CORREO
RSS
Noticias
De Ninghures revisa a 'Feira' en urban-trad
Xénero: | 25 / 2 / 2025
Hoxe publicouse nas plataformas o novo traballo discográfico de 'De Ninghures', 'Feira, (Tremendo Audiovisual, 2025) é o segundo disco longo tras 'Aquí' (2022) e presenta sen medo unha revolución da sonoridade da banda. Se ben a base do seu traballo é a actualización do patrimonio tradicional, neste novo disco a banda métese de cheo no urban-trad e engade influencias latinas e árabes nalgúns temas. O resultado é unha proposta nova e fresca que coas referencias das foliadas, os seráns e as temáticas da tradición musical entran directamente nos sons electrónicos que caracterizan xa a unha xeración de artistas deste primeiro cuarto de século. Da man do produtor Juan De Dios Martín (Amaral, Xoel López, etc.), o grupo experimenta coa electrónica, coa utilización de novos instrumentos -ou usos renovados na súa instrumentación habitual- e a incorporación de efectos nas composicións. Nun dos temas 'Poço' tamén contan coa produción de Hevi. O disco pretende ser, como o seu nome indica, a carta de presentación dunha Feira do século XXI.
'Heredeiros da Crus' receitan rock con 'Trankimasín'
Xénero: | 21 / 2 / 2025
'Heredeiros da Crus' a veterana banda de rock en galego, regresa cun novo traballo longo, 'Trankimasin' (Dotbeat), que desde hoxe xa está nas plataformas dixitais. Este novo traballo de estudio, o primeiro en seis anos tras 'Derretidos' (Dotbeat, 2019), presenta unha colección de 12 temas, baixo o concepto de comprimidos receitables "en caso de deficiencia sanguínea de rock setentero", segundo comunican. O disco, coherente coa súa traxectoria e son e que non defraudará aos seus fieis e numerosos seguidores, ven cargado de irreverencia, retranca, referencias sexuais e potencia guitarreira e sonora en xeral. A presentación, un concerto sorpresa que celebrarán hoxe na coruñesa Sala Mardi Gras, anunciouse onte e esgotou entradas en tres horas. 'Trankimasin' reafirma a capacidade do grupo para seguir tras máis de trinta anos de traxectoria ofrecendo novidades sen comprometer as raíces que os converteron en iconas da música en galego.
Montedapena comparte a súa intimidade con ritmos de club no seu debut
Xénero: | 20 / 2 / 2025
Héctor Rodríguez é coñecido por ser membro da formación Lontreira, pero tamén ten un proxecto artístico persoal, baixo o nome de Montedapena que leva o nome dun alto da península do Morrazo de onde é o músico. Cunha proposta musical que aínda que nos marcos da música urbana transcende as etiquetas e de ter algunha sería a de 'íntimo' ven de sacar o que é o seu primeiro traballo longo, con título homónimo ao proxecto. 'Montedapena' (Ernie Records, 2025) está desde hoxe nas plataformas dixitais e dispón dunha edición en vinilo, adquirible na tenda virtual de Ernie. Neste traballo de dez pistas conflúen desde os sons synth-pop das últimas décadas á música electrónica de club. Cunha maioría de uso do galego, o artista tamén inclúe cancións en catalán e castelán. O cantante e produtor moañés opta pola experimentación con lixeireza e atrevemento. O artista asina a composición, voz, a produción e a mestura no disco. Contou coas colaboracións de Jairo Daponte e Raphael Souza nas guitarras, Eloy Riveiro no baixo e Xurxo Núñez na batería. María Galdón cos teclados e Javier Vidal nos coros.
O Álbum de Galicia incorpora as Cantareiras de Cerceda
Xénero: | 19 / 2 / 2025
Dúas das protagonistas nas que a Real Academia Galega personifica a homenaxe colectiva ás cantareiras neste Día das Letras conta xa coa súa entrada no Álbum de Galicia do Consello da Cultura Galega. A institución súmase ao recoñecemento a achegar unha biografía, fotografías e documentación sobre Adolfina e Rosa Casás, cantareiras da Vila da Igrexa (Cerceda).
