16/04/2021
A historia das cigarreiras da Coruña e Pardo Bazán a través dun documental e unha peza de danza
Un documental e unha peza de danza arredor da historia das cigarreiras da Fábrica de Tabacos da Coruña e do xeito en que influíron na obra de Emilia Pardo Bazán estréanse hoxe de xeito complementario no Teatro Colón da Coruña.
Amparo ao outro lado é unha peza documental de 20 minutos dirixida pola artista cubana Ana Beatriz Pérez e financiada cos fondos do Plan de Reactivación Económica e Social da Coruña (PRESCO) do Concello, conta coa participación de varias cigarreiras e expertas na figura de Pardo Bazán e co asesoramento de Artestudio. O documental inclúe como elemento de ligazón principal á peza de danza
Amparo creada tamén pola bailarina e coreógrafa cubana inspirada na historia desas mulleres personificadas nesa Amparo que recreou a Pardo Bazán na súa obra
La Tribuna. .
Amplía a nova>>
15/04/2021
Apróbanse as axudas reforzadas ás salas de cine
O Consello da Xunta aprobou hoxe á convocatoria da nova liña de subvencións para salas comerciais de cine xa anunciada o mes pasado polo Conselleiro de Cultura, Educación e Universidade, Román Rodríguez en sede parlamentaria. Esta liña auméntase considerablemente este ano que estará dotada con 350.000 euros, mentres que o pasado ano contaron con 120.000 euros. As contías outorgadas este ano destinaranse especificamente á adaptación dixital e sanitaria dos espazos, a campañas para a captación de públicos e para a promoción do audiovisual galego, ao reforzo da programación de producións galegas e europeas e a accións especiais, como descontos ou convites, dirixidas á infancia, á xuventude e a colectivos profesionais recoñecidos polo seu labor durante a pandemia. .
Amplía a nova>>
15/04/2021
As axudas ao audiovisual reforzan o financiamento de produción de 'obras difíciles'
Como xa ten ocorrido noutras ocasións desde o comezo da crise pandémica, o Diario Oficial de Galicia ven de publicar unha modificación de bases das subvencións da Xunta no relativo á cultura. Neste caso son as axudas a producións e coproducións audiovisuais de contido cultural galego as que a Axencia Galega de Industrias Culturais cambia, levando a cabo un aumento das porcentaxes máximas de axuda que poden recibir certo tipo de producións definidas a nivel europeo como obras difíciles canto ao seu financiamento, realización e distribución. Este cambio atinxe ás curtametraxes, ás películas rodadas integramente en galego, ás realizadas por mulleres, as de dirección novel cun orzamento non superior a 1,5 millóns de euros, as dirixidas por profesionais cunha discapacidade recoñecida de porcentaxe igual ou superior ao 33%, aos documentais cinematográficos ou aos traballos de animación. .
Amplía a nova>>
12/04/2021
Neiti Aika e A miña Terra son os vencedores da 16 MICE
O filme
Neiti Aika, da realizadora finlandesa Elina Talvensaari, foi seleccionada como vencedora do premio ao Mellor Filme da 16 Mostra Internacional de Cinema Etnográfico. O xurado do certame, que fechaba as súas portas este sábado 10 de abril, recoñeceu a obra "pola súa proposta de historia de vida dunha persoa que xa non está, realizada desde á recuperación da cultura material, cun traballo de investigación minucioso e cun ollar persoal e poético sobre o tempo e a memoria tocando diferentes esferas da condición humana". A peza
A miña Terra e Santiago D. Risco, foi seleccionada como Mellor Filme Galego "pola abordaxe sobria dun tema complexo e a reflexión sobre o territorio, a herdanza e a familia a través dun bo exercicio de observación con elementos poéticos".
.
Amplía a nova>>
09/04/2021
Un novo documental repasa o período de Carballo Calero en Lugo
A Associaçom Galega da Língua, mediante Através Produtora, publicou na rede o documental
Saltério de Fingoi. O exílio lucense de Carvalho. Realizada por João Aveledo, a produción repasa os anos, entre 1950 e 1965, que o homenaxeado no Día das Letras de 2020 viviu na Cidade da Muralla, dedicado fundamentalmente ao ensino no Colexio Fingoi. A produción reconstrúe, a través das voces do alumnado do centro naquela época, o papel do profesor, a vida no colexio e o xeito no que esta experiencia marcou as súas vidas. .
Amplía a nova>>
09/04/2021
O filme 'Cuñados' estréase hoxe en 120 salas de cine
Este venres 9 de abril chega a 120 salas de cine de Galicia e o resto de España
CUÑADOS, ópera prima de Toño López e primeira incursión na longametraxe cinematográfica da produtora galega PORTOCABO, responsable da aclamada serie "Hierro".
