31/03/2022
Premio Pedigree de Cans para Margarita Ledo
Margarita Ledo Andión recollerá un novo premio de honra este ano pola súa traxectoria na cinematografía. Tras do recentemente outorgado Premio Fernando Rey pola Academia Galega do Audiovisual a cineasta, escritora e investigadora foi a persoa elixida en asemblea pola Asociación Cultural Arela, que organiza o Festival de Cans, para concederlle a distinción de Honra do festival, o Premio Pedigree desta XIXª edición. A organización do certame quere premiar en Margarita Ledo (Castro de Rei, 1951) unha obra "caracterizada pola defensa da lingua, a visibilidade das mulleres anónimas e a intención de reconstruír a identidade dun país rescatando a memoria borrada", aseguran nun comunicado que sinala sobre a ollada da cineasta a súa "evolución desde o documental a novas vías de exploración difuminadas coa ficción". .
Amplía a nova>>
30/03/2022
O IX Carballo Interplay contará con 16 proxectos a competición
Un total de 16 webseries, catro galegas, catro estatais e catro do resto do mundo, competirán na novena edición do Carballo Interplay. O Festival de Contidos Dixitais abre as súas portas entre o seis e o nove de abril para achegar as últimas propostas creativas nas redes e a prestar unha especial atención ao formato podcast..
Amplía a nova>>
28/03/2022
Premio para 'Rompente' no Festival de Málaga
A curtametraxe 'Rompente' dirixida por Eloy Domínguez Serén alzouse co premio á mellor curtametraxe de ficción da sección oficial da 25ª edición do Festival de Málaga. O filme recibiu a BIZNAGA DE PLATA 'CAJAMAR' e un premio en metálico de con 2.000 euros. 'Rompente' é unha produción de Zeitun Films que foi rodada na comarca coruñesa de Barbanza e que está protagonizada por Sergio Baleirón, Soraya Luaces e Vicente Mohedano. Segundo a sinopse da curtametraxe de Eloy Domínguez Serén, o protagonista, Santi ,é un pai adolescente que vive nunha pequena vila costeira. De día traballa nas bateas e polas noites marísquea de maneira furtiva. Mentres a súa moza Lucía asume en soidade o coidado do bebé de ambos, Santi, ausente e afogado pola responsabilidade, busca refuxio e redención no mar..
Amplía a nova>>
25/03/2022
A provincia de Ourense xa ten Film Commission
O Centro Cultural Marcos Valcárcel de Ourense acolleu a constitución da Ourense Film Commission impulsada pola deputación provincial coa primeira reunión do Comité Asesor. A comisión está integrada por representantes do sector audiovisual galego e da propia Deputación. O obxectivo deste novo órgano é apoiar ás producións galegas, nacionais e internacionais da industria audiovisual na loxística necesaria para desenvolver o seu traballo, promovendo a difusión da provincia de Ourense en España e fóra das súas fronteiras, así como da calidade e competitividade dos servizos que se precisen. Entre os servizos que ofrecerá este novo órgano figura achegar información e propostas sobre localizacións; apoio e asesoramento sobre permisos administrativos; axuda na promoción e difusión das rodaxes previstas; coordinación entre as produtoras e as administracións públicas; e axuda na loxística da produción..
Amplía a nova>>
24/03/2022
'Malencolía' chega este venres a 24 salas de cine de toda Galicia
A nova longametraxe de Alfonso Zaruza, 'Malencolía', celebra hoxe xoves a súa
premiere na Coruña, cun pase especial nos Cantones Cines, de xeito prvio á súa estrea oficial en salas que será este venres, 25 de marzo. Inicialmente, antes do seu paso ás salas do resto da península, o filme rodado integramente en Galicia e en galego, estréase en 24 cinemas de 17 localidades galegas exclusivamente. A película que tiña 11 candidaturas finalistas nos premios Mestre Mateo que se celebraron o pasado sábado, acadou dous premios, os dos actores Iolanda Muíños e Diego Anido como mellor interpretación de reparto feminina e masculina, respectivamente. Logo de ter gañado o Premio Xacobeo do Ourense Film Festival o pasado mes de outubro, o luns presentouse no Sombra, Festival de Cine Fantástico Europeo de Murcia, onde compite na Sección Oficial. .