Xerais lanza novos títulos a conmemorar o Día das Letras das Cantareiras
Xénero: | 17 / 2 / 2025
O Día das Letras dedicado ás cantareiras está a ter un importante reflexo editorial neste comezo do ano. Edicións Xerais recolle no seu web catro novos lanzamentos arredor da data, que sumado á biografía Cantareiras suma cinco publicacións sobre o tema. Dentro destes, destaca o volume colectivo Somos pandeireteiras, que dá conta do nacemento da asociación do mesmo nome en 2024 e analiza diferentes aspectos deste movemento de recuperación do patrimonio sonoro.
Filloas ofrece baile e boa onda co seu terceiro traballo
Xénero: | 17 / 2 / 2025
Iago galego, coñecido como Filloas e artista gañador do concurso Novos Valores 2024 do Festigal, ven de sacar en todas as plataformas o que xa é o seu terceiro disco en catro anos. 'súbete ao EVA' (Alende, 2025) supón nos seus sete temas unha proposta explosiva de baile e festa máis electrónica que nos traballos anteriores, hiperpop e ritmos electrónicos, acompañados de letras cheas de referencias a animes icónicos, videoxogos clásicos e modernos e aos memes máis virais de Internet nunha obra que captura o espírito dunha xeración conectada e creativa e cunha vida social nocturna de referencias comúns. A produción corre a cargo do artista coa colaboración de Daiv e a mestura é de Luis Antelo nos Estudios Estereoarte.
Hoxe é o día 'de amor'
Xénero: | 14 / 2 / 2025
Acaído ao día de San Valentín chega o disco de debut do colectivo creativo multidisciplinar 'resaca emocional' (RSK no seu nome curto), baixo o título 'de amor' (Tremendo audiovisual). Tras catro temas que foron avanzados nos pasados meses, hoxe sae á luz a totalidade do álbum de 10 temas que xa está en plataformas. Ash Diz, Berto Mira, Brais Iriarte e Lorena Cachito conforman a parte musical deste colectivo no que tamén hai artistas visuais e no que a comunidade é a clave dun proxecto atravesado polas diversidades. O resto do colectivo está conformado por Diana Montserrat: danza; Gala Rodriguez: escenografía, vídeo, foto; Noelia Mato: danza; Rocio Campoy: debuxo, maquillaxe; Zeltia Iglesias, deseño. O disco ofrece dez delicadas e exquisitas cancións de pop electrónico, suaves pero con picos de baile techno -acompañadas doutras tantas pezas visuais de Zeltia Iglesias- que afondan con honestidade no universo emocional dunha xeración nova con todo por explorar.
O festival de Ortigueira crea o Laboratorio de Cántigas Novas
Xénero: | 12 / 2 / 2025
O vindeiro 8 de marzo comeza a súa actividade en Ortigueira o LAB-Laboratorio de Cántigas Novas. O Festival Internacional do Mundo Celta que se celebra nesta localidade abre este novo espazo de formación no campo da música tradicional coa dirección de Ugia Pedreira e Óscar Górriz e coa colaboración da escola de gaitas municipal.
A música protagoniza o Día das Letras dedicado ás cantareiras
Xénero: | 10 / 2 / 2025
A sede da Fundación Seoane, na Coruña, acollía este 10 de febreiro a presentación do programa que a Real Academia Galega artellará ao longo do ano arredor do Día das Letras Galegas. A efeméride está dedicada nesta ocasión "á poesía popular oral e ás mulleres que contribuíron á súa creación e transmisión" e personificada en Adolfina e Rosa Casás, Eva Castiñeira e mais Manuela Lema, Prudencia e Asunción Garrido Ameixenda e Teresa García Prieto, as catro integrantes das Pandeireteiras de Mens que faleceron hai máis de dez anos, requisito establecido para recibir esta dedicatoria.
Quiosco: Raigame 51
Xénero: | 7 / 2 / 2025
A sede da Deputación de Ourense acollía este 2 de febreiro a presentación do número 51 da revista Raigame. Revista de arte, cultura e tradicións populares. A publicación que realiza o Centro de Cultura Popular Xaquín Lorenzo co apoio da Deputación de Ourense lembra nesta entrega o cincuentenario do falecemento do fotógrafo José Suárez. O creador protagoniza un artigo no que Xosé Luis Suárez Canal e Mercedes Rozas repasan diferentes exposicións que protagonizou ao longo da súa vida.