24/05/2024
Máis de 130 proxeccións de audiovisual de vangarda internacional no (S8)
A 15ª edición do (S8) Mostra de Cinema Periférico, que terá lugar do 31 de maio ao 9 de xuño en diferentes localizacións da cidade da Coruña contará con máis de 130 proxeccións do audiovisual de vangarda. Estreas, obras inéditas, referentes internacionais convidados, retrospectivas únicas en Europa e unha aposta clara polas novas xeracións de artistas fan da (S8) unha cita referente arredor do cinema experimental. O discurso fílmico das creadoras de vangarda imponse nunha programación que atravesa a obra de referentes como Narcisa Hirsch, falecida hai poucas semanas e a quen se lle dedica este ano o festival, cunha primeira gran retrospectiva da súa obra. .
Amplía a nova>>
23/05/2024
Premio de Honra da AGAPI para Rosa Moledo
A Asociación Galega de Produtoras Independentes (AGAPI) ven de facer pública a designación da tradutora e asesora lingüística Rosa Moledo como receptora do Premio de Honra Dolores Ben na súa terceira edición. O recoñecemento, que leva o nome de quen foi presidenta da AGAPI durante doce anos, busca recoñecer a persoas ou institucións que encarnan os valores de loita e defensa do ben común que ela mesma representaba. Nese sentido desde AGAPI ven en Rosa Moledo eses valores polo seu traballo de 30 anos no audiovisual dedicándose á tradución de numerosas producións de cine e televisión e como asesora e supervisora lingüística tanto en sesión de dobraxe coma en rodaxes. A entrega do galardón terá lugar o vindeiro día 18 de xuño en Cinemar Films ás 19h, estudio cinematográfico de son fundado por Dolores Ben no ano 2006, situado no polígono de Novo Milladoiro, moi preto de Santiago de Compostela. O I Premio de Honra Dolores Ben recaeu na poetisa e xornalista cultural Ana Romaní e o II Premio de Honra foi para a xornalista Tareixa Navaza..
Amplía a nova>>
23/05/2024
Bota a andar con quince proxectos o Ames AV Lab
Un total de quince proxectos, catro series, seis curtametraxes, tres longametraxes e dous documentais, participan da primeira edición do Ames AV Lab. O Laboratorio de Aceleración de Proxectos Audiovisuais que promove o Concello de Ames coa Deputación da Coruña inicia en maio as súas actividades de formación, asesoramento e mentorización para contribuír ao desenvolvemento destas propostas..
Amplía a nova>>
08/05/2024
Pontevedra será a nova sede dos Premios Feroz
O alcalde do Concello de Pontevedra, Miguel Anxo Fernández Lores ven de asinar un acordo coa presidenta da Asociación de Informadores Cinematográficos de España (AICE), María Guerra, para que a vila acolla as dúas vindeiras edicións da gala de entrega dos Premios Feroz de longametraxes cinematográficos de España que organiza esta asociación. Mediante este importante acordo Pontevedra entra no mapa audiovisual estatal no que é un impulso ao audiovisual da cidade, que organiza o festival Novos Cinemas e alberga a Facultade de Comunicación Audiovisual, e tamén un recoñecemento á crecente importancia e capacidade da industria audiovisual galega no seu conxunto. Os Premios Feroz son unha cita cada vez máis importante para a cinematografía estatal, emuladora dos Golden Globes estadounidenses, e que se ten celebrado anteriormente en Madrid, Bilbao (2019), Alcobendas (2020) e Zaragoza (2022 y 2023). Á primeira das citas, que reunirá nunha cea-gala a máis dun milleiro de persoas da industria audiovisual estatal, terá lugar o vindeiro 25 de xaneiro de 2025 no recinto feiral da cidade do Lérez. Agárdase unha grande alfombra vermella con numerosos rostros coñecidos do cine español entre so que sen dúbida haberá importantes presenzas galegas. Nos pasados anos intèrpretes como Luis Zahera ou maría Pujalte recolleron algún destes galardóns..
Amplía a nova>>
08/05/2024
Chega aos cines o filme 'As Neves'
Tras dúas preestreas na Fonsagrada e na Coruña, e o seu pase polo 27º Festival de Cine de Málaga, este venres chegará ás salas comerciais o filme 'As Neves', debut na longametraxe de ficción da actriz realizadora Sonia Méndez, que asina tamén o guión. 'As Neves' é un filme de intriga ambientado nunha vila de montaña que se achega cunha mirada íntima á xeración nova que vive no contraste da hiperconexión e o illamento. Na noite do Entroido un grupo de adolescentes da vila celebra una festa e toman setas alucinóxenas por primeira vez. Ao día seguinte espertan cun temporal de neve e coa noticia de que Paula, unha das rapazas da festa, desapareceu. Mentres, a vila queda incomunicada e cae internet. Cada vez é máis urxente atopala. Comeza unha investigación que causará un profundo cambio nas súas vidas e na súa relación co mundo. O filme, rodado na súa versión orixinal en galego, está protagonizado por Andrea Varela e David Rodríguez Fernández ('Live is life'), ao que se suman novos talentos galegos que debutan na película como Antía Mariño, Xacobe Bruña e Irene Rodríguez, coa colaboración especial de Lucía Veiga ('Rapa', 'El desorden que dejas'). O filme está produción por Aquí y Allí Films e Cósmica Producións e distribuído en salas por Sideral Cinema. .
