11/06/2020
Xavier Bermúdez abrirá o 25º OUFF coa estrea de 'Olvido y León'
O director ourensán Xavier Bermúdez fará a estrea mundial da súa nova película,
Olvido y León na apertura do 25º Ourense Film Festival. Será o 25 de setembro cando está prevista esta edición do festival que se prolongará ata o 3 de outubro. O filme de Bermúdez continúa a trama da galardoada
León y Olvido (2004) do mesmo director e guionista, e comezou a rodarse coincidindo coa anterior edición do festival. A secuela mantén como protagonistas a Guillem Jiménez e a Marta Larralde aos que se xuntou Monti Castiñeiras, e foi gravada en diferentes localizacións da provincia de Ourense, como o Balneario de Laias, Cenlle, Arnoia ou Ribadavia, sendo esta a primeira vez que o realizador fai unha rodaxe na súa provincia. Este 2020 celebrase o 25 aniversario do Festival de Cine de Ourense, organizado pola Fundación Carlos Velo e a Deputación de Ourense. A pesar da situación actual, o persoal que forma parte do certame estivo traballando para sacar adiante o festival e manter as datas previstas..
Amplía a nova>>
10/06/2020
O Curtas festival do Imaxinario estrea hoxe un programa de TV en liña sobre o xénero fantástico
O Curtas, Festival do Imaxinario de Vilagarcía de Arousa anunciaba hai ben pouco o seu cambio de denominación e formato, ampliando as súas miras máis alá do cinematográfico e amosando un gran dinamismo de cara a súa celebración entre o 23 de outubro e o 1 de novembro. Hoxe seguen presentando novidades nesa liña como o lanzamento hoxe mesmo dun programa de TV propio en liña sobre a actualidade do cinema fantástico e os seus protagonistas para manter á xente conectada co evento ata a súa celebración. A canle de YouTube e de Facebook do festival emitirán hoxe ás 20:00 horas a primeira entrega deste programa presentando ao director Miguel Ángel Vivas (
Tu hijo,
Secuestrados,
Extinction) e ao realizador arxentino Fabián Forte (
Cosa e Mandinga,
El muerto cuenta su historia,
Malditos Sean) ademais de aportar curiosidades ou tratar outros temas de interese para os afeccionados ao xénero fantástico. O Curtas ven ademais de convocar unha nova edición do seu concurso literario de contos en galego, que leva o título
"Contos arrepiantes para tremer ao carón da lareira". Coordinado por Xosé Duncan, e cun xurado composto por Maite Mosconi, Tomás Rivera e Josué Ramos, o concurso conta cun primeiro premio de 300€ para o relato gañador..
Amplía a nova>>
10/06/2020
Os 'jalpóns' de Cans van á Bienal de Arquitectura de Venecia
Un dos aspectos máis singulares do Festival de Cans é o uso de espazos domésticos, sobre todo os galpóns dos veciños da parroquia, como espazos de proxección audiovisual. Agora, un proxecto do estudo coruñés de arquitectura Creus e Carrasco titulado "Cans: arquitectura de consenso", no que desenvolven estes usos efémeros de espazos de almacenamento e traballo do rural galego irá á Bienal de Arquitectura de Venecia, como un dos 34 proxectos admitidos para seren expostos no Pavillón de España do evento. "Os dous arquitectos, seguidores fieis do Festival de Cans, presentaron un proxecto tentando responder á pregunta que plantea a Bienal de Venecia nesta edición: “How will we live together?” (Cómo vivir xuntos?). Os eixos centrais do traballo baséanse na idea de Cans como un proxecto que estimula a recuperación do patrimonio, explora novas formas de convivencia, e pon en valor o sentimento de colectividade como un xeito de afianzar unha base de identificación co certame". A exposición de Cans conterá material gráfico, vídeos, paneis e un plano de aldea coas maquetas físicas deseñadas expresamente para a exposición. .
