28/07/2020
O XVIIº Curtocircuíto celebrarase en outubro
Curtocircuíto - Festival Internacional de Cine de Santiago de Compostela, fai públicas as datas da súa próxima edición: do 3 ao 11 de outubro deste 2020. Dados os condicionamentos e as limitacións xurdidas da crise COVID-19, a organización propón para esta décimo sétima edición do festival un formato reducido e mixto que combinará a programación en liña, a través da plataforma Filmin e das redes sociais do festival, cunha serie de proxeccións e eventos puntuais nas súas sedes habituais en Santiago de Compostela. Malia a redución de programación, Curtocircuíto manterá as catro seccións competitivas tradicionais: Radar, Explora, Planeta GZ e Penínsulas, co obxectivo de preservar a esencia do evento. Aínda que nun formato compacto, Curtocircuíto continuará a ser un punto de encontro e lugar para a confluencia de distintas disciplinas, mantendo como eixo principal o cinema de autor e a aposta polas linguaxes contemporáneas.O Festival Internacional de Cine de Santiago de Compostela, que desvelará máis contidos da súa programación nas próximas semanas, está organizado polo Concello de Santiago e conta co apoio da Deputación da Coruña, o Consorcio de Santiago e a AGADIC. A convocatoria para a recepción de filmes a competición queda aberta desde hoxe ata o próximo 10 de agosto a través da plataforma ShortFilmDepot.
.
Amplía a nova>>
23/07/2020
Melania Cruz recibirá o premio de honra do festival FICBUEU
A actriz Melania Cruz (Lugo, 1983) recibirá o Premio Cinema Galego do 13º Festival Internacional de Curtametraxes de Bueu, FICBUEU 2020. A actriz recibirá o galardón nun encontro co público que terá lugar na xornada de clausura o 19 de setembro na sala multiusos do Centro Social do Mar da localidade pontevedresa. O Encontro con Melania Cruz permitirá aos asistentes achegarse á traxectoria vital e profesional desta actriz, gañadora de dous premios Mestre Mateo e un María Casares. Melania Cruz ten pendente de estrea arestora o filme
Ons e tamén protagonizou a galardoada
Dhogs’, ademais de participar en destacados proxectos do cine galego dos últimos tempos, como
María Solinha, ou
Trote. Outros recoñecidos persoeiros do mundo do cinema, como o actor Manuel Manquiña ou o crítico Javier Tolentino, participarán nas actividades programadas dentro do FICBUEU 2020 que se desenvolverá do 11 ao 19 de setembro coas limitacións de aforo e demais medidas de seguridade que require a prevención fronte ao coroavirus..
Amplía a nova>>
23/07/2020
O Plan de Dinamización Cultural da Coruña apoia a realización de medio cento de proxectos
Arredor de 50 proxectos culturais terán lugar na cidade da Coruña co apoio do Plan de Dinamización Cultural impulsado polo Concello a través do Instituto Municipal Coruña Espectáculos (IMCE). Ven de facerse pública a relación destes proxectos seleccionados que teñen coma requisitos comúns estar destinados ao público en xeral, ser de carácter gratuíto e desenvolverse integramente no termo municipal. No listado aparecen multitude de actividades musicais, concertos, pero tamén hai espazo para outros espectáculos de circo, teatro, charlas, cine, arte, recitais, etc. Entre os destinatarios poden verse nomes coñecidos de creadores e axentes do sector cultural da cidade coma Yolanda Castaño ou o xornalista Javier Becerra ademais de varias empresas culturais. O plan conta cun orzamento de 200.000 euros e cada proxecto pode recibir un máximo de 6.000 euros. O Plan de Dinamización Cultural do Concello da Coruña dá así os seus primeiros froitos mentres que aínda non se sabe nada do Plan estratéxico que o Concello de Santiago estaba a preparar en abril para o sector cultural local..
Amplía a nova>>
22/07/2020
Portamérica estrea en liña un documental propio sobre a súa historia gastronómico-musical
O festival Portamérica non puido celebrarse este ano en Caldas de Reis como era a súa intención e quedou, como outras moitas grandes citas, posposto para o vindeiro 2021 cando celebrará o seu décimo aniversario. Pero aínda así o evento musical e culinario terá presenza cultural este verán xa que na súa canle da plataforma YouTube estrearase este xoves un documental propio do festival, producido pola empresa Esmerarte coa colaboracuión da Deputación de Pontevedra, e dirixido por Alberto Baamonde, que baixo o título de
Esa maldita felicidad dá conta da singularidade deste evento e da súa historia, concepción e desenvolvemento. Dous anos de rodaxe entre España e Latinoamérica da coma resultado unha
<> de cociñeiros e músicos cun destino común no festival da carballeira de Calda de Reis. O resultado documental estrearase ás 21:00 horas na devandita canle do festival Portamérica. .
