04/02/2025
Homenaxe dos cómicos a Farruco
O Salón Teatro de Santiago acolle hoxe ás 20:30 horas un evento no que actores e cómicos galegos renderán homenaxe a Xosé Luís Bernal (Santiago de Compostela 1942, coñecido polo seu alter-ego cómico, Farruco, como un dos precursores dos contacontos e humoristas do país con máis de cinco décadas de actividade. Para esta celebración o evento contará coa presenza e actuación de actores e cómicos como Pepo Suevos, Xosé A. Touriñán, David Amor, Roberto Vilar, Quico Cadaval, Isabel Risco, Isi, Carmen Méndez, Luis iglesia, Xan Veiga, Celso F. Sanmartín, Avelino González, Cándido Pazó, Carmen Méndez, David Noya e Arantxa Treus. A entrada é libre ata completar a capacidade, previa retirada de convite na billeteira do Salón Teatro dende 2 horas antes do comezo do acto (18.30h)..
Amplía a nova>>
03/02/2025
Exército Mekemeke, Sara Seco e Prado Rúa impóñense nos VIII Premios Youtubeiras+
O Pazo da Cultura de Narón acollía este sábado a gala de entrega da VIII edición dos Premios Youtubeiras+. O xurado escolleu Exército Mekemeke como mellor canle desta edición, a recoñecer a "coidada estética empregada, a calidade técnica, a periodicidade das publicacións e a súa transversalidade"..
Amplía a nova>>
31/01/2025
Presentada un novo catálogo de 'Shorts from Galicia'
A Axencia Galega das Industrias Culturais presentou unha nova edición de 'Shorts from Galicia', o seu catálogo interactivo en inglés que permite o acceso a destacadas curtametraxes do ano producidas no país, así como algúns proxectos en desenvolvemento. O catálogo destaca as curtas
Uno novo día (dirixida por Gon Caride), La casa de la abuela (Ashling Ocampo), Monstera (Diego R. Aballe, Delincuente (Alba Domínguez), A voz de todas as cousas (Daniel Pérez) e O costume do traballo (Luis Morla) como produtos finalizados, e as curtas de animación Cume (David Fidalgo) e O corpo de Cristo (Bea Lema), ademais de Algo novo que contar (Paula Pereira). . Amplía a nova>>
31/01/2025
Lidia Fraga, Nati Juncal e Jaione Camborda gañan o Premio Mulleres no Foco
O auditorio da sede de Afundación de Pontevedra acolleu a entrega dos premios 'Mulleres no Foco' da Deputación Provincial de Pontevedra, promovido tamén pola Asociación de Mulleres CIMA que ten o obxectivo de dar visibilidade ao papel da muller no sector do audiovisual. Nesta cuarta edición as tres gañadoras estiveron acompañadas das outras once nomeadas.A guionista Lidia Fraga, a prdutora Nati Juncal e a realizadora Jaione Camborda foron as que finalmente levaron este ano os recoñecementos, que están ademais dotados económicamente con 5.000 euros cada un. As outras nomeadas foron Lucía Estévez, Xisela Franco, Andrea Vázquez, Teresa Fernández-Valdés, Uxía Caride, Inés Colmero, Beatriz Legerén, Mayka Braña, María Elva Martínez, María Roja e Carmen Méndez.. Amplía a nova>>
31/01/2025
'Filmei paxaros voando' estréase hoxe en cines
Este venres estrearase en salas de cine a película 'Filmei paxaros voando', ópera prima de Zeltia Outeiriño. O filme, que xa pasou por festivais como Cineuropa terá varios pases ao longo dos vindeiros días en diferentes salas galegas. Os Cines os Cantones da Coruña acollerán este venres ás 22:00 horas a estrea, que incluirá un coloquio con parte do equipo da película. Será o domingo, 2 de febreiro, ás 17:30 nos Multicines Norte de Vigo onde será a seguinte oportunidade de verse este filme. Os días 8, 9 e 10, haberá proxeccións en NUMAX en Santiago, Dúplex en Ferrol e no Cibnceclube Padre Feijoo de Ourense, respectivamente. . Amplía a nova>>
30/01/2025
Galicia mantén posicións no Observatorio da Cultura estatal
O informe do Observatorio da Cultura da Fundación Contemporánea, elaborado coas valoracións de máis de 400 expertos e profesionais de toda España, ven de sacar as súas conclusións e listaxes respecto ao pasado ano 2024. Máis aló das mencións individuais de eventos ou programacións, que fan sacar peito a nivel local, o documento deixa unha instantánea da relevancia e proxección de toda a comunidade así como dos seus cambios en canto ao deseño dos propios contidos máis destacados. No relativo á comparación co resto das comunidades autónomas, Galicia mantén unha estabilidade repetindo un ano máis no sexto posto da lista. Como 'Insignia cultural de Galicia', o nome dado ao máis valorado cada ano, a Cidade da Cultura tamén repite para os expertos consultados. Grazas á mostra 'Galiverso, Habitats' a Cidade da Cultura de Galicia entra tamén na listaxe do mellor da cultura dixital, no posto 41 de 51 propostas. Pola contra, nas listaxe de 'Imprescindibles' estatais nas diferentes disciplinas non hai presenza galega, concentrándose os destaques en Madrid ou Barcelona.. Amplía a nova>>
24/01/2025
Pedralonga Estudios xestionará o Coruña Estudio Inmersivo
A Deputación da Coruña e Pedralonga Estudios asinaron o contrato para a xestión de Coruña Estudo Inmersivo (CEI), aprobada no pleno do pasado 27 de decembro. Coa firma deste documento, a sociedade será a encargada da xestión e explotación do centro de produción virtual VPxR, promovido pola Deputación da Coruña no marco do proxecto "Ecosistema Dixital do Sector Audiovisual de Galicia (EDAGA) – Coruña Estudio Inmersivo (CEI)", por un período de 20 anos prorrogables por outros 5 anos máis. Con esta sinatura que se pon fin ao proceso administrativo da posta en marcha da infraestrutura, que será inaugurada durante o mes de febreiro e comezará de xeito inmediato a ser sede dunha formación específica para traballar coa súa tecnoloxía.. Amplía a nova>>
23/01/2025
A Agadic abre as axudas ao talento audiovisual para 2025
O Diario Oficial de Galicia deste 23 de xaneiro publica a convocatoria de subvencións á creación audiovisual para a promoción do talento audiovisual galego. Esta liña de axudas, que ten o prazo aberto ata o vindeiro 24 de febreiro, mantén ao igual que en 2024 uns fondos de 176.000 euros.. Amplía a nova>>
23/01/2025
A Rede Cultural da Deputación da Coruña mantén o seu orzamento
Ata o vindeiro 6 de febreiro está aberto o prazo para que artistas e grupos se inscriban na edición 2025 da Rede Cultural da Deputación da Coruña. O programa, que apoia o desenvolvemento de actividades en concellos de toda a provincia, conta na súa nova xeira cun orzamento de 1.975.000 euros, a mesma cifra que en 2024.. Amplía a nova>>
22/01/2025
Pontevedra acolle os Premios Feroz este 25 de xaneiro
Este sábado 25 de xaneiro o Pazo da Cultura de Pontevedra acolle a XII gala de entrega dos Premios Feroz. A Cidade do Lérez alberga por vez primeira os galardóns que outorga a Asociación de Informadores Cinematográficos de España (AICE) e o Concello artellou arredor desta ocasión unha ambiciosa programación cultural. A última proposta neste sentido é Ouveo Feroz, unha serie de seis entrevistas que se poden ver na canle de Youtube municipal.. Amplía a nova>>