Amplía a nova>>
08/05/2024
David Trueba, María Vázquez e Kepa Junquera pasarán polo XXI Festival de Cans
O director David Trueba, a actriz María Vázquez, o músico vasco Kepa Junquera e a banda de Muros The Rapants serán algúns dos protagonistas principais da XXI edición do Festival de Cans que terá lugar entre o 21 e o 25 de maio. Serán cinco xornadas cheas de cine, música, coloquios e multitude de actividades paralelas nesta aldea do Porriño que consolidouse nestes últimos anos como unha importante iniciativa cultural con repercusión dentro e fora de Galicia. O Torreiro de Cans acolleu a rolda de prensa de presentación do evento, coa asistencia, entre outras autoridades, do conselleiro de Cultura da Xunta, José López Campos, e do alcalde do Porriño, Alejandro Lorenzo. Durante a presentación o director do festival, Alfonso Pato, explicou que durante as cinco xornadas do festival haberá máis de cen proxeccións das que un total de 35 serán estreas..
Amplía a nova>>
07/05/2024
Premio do Play-Doc para 'Salvaxe, salvaxe' de Emilio Fonseca
A 20ª edición del Festival Internacional de Cine de Tui, Play-Doc, xa ten palmarés oficial. A cinta documental 'Salvaxe, salvaxe' (Walkie Talkie Films), debut de Emilio Fonseca (Ourense, 1978) na realización de longametraxes foi a gañadora da sección competitiva galega. Este filme achégase ao lobo ibérico desde un cinema "inmersivo e político: un anti-documental de natureza", segundo a súa comunicación. Neste sentido, a cinta ensaia novas imaxes para representar a vida no planeta, superando a tradición do "documental de natureza". 'Salvaxe, salvaxe' está rodada en Galiza e Portugal e conta cun equipo galego e catalán. Ademais de dirixir, Emilio Fonseca é coautor do guión xunto con Xiana do Teixeiro, á vez produtora do filme. O xurado baseou a súa decisión na "súa capacidade suxerinte , a través dunha abordaxe inmersiva con un inesquecible deseño sonoro, onde o telúrico, o poético, o antropolóxico e o político conversen con fluidez, ofrecendo unha película que reflexiona sobre un dos motivos centrais do noso tempo e revisa o concepto de salvaxe". O xurado coincide así co do Festival de Málaga que faiu dous meses lle outorgaba a esta produción a Biznaga de Prata a mellor documental. .
Amplía a nova>>
25/04/2024
O XX aniversario do Play-Doc de Tui será un evento para lembrar
O festival internacional de cinema Play-Doc de Tui xa ten todo preparado para celebrar a súa vixésima edición entre os vindeiros días 1 e 5 de maio. Ao longo de varias semanas o festival foi dando a coñecer algúns avances da súa proposta para este ano. Sete filmes participarán na súa sección oficial internacional, entre os que destaca o traballo póstumo de Jean-Luc Godard, 'Film annonce de film qui n'existera jamais:"Drôles de guerres"' (Francia, 2023). O festival, que se destaca por presentar primeiras retrospectivas dedicadas a aclamados cineastas e directores de culto, anunciou tamén entre outras, unha revisión da pouco coñecida obra documental do recentemente desaparecido William Friedkin (1935-2023), un dos realizadores máis influentes de todos os tempos e autor dalgunhas das películas máis emblemáticas do cinema contemporáneo, cuxos orixes como cineasta estiveron ligados ao cinema documental. A tradicional sección competitiva galega propón a través de trece títulos (entre longametraxes e curtametraxes) un percorrido caracterizado pola diversidade de propostas, tanto no formal como no temático. .
Amplía a nova>>
24/04/2024
O cine sen recursos ten un festival de seu
Unha proposta atípica dentro do sector audiovisual comeza hoxe a súa andaina na capital galega, tres cine clubes locais únense para organizar o Festival Cine Barato. O certame, que durará tres días, acolle as creacións audiovisuais realizadas con poucos recursos e de carácter "amador". Cineclube Compostela, Club de cine Facom e CineMazarelos son as asociacións que organizan esta nova cita que presume de contar con "tan poucos recursos como as películas que proxecta". O festival, fiel ao seu nome, tampouco cobra entradas, aínda que propón billeteira inversa, pagando a vontade tras o visionado, para cubrir gastos. Ademais diso tamén ofrece obradoiros sobre as posibilidades da produción alternativa e sen recursos..
Amplía a nova>>
23/04/2024
Novo premio para a curtametraxe 'To bir or not to bird' en Benidorm
Tras do seu triunfal paso polos Premios Goya e os Premios Mestre Mateo, a curtametraxe "To bird or not to bird" ven de acadar un novo recoñecemento na oitava edición do Skyline Benidorm Film Festival. O filme escrito e dirixido polo director coruñés Martín Romero e producido por Chelo Loureiro (Abano Produccións) e Iván Miñambres (Uniko) recolleu o Premio a Mellor Curtametraxe de Animación. A película, que tamén pasou polo festival de Cannes, segue así o seu percorrido polos certames aumentando o seu palmarés, que conta con utros recoñecementos en diversos festivais nacionais, conformando a súa relevancia na produción de animación galega e español este ano. A historia da película ofrece , a través duns personaxes que son paxaros, unha ollada crítica e calidoscópica do mundo actual.
.
Amplía a nova>>
