18/09/2025
O Galician Freaky Film inaugura mañá a súa novena edición
O certame internacional de cine
freak e fantástico de Vigo celebra a súa novena edición do 19 ao 27 de setembro nos Cines Tamberlick da Praza Elíptica, cunha programación que vai máis alá das proxeccións habituais. A proposta da sección oficial chega con cifras de récord: 74 curtametraxes procedentes de 34 países. Máis de 14 horas de cine freak que converterán Vigo na capital internacional do cinema fantástico e de terror. Este ano, o festival consolida a súa vontade de expandir fronteiras e tecer alianzas con outros festivais de xénero, tanto do panorama nacional como internacional. Nesta liña o Galician Freaky Film Festival contará con tres actividades especiais: o II Encontro Irmandades do Norte, con mesa redonda e sesión de curtas de festivais galegos, vascos, navarros e cataláns; unha selección de curtametraxes do ToHorror Fantastic Film Fest de Turín; e, dentro da sección Pequefreak, a chegada do Lobo Mau de MotelX desde Lisboa, cun programa de animación infantil titulado Sustos Curtos. .
Amplía a nova>>
18/09/2025
Youtubeiras+ ábrese a contidos en todas as redes sociais
A organización do certame Youtubeiras+ daba a coñecer este 17 de setembro as novidades da súa IX edición. A principal mudanza na convocatoria é que poderán participar contidos publicados en calquera rede social, cando ata o momento estaba restrinxido unicamente a Youtube e TikTok. A dotación mantense en 7.500 euros que se repartirán entre as sete categorías de Canle, Creación de Contidos, Revelación, Calidade Lingüística, Rede, Premio do Público e, como novidade nesta xeira, Podcast..
Amplía a nova>>
18/09/2025
O festival Intersección será punto de encontro de estudantes e profesionais do cinema contemporáneo
O festival Internacional Intersección da Coruña celebrará a súa oitava edición do 26 de setembro ao 4 de outubro para ofrecer máis de 100 de películas independentes de 17 países. Desenvolverase en espazos clave da cidade como Cantones Cines, Filmoteca de Galicia, Fundación Luis Seoane e Sala Palexco. O festival actuará ademais como punto de encontro do cinema contemporáneo co seu espazo profesional Nexus, que reunirá a cineastas, produtoras e escolas de cinema de diversos países. Dentro del estará tamén o apartado Intersección Lab. Con esta iniciativa, o festival coruñés ofrece titorías especializadas a creadoras e creadores galegos en fase de desenvolvemento. Este ano, os proxectos que gozan deste acompañamento son 'Antes de nada', de Sabela Eiriz; 'Cando as árbores choran', de Miguel Bouzas; 'GRISGRIS', de Raúl Capdevila Murillo; 'Lembrarás como bailabas', de Alba Gallego; 'Miñacora', de Eva Vaeli; 'Resonancias do escultor', de Uxía Caneda e Javier Darriba; 'Só o ruído', de Santos Díaz; 'SOS', de Nicolás Martínez, e 'Wólfram', de Sara Gil Méndez. Na Sección Galicia competirán este ano 11 filmes que viaxan da memoria íntima á mitoloxía, ou da exploración ecolóxica ás identidades disidentes. Destacan, neste sentido, as proxeccións de 'Deuses de pedra', de Iván Castiñeiras, 'Maldito Espírito', de Carlos Martínez-Peñalver e Alboroque, de Sabrina Fernández Casas..
Amplía a nova>>
17/09/2025
'Sirât' representará a España nos Premios Oscar
A Academia de Cine de España ven de dar a coñecer a elección dos académicos respecto selección da película que representará á cinematografía española na vindeira 98ª edición dos Premios Oscar de Hollywood. 'Sirât', dirixida por Oliver Laxe, foi a elixida das tres finalistas, entre as que estaba tamén o filme 'Romería', de Carla Simón rodado en Vigo. A longametraxe do cineasta galego, gañadora do Premio do Xurado do Festival de Cannes, está protagonizada por Sergi López e traslada ao espectador ao deserto, a unha "rave" perdida en medio das montañas do sur de Marrocos. O seu anterior filme, 'O que arde', xa estivo entre as tres finalistas a representar a España nos Oscar en 2020, pero non foi finalmente a seleccionada. 'Sirât' é unha película orixinal Movistar Plus+ producida en colaboración con Filmes da Ermida (a produtora de Oliver Laxe), El Deseo (dos irmáns Almodovar), Uri Films e 4A4 Productions. Agora haberá que agardar ata o vindeiro 16 de decembro a que se dea a coñecer a lista curta ou "shortlist" dos Oscar, para saber se 'Sirât' continúa o percorrido dentro da competición polo galardón á Mellor Película Internacional. O 22 de xaneiro de 2026 saberanse xa as cinco películas candidatas de todo o mundo nesta categoría e a cerimonia dos Oscar terá lugar o 15 de marzo de 2026 en Los Ángeles..
