18/08/2020
O OUFF homenaxea ao cineasta e primeiro director do certame Eloy Lozano
A edición número 25 do Ourense Film Festival (OUFF)renderá homenaxe ao seu fundador e director do primeiro certame, Eloy Lozano (1953-2009),coa proxección da longametraxe
As belas dormentes e a publicación dunha monografía que lembra a traxectoria de quen foi unha figura imprescindible do audiovisual galego. Esta homenaxe xa estaba prevista desde fai dous anos para a edición de 2019, unha edición marcada despois polas dúbidas de realización e continuidade, que non se disiparon ata a entrada da Deputación de Ourense e a Fundación Carlos Velo. Finalmente será este ano cando se leve adiante a homenaxe ao falecido cineasta. coa proxección da súa longametraxe e a publicación da monografía que preparou o escritor e crítico de cine Eduardo Galán co obxectivo de “reivindicar unha figura que non é suficientemente coñecida pero que é de importancia vital para o audiovisual galego”. O libro, titulado
Eloy Lozano, o cineasta que devorou a luz, recorda a obra de Lozano a través das conversas que o seu autor mantivo cos seus familiares, amigos e colaboradores. Tamén das súas propias lembranzas, xa que Galán e Lozano eran coñecidos e traballaron xuntos na Televisión de Galicia (TVG). A publicación formará parte do catálogo de obras propias que o OUFF recuperou hai tres anos, e que nesta nova etapa repasou tamén a traxectoria do cineasta Xavier Bermúdez e a produtora Vaca Films..
Amplía a nova>>
14/08/2020
A 15ª MICE estreará o documental 'Dorothé na vila' de Alejandro Gándara e Olaia Tubío
A pandemia forzou en marzo á suspensión da Mostra Internacional de Cinema Etnográfico uns días antes de decretarse o estado de alarma. Agora a 15ª edición da MICE do Museo do Pobo Galego en Santiago volve con novas datas de celebración, do 25 ao 29 de agosto, e cunha fórmula mixta que xa é un estándar destes tempos en aras dunha maior seguridade, na que as actividades se realizarán combinando un formato presencial e en liña. Por iso, a organización optou por unha redución da programación presencial. Destes cambios nace Cinema Bonaval, que aproveitará as noites de agosto para gozar de filmes ao aire libre baixo as estrelas do Parque de Bonaval. Esta sección, que estará formada por cinco filmes en tres sesións, reúne as liñas temáticas que ían centrar as seccións non competitivas
Trazas e
Impropias (adiadas ao 2021): a oralidade e a memoria histórica e das mulleres. Dentro destas proxeccións, destaca a estrea o xoves 27 de agosto ás 22h00 do documental
Dorothé na vila, proxecto de Alejandro Gándara e Olaia Tubío, con Lucía Estévez na edición, que recibiu o Premio Luisa Villalta da Deputación da Coruña. A película segue os pasos, corenta anos despois, da musicóloga suíza Dorothé Schubarth na súa viaxe por Galicia a finais dos 70, cando procuraba cantos antigos que desapareceran no centro de Europa. Desta busca saíron as 300 horas de gravacións que forman o Cancioneiro Popular Galego, a maior compilación de músicas tradicionais do país, que hoxe en día están depositadas no APOI do Museo do Pobo Galego.
.
Amplía a nova>>
14/08/2020
Agadic modifica as bases das súas axudas á produción audiovisual e creación escénica
A Axencia Galega de Industrias Culturais (AGADIC) publicou ao longo desta semana no Diario Oficial de Galicia ata catro modificacións de anteriores convocatorias de subvencións ás industrias culturais coa finalidade de avanzar na adaptación das mesmas ao contexto actual no marco do Plan de reactivación dos sectores cultural e turístico fronte aos efectos da covid-19. A entidade busca con isto facilitarlles ás empresas adxudicatarias o cumprimento dos requisitos inicialmente esixidos para a concesión e xustificación destas axudas. Con esa finalidade esta semana se publicaron no Diario Oficial de Galicia (DOG) tres modificacións referidas ás bases para producións e coproducións audiovisuais do ano 2019, para a produción dunha obra audiovisual cara ao Xacobeo 2021 de 2018 e para creación escénica de 2020. Durante o pasado mes de xullo a axencia gobernamental xa fixera modificacións adaptadas no mesmo sentido sobre as axudas a festivais audiovisuais e as artes escénicas..
