos e no Teatro bambalinas de Buenos Aires. Na súa xira estarán acompañadas pola cantante Uxía. E entrando polo Norte do continente tamén inician xira internacional os Berrogüetto coa súa renovada formación. En México actuará nun dos teatros con máis solera do país: o Teatro Degollado na cidade de Guadalajara; será o 1 de maio. A continuación participará durante dous días na Feira de San Marcos, en Aguascalientes, o día 3 de maio no Teatro del Pueblo e o día 4 no Pabellón de España ubicado na citada feira. A seguinte parada neste periplo será Irlanda, país ó que acudirá para presentar o seu traballo en dúas cidades: Ennis, no Glòr Music Center o día 9 de maio, e Baltimore, dentro do Baltimore Fiddle Festival o 10 do mesmo mes.
Blu Sens creara un selo para distribuír música nos seus reprodutores portátiles
Xénero: | 21 / 4 / 2008
A empresa compostelá Blu:Sens, fabricante de tecnoloxía audiovisual de consumo e referente no mercado dos reprodutores portátiles mp3 e mp4, anunciou recentemente a creación dun selo musical propio, Blusens Music, que operará exclusivamente no soporte dixital a través da rede e nos reprodutores da empresa. Blusens Music pretende centrarse no lanzamento de artistas noveis e comercializará as súas cancións a través destas canles buscando potenciar a interactividade cos seguidores a través do punto de encontro virtual Blu Generation.
Premio de investigación para un estudo sobre a música en Pontevedra
Xénero: | 18 / 4 / 2008
Un traballo sobre a situación da música pop e rock na provincia de Pontevedra pasada a época da “movida” foi o gañador do premio á investigación convocado pola Deputación de Pontevedra. O xurado reunido onte achou a Susana Rodríguez Barcia e Rubén Suárez Sousa merecedores do máximo galardón da convocatoria polo estudio da evolución da cultura musical na provincia no período comprendido entre 1997 e 2007. O galardón está dotado con 6.000 euros.
Lamatumbá saca o disco “Paraugas universal”
Xénero: | 18 / 4 / 2008 + IMAXES + AUDIO + VIDEO
Desde hoxe xa está nas tendas “Paraugas universal” (PAI – Música) o novo disco da multitudinaria banda Lamatumbá. Esta saída marca discográficamente a nova etapa do grupo despois dos cambios na formación e polo cambio de editora, malia que os actuais integrantes xa levan un ano subindo aos escenarios e mesmo formaron parte da embaixada musical galega na feira Popkomm de Berlín no pasado ano. Se con “Lume!” (Falcatruada, 2005) chegaron a vender máis de tres milleiros de discos con “Paraugas universal” a festeira banda agarda repetir o éxito. O disco, que inclúe un DVD con cinco pezas audiovisuais entre as que hai videoclips e outros documentos, conta con colaboracións de luxo como as de Guadi Galego, Paulo Borges ou Uxía Senlle. Lamatumbá están negociando xa futuras actuacións en escenarios tan importantes como a Expo de Zaragoza, o Festival de Ortigueira, o Parque de Castrelos de Vigo ou o San Froilán de Lugo. Quince temas propios co habitual son de Lamatumbá conforman o disco gravado e mesturado por Segundo Grandío en Casa de Tolos.
A Sinfónica de Galicia gravará a zarzuela de Chueca no centenario da súa morte
Xénero: | 17 / 4 / 2008
“Cádiz” é a zarzuela na que o madrileño Federico Chueca transmitiu o espírito que se respiraba cando os españois se levantaron contra os franceses. Unha composición singular que a Sinfónica de Galicia editará en CD cando se cumpren cen anos da morte do autor. Ademais, o director da Sinfónica, Víctor Pablo, presentou os tres cedés que a formación coruñesa rexistrou nos últimos meses. Son a ópera “Il Disoluto Punito, ossia Don Giovanni Tenorio”, que editou a Fundación Autor; o “Concerto de Aranjuez” que presenta Decca, e “Iberia” de Isaac Albéniz no selo Glossa.
