31/03/2010
Prodúcese o último apagado da televisión analóxica que afectará a un millón de galegos
En plena Semana Santa, 76 concellos da provincia de Pontevedra e Lugo serán os últimos en incorporarse ao plan de encendido dixital que comezou no 2008 coa experiencia piloto da Fonsagrada. En total, serán un millón de galegos os que pasen polo último tramo que inaugura unha nova etapa na historia da televisión. O 3 de abril é o día fixado polo goberno central para o cese das emisións analóxicas polo que a Secretaría Xeral de Medios da Xunta leva meses desenvolvendo un programa de desconexión e información co fin de chegar ao 100% da cobertura co novo sistema..
Amplía a nova>>
31/03/2010
Convocadas as axudas a produción de curtametraxes en galego
Tal e como estaba anunciado, a Axencia Galega das Industrias Culturais (AGADIC) acaba de convocar as axudas a produción de curtametraxes en versión orixinal en lingua galega. En total destinarán 200.000 euros (a mesma cifra que na convocatoria anterior) a financiar curtametraxes en soporte cinematográfico, de animación, innovadoras ou experimentais e videoclips. Pódense presentar a esta convocatoria produtoras independentes ou empresas discográficas legalmente constituídas. O texto establece ademais, que lle compte ao presidente do consello de dirección da AGADIC ditar a resolución da concesión da subvención..
Amplía a nova>>
30/03/2010
A Unión de Actores premia a interpretación de Cela 211
O traballo de Luis Tosar en
Cela 211 acaba de sumar un novo recoñecemento ao seu xa amplo palmarés. É o que lle concederon o seus propios compañeiros de profesión reunidos na Unión de Actores. Canda a interpetación de Tosar no filme coproducido por Vaca Films, Carlos bardem e Alberto Ammann recibiron os premios de mellor actor secundario e mellor actor revelación, respectivamente. O premio que recoñecía a interpretación feminina foi para Lola Dueñas polo seu traballo en
Eu, tamén. .
Amplía a nova>>
29/03/2010
Un ciclo de cine galego no Bafici, no que compite Auga fría de mar
Despois dun intenso percorrido por festivais, chega a Bos Aires
Auga fría de mar, a coprodución de Tic Tac que compite na sección oficial do Festival de Cine de Bos Aires, Bafici (que se desenvolverá do 7 ao 18 de abril). Canda este título, o cine galego terá abondosa representación grazas a un ciclo especial que o Centro Galego de Artes da Imaxe leva á capital arxentina para dar a coñecer as producións audiovisuais feitas en Galicia..
Amplía a nova>>
29/03/2010
A Xunta pretende que o Consorcio Audiovisual se reactive en abril
“O reto é que na semana que se entreguen os Mestre Mateo o Consorcio Audiovisual Galego xa esté en marcha”. Apuntou Alfonso Cabaleiro, na presentación da gala de entrega dos premios do audiovisual. Pero para que iso esté listo queda un trámite administrativo farragoso de por medio: a aprobación e actualización de numerosos decretos (a lei do audiovisual incluída) que posibiliten o que o goberno leva meses apuntando, que o Consorcio Audiovisual será a “fiestra única” do sector. A súa reactivación (leva máis de tres meses sen director e sen persoal) depende do encaixe xurídico e administrativo, así como a aprobación da Lei Xeral do Audiovisual estatal, que foron adiando o seu novo rumbo. Ademais, Cabaleiro anunciou que xa se enviaron ao DOG as axudas para o sector audiovisual que inclúen, como novidade, que as series de animación están dentro das subvencións a producións ou coproducións audiovisuais; así como que este ano tamén se recuperará a rehablitación das liñas de axudas a través do IGAPE. Cabaleiro tamen avanzou que a AGADIC será quen convoque as subvencións, pero que espera que se resolvan baixo o amparo do Consorcio. .
