CORREO
RSS
Ti estás aquí > Inicio / música en galego
Música en galego
A Real Banda de Gaitas de Ourense viaxará por China difundindo a súa música
Xénero: | 6 / 8 / 2009
Caixanova e a Real Banda Escola Provincial de Gaitas de Ourense veñen de subscribir un convenio de colaboración que permitirá á agrupación ourensá difundir o coñecemento da gaita, como instrumento destacado do folclore galego, nunha serie de concertos que ten previsto realizar por diversas cidades de China. Na sinatura do convenio estiveron presentes o director da banda, Xosé Lois Foxo, e Amadeo Rodríguez Piñeiro, director de Relacións Institucionais de Caixanova en Ourense.
Música, arte e deporte únense na novena edición do Marisquiño
Xénero: | 6 / 8 / 2009
¿Que ten que ver o marisco coa cultura urbana? Posiblemente nada, pero Vigo acolle desde hai nove anos baixo o nome de O marisquiño a un festival que une música (este ano está a Mala Rodríguez), arte (o grafiteiro vigués Nano 4814 axitará os seus esprais nun mural de 25 metros) e diferentes deportes urbanos: skate, breakdance, descensos en bicicleta de montaña pola cidade... O encontro terá lugar esta fin de semana (8 e 9 de agosto) en Vigo aínda que tamén se poderá seguir pola rede. Ademais, a organización ofrecerá información en tempo real para os visitantes vía Bluetooth, ademáis dos códigos BIDI (códigos bidimensionais para usuarios da rede 3G).
A canción Boogie Vigo de AÍD é o Tema da semana na sección latina de iTunes
Xénero: | 31 / 7 / 2009
iTunes, a tenda de música máis importante do mundo, escolleu “Boogie Vigo” como “Latino Single of the Week”, o que permitiu que o nome da rapeira de Vigo, con apenas 19 anos, destaque na portada da popular sección latina xunto a artistas consagrados como Nelly Furtado, Bebe, Shakira, Manu Chao, etc. A sección latina de iTunes, cunhas vendas que superan as 4.000 cancións por minuto, ten unha ampla repercusión internacional e permite que millóns de persoas poidan achegarse á súa música. Malia que esta sección non está dispoñible en España, si o está nos países que máis usuarios aportan a iTunes: EEUU, U.K., Australia, Canadá, Francia, Xapón, Holanda e Suíza. iTunes destaca nunha páxina especial dedicada a esta promoción o feito de que AíD emprega nas letras do disco Jugando tanto o castelán como o galego, e que estamos ante unha proposta auténtica, lonxe dos artificios das elaboradas propostas de marketing que dominan a escena musical. Jugando (autoedita-licor kafé, 09) está distribuído en todo o mundo por Lonxa Cultural.
Sae á venda Contratempos de Xoán Rodríguez Proxet
Xénero: | 30 / 7 / 2009 + VIDEO
O proxecto do percusionista Xoán Rodríguez (Raxó, 1971) ven de desembocar no disco Contratempos no que ao seu trío de percusión composto por el mesmo, o tablista hindú Vikas Tripathi e o percusionista galego Noli Torres, engade a colaboración doutros tres músicos e as voces de Tatiana Depestre e Irene Pérez. O disco contén oito temas, catro deles autoría de Xoán Rodríguez, e un vídeo e foi gravado nos días 2 e 3 de abril no auditorio do Conservatorio Profesional de Música de Vigo, no que Rodríguez é titulado na especialidade de percusión completa. O artista edita este Cd baixo o seu propio selo Latin Jazz XRP Records. Os estilos que manexa o Xoán Rodríguez Proxet van desde o jazz e latin jazz a bossa nova pasando polo afro o swing ou o hip – hop tocados con instrumentos de parches.
Gravar de cara ao público
Xénero: | 21 / 7 / 2009
Facer da gravación dun disco algo que tamén se comparte co público. Esta é unha proposta que atopamos, baixo dúas fórmulas diferentes, en senllos grupos galegos esta verán. A rachar a fronteira do álbum como produto final, Sumrrá acaba de gravar na NASA o seu terceiro disco e The Homens retransmiten na rede as súas sesións de gravación. Falamos con eles sobre estas iniciativas.
