CORREO
RSS
Noticias
A RAG bota a andar a Primavera das Letras dedicada ás cantareiras
Xénero: | 10 / 3 / 2025
O CEIPP Celso Emilio Ferreiro de Cerceda acollía na mañá deste 10 de marzo a presentación da Primavera das Letras. O programa didáctico co que a Real Academia galega achega a celebración do 17 de maio ao público escolar botou a andar coa estrea, a cargo do alumnado deste centro, da obra teatral As Ferreñas (en vivo e en directo), escrita por Paula Carballeira, que se pode descargar no web da iniciativa nunha edición ilustrada por Nuria Díaz.
Deleiba publican o seu primeiro LP
Xénero: | 10 / 3 / 2025
Nados como banda en 2017, e con temas presentados en EP e sinxelos ao longo destes anos, ademais de actuacións en directo en festivais, os Deleiba tiveron que agardar ata este ano para presentar o seu primeiros traballo de longa duración. 'Ao revés do mundo' (Deleiba, 2025) está producido polo coñecido músico e produtor Iago Pico, que xa colaborara noutras gravacións da banda, e gravado en Pouland Studios. Neste disco de once temas, a formación reúne algunhas das cancións que foi presentando estes anos e outras novas composicións. Todas entran dentro do son punk rock moi achegado ao metal. Con letras en galego sobre todo tipo de temas, desde o social ao íntimo. Nunha das cancións 'Sere-Bros Destruídos' contan coas colaboracións de Monolious Dop e Ula Mayo. O son, baseado en guitarreo ametrallador e contundente, percusión potente e importantes punteos non baixa o ritmo agás nun par de temas máis próximos á balada, pero tampouco o fai de todo, deixando espazo para o seu selo sonoro. O disco está dispoñible para escoita nas plataformas dixitais. A primeira das subidas ao escenario tivo lugar este pasado venres na Sala Sonar de Santiago, para o que contaron coa subida ao escenario do propio Iago Pico. O vindeiro día 14 de marzo estarán na Coruña, na Sala Filomatic.
O VilaBlues farase este ano en Santiago en maio
Xénero: | 10 / 3 / 2025
O festival de música blues e soul Vilablues ten un longo historial xa de celebracións e de cambios de localización buscando sempre manter unha oferta de calidade no cartel. Se o seu lugar de inicio fai varios anos foi Vilagarcía de Arousa durante as súas primeiras edicións, tras diso fíxose durante dous anos en Noia e logo pasou a facerse en Ferrol, sempre na época do verán. Agora ven de anunciarse un novo capítulo con novo desprazamento e confirmarse xa o cartel deste ano. O festival celebrarse en primavera, os días 15 e 17 de maio, na Sala Capitol de Santiago de Compostela. O cartel para estes dous días xa inclúe formacións como KoKo Jean &The Tonics, Raimundo Amador e o bluse e solu galegos da man da Adrian Costa Blues Band e The Fabulous Resaca Brothers.
Amoebo presenta o seu traballo dual 'Escándalo no escuro'
Xénero: | 7 / 3 / 2025
Desde hoxe está xa en plataformas o novo duplo disco de Amoebo, 'Escándalo no escuro (A e B)' (Autoedición). Neste dobre LP, unha das bandas seleccionadas para formar parte da aceleradora musical Son Emerxente de Fundación Paideia, explora os ritmos urbanos, e mesmo latinos mesturados co pop dos 2000, dando paso, tamén, aos sons máis rockeiros. No novo traballo producido por David Fernández (Daiv) conviven dous estilos que a primeira vista poden parecer contrarios o urbano e o rock. Como liña coherente de ambas caras, os temas de 'Escándalo no escuro' presentan unha gran carga explícita de sexualidade desinhibida, diversión, paixón, escuridade e festa. Amoebo pode acadar con esta ampla panoplia de temas que o seu disco poida estar presente en calquera pista de baile actual.
Grande Amore lanza o seu "III" álbum
Xénero: | 6 / 3 / 2025
Xa chegou ás plataformas o novo álbum de Grande Amore. Titúlase III, seguindo a tónica iniciada desde o primeiro, e ofrece 11 cancións na liña frenética do grupo. A xira de presentación do novo álbum comezará en Ourense o día 14 de marzo e continuará por Lugo (15), Murcia, Alicante, Madrid, Zamora, Oviedo, Toledo, ou Coruña ou Santiago entre outras localidades. Para o novo disco, a banda preparou un conxunto de videoclips como Ontes fun moi malo, Ti e máis eu, en colaboración con Nacho Vegas, e está a rodar nestes momentos outro en Arzua a partir do tema Vou pa Arzúa. Este é o terceiro álbum que publica a banda, tras Grande Amore (2021) e II (2023).
