RSS
CRÍTICAS SOBRE Infantil-Xuvenil / 48
SOBRE O LIBRO "DAS NOVAS COUSAS DE RAMóN LAMOTE"
O regreso dun clásico
Para toda unha xeración de galegos e galegas, Ramón Lamote é alguén máis ca un personaxe literario. Saber máis da vida e andainas de Lamote é agora posible grazas á aparición deste libro co que Paco Martín volve a traer ao seu personaxe entre nós con capacidades e forza literaria renovadas. Todo un conxunto de ingredientes e unha galería de personaxes e anécdotas que converten cada unha das páxinas nunha deliciosa lectura.
SOBRE O LIBRO "O CARTEIRO DE BAGDAD"
Polas rúas de Bagdad
Marcos S. Calveiro ofrécenos este engaiolante relato que resultou gañador do premio estatal Ala Delta. A súa forza literaria mergúllanos nesta ocasión no Bagdad en guerra conseguindo retratar unha dura vida cotiá de supervivencia na que tamén hai lugar para a esperanza a través do valor e da suxestión que agochan as palabras.
SOBRE O LIBRO "REINO VERDE"
A poesía que xoga
Trinta e seis poemas que fan referencia a elementos da natureza ou elementos máxicos.Un espazo poético poboado de animais que se converten en protagonistas e no que o paso do tempo depara sempre novas sorpresas, pois día a día este máxico reino ofrece sons diversos e fermosas paisaxes cheas de actividade vital. Unha concepción lúdica da poesía, que xoga con elementos procedentes da fantasía e da realidade
SOBRE O LIBRO "ILLA SOIDADE"
Vadeando illas
A obra gañadora do Premio Fundación Caixa Galicia de Literatura Xuvenil 2007 é unha novela iniciática que nos descobre unha vida marcada pola paixón e a soidade, con reflexións sobre a autonomía persoal e o respecto polo diferente. Dende a inconsciencia e a inxenuidade propias da adolescencia Lucía traspasa a liña que separa o mundo convencional do marxinal, mesmo desafiando as advertencias da súa nai que percibe nela un perigoso exceso de idealismo.
SOBRE O LIBRO "INSTRUCIóNS PARA ESPERTAR A UNHA CADEIRA DURMIDA"
Máis tarefas domésticas
Prestifilippo preséntalle ao lector unha perfecta guía didáctica sobre a cadeira, destacando as vantaxes de compartir a nosa vida cunha mascota coa que podemos falar, xogar e mesmo facer ximnasia. Un relato nonsense que reborda surrealismo, sumido nun divertido caos de ideas e colores. Un libro insólito e divertido polo que deixarse cativar e co que todo tipo de lectores, incluídos os máis pequenos, poderán internarse nun mundo fóra do politicamente correcto e sen máis leis que as da imaxinación.
SOBRE O LIBRO "RINOCERONTES E QUIMERAS"
Calveiro, soñador de mundos
Nun vagón de tren arrómbanse sete monstros de feira, sete nenos que antes foron o gran engado dun prodixioso circo creado por un home extraordinario. Baixo este contexto integran a historia vintedous capítulos que alternan episodios, temporalidades, escenarios e voces ben diversas que configuran, amais dunha liña interesante na literatura xuvenil, un mundo narrativo que o autor manexa con acerto.
SOBRE O LIBRO "UNHA BRUXA BEN RARA"
Raruxa de Bentraces
O pontevedrés Carlos Mosteiro, autor de reducida pero interesante traxectoria, pasaba hai uns meses a formar parte da nómina de galardoados co Premio Barco de Vapor con esta narración humorística, repleta de resonancias literarias e que pon o acento na diferenza.
SOBRE O LIBRO "A LAGOA DAS NENAS MUDAS"
Cos fíos da realidade
As cuestións de actualidade non son alleas aos relatos dirixidos aos máis novos. Proba disto é a última entrega de Fina Casalderrey, unha figura indiscutible na nosa LIX que adoita literaturizar temas extraídos do ámbito do cotián. En “A lagoa das nenas mudas”, un suxestivo título que concentra o espazo simbólico e o trazo definitorio das protagonistas, volve mostrar a súa habelencia para ver o mundo cos ollos dos nenos e das nenas e explicalo coa súa propia voz.
SOBRE O LIBRO "LóBEZ"
O lobo diferente
Gañador do 2º Premio de Literatura Infantil e Xuvenil Meiga Moira 2006. O relato narra a historia dun fermoso lobo, que, ao non saber ouvear como os da súa especie, produce un gran pesar aos seus pais e é continuo obxecto de burlas. Unha historia que propón a valoración positiva dos “diferentes”, dos “raros”, que son quen de transformar o mundo.
SOBRE O LIBRO "PUCHO, O HABITADOR DOS TELLADOS"
Un campo nas azoteas
Manuel Janeiro estréase como narrador con este relato de coidada edición e destinado a todas as idades de lectores. O protagonista acha nos tellados da cidade un mundo diferente no que, por circunstancias, terá que desenvolverse. Os tellados serán o seu campo de soños e realidade.