Desaparece o programa Banda Curta da TVG
Xénero: | 17 / 7 / 2009 + VIDEO
Despois de oito meses en antena con 27 programas emitidos, “Banda Curta”, o programa de música en directo que se viña emitindo todos os sábados na TVG, non terá continuidade despois do verán. Así o fixo saber hoxe o director do programa, Alfonso Pato, por medio dun comunicado. Músicos como Iván Ferreiro, Coque Malla, Silvia Superstar, Dr. Explosion, Lamatumbá, Christina Ronsenvinge, The Homens, Josele Santiago, Def con Dos, David Fonseca, Ruxe-Ruxe, Ectoplasma, Sugar Mountain, Som do Galpom, Cornelius, Moon Cresta e ata 45 bandas pasaron en directo pola discoteca LP45 de Ordes onde se gravava o programa. Banda Curta era o único formato dedicado en exclusiva á música pop e rock da televisión pública galega.
A 25ª edición do festival de Ortigueira conseguiu chegar aos 100.000 asistentes
Xénero: | 13 / 7 / 2009
A crise non parece ter afectado ao Festival Internacional do Mundo Celta de Ortigueira que este ano conseguiu incrementar o seu número de asistentes. Segundo as estimacións do Concello de Ortigueira foron 100.000 as persoas que este ano se achegaron á localidade nos catro días do festival. Esta cifra supón un incremento de 10.000 persoas respecto ao ano anterior nun evento que adoita ser, segundo os anuarios da SGAE, o que máis público convoca en todo o Estado. Segundo un estudio da Cámara de Comercio de Ferrol o festival xera cinco millóns de euros de ingresos á comarca. Neste contexto de éxito da convocatoria o gaiteiro Xosé Manuel Budiño realizou a gravación en directo da súa actuación no festival o sábado, un concerto que integrará un proxecto audiovisual en DVD.
Os músicos ao vivo reúnense para crear unha plataforma
Xénero: | 3 / 7 / 2009
Os artistas que se dedican á música en directo no noso país teñen unha cita o vindeiro domingo 5 de xullo ás 17:00 horas no Auditorio de Galicia. O encontro pretende crear unha "plataforma de intercambio de información e opinión" e desenvolver unha Asociación Galega de Músicos ao Vigo que outorgue unha voz común ao colectivo. A iniciativa pretende abranguer tanto afeccionados coma profesionais que teñan coma nexo común o tocar en directo.
Coanhadeira presenta o seu primeiro disco Haique
Xénero: | 3 / 7 / 2009 + AUDIO
Cunha festa- concerto no Café Grándola de Ourense celebrará o grupo Coanhadeira este sábado a saída do seu primeiro disco HAIQUE. A formación inicia tamén con esta actuación a xira de presentación deste traballo que xa ten 18 concertos fechados para este verán. O grupo está formado por Patrícia López, voz e pandeireta; Xerardo Quintela, acordeón; Xesus Pérez ”Chechu”, gaitas, whistle e zanfona; Marco Pérez, batería e percusións; Óscar Freire, gaitas e saxos e Fran X. Gómez, clarinete e guitarra. Xurde primeiro como grupo de “gaiteiros”, partindo dunha base eminentemente tradicional e baseándose na recollida da tradición musical popular. HAIQUE recolle o principal do repertorio do grupo dende a súa formación, con renovacións de arranxos nalgún caso, e conta coas colaboracións de Guadi Galego e Fonso “Skarnio”. O grupo está detrás de todos os procesos que levaron a sacar HAIQUE, dende a pre-produción, a idea orixinal ( plasmada por Heitor Real), até a mestura e seguramente a distribución. Asemade Coanhadeira xa está a preparar os temas do que será o seu segundo traballo, con data prevista de saída a comezos do 2010.
Juan Carlos Fernández Fasero é o novo director de AGADIC
Xénero: | 2 / 7 / 2009
O Consello da Xunta deste xoves oficializou o nomeamento do novo director da Axencia Galega das Industrias Culturais. O músico Juan Carlos Fernández Fasero será o responsable de AGADIC substituíndo a Miguel Martín. Fasero é membro do grupo folk Mutenrohi, ademais de ter publicados varios discos en solitario. Ademais, é creador do selo discográfico Zouma Récords e responsable do estudio de gravación Desfase Sound. Fasero é tamén secretario de AGAPHONO (Asociacion Galega de Fonograficas) e vicepresidente de AGEM (Asociación Galega de Empresas Musicais) ademais de formar parte da corporación municipal de Arnoia polo Partido Popular.