Amplía a nova>>
08/06/2020
Diálogos confinados: O audiovisual que se reinventa
"O noso sector é complicado e descontinuo, a xente non ten estabilidade e sempre vivimos un pouco en precario. Estas circunstancias fan que esta situación afecte máis. Os técnicos non teñen contratos de anos, senón que van de produción e produción". Mamen Quintas, Produtora Executiva de Ficción Producciones advirte así das debilidades particulares do sector audiovisual para enfrontar a crise derivada da Covid-19. A sétima entrega dos Diálogos Confinados que publica este 8 de xuño o Consello da Cultura Galega no seu web repasa con ela e coa directora e produtora Paula Cons os efectos e as oportunidades que para o mundo do cinema e das series supón esta situación. Unha problemática que afecta a toda a cadea da produción e a exhibición, desde a creación e as rodaxes ata a produción e a exhibición..
Amplía a nova>>
08/06/2020
O audiovisual únese contra o Plan de Reactivación Cultural da Xunta
Guionistas, intérpretes, produtoras, festivais, realizadores e outras empresas do audiovisual así como a propia Academia Galega uniron as súa voces nun comunicado que expresa taxativamente que o Plan de Reactivación dos sectores turístico e cultural presentado pola Xunta o pasado 7 de maio non responde ás necesidades reais do sector. Asinan o comunicado as asociacións gremiais Asociación de Actores e Actrices de Galicia (AAAG), Asociación galega de Produtoras Independentes (AGAPI), Asociación Sindical galega de Guionistas (AGAG), Asociación Galega de Profesionais da Realización e a Dirección (CREA), Coordinadora Galega de Festivais de Cinema (Proxecta) e Cluster Audiovisual Galego (CLAG) xunto á Academia galega do Audiovisual (AGA). Para todos estes colectivos do mesmo sector o plan da Xunta careceu de análise e diálogo na súa elaboración, sinalan que a administración pon o foco máis no turismo e relega o sector cultural a un segundo plano. Ademais aseguran que o Plan non contén ningún tipo de medida asistencial ou específica para as necesidades derivadas da crise sanitaria. Segundo eles "o paquete de medidas recollidas no eido audiovisual non son máis que compromisos pendentes previos á situación da COVID-19". .
Amplía a nova>>
03/06/2020
A TVG emitirá a versión audiovisual de 'Crónicas do paraíso' de Sarabela Teatro
A compañía ourensá Sarabela Teatro está de actualidade por causa dupla. A adaptación a televisión da súa obra de teatro
Crónicas do paraíso, en colaboración coa produtora Ollovivo, é o proxecto seleccionado pola CRTVG, de entre os 20 presentados, no marco das súas medidas extraordinarias de apoio ao sector audiovisual e creativo galego, neste caso para compañías e produtoras teatrais.
Crónicas do paraíso é unha versión libre da obra
As crónicas do sochantre, do escritor Álvaro Cunqueiro. Baixo a dirección de Luis Avilés, a obra está interpretada por Elena Seijo, Fernando Dacosta, Fran Lareu, Fina Calleja e Sabela Gago e será emitida pola Televisión de Galicia. Ademais a compañía ven de iniciar os traballo para levar aos escenarios a obra literaria de Manuel Rivas,
A lingua das bolboretas coa que Sarabela celebrará os seus 40 anos de actividade teatral.
escortbayan.xxx/istanbul
.
Amplía a nova>>
02/06/2020
O Play-Doc tamén pasa ao programa do outono cultural a súa sexta edición
O festival de cine documental Play-Doc de Tui ven de facer públicas as súas novas datas de celebración este mesmo ano tras a cancelación debida ao Estado de Alarma o pasado 29 de abril. Tras un intenso traballo e “innumerables reunións” será entre o 23 e o 27 de setembro cando terá lugar a décima sexta edición deste evento audiovisual. Desde a organización lembran, nunha comunicación feita a través de redes sociais, que as circunstancias obrigarán a pensar "nun modelo de festival distinto que se adapte ás medidas e protocolos de seguridade de maneira rigorosa", pero que aseguran que se vai celebrar "co mesmo espírito e a mesma ilusión de sempre, e se cabe con máis amor". Pouco antes do Play-Doc e tamén contra o sur do país, levarase a cabo unha edición igualmente “trasladada” en datas de outro festival audiovisual o Festival Internacional de Curtametraxes de Verín, FIC Vía XIV, que terá lugar entre o 5 e o 13 de setembro, neste caso a quinta cita co cine en formato curto adiántase, xa que nas anteriores edicións era no mes de decembro cando se celebraba. Esta decisión de cambio foi anterior ao Estado de Alarma e a crise sanitaria, que no caso do FIC Vía XIV, só tivo como incidencia o feito de que ampliasen o seu prazo d recepción de curtametraxes ata o vindeiro 15 de xuño..
