17/11/2020
As curtametraxes de Alberto Vázquez e Álvaro Gago entran na carreira polos Goya
A comisión de curtametraxes dos Premios Goya 2021 ven de seleccionar as pezas que poden ser votadas polos membros da Academia das Artes e as Ciencias Cinematográficas de España para optar coma finalistas na vindeira edición dos galardóns. Entre os dez títulos propostos na categoría de animación está o novo traballo de Alberto Vázquez,
Homeless Home, estreado este ano no festival francés de Annecy no que obtivo o premio do xurado. Esta é a sexta curtametraxe do animador galego, que xa gañou dous Goya en 2017 na categorçía de curtametraxes de animación por
Decorado e na de longametraxes de animación por
Psiconautas. Os nenos esquecidos.
mantén a estética escura e fantástica de outros traballos de Vázquez e conta a historia dun triángulo amoroso entre unha bruxa, un orco e un ogro coma escusa para abordar o tema da volta á terra de orixe de moitas persoas debido á crisis económica. . Amplía a nova>>
16/11/2020
O Carballo Interplay xa non sae da rede este 2020
As restricións sanitarias e as medidas de afastamento social levaron á organización do Carballo Interplay a plantear unha realización completamente virtual deste evento que, xustamente pon o foco sobre as realizacións feitas para as redes dixitais. Todo o programa de actividades, encontros e mostra de producións que este ano se presentan neste evento desde a localidade de Carballo entre os días 18 e 21 de novembro terán Internet como punto de encontro exclusivo. Mentres outros festivais audiovisuais propuxeron formatos mixtos entre o presencial e o virtual, Carballo Interplay ten na rede o seu punto de partida natural e úsao de base fundamental ausente de riscos neste momento. O programa a través das tres diferentes seccións competitivas (VO Galego, Internacional e Estatal) ofrece en total máis de trinta producións con participación chegada de ata 14 países. Sete series en galego poderán verse este xoves 19 dentro da súa competición, Ademais haberá diversos encontros virtuais dentro do programa que tratarán, entre outros, temas como a presenza da muller no mundo dos videxogos, as etapas e xeracións dentro das creacións para YouTube en Galicia, o uso e consumo de podcasts en galego e mesmo a propia circunstancia da virtualidade dos eventos será obxecto dun encontro, Os festivais en tempos de distancia social e multipantalla no que participarán Ana Domínguez (S8), Ángel Sánchez (Play Doc) e Sonia Méndez (Carballo Interplay). Cada actividade e proxección ten asignado un horario e unha dirección no programa, que se pode consultar na web do festival.. Amplía a nova>>
16/11/2020
Margarita Ledo premio á mellor dirección de película española en Sevilla por 'Nación'
A estrea mundial da longametraxe Nación no Festival de Cine Europeo de Sevilla tivo coma resultado o primeiro galardón para esta produción. O xurado do festival decidiu outorgar á realizadora o filme, Margarita Ledo Andión, o Premio Especial á mellor dirección de película española que fixera estrea nacional ou mundial nesta edición do festival sevillano. Do filme o xurado valora a complexidade do traballo de investigación que supón "a favor da memoria das mulleres galegas que traballaron nas fábricas da incipiente modernización do século XX, e despois sufriron as consecuencias da reconversión industrial". Ademais sinala sobre a factura da realización galardoada como a súa "delicada aproximación a través da documentación e da reconstrución do imaxinario do entorno, do contexto e das súas vidas encárnase a través do retrato de varias mulleres, verdadeiras protagonistas do relato". O xurado fai especial mención do tratamento sonoro da película, que consideran crucial para afirmar "o impresionante valor das imaxes que compoñen o documental", conclúen. Margarita Ledo recibe tamén estes días o Premio de honra de Cineuropa en Santiago, onde ademais se proxecta Nación.. Amplía a nova>>
13/11/2020
'La isla de las mentiras' seleccionada a competición no festival internacional chinés Golden Rooster