Amplía a nova>>
12/08/2020
Máis de trinta realizadores para unha nova edición do Chanfaina Lab
Unha nova edición do encontro audiovisual Chanfaina Lab terá lugar entre o 3 e o 6 de setembro en San Sadurniño. Nela se darán cita máis dunha trintena de creadoras e creadores cun mesmo obxectivo: produciren alí mesmo durante os días do encontro pequenas pezas protagonizadas pola xente e os lugares da contorna local da vila. Ademais de ser escenario para as súas obras cinematográficas, San Sadurniño tamén acollerá outras actividades paralelas que forman parte do proxecto Chanfaina Lab, todas elas adaptadas ás actuais obrigas preventivas. A Praza do antigo Concello acollerá a Eira de Cineastas coa que se inaugurara o Chanfaina facendo a presentación de todas as persoas participantes, que repasarán a súa traxectoria audiovisual mostrando fragmentos -ou pezas completas- que consideran máis representativos do seu traballo. Neste mesmo espazo aberto terá lugar a proxección do filme
O que arde de Óliver Laxe. Haberá tamén un obradoiro de montaxe audiovisual, “Corte a corte” co realizador Fran X. Rodríguez. .
Amplía a nova>>
11/08/2020
A Mostra de Cinema Periférico presenta un formato dual de actividades presenciais e contidos deseñados para a rede
O (S8) Mostra Internacional e Cinema Periférico celebrará entre o 27 de setembro e o 3 de outubro a súa undécima edición explorando un novo formato dual. Nel combinará diversas performances, encontros e proxeccións na cidade da Coruña cunha serie de formatos deseñados para a súa emisión a través da web e as redes sociais do festival. Nesta edición dual, a Mostra amosará máis que nunca o seu carácter internacional: chegará a todos os recunchos do mundo con contidos en galego, castelán e inglés e reforzará especialmente o seu carácter divulgativo. Deste xeito, a formación de públicos e a descuberta de creadores e creadoras continuarán a ser dous dos eixos principais da programación do evento.
.
Amplía a nova>>
11/08/2020
Botan a andar as accións formativas do Plan de reactivación do sector cultural
A Consellería de Cultura anunciou este 10 de agosto un investimento de 90.000 euros en accións formativas dentro do Plan de reactivación do sector cultural ante a Covid-19. O organismo público asinou cadanseu convenio coa Asociación Galega de Produtoras Independentes (Agapi), a Asociación de Empresas Tecnolóxicas e Servizos Audiovisuais de Galicia (Agatec), a Asociación Galega de Empresas Musicais (AGEM) e mais Escena Galega para desenvolver diferentes programas didácticos que se desenvolverán ao longo do segundo semestre de 2020..
Amplía a nova>>
10/08/2020
O filme 'Reboiras, acción e corazón' estrearase en Ferrol no 45 aniversario da súa morte
Tras da súa preestrea este sábado en Imo (Dodro), lugar natal de Ramón Reboiras, o filme
Reboiras, acción e corazón estrearase este vindeiro día 12 de agosto, coincidindo co aniversario do homicidio do activista a mans da policía, e será na cidade onde ocorreron os feitos en 1975, Ferrol, no cinema Duplex. A longametraxe producida pola Fundación Terra e Tempo de Estudos Nacionalistas e con guión e dirección de Alberte Mera, recrea momentos clave da vida de Reboiras (1950-1975) coma o do día da súa morte. A longametraxe inclúe tamén abundante material de arquivo e máis de quince testemuños de persoas que coñeceron persoalmente a Reboiras e partillaron con el vida persoal e ou política entre os que están nomes coma Margarita Ledo, Darío Xohán Cabana, Xosé Luis Méndez Ferrín, Nemesio Barxa ou Manuel Mera entre outros. As dramatizacións están protagonizadas polo actor Daniel Celester, que interpreta a Moncho Reboiras. Daniel Priet, Lidia Veiga, Carlota Mosquera e Sergio Alfonso completan o elenco de intérpretes para as recreacións. .
