22/03/2016
Xunta e sector audiovisual procuran unha estratexia conxunta para 2016-2020
A Xunta, a Televisión de Galicia e seis entidades e asociacións audiovisuais reuníronse onte na Cidade da Cultura co obxectivo de definir unha estratexia conxunta para este sector entre os anos 2016 e 2020, definindo prioridades e prazos. Na xuntanza participaron o director da Axencia Galega das Industrias Culturais (Agadic), Jacobo Sutil, e nela tamén participaron Dolores Meijomín, coordinadora de Política Audiovisual da Agadic; Carmen Pita, directora de Promoción de Turismo de Galicia; Fernando Rodríguez Madriñán, director do departamento de Programación e Emisión de TVG; Carlos Ares, presidente da Academia Galega do Audiovisual; Mar Varela, xerente do Clúster Audiovisual Galego (Clag); Dolores Ben, presidenta da Asociación Galega de Produtoras Independentes (Agapi); Ramón Domínguez, presidente da Asociación de Empresas Galegas do Audiovisual (AEGA); Jorge Coira, presidente da Asociación de Directores e Realizadores de Galicia-CREA; e Daniel Domínguez, vogal Asociación Galega de Guionistas..
Amplía a nova>>
18/03/2016
Un erro no reconto modifica as candidaturas aos premios Mestre Mateo
Un erro notarial no reconto dos votos para seleccionar os finalistas aos premios Mestre Mateo provocou unha modificación nas candidaturas aos galardóns do audiovisual galego. Os responsables da Academia Galega do Audiovisual facía público onte un comunicado no que explicaban o problema, do que foron conscientes ao preparar a votación final dos premios e comprobar que o número de votos rexistrado na plataforma dixital non correspondía co reconto que realizara o notario. O erro afectou a cadanseu finalista de 13 candidaturas e a dous no caso da categoría de Mellor Anuncio Publicitario..
Amplía a nova>>
16/03/2016
Emma Lustres leva o Premio Pedigree de Cans
A Asociación Cultural Arela, que organiza anualmente o Festival de Cans, acordou outorgalle o seu premio Pedigree á produtora Emma Lustres. A organización recoñece así a que considera "unha figura clave no cinema galego actual a través da súa empresa Vaca Films" e "valora a visibilidade e as oportunidades que lles dá aos profesionais galegos" a través desta empresa. O galardón recoñece así a destacada carreira desta profesional que obtivo importantes recoñecementos para varios dos seus proxectos, como
Celda 211 ou
El desconocido.
.
Amplía a nova>>
14/03/2016
O Descoñecido, Lobos Sucios e Hospital Real concentran as candidaturas dos Mestre Mateo
Quince nominacións para o filme
O Descoñecido sitúan esta produción como favorito para a actual edición dos Premios Mestre Mateo. Moi achegado a ela está
Lobos Sucios, con 14 candidaturas, mentres a serie de televisión
Hospital Real, con once, é a terceira máis recoñecida. A Academia Galega do Audiovisual daba a coñecer esta mañá os finalistas para os seus galardóns anuais, que se seleccionarán agora por votación dos socios. Destacan na listaxe tamén a serie
Serramoura, que compite por sete estatuas e a longametraxe
Las altas presiones, presente en 5 candidaturas. Esta última, canda a
A Praia dos Afogados completan, con
O descoñecido e
Lobos sucios os traballos con opción a levar o premio ao mellor filme. A gala dos premios celebrarase o 23 de abril no Pazo da Ópera de A Coruña..
Amplía a nova>>
09/03/2016
A AGADIC convoca axudas á produción audiovisual por dous millóns de euros
O Diario Oficial de Galicia recollía onte a convocatoria das axudas para producións e coproducións audiovisuais de contido cultural galego. A Axencia Galega das Industrias Culturais mantén o orzamento de dous millóns de euros para estas subvencións. Ademais elimina a obrigatoriedade de constituír garantías para o adianto de cantidades de máis de 18.000 euros e ábrese a posibilidade de acceder a un 85% do importe da subvención de xeito anticipado. Na distribución dos fondos, incremétanse as axudas para proxectos en versión orixinal galega, para coproducións europeas e para os primeiros proxectos de directores de ata 300.000 euros de orzamento. .