Xa vai a pola súa sexta semana en salas de cine e a película de Paula Cons segue co seu percorrido internacional por festivais. Neste caso a longametraxe protagonizada por Nerea Barros e Darío Grandinetti que reconstrúe os sucesos ocorridos na Illa de Sálvora en 1920 co naufraxio do Santa Isabel ven de entrar na selección de competición oficial dentro da sección de Cine Extranxeiro da 33ª edición do festival chino Golden Rooster Awards, que se celebrará entre o 25 e o 28 de novembro na cidade de Xiamen. La isla de las mentiras volve así ao país onde tivo a súa estrea mundial dentro da competición oficial no Festival Internacional de Cine de Shanghai en xullo. A estrea en exhibición tivo que realizarse en xullo a tra´ves da plataforma Filmín, onde a longametraxe está aínda dispoñible. O festival chinés Golden Rooster Awards é unha acción paralela á entrega destes premios propios da industria audiovisual chinesa que reúnen ao máis salientable do sector do país oriental. La isla de las mentiras está rodada en castelán e dispón de dobraxe ao galego.. Amplía a nova>>
13/11/2020
Teo Cardalda nomeado presidente da SGAE en Galicia
Teo Cardalda (Vigo, 1962) exercerá a representación da Sociedad General de Autores y Editores (SGAE) en Galicia á fronte dun Consello Territorial onde tamén están outros músicos e representantes do audiovisual. O coñecido músico fundador de Golpes Bajos e Cómplices foi designado pola recentemente elixida xunta directiva da SGAE para ser o presidente do Consello Territorial sucedendo a Juan Rivas e Rodrigo Romaní no cargo. Cardalda xa formara parte anteriormente dos órganos de goberno da SGAE na Xunta Directiva e foi vicepresidente de Pequeno Dereito da entidade. No órgano territorial da sociedade de xestión de dereitos está tamén presente o músico Miguel Costas, fundador de Aerolíneas Federales e Siniestro Total, entre outros proxectos musicais, Alberto Gallardo e Raquel Rodríguez Fernández. Coma representantes do colexio audiovisual entran neste consello territorial galego o guionista Víctor Sierra e o compositor Sergio Moure. A SGAE ten a a súa sede galega en Santiago de Compostela. . Amplía a nova>>
10/11/2020
Oliver Laxe recibe o Premio especial do Festival Márgenes de Madrid
O cineasta Oliver Laxe recibirá o Premio Especial Márgenes al Cine Independiente que se concede no marco de la décima edición del certame Márgenes de Madrid. Desde a organización do festival sinalan un paralelismo entre a carreira do director de O que arde e o propio festival. Mimosas, foi a película inaugural da sexta edición do certame. Con este galardón o festival que render "un merecido tributo a un cineasta imprescindible cuxa obra, repleta de beleza e intensidade, entronca coa de outros grandes heterodoxos e nos reconcilia, dalgún xeito, co cine entendido como un feito cultural e artístico afastado do mero entretemento", din. Nesta Xª edición do Festival Márgenes tamén estará presente o audiovisual galego a través das proxeccións da curtametraxe gañadora do premio mestre Mateo en 2017, Einstein-Rosen de Olga Osorio (2016) na sección Márgenes Lafamily e das máis recentes producións Ons de Alfonso Zarauza (2020) e Nación de Margarita Ledo (2020).. Amplía a nova>>
03/11/2020
Margarita Ledo, Alfonso Zarauza e Javier Gutierrez premios Cineuropa 2020
A 34ª edición do Cineuropa afronta un ano complicado coa determinación de manter a súa "medula central", en palabras do seu director José Luís Losa, que volve este ano tomar o timón tras a ausencia en 2019. Hoxe celebrouse no Concello de Santiago a presentación do evento que se celebrará entre o 6 e o 22 de novembro en catro salas da cidade (Teatro Principal, Salón Teatro, NUMAX e Sala Mozart do Auditorio de Galicia). Ata 95 películas se proxectarán este ano na cita que recolle unha seleccións dos palmarés dos principais festivais internacionais europeos deste ano, ofrecendo máis primicias nacionais que nunca. Na presentación déronse a coñecer os nomes dos premiados cos recoñecementos honoríficos deste ano. A cineasta militante da loita pola memoria e o rol feminino na historia do noso pais Margarita Ledo, que ademais este ano presentará a súa nova obra Nación. Tamén é premiado o actor de adopción ferrolá Javier Gutiérrez, que xa conta con dous premios Goya no seu haber; e o director e guionista Alfonso Zarauza, que recibirá o Premio no acto de clausura do Festival, que coincide coa estrea do seu filme Ons.. Amplía a nova>>
