10/06/2025
As axudas ao desenvolvemento audiovisual baixan aos 300.000 euros
O Diario Oficial de Galicia deste 9 de xuño publicaba as bases das subvencións para o desenvolvemento de proxectos audiovisuais galegos. Esta liña de axudas conta en 2025 cun orzamento total de 300.000 mil euros, 140.000 menos do que no ano anterior, cando a Axencia Galega das Industrias Culturais ampliara o crédito previsto inicialmente para as mesmas..
Amplía a nova>>
06/06/2025
'Sirat' chega hoxe ás salas de cine
Máis de 140 salas de cine de todo o territorio español proxectarán hoxe 'Sirat. Trance en el desierto' o novo filme de Oliver Laxe. Xa designada como "a película máis agardada do ano", 'Sirat' chega aos cines tras o seu exitoso paso polo Festival Internacional de Cannes, onde acadou o Premio do Xurado, e polos antecedentes do seu laureado realizador. O filme, unha produción de Movistar+ coa produtora dos irmáns Almodovar, El Deseo, contará cunha importante distribución por todo o país. As principais salas de Galicia, nas catro provincias, acollerán hoxe a estrea desta longametraxe, nalgunhas delas, coma na NUMAX, programaranse pases que contarán coa presenza do director, Oliver Laxe, para establecer un coloquio cos espectadores. .
Amplía a nova>>
05/06/2025
O IX Premio Begoña Caamaño recoñece a Illa Bufarda e a Mala Herba Producións
A Deputación da Coruña daba a coñecer este 4 de xuño o fallo do IX Premio Begoña Caamaño á acción cultural pola igualdade de xénero. A produtora audiovisual Illa Bufarda fíxose co galardón que recoñece unha traxectoria, mentres Mala Herba Producións obtivo o que se destina á mellor iniciativa. Cada unha das categoría conta cunha dotación de 6.500 euros..
Amplía a nova>>
02/06/2025
Lucía Veiga é a nova presidenta da Academia Galega do Audiovisual
A Academia Galega do Audiovisual daba a coñecer este 30 de maio a composición da súa nova xunta directiva. A actriz Lucía Veiga presidirá a entidade ao longo dos vindeiros dous anos, sendo a terceira muller que ocupa o cargo..
Amplía a nova>>
28/05/2025
A ficción en serie reúnese en Vigo
Co actual peso das plataformas dixitais no sistema do audiovisual o formato das series está no epicentro da produción cunha forza e vitalidade que é imposible negar. Entre o 29 e o 31 de maio, a cidade de Vigo acollerá a Iª Edición do Festival Internacional de Series Ría de Vigo, un evento que reunirá a actual creación audiovisual deste formato. Destacadas figuras do sector audiovisual nacional e internacional achegaranse a este encontro que aspira a consolidarse como unha cita dentro do circuíto internacional de festivais. .
Amplía a nova>>
26/05/2025
A curta 'Curmán' acada catro galardóns en Cans
O Festival de Cans pechou a súa XXIIª edición repartindo o seu palmarés nas diversas seccións de competición oficial e tras realizar as súas homenaxes a realizadores como Alfonso Zarauza e Daniel Sánchez Arévalo. A curta 'Curmán' foi elixida polo xurado como gañadora na sección de Ficción e levou ata catro galardóns. 'Curmán', película debut como director do ata agora actor Alejandro Jato narra a perda de inocencia do protagonista. O filme triunfou na noite de galardóns engadindo o premio a Mellor Actriz para Melania Cruz, Mellor Fotografía para Alicia Francés e o premio do Xurado de veciños. .