Amplía a nova>>
08/03/2016
A Xunta anuncia un Plan estratéxico do Audiovisual Galego
Desenvolver un plan estratéxico para o sector audiovisual para o período 2016-2020. Esta é a proposta que o Presidente da Xunta lles facía a representantes deste ámbito profesional na reunión que mantiveron onte. Alberte Núñez Feijóo anunciaba a súa intención de "impulsar este sector como un dos buques insignia da nosa industria cultural" e convidou a asociacións, empresas e entidades vencelladas ao audiovisual a facer parte dun proceso de debate que analice as medidas máis axeitadas a desenvolver. Entre outras propostas, a Xunta xa anunciou a súa intención de mudar o sistema de pagos de subvencións, que permitirá acceder por anticipado ata o 85% do importe concedido e eliminará a necesidade de garantías para importes superiores aos 18.000 euros. Ademais, poranse en marcha medidas para a creación e a dinamización de audiencias, aumentar a implicación da cidadanía no consumo de bens e servizos audiovisuais e mellorar a educación audiovisual nas escolas..
Amplía a nova>>
08/03/2016
A cultura implícase co 8 de marzo
A celebración hoxe 8 de marzo do Día da Muller, está motivar múltiples actividades culturais a reivindicar a presenza feminina en diferentes ámbitos. Neste ano, semella que o audiovisual está a adquirir unha especial importancia nas propostas que se fan desde a cultura. Así, o Festival de Cans daba a coñecer onte o seu
Decálogo para a visibilidade das mulleres, unha serie de medidas que o evento aplicará en todas as súas seccións e homenaxes e que fará chegar a outros festivais, colectivos e administracións. Pola súa banda, a Deputación de Pontevedra pon en marcha o ciclo
Cinema e muller, no que se proxectarán dezaseis curtametraxes dirixidas por mulleres galegas ademais do filme colaborativo
Visións. Un concerto e varias charlas completan este programa que se distribúe entre Pontevedra e Vigo..
Amplía a nova>>
29/02/2016
Miss Ledyia cumpre cen anos en Pontevedra
Foi un fito fundacional do noso cinema. Gravouse a man da produtora viguesa de José Gil e entre os seus actores aparece Castelao.
Miss Ledyia fai neste 2016 un século de existencia. Para conmemorar a efeméride, a Consellería de Cultura, a través da Axencia Galega das Industrias Culturais e do Centro Galego de Artes da Imaxe, o Concello e mais o Museo Provincial de Pontevedra organizan para o vindeiro venres 4 de marzo unha proxección especial deste filme. .
Amplía a nova>>
25/02/2016
Carballo Interplay crea un premio para proxectos de webseries
Fomentar a creación dixital innovadora, en lingua galega e para o mundo son os obxectivos cos que Sonia Méndez, directora do festival de webseries Carballo Interplay, presentaba esta mañá o novo galardón que se entregará no transcurso deste evento. O premio, dotado con 1.500 euros, recoñecerá o mellor proxecto de webserie na nosa lingua, e deberá destinarse á produción dos primeiros capítulos da iniciativa galardoada. Canda a este, o festival mantén os premios á mellor webserie de imaxe real, mellor webserie de animación, mellor webserie internacional e mellor webserie en versión orixinal en galego, dotados con cadanseus 800 euros e trofeo, o galardón do público, dotado con 400 euros, e os trofeos para a mellor actriz, o mellor actor e un premio AGAG ao mellor guión..
Amplía a nova>>
23/02/2016
Nace a cronoloxía do Novo Cinema Galego
A estrea en xaneiro de 2005 de
Como foi o conto de Alberte Pagán na Sala Nasa de Santiago de Compostela márcase como punto de partida na Cronoloxía do Novo Cinema Galego. Esta publicación, que se daba a coñecer hoxe na páxina
Novo Cinema Galego recolle datas de estreas, premios e presenza en festivais de filmes e creadores vencellados a esta corrente. Canda a isto, amosa fitos da política audiovisual do país, convocatorias e resolución de axudas e outros eventos coa intención de "poñer en contexto e relación as obras co tempo no que xurdiron". Un documento de grande interese para coñecer esta vizosa corrente do noso audiovisual ata os nosos días..
Amplía a nova>>