Amplía a nova>>
10/08/2020
Rebeca Losada gaña o certame de 'Contos arrepiantes' do festival Curtas de Vilagarcía
O certame literario 'Contos arrepiantes para tremer ao carón da lareira' convocado desde o Curtas Festival do Imaxinario de Vilagarcía ten en Rebeca Losada a súa primeira gañadora co conto
No profundo. O xurado composto por Maite Mosconi, Tomás Rivera e Josué Ramos, coordinado por Xosé Duncan, escolleu o relato de Losada como gañador así como outro nove finalistas desta primeira edición do certame. Os dez relatos formarán parte dun volume especial que se presentará e se distribuirá de balde no festival entre o 23 de outubro ao 1 de novembro de 2020 en Vilagarcía de Arousa. Rebeca Losada recibirá un premio de 300 euros e cinco exemplares do libro publicado, ese mesmo número de copias será o que recibirán os nove finalistas. Conforman a lista de relatos finalistas:
Espérame, de Vanesa Santiago;
As malas compañas, de Marcos Dios;
Non creas o que contan as lendas, de José Paz;
A torre dos lamentos, de Mónica Penas;
A caída, de Carlos Vega;
Diario do Confinamento, de Ilda Luaces;
Presa, de Silvia Martínez;
As campás tocaban a morto, de Paula Cascallar;
Entre conto e lenda, de Raúl Costas. O festival ten aínda aberta ata o vindeiro 15 de agosto a convocatoria para o concurso de ilustración 'Ilustracións arrepiantes para tremer ao carón da lareira', para o cal elixirán unha gañadora e outras nove finalistas coa mesma finalidade de ilustrar a cuberta e as páxinas interiores do libro
Contos Arrepiantes para tremer ao carón da lareira que xuntará as dúas convocatorias no volume..
Amplía a nova>>
04/08/2020
A serie Vidago Palace entra no catálogo de HBO España
A serie de televisión Vidago Palace, un drama romántico de seis capítulos producido pola galega Portocabo e a portuguesa Hop Filmes, ven de engadirse ao catálogo da plataforma HBO España. A serie, protagonizada por Micaela Lupu, Pedro Barroso e David Seijo, foi a primeira coprodución galego-portuguesa para Televisión de Galicia e RTP, e agora adquirida por HBO. Desde o 31 de maio está dispoñible en HBO Portugal, onde se estreou con grande éxito de público. A trama romántica de Vidago Palace transcorre no hotel e spa aberto en Vidago a comezos no século XX para recibir os persoeiros máis notables da sociedade europea. Nun contexto marcado polos Xogos Olímpicos de Berlín, a ditadura de Salazar en Portugal e o inicio da Guerra Civil en España. Mentres que o portugués Henrique Oliveira foi o responsable da creación e dirección da serie, no guión tamén participaron Pepe Coira e Araceli Gonda, traendo parte da historia á fronteira entre Galicia e Portugal no verán do 1936. No elenco atópanse destacadas actrices e actores galegos como David Seijo, Antonio Mourelos, Eva Fernández, David Novas, David Amor, Sheyla Fariña ou Xosé Antonio Touriñán. Ademais figuran no equipo recoñecidos profesionais do audiovisual galego como Alfonso Blanco na produción executiva, Ana Míguez na produción, Xavi Font como creador da banda sonora ou Antonio Pereira na dirección de arte. Esta é a segunda serie da produtora Portocabo que podemos ver en HBO en toda península, logo da estrea en abril nesta mesma plataforma de Auga Seca, un drama policial coproducido tamén entre España e Portugal, esta vez coa produtora lusa SP-i. Ao igual quer con aquela, Vidago Palace poderá visionarse na plataforma no seu idioma de rodaxe orixinal, en galego e portugués, pero tamén contará cunha versión dobrada ao castelán..
Amplía a nova>>
03/08/2020
O audiovisual en loito pola morte de Dolores Ben Pena
O pasado sábado 1 de agosto falecía aos 64 anos Dolores Ben, empresaria fundadora dos estudios de son cinematográfico Cinemar Films e que durante unha década estivo á fronte da Asociación Galega de Produtoras Independentes (AGAPI). Ben recibiu o Premio de Honra Fernando Rey 2011 da Academia Galega do Audiovisual, da que era socia e no seu rol de presidenta de AGAPI tamén recibiu o Premio da Cultura Galega en 2014. O seu pasamento foi recibido con tristura a nivel colectivo polas principais entidades do sector audiovisual como a AGAPI á que tantos anos dedicou, a Academia Galega do Audiovisual, a asociación Escena Galega, que lembraba a súa colaboración na organización da feira Culturgal, e desde a mesma dirección de Culturgal tamén se sumaban ao loito. O mesmo facía a Axencia Galega de Industrias Culturais (AGADIC) lembrando o traballo conxunto coa AGAPI. Dolores Ben foi presidenta de AGAPI dos anos 2007 a 2019, ano no que Felipe Lage tomou o seu relevo no cargo. E desde esta asociación comunicaban definían así á súa ex-presidente: “Dolores foi un exemplo de muller rexa, loitadora e imprescindíbel no panorama cultural galego e estatal. Lamentamos con fondura a perda dunha muller pioneira, valente e comprometida.” Tamén a Academia de las Artes y las Ciencias Cinematográficas de España facía lembranza da súa figura como “muller de retos” e “referente do audiovisual galego”..
Amplía a nova>>