Amplía a nova>>
01/06/2020
O cine volve a Galicia esta semana e irán abrindo máis salas na vindeira
No proceso de volta do peche cultural total cada poucos días imos contabilizando unha actividade que volve a formar parte das nosas vidas. Desde a apertura inicial das librarías na Fase 1, as bibliotecas con servizos restrinxidos, os museos e o pasado venres os primeiros concertos ante público en salas, agora chega o momento en que van abrir de novo as primeiras salas de cine. O posto de saída na volta ás proxeccións o levará unha sala histórica e de empresa familiar, o Cine Seixo, de Marín, situado na parroquia do mesmo nome, abrirá as súas portas o vindeiro venres 5 de xuño. Esta sala aberta en 1943 por José Carballo García e que hoxe rexenta o seu fillo Perfecto Carballo desde a reapertura en 1999 tras máis dunha década parado, viña xustamente de implantar un sistema de proxección dixital antes do Estado de Alarma e agora será a primeira en ofrecer de novo a experiencia cinematográfica aínda que sexa con restricións de aforo (60 butacas) e sistemas de seguridade e separación entre o público. A cartelira comezará coas películas que estaban en proxección previamente á parada.,.
Amplía a nova>>
28/05/2020
Agadic publica as bases de dúas subvencións de apoio ao audiovisual
O Diario Oficial de Galicia recolle hoxe dúas convocatorias da Axencia Galega de Industrias Culturais de subvencións de apoio á industria audiovisual que mañá mesmo abren o prazo de presentación de solicitudes. O ente da Consellería de Cultura e Turismo fai así as aperturas dos procesos anuais de axuda para o desenvolvemento de proxectos audiovisuais de produción galega e para a asistencia a mercados e foros internacionais de contidos audiovisuais. Esta última liña de axudas púxose en marcha por primeira vez o pasado ano con 50.000 euros de orzamento para o período anual e co obxectivo de sistematizar o apoio económico á presenza de produtoras e distribuidoras galegas en feiras estratéxicas para a industria do cinema e da televisión a nivel mundial. Neste caso a convocatoria ten carácter excepcional e só cubre as asistencias a mercados ou foros de negocio dos catro meses e medio previos ao Estado de Alarma, as comprendidas entre os días 1 de decembro de 2019 e o 13 de marzo de 2020, polo cal reduce o seu orzamento a 30.000 euros, que será outorgado ata o seu esgotamento..
Amplía a nova>>
18/05/2020
O Clúster Audiovisual reelixe a Jorge Algora como presidente
O produtor e socio fundador de Adiviña Producións, Jorge Algora, foi relixido por unanimidade presidente do Clúster Audiovisual Galego para os próximos tres anos na Asemblea Xeral Extraordinaria de socios que celebrou a entidade o venres 15 de maio de maneira telemática. A Asemblea, que representa a cae 40 compañías do sector, tamén ratificou os membros que integran a nova Xunta Directiva para este novo período. Entre os retos declarados a curto e medio prazo da directiva está impulsar os contidos dixitais, a través dunha maior interrelación entre contidos e tecnoloxía, e integrar como socios colaboradores a asociacións e colectivos sectoriais co obxectivo de formular propostas conxuntas ante a administración que redunden no beneficio do audiovisual galego. Tamén está nos planes do organismo promover a posta en marcha da Galicia Film Commission, así como a creación do Observatorio do Audiovisual Galego, que facilite datos actualizados da industria, entre outros..
Amplía a nova>>