Amplía a nova>>
23/03/2022
O Carballo Interplay pon o foco nas webseries e os podcast
O Festival de Contidos Dixitais Carballo Interplay (CIP) mantén o foco nas webseries, como xa ven sendo habitual no evento e ademais entra con forza este ano sobre os formatos Podcast, cada vez máis presentes. A novena edición do festival, a celebrar entre o 6 e o 9 de abril, reunirá en competición ata 16 webseries de procedencia internacional, catro delas galegas. As series seleccionadas competirán por levar algún dos seis premios que se reparten, un deles á mellor serie con versión orixinal en galego. As webseries irán presentadas en tres seccións, segundo temáticas. Na sección 'Outra Historia' tres series cuxos contidos xiran arredor de feitos históricos; en 'Movidas humanas' as produción enfócanse sobre os conflitos aos que se enfronta o ser humano na actualidade e no seu futuro; o bloque 'Mix de Trasnadas' actúa como contedor das propostas máis trastes, divertidas e irreverentes da produción audiovisual para internet. É nesta última sección na que se inclúe a última temporada, xa van pola 4, da webserie 'Mataría', co malogrado Pedro Brandariz, que na pasada edición obtivo o recoñecemento á mellor serie con versión orixinal en galego e conseguiu ademais o premio do público. Esta producón acadou ademais o premio a mellor webserie nos XX Premios Mestre Mateo..
Amplía a nova>>
22/03/2022
Agadic convoca as subvencións á creación audiovisual
A Axencia galega de Industrias Culturais publica hoxe no Diario Oficial de Galicia a convocatoria anual das subvencións á creación audiovisual para a promoción do talento audiovisual galego. Con esta liña en réxime de concorrencia competitiva, a axencia gobernamental quere impulsar a creación de obras audiovisuais en galego a través do apoio á escrita de guións, á realización e posprodución de curtametraxes e á produción de longametraxes, co fin último de promover o sector creativo da industria audiovisual galega e, ao mesmo tempo, contribuír ao cumprimento das tarefas que a Lei do audiovisual atribúe ao sector na normalización da lingua galega. O orzamento desta convocatoria é o mesmo que no ano anterior, quedando en 194.000 euros a repartir entre 2022 e 2023. Na anterior xeira estas axudas ata 19 proxectos audiovisuais obtiveron apoio publico da liña ao talento. As bases destas subvencións contemplan varias modalidades beneficiarias. Desde proxectos de escrita de guión para a realización dunha obra audiovisual; realización de curtametraxes, longametraxes e webseries..
Amplía a nova>>
22/03/2022
A XVII edición da MICE proxectará trinta e catro filmes
A Mostra Internacional de Cinema Etnográfico, que organiza o Museo do Pobo Galego, volta á presencialidade na súa décima sétima edición, que se desenvolve en Compostela entre o 28 de marzo e o 2 de abril. O Teatro Principal, a sala NUMAX e mais o propio Museo do Pobo acollen o groso das actividades do evento, que proxectará trinta e catro filmes sen contar as curtametraxes. .
Amplía a nova>>
21/03/2022
Aquí medra a lingua viaxa á procura da dinamización do galego nas escolas
Hoxe pola mañá presentouse no IES Perdouro de Burela (Lugo) o proxecto documental
Aquí medra a lingua, un conxunto de audiovisuais concibidos pola Sección de Lingua, Literatura e Comunicación do Consello da Cultura Galega e realizados por Cristina de la Torre que exploran como seis centros educativos do país desenvolven programas de apoio e dinamización á lingua galega. Con este proxecto, o Consello da Cultura Galega quere amosar diferentes estratexias de promoción da lingua do país en espazos xeográficos moi distintos, desde ao norte ao sur do país, con diferentes modelos e contextos sociolingüísticos e demográficos. Os documentais, sempre inferiores aos 10 minutos de duración, veñen acompañados con fichas que resumen as accións levadas a cabo e o seu impacto, pensadas para poder ser postas en práctica por outros centros. Rosario Álvarez, presidenta do Consello da Cultura Galega presentou esta mañá en Burela o primeiro dos seis documentais, que aborda un dos programas máis veteranos e de máis impacto da dinamización lingüística: o "modelo Burela". O resto dos documentais serán emitidos os vindeiros luns no web do Consello da Cultura Galega e no Youtube..
Amplía a nova>>
18/03/2022
Un documental repasa a historia do ecomuseo Casa do Patrón
Terra e tesón é o título do documental que presentaba este doce de marzo Ab Origine co apoio da Secretaría Xeral de Política Lingüística. O filme repasa ao longo de hora e media "como se foi forxando ao longo do tempo o proxecto do Museo Etnográfico Casa do Patrón de Doade", Lalín, "desde o nacemento da idea ata converterse nun museo de referencia no rural sobre a etnografía galega", segundo explica a presentación do proxecto..
Amplía a nova>>