Amplía a nova>>
26/03/2010
A Academia do Audiovisual achegalle á sociedade os candidatos aos Mestre Mateo
Non son só os premios do Audiovisual Galego, senón que os Mestre Mateo son unha oportunidade para coñecer os traballos que se fixeron no noso país durante o ano anterior. Por iso, a Academia Galega do Audiovisual organiza, como actividade paralela á propia gala de entrega de premios (Pazo da Cultura de Narón, 15 de abril), actividades para dar a coñecer os traballos finalistas e a propia actividade audiovisual. Para o primeiro está a Semana do Audiovisual que permitirá proxeccións en 30 localidades (do 5 ao 11 e abril) e, para o segundo están os encontros que os profesionais manterán cos estudiantes para explicarlles o que é a realización ou a dirección de produción. Este ano, o premio Fernando Rey que recoñece a traxectoria dalgún profesional recaeu en Enrique Banet (Santiago, 1941). Ademais de director do Arquivo de Imaxe e Son de Galicia, Bonet ten traballado con director como Patricio Guzmán, Manuel Gutiérrez Aragón ou Basilio Martín Patino. Ultimamente, Banet fundou coa súa muller Mabel Rivera, a produtora especializada en traballos de carácter ambiental e social. .
Amplía a nova>>
24/03/2010
Galiciadixital reforza os seus contidos para celebrar os 25 anos da CRTVG
A Compañía da Radio e Televisión de Galicia, é dicir, a TVG e a Radio Galega, cumpre 25 anos. Un cuarto de século que tanto o ente público como a secretaría xeral de Medios celebrarán cunha exposición. A mostra itinerante e interactiva Galiciadixital amplíase para acoller unha mostra fotográfica, un vídeo conmemorativo e aqueles materiais (cámaras, magnetoscopios, mesas de mistura de vídeos ou son...) que serven para ver a evolución tecnolóxica da sociedade galega e da CRTVG. A exposición, que conta cun plató Chroma-Key no que os usuarios poderán emular aos presentadores da televisión, estréase o venres no marco do Xuventude Galicia Net. Despois iniciará unha xira que a levará por 14 localidades galegas e que se poderá seguir e comentar a través das redes sociais. .
Amplía a nova>>
22/03/2010
Redondela acurta a duración do festival de curtas con maior participación
Menos é máis. Isto deberon pensar desde oi festival de curtametraxes de Redondela que este ano tiveron que recurtar a programación, malia recibir 50 traballos máis que na anterior edición. ¿Os motivos? A crise económica que reduciu os patrocinios e fixo que o encontro se reduza a 4 días (do 22 ao 25 de abril). Madrid, Barcelona, País Vasco son os lugares dos que recibiron o maior número de traballos e nos que destaca o descenso da presenza galega (só recibiron 5 curtas, cando o habitual era recibir uns quince traballos). Entre as novidades destaca a sección “curtos alternativos”, que aínda está por definir..
Amplía a nova>>
22/03/2010
O Congreso dos Deputados aproba a Lei da Comunicación Audiovisual
Despois de seis anos, o pleno do Congreo dos Deputados aprobou a noa Lei da Comunicación Audiovisual. Un documento que regula a garantía dos dereitos dos ciudadáns, a adecuación dos contidos ao ordenamento constitucional vixente, o regulamento da publicidade, os dereitos e deberes dos operadores de televisión, entre outros. O texto supón tamén a trasposición ao noso ordenamento xurídico da Directiva Europea de Servizos de Comunicación Audiovisual de 2007, e implica a derogación de doce leis e outras cinco con carácter parcial. A lei intégrase no proxecto de reforma audiovisual do Goberno emprendida na lexislatura anterior coa aprobación da lei da radio e da televisión de titularidade estatal e complementanda coa lei de fianciamento da Corporación RTVE. .
Amplía a nova>>
22/03/2010
O Xurado de Play DoC premia ex-aequo a Sweetgrass e Snaya y Pardal
“Todos os títulos premiados expresan a vitalidade do documental contemporáneo, a súa enorme riqueza lingüistica e a súa capacidade para implicar ao público”, así recoñecía o xurado de Play DOC o bo momento que vive o documental. Algo que se confirmou nos 7.000 espectadores que tivo o certame nesta edición. O xurado fixo que as producións
Sweetgrass e
Snaya y Pardal compartisen o primeiro premio desta edición. Na categoría galega Alberte Pagán gañou o premio con
Tanyaradzwa..
Amplía a nova>>