Ophiusa saca ao mercado o seu primeiro disco
Xénero: | 16 / 4 / 2008 + VIDEO
Máis de dúas décadas despois do seu nacemento o grupo compostelán Ophiusa presenta esta semana o que é o seu primeiro disco “Paos” editado baixo o selo independente Leilear. Un concerto no Centro Sociocultural do Ensanche de Santiago este venres 18 de abril marcará o punto de saída do álbum ao mercado. Ophiusa está formado por Ramón Feáns, Paco Nogueiras, Antonio Presedo e Paulo Gacio. O grupo naceu a mediados do ano 1986,e durante case dez anos amosou o seu traballo en escenarios diversos e mesmo realizaron dúas xiras polas Illas Británicas nos anos 1988 e 1990. No ano 1995 o grupo fixo unha paréntese que durou dez anos volvendo a xuntarse a finais do ano 2005 renovándose coas experiencias acumuladas por cada un deles nas diversas bandas e formacións musicais polas que pasaron nestes anos.
Os selos independentes únense nunha plataforma estatal que fomente e promova os seus contidos
Xénero: | 15 / 4 / 2008
A Asociación Galega de Productoras Fonográficas, AGAPHONO, participa na recente Plataforma Independiente por la Música creada por selos independentes de todo o Estado ante os problemas de concentración e de acceso ao mercado que as PEMES do sector teñen ante as grandes multinacionais. En AGAPHONO están representadas as compañías Atlantia, Audia Records, Clave Records, Edicións Do Cumio, Kamikaze Producións, Lonxa Cultural, Ouvirmos, Sons Galiza, Zouma e Falcatruada. Esta última está representada por partida doble ao formar parte tamén da UFi, Asociación Nacional de Productores Fonográficos independentes, outra das asociacións que xunto con AFOCAM, asociación Fonográfica de la Comunidad de Madrid e APECAT, Associacó de productors – editoras fonogràfics i videogràfics catalans, conforman esta nova plataforma de oitenta selos independentes para traballar unidos co fin común de fomentar e promover os seus contidos e ter una voz única ante entidades públicas e empresas.
Artistas internacionais pechan a temporada de concertos para o verán
Xénero: | 11 / 4 / 2008
Lenny Kravitz abrirá en Vigo (29 de maio) a súa nova xira europea estreando o seu novo traballo “It is Time For A Love Revolution”. Con el ábrese o listado de artistas de carácter internacional que teñen programado un concerto para este verán. Juanes (Santiago, 20 de xuño), Bob Dylan (Vigo, 27 de xuño), o fundador de Supertramp, Roger Hodgson (Vigo, 23 de xullo) ou The Chemical Brothers (Vigo, 2-3 de agosto) son algúns dos concertos anunciados ata o momento, mais as citas clásicas “Festival do Norte” ou o “Festival Folk de Ortigueira”.
Comeza na Coruña a terceira edición do ciclo Rock Mariño
Xénero: | 10 / 4 / 2008
Dende este xoves, 10 de abril, e ata o mes de novembro, 26 grupos musicais da cidade herculina realizarán outros tantos concertos en 5 locais da Coruña dentro da programación do "Rock Mariño 08". O calendario de actuacións foi presentado onte no Pazo de María Pita pola concelleira de Cultura, María Xosé Bravo, o coordinador do Intituto Municipal de Cultura e Espectáculos, Agustín Lorenzo, Gandy e unha pequena representación dos grupos que actuarán ao longo destes meses. O grupo Black Bum, banda coruñesa de fusión multicultural, abrirá hoxe o programa as 22 horas, no Forum Celticum. Os concertos realizaranse fundamentalmente os xoves ou venres, e a entrada será de balde. A concellaría inviste 100.000 euros no proxecto.