Amplía a nova>>
26/05/2025
O premio de Cannes lanza a proxección internacional de 'Sirât'
O triunfo da nova película de Óliver Laxe, 'Sirât', acadando o Premio do Xurado 'ex-aequo' (xunto co filme xermano ' In die sonne schauen' de Mascha Schilinsk) no Festival Internacional de Cannes, impulsa con entusiasmo esta produción cara a súa promoción internacional. Coa validación deste importante galardón, o filme iniciará agora un percorrido que augura vindeiros recoñecementos, tanto en festivais coma nas vindeiras edición de premios como os Goya ou Mestre Mateo do vindeiro ano. Ademais xa está confirmada a preparación dunha campaña de promoción da película nos circuítos de autor de EE.UU. o que leva a considerar seriamente as súa opcións como representación do cine español na vindeira edición dos Oscar. Recén chegado de Cannes a Galicia, Laxe foi directo a Navia de Suarna en Lugo, á aldea de Vilela de onde é orixinaria a súa familia e onde mantén a casa familiar, para facer alí a pre-estrea ante público local, os seus conveciños, do filme galardoado polo prestixiosos xurado do festival francés. Alí foron a acompañalo e felicitalo numerosas autoridades, como o conselleiro de Cultura, Lingua e Xiventude, José López Campos, entre outros. .
Amplía a nova>>
23/05/2025
Chega aos cines 'Antes de nós'
Despois de ter a súa preestrea onte na Coruña, 'Antes de nós', o filme sobre Castelao con guión de Pepe Coira, produción de Zaza Ceballos e dirixido pola cineasta Ángeles Huerta (Gijón, 1974) chegará este venres 23 ás salas de cine. Nesta primeira semana estará dispoñible en localidades e cidades como A Estrada, A Coruña, Barcelona, Cee, Ferrol, Lleida, Lugo, Madrid, Narón, Ourense, Oviedo, Pamplona, Pontevedra, Sant Feliu de Llobregat, Santiago de Compostela, Valladolid, Vigo ou Viveiro. .
Amplía a nova>>
20/05/2025
O festival (S8) ofrecerá unha programación reforzada
A 16ª edición da (S8) Mostra de Cinema Periférico, que se celebrará do 3 ao 8 de xuño en diferentes espazos da Coruña, presentará ata 112 obras en proxección e contará coa participación de 60 cineastas procedentes de 15 países. A cita converterá a cidade no centro mundial do cinema experimental e de vangarda e nesta edición farase unha homenaxe ao formato Súper 8, que neste 2025 cumpre 60 anos de historia. Unha das novidades desta vindeira edición da (S8) é a ampliación de 'Sinais', sección onde se reúne o mellor da creación cinematográfica contemporánea da península ibérica, con 21 películas galegas e españolas repartidas en tres programas. Ademais, o festival programa 'Sinais Latinoamérica', con 7 filmes de países como México, Chile e Bolivia, e 'Sinais Desbordamentos', cinema ao vivo coa performance do colectivo vasco Tekno Fantasy. A Filmoteca de Galicia, xunto co Palexco, a Fundación Luis Seoane e a Domus, volven ser os espazos colaboradores coa mostra..
Amplía a nova>>
15/05/2025
O XXII Festival de Cans aproximase con actos previos
Antes da súa inauguración oficial o vindeiro 20 de maio, a XXIIª edición do Festival de Cans (O Porriño) quenta motores esta fin de semana cunha programación previa que mestura cinema internacional, música galega de raíz e memoria histórica. A primeira gran cita será a proxección da longametraxe Utama (2022), do director boliviano Alejandro Loayza Grisi, a súa obra debú coa que foi premiada en Sundance en 2022. O director presentará esta obra a través de videoconferencia o sábado 17 de maio ás 18:00 h no Centro Cultural do Porriño. Estreada no Festival de Sundance, Utama gañou o Gran Premio do Xurado na World Dramatic Competition e acumulou máis de 40 premios en máis de 80 festivais internacionais. Foi nomeada aos Goya 2023 como Mellor Película Iberoamericana e destacou nos Premios Platino, onde gañou Mellor Música e Mellor Fotografía. Este realizador será o obxecto do Foco Internacional desta edición de Cans, o boliviano estará presente a partires do día 20 e participará tamén nos coloquios Café con Crea..
Amplía a nova>>