Milladoiro recibirá o XVIII Premio Opinión Andaina Senlleira
Xénero: | 4 / 3 / 2025
O vindeiro 9 de abril o teatro Rosalía de Castro da Coruña acolle a gala de entrega dos XXIV Premios Opinión da Música de Raíz. O galardóns que artella o xornal La Opinión recoñecerán co XVIII Premio Opinión Andaina Senlleira a histórica formación Milladoiro.
A Facultade de Filoloxía de Santiago celebra 50 anos cun festival
Xénero: | 26 / 2 / 2025
Para celebrar, este mes de febreiro, os seus 50 anos de existencia, a Facultade de Filoloxía da Universidade de Santiago programa para este día 26 un festival musical singular. Scripta manent, verba volant reúne, ás 19 horas no Auditorio de Galicia, unha selección de artistas que pasaron polas aulas deste espazo ao longo da súa historia.
De Ninghures revisa a 'Feira' en urban-trad
Xénero: | 25 / 2 / 2025
Hoxe publicouse nas plataformas o novo traballo discográfico de 'De Ninghures', 'Feira, (Tremendo Audiovisual, 2025) é o segundo disco longo tras 'Aquí' (2022) e presenta sen medo unha revolución da sonoridade da banda. Se ben a base do seu traballo é a actualización do patrimonio tradicional, neste novo disco a banda métese de cheo no urban-trad e engade influencias latinas e árabes nalgúns temas. O resultado é unha proposta nova e fresca que coas referencias das foliadas, os seráns e as temáticas da tradición musical entran directamente nos sons electrónicos que caracterizan xa a unha xeración de artistas deste primeiro cuarto de século. Da man do produtor Juan De Dios Martín (Amaral, Xoel López, etc.), o grupo experimenta coa electrónica, coa utilización de novos instrumentos -ou usos renovados na súa instrumentación habitual- e a incorporación de efectos nas composicións. Nun dos temas 'Poço' tamén contan coa produción de Hevi. O disco pretende ser, como o seu nome indica, a carta de presentación dunha Feira do século XXI.
'Heredeiros da Crus' receitan rock con 'Trankimasín'
Xénero: | 21 / 2 / 2025
'Heredeiros da Crus' a veterana banda de rock en galego, regresa cun novo traballo longo, 'Trankimasin' (Dotbeat), que desde hoxe xa está nas plataformas dixitais. Este novo traballo de estudio, o primeiro en seis anos tras 'Derretidos' (Dotbeat, 2019), presenta unha colección de 12 temas, baixo o concepto de comprimidos receitables "en caso de deficiencia sanguínea de rock setentero", segundo comunican. O disco, coherente coa súa traxectoria e son e que non defraudará aos seus fieis e numerosos seguidores, ven cargado de irreverencia, retranca, referencias sexuais e potencia guitarreira e sonora en xeral. A presentación, un concerto sorpresa que celebrarán hoxe na coruñesa Sala Mardi Gras, anunciouse onte e esgotou entradas en tres horas. 'Trankimasin' reafirma a capacidade do grupo para seguir tras máis de trinta anos de traxectoria ofrecendo novidades sen comprometer as raíces que os converteron en iconas da música en galego.
Montedapena comparte a súa intimidade con ritmos de club no seu debut
Xénero: | 20 / 2 / 2025
Héctor Rodríguez é coñecido por ser membro da formación Lontreira, pero tamén ten un proxecto artístico persoal, baixo o nome de Montedapena que leva o nome dun alto da península do Morrazo de onde é o músico. Cunha proposta musical que aínda que nos marcos da música urbana transcende as etiquetas e de ter algunha sería a de 'íntimo' ven de sacar o que é o seu primeiro traballo longo, con título homónimo ao proxecto. 'Montedapena' (Ernie Records, 2025) está desde hoxe nas plataformas dixitais e dispón dunha edición en vinilo, adquirible na tenda virtual de Ernie. Neste traballo de dez pistas conflúen desde os sons synth-pop das últimas décadas á música electrónica de club. Cunha maioría de uso do galego, o artista tamén inclúe cancións en catalán e castelán. O cantante e produtor moañés opta pola experimentación con lixeireza e atrevemento. O artista asina a composición, voz, a produción e a mestura no disco. Contou coas colaboracións de Jairo Daponte e Raphael Souza nas guitarras, Eloy Riveiro no baixo e Xurxo Núñez na batería. María Galdón cos teclados e Javier Vidal nos coros.