Cuñados é unha comedia de enredo sobre as peripecias delictivas de tres cuñados unidos polo azar e embarcados nun plan disparatado. Miguel de Lira, Xosé Antonio Touriñán e Federico Pérez encabezan esta historia na que tamén teñen papeis principais as actrices Iolanda Muíños, María Vázquez e Eva Fernández ademais dalgunhas das caras máis recoñecidas e queridas do noso audiovisual. A película, gravada orixinalmente en galego na versión orixinal pero que conta con versión dobrada ao castelán, tivo a súa primeira presentación internacional no marco do Festival de Berlín, e a pasada semana celebrouse a súa estrea en Ourense, provincia onde se levou a cabo a rodaxe..
Amplía a nova>>
08/04/2021
A Academia do Audiovisual outorga a Manuel Lourenzo o Premio de Honra Fernando Rey
O actor, dramaturgo, director teatral, tradutor e docente Manuel Lourenzo recibirá o Premio de Honra Fernando Rey da Academia Galega do Audiovisual na XIXª edición dos Premios Mestre Mateo, que se entregan este sábado, 10 de abril no Teatro Colón da Coruña. A Academia outórgallo en recoñecemento á súa extensa e prolífica traxectoria e á súa irremprazable contribución á cultura galega. Na súa carreira recibiu numerosos recoñecementos, aos que, a partir do vindeiro sábado haberá que engadir o Premio de Honra Fernando Rey. Entre outros o Premio Abrente (1978), o Premio Nacional de Literatura Dramática (1997), o Pedrón de Ouro (2001), o Premio Nacional da Cultura Galega en Artes Escénicas (2008). É profesor Honoris Causa pola ESAD e Socio de Honra da Asociación de Escritores en Lingua Galega..
Amplía a nova>>
07/04/2021
Publícase a modificación dos estatutos de Agadic
A Consellería de Cultura ven de oficializar os anunciados cambios estatutarios da Axencia Galega de Industrias Culturais coa súa publicación hoxe no Diario Oficial de Galicia. O documento recolle algunhas modificacións respecto ás avanzadas no proxecto de decreto, que foron protestadas desde as asociación profesionais do sector das artes escénicas e musicais en decembro de 2019 reclamando a súa paralización e a apertura dun proceso de diálogo co sector. Finalmente o texto publicado hoxe mantén a protestada unificación das competencias sobre música e danza nun único departamento e baixo unha única coordinación, que exercerá a dirección do Centro Corográfico Galego; tamén inclúe a adscrición orgánica dentro do Departamento de Política Audiovisual do Centro Galego de Artes da Imaxe e o seu cambio de denominación a Filmoteca de Galicia. Así mesmo mantense a creación dun Departamento de Coordinación Xeral e Xerencia e a figura de Xerente da AGADIC. .
Amplía a nova>>
06/04/2021
O documental 'Negro púrpura' estréase na inauguración da MICE
A primeira xornada da Mostra Internacional de Cinema Etnográfico acollerá hoxe na súa sesión de apertura a pre-estrea do documental
Negro púrpura, de Sabela Iglesias e Adriana P. Villanueva (Illa Bufarda), unha proxección que se encadra dentro da sección fóra de concurso. O documental, rodado entre 2018 e 2020, realiza unha viaxe no tempo para contar a historia do fungo de propiedades alucinóxenas dos mil nomes (caruncho, cornecelo, dentón, cornello, grao de corvo, etc).
Negro púrpura vai da sabedoría popular á ciencia, repasando a historia do cláviceps purpúrea e conectando Galicia co resto do mundo (relacionándose con multinacionais farmacéuticas, a CIA ou o nacemento do LSD) e alimenta relatos que nos son propios e nos tocan de preto, como o seu uso na medicina popular. .
Amplía a nova>>
06/04/2021
A Mesa leva ao Parlamento as sinaturas para solicitar unha Canle Xabarín
Actualizada a 7/04/2021
Logo de superar 33.000 sinaturas de apoio, a Mesa pola Normalización Lingüítica presentou este 7 de abril ante o parlamento a "Proposición non de Lei de Iniciativa Popular para unha canle Xabarín Club na TVG e máis e mellor difusión de programación infantil e xuvenil en galego". A proposta quere que o Parlamento inste á Xunta a que "a Corporación de Radio de Televisión de Galiza aumente a oferta en galego destinada á infancia e mocidade nas televisións públicas" a través dunha canle temática "Xabarín" "así como App actualizadas que conten ademais con programas e xogos co fin de garantir nesta canle en galego, a presenza de contidos atractivos, de éxito, actuais e pasados, así como contidos educativos e de produción galega".
.
Amplía a nova>>