SOBRE O LIBRO "A COVA DAS VACAS MORTAS"
Hippies e nazis en Galicia
O Premio Fundación Caixa Galicia de Literatura Xuvenil inaugura a súa andaina en 2006 con esta obra, unha historia que sorprende pola súa temática, a súa localización espacial e por presentar unha concepción do protagonista adolescente afastada do habitual neste tipo de obras.
SOBRE O LIBRO "POR QUé BALDOMERO QUINTáNS?"
Atopar resposta a unha pregunta
Texto gañador do III Premio de Literatura Infantil e Xuvenil “Pura e Dora Vázquez”, da Deputación de Ourense. As excelentes ilustracións de María Puertas Feijóo-Montenegro tamén resultaron premiadas neste certame pola súa tradución en imaxes do texto seleccionado.
SOBRE O LIBRO "A SOMBRA DESCALZA"
Sombras de muller
An Alfaya mereceu o Premio Lazarillo de Literatura Xuvenil 2005 con esta emocionante novela sobre a recuperación da dignidade e a necesidade de esculcar no pasado para facelo desde a distancia.
SOBRE O LIBRO "ELA ATOPA UN NOME"
A aventura interior
A protagonista non ten nome aínda, pero ante os seus ollos o libro que ten nas mans pídelle axuda e trasládaa ao seu mundo. o Mundo de Dentro. A partires desta viaxe ao mundo da fantasía a narración presenta unha intelixente reflexión arredor da busca da identidade propia, invita á reflexión sobre a extensión de modelos universais e o tratamento do imaxinario, pero tamén sobre a educación e as relacións familiares.
SOBRE O LIBRO "AS LUCES QUE SE ACENDEN E SE APAGAN"
Soños de cor aventura
As dúbidas e curiosidades sobre o proceso creativo dunha obra de arte respóndense neste libro. O crítico de arte Xosé Manuel Lens acha o procedemento do libro como "impecable, sinxelo e tremendamente efectivo."
SOBRE O LIBRO "EU CONTO, TI CANTAS..."
Despedidas que mancan o corazón
Último dos libros editados da autora recentemente desaparecida e á que se dedica unha homenaxe no Salón do Libro Infantil e Xuvenil de Pontevedra. Trátase dunha mostra máis dese mundo propio e recoñecible que María Victoria Moreno soubo crear. Tres contos para todos os nenos e nenas de sete anos en diante que buscan o amor nos olliños doces de mel dun can de bondadosas orellas.
SOBRE O LIBRO "RúA CARBóN"
Collendo o medo polo pescozo
Novela na que a autora propón a procura do pai como eixo do problemático tránsito da adolescencia á madurez. Unha narración onde o conflito político vasco funciona como fondo, sobre a procura complexa das identidades individuais e colectivas.
SOBRE O LIBRO "UN TARRO CHEO DE LAPIS"
A emoción do cotián
Juan Farias está de plena actualidade porque un dos seus títulos, “Un tarro cheo de lapis”, acaba de aparecer no mercado galego dentro da colección “Camaleón” que edita Planeta & Oxford, ademais de ter acadado recentemente o Iº Premio Iberoamericano de Literatura Infantil e Xuvenil Edicións SM. O galardón quere recoñecer a solidez e o compromiso da súa obra, a elección de temas e a súa vontade de estilo, trazos que o converten nun auténtico clásico en vida ao se tratar dunha das voces máis persoais e recoñecibles da LIX actual.
SOBRE O LIBRO "A NOITE DA RAíñA BERENGUELA"
Raíña de lenda a escena
Na catedral de Santiago unha raíña dorme o seu sono de pedra. Unha noite no ano, Berenguela acorda e percorre a cidade. “A noite da raíña Berenguela” é a primeira peza de teatro escrita por Neira Cruz e fíxose co Premio Lazarillo de Creación Infantil e Xuvenil outorgado pola Organización Española para o Libro Infantil e Xuvenil – OEPLI- entre as cento vinteoito obras presentadas en catro linguas cooficiais españolas. Xosé A. Neira Cruz soubo argallar un texto literario utilizando a figura histórica da raíña e adobiándoa de fantasía e imaxinación.
SOBRE O LIBRO "OS DONOS DO PARAíSO"
A lenda negra da conquista
Nesta obra gañadora do Premio Edebé 2004 de Literatura Xuvenil dous mozos universitarios, Ariadna e Toni, proxectan escribir unha novela ambientada na época do descubrimento de América, inspirándose nas denuncias de xenocidio feitas no seu día por frei Bartolomé de las Casas. A partir de aquí, o lector asiste a unha dupla lectura: por un lado, as aventuras dun mozo en plena conquista do Novo Mundo a principios do século XVI, a medida que Ariadna e Toni van escribindo capítulo a capítulo; por outro lado, o proceso creativo que seguen Ariadna y Toni, así como a súa propia aventura amorosa ou, mellor dito, a súa propia estratexia de conquista. O resultado d’Os donos do paraíso, unha obra valente e complexa, é unha lectura áxil e amena, con moitos datos e máis matices, que combina a novela histórica coa novela romántica, a aventura cos dilemas morais, a ficción coa realidade.