Amplía a nova>>
15/09/2025
María Vázquez recibirá a homenaxe da 47ª Semana de Cine de Autor de Lugo
A Semana de Cinema de Autor de Lugo, organizada pola asociación Fonmiñá en colaboración coas administracións autonómica, local e provincial e máis a USC, chega este mes á súa cuadrasétima edición. Entre os días 22 e 28 terán lugar 148 proxeccións en cinco espazos da cidade cun programa que inclúe dúas homenaxes. Por un lado celébrase, xa desde o cartel, o centenario do filme 'A Quimera de Ouro', de Charlie Chaplin 'Charlot'. Ademais este ano o festival homenaxea tamén a unha actriz do país, María Vázquez, coa proxección do filme 'A sombra do castiñeiro' (Marcos Varela, 2024), que se verá o luns. O ciclo Cine galego, ofrecerá en total trece obras recentes que amosan a forza do noso audiovisual, e tamén haberá un ciclo Cine de Nadal, en homenaxe ao Belén de Begonte, un referente cultural e artístico do Nadal lucense..
Amplía a nova>>
08/09/2025
Xosé Lois O Carrabouxo recibe o premio RiR en Allariz
Os máis de 40 anos de traballo no humor gráfico de Xosé Lois González,
O Carrabouxo, recibiron este sábado 6 de setembro o recoñecemento do Festival Internacional de Curtas de Comedia RiR de Allariz. A sesión de clausura deste programa acolleu a entrega do galardón RiR Contigo, co que o evento recoñece anualmente figuras destacadas do humor..
Amplía a nova>>
05/09/2025
O FIC Bueu dá comezo con enfoque internacional
O Festival Internacional de Cinema de Bueu dará comezo hoxe venres, 5 de setembro, coa proxección de Romería, a nova longametraxe de Carla Simón, coincidindo coa súa estrea en salas comerciais e a súa preselección para representar a España nos premios Oscar. O festival, que se celebrará ata o vindeiro día 20, celebra a súa 18ª edición cun programa que combina cinema, música e encontros profesionais e que traerá á vila morracense a unha corentena de convidados estatais e internacionais. O FICBUEU, como medida de presión ante o xenocidio en Gaza decide un ano máis deixar fóra do proceso de selección ás curtas israelitas financiadas polo goberno de Israel.
Amplía a nova>>
03/09/2025
'Sirât' preseleccionada para os premios Oscar
Os intérpretes Emma Suárez e Juan Diego Botto foron os escollidos pola Academia de Artes y Ciencias Cinematográficas de España para dar a coñecer hoxe os tres títulos da produción estatal preseleccionados para representar ao país como Película Internacional nos vindeiros Premios Oscar estadounidenses. O cuarto filme de Oliver Laxe 'Sirât' é unha destas longametraxes candidatas, que agora terá que pasar por unha nova votación dos académicos para saber se finalmente será a elixida. O vindeiro 17 de setembro darase a coñecer o resultado e a película seleccionada. Nesta terna está tamén 'Romería' de Carla Simón, filme rodado en Vigo e que conta a historia dos pais da realizadora de orixes galegas, que terá a súa estrea en salas esta fin de semana. Completa o trío de candidaturas 'Sorda', de Eva Libertad. 'Sirât' ten como aval o Premio do Xurado do Festival Internacional de Cannes e na súa produción participa a produtora El Deseo, dos irmáns Almodovar..
Amplía a nova>>
03/09/2025
O Chanfaina Lab cumpre dez anos de creación audiovisual
O encontro de creación audiovisual do Concello de San Sandurdiño, o Chanfaina Lab, fai dez anos. Entre o 5 e o 7 de setembro, 25 cineastas profesionais e afeccionados gravarán as súas curtametraxes en diferentes localizacións do concello. O programa, organizado polo concello, propiciou desde o seu nacemento 215 curtametraxes, todas elas dispoñibles en liña. .
Amplía a nova>>
02/09/2025
Unha exposición amosa as últimas propostas do videoxogo galego
Unha mostra interactiva que permite a coñecer as últimas propostas galegas no ámbito dos videoxogos. Esta é a proposta que realiza Videoxogo.gal, asociación que agrupa empresas do sector do entretemento electrónico do país, o vindeiro 6 de setembro no centro comercial Pontiñas, en Lalín..
Amplía a nova>>