02/11/2020
O festival INTERSECCIÓN e o Curtas-Festival do Imaxinario reparten os seus premios
O pasado sábado 31, tivo lugar o acto de clausura do festival, INTERSECCIÓN - Festival de Arte Audiovisual Contemporánea coa entrega de oito premios na que foi a súa primeira edición con seccións competitivas e na que maior protagonismo tivo a creación galega. Esa presenza tamén se viu reflectida no palmarés xa que, ademais dos cinco premios repartidos na Sección Galicia tamén o filme de Antía Carreira Ola baby (Video-ensaio sobre a miña depresión) acadou o Premio Resorte, polo que competían as pezas da Sección Escolas. Na Sección Galicia o Premio Númax consistente na exhibición na sala compostelá da obra gañadora durante unha semana, foi para Judith Adataberna por Inside the Microtubule, a obra foi tamén merecente do Premio A Colectiva pola "habilidade e a sutileza na hibridación dos distintos formatos que combina a peza, pola mestura de documentos e gravacións reais e experimentais co formato documental", entre outros motivos ; o Premio Contemporánea, outorgado pola Asociación de Galerías de Arte Contemporáneo de Galicia, foi para Berio Molina e Alexandre Cancelo por -oito; o Premio Xurado Novo desta sección foi para La bouche, promèner, non, non, non de Acacia Ojea e por último, o público outorgou a David Fidalgo o Premio do público da Sección Galicia pola peza de animación Reality. Ademais diso o xurado da Asociación Sindical Galega de Guionistas, decidiron dar o Premio AGAG ao Mellor tratamento de proxecto a Lara Curto, por Lluny e na sección Contemporánea, o Premio Xurado Novo foi para Manuel Saiz por (SUBTÍTULOS) saber sin estudiar "pola indagación nun elemento que habitualmente pasa desapercibido no filme, por inverter orixinalmente a orde dos elementos da imaxe e pola execución textual e visual".. Amplía a nova>>
02/11/2020
A celebración do Día das Letras deixa na rede novos contidos sobre Carballo Calero
As máis recentes medidas para coutar a pandemia de Covid-19 no noso país levaron á cancelación a última hora de grande parte dos actos centrais de homenaxe a Carballo Calero polo Día das Letras. Así, a Real Academia anulou o pleno extraordinario que tiña previsto celebrar na honra do autor este sábado 31 de outubro logo de o trasladar de Ferrol á Coruña polo mesmo motivo. Tampouco a lectura continuada da novela Scórpio, convocada en Compostela para o día 30 se puido realizar, sen que polo momento haxa novas datas para estes eventos.. Amplía a nova>>
30/10/2020
'Lúa Vermella' de Lois Patiño chega hoxe ás salas de cine
Ata en nove localidades galegas se poderá ver hoxe á estrea en salas da película Lúa Vermella, do cineasta Lois Patiño. O filme estrease este venres en cines tras o seu paso por festivais e a súa estrea galega no recente Curtocircuíto. A película, cuxa inicial estrea en abril viuse truncada pola pandemia, chegará desde hoxe a 18 localidades de toda España, a metade delas en Galicia. Salas de A Coruña, Vigo, Santiago, Lugo, Ferrol, Marín, Monforte, Carballo e A Estrada acollerán esta película que obtivo a Biznaga de Plata á Mellor Película Española na Sección ZonaZine do 23 Festival de Málaga e o Premio á Mellor Película na 25ª edición do Festival Cinespaña de Toulouse. Lois Patiño volve en Lúa vermella a escribir e dirixir unha historia situada nunha localidade costeira, como xa fixera con Costa da Morte (2013) a súa primeira longametraxe pola que obtivera o premio no festival internacional de Locarno á mellor dirección emerxente. Nesta nova película Patiño usa do mundo dos mitos e lendas populares para contar unha fabulación sobre unha vila costeira na que os seus habitantes están paralizados coma suspendidos no tempo, tres mulleres chegan ao pobo e teñen que manexarse con esta situación. A historia está protagonizada por Ana Marra, Carmen Martínez e Pilar Rodlos. . Amplía a nova>>