Amplía a nova>>
22/07/2020
O festival de Cans abrirá coa proxección de 'La isla de las mentiras'
A estrea en pantalla grande do filme
La isla de las mentiras, antes de que a súa distribución chegue ás salas de cinema, servirá para abrir a XVIIª edición do Festival de Cans, que terá lugar do 2 ao 5 de Setembro. A longametraxe da debutante Paula Cons, comparte ademais protagonismo este ano coa homenaxe a Chano Piñeiro e a súa figura, que o festival prepara para conmemorar o vixésimo quinto aniversario do seu pasamento. Á figura do creador de clásicos do audiovisual galego coma
Mamasunción ou
Sempre Xonxa adicáselle o cartaz do certame deste ano, a través da figura icónica do seu personaxe Caladiño. Parte da programación da XVIIª edición do Festival de Cans presentouse onte en Santiago , na tenda NikisGalicia, cuxo equipo deseña cada ano os cartaces do Festival e apoia a súa celebración. Nesta edición, a seguridade e, de maneira moi especial, trazar un ‘escudo protector’ sobre os maiores de Cans, é o primeiro obxectivo do Festival, que reducirá considerablemente o seu aforo e eliminará os concertos nocturnos, para adaptarse ás medidas de seguridade.
Amplía a nova>>
21/07/2020
Premio para a película 'María Solinha' en Sicilia
A longametraxe
María Solinha de Ignacio Vilar (Vía Láctea Filmes) ven de abrir o seu palmarés propio ao recibir o máximo galardón na sección Indieuropea do 66º Taormina Film Fest, cita internacional que se celebra na vila siciliana de Taormina. A película galega acadou o favor do xurado en competición con outras 11 longametraxes de Francia, Polonia, Irlanda, Turquía, Grecia, Reino Unido, Rusía, Italia e Bulgaria. O xurado xuvenil da sección Indieuropea estaba, conformado por estudantes do Master TeA da Universidade de Roma outorgaron este recoñecemento da película de Ignacio Vilar “por presentar un tema tan actual como o da represión da liberdade da muller a través dun uso envolvente, innovador e refinado da metanarrativa”.
María Solinha proxectouse en Taormina na súa versión orixinal en galego con subtítulos en italiano. A longametraxe conta a lenda dunha muller icónica, condenada pola Inquisición, cun relato que se move entre o século XVII e o XXI. Grial Montes e Laura Míguez protagonizan a versión contemporánea da lenda dunha figura visionaria cuxo anhelo de liberdade a converteu en icona feminista. O filme estreouse o pasado 19 de xuño e está a percorrer Galicia a través de cines ao aire libre..
Amplía a nova>>
21/07/2020
Os V Premios Crea recoñecen o traballo de Senunpeso
A Asociación Galega de Profesionais da Dirección e Realización (CREA) entregaba na mañá deste 20 de xullo os galardóns cos que os seus membros recoñecen "aquelas colegas que destacasen nas distintas facetas da dirección audiovisual". O proxecto LAV de Vedra, que organiza a Asociación Senunpeso, foi recoñecido co Premio de Honra, e houbo dúas mencións especiais, unha á internacionalización do audiovisual galego para
O sabor das margaridas e outra á promoción da igualdade de xénero que levou CIMA - Asociación de Mujeres Cineastas y de Medios Audiovisuales.
.
Amplía a nova>>
17/07/2020
Agadic flexibiliza prazos e requisitos nas subvencións de festivais audiovisuais e artes escénicas
A Axencia Galega de Industrias Culturais (Agadic) ven de publicar hoxe no Diario Oficial de Galicia dúas modificacións de bases de subvencións no marco das medidas contempladas no Plan de reactivación dos sectores cultural e turístico fronte aos efectos derivados da Covid-19. As subvencións aos festivais audiovisuais e e as dirixidas á creacións escénica vense modificadas pola Agadic nestas novas resolucións. Así a resolución hoxe publicada inclúe entre os festivais susceptibles de apoio aqueles que se celebren en liña; amplía nun mes máis, ata o 30 de novembro de 2020, a posible data de celebración; aumenta nun 20%, ata o 80%, o orzamento subvencionable cando o solicitante sexa unha entidade privada; permite a reformulación das solicitudes xa presentadas anteriormente para axeitarse ás novas bases; declara unha exención de constitución de garantías para pagamentos anticipados de máis de 18.000 euros; concede un prazo de dez días para presentar alegacións e inclúe coma gastos subvencionables aqueles incorridos anteriormente e non recuperables como consecuencia do estado de alarma decretado polo COVID-19..
Amplía a nova>>
16/07/2020
O Festival de Cans cambia para protexer aos maiores da aldea
A XVII edición do Festival de Cans, a celebrar entre o 2 e o 5 de setembro, presentará un formato moi diferente ao dos pasados anos, con medidas que terán como obxectivo as máximas garantías de seguridade sanitaria. A protección das persoas maiores da aldea pontevedresa será a maior prioridade este ano, ademais de evitar a concentración multitudinaria en calquera caso. Por este motivo evitaranse as proxeccións e actividades naqueles “jalpóns” onde habiten persoas de maior idade, que non formarán parte tampouco nesta edición do xurado das veciñas e veciños nin por precaución se programarán actuacións colectivas, como a que tradicionalmente reúne ás Pandereteiras de Cans. O “escudo protector” sobre os maiores tamén se activará no caso dos condutores de chimpíns de maior idade, que este ano non participarán por precaución. A previsión sería facer só pequenas procesións honoríficas dos chimpíns, totalmente controladas, cun máximo de catro persoas en cada un. O plan do Festival pasa por reducir o número de jalpóns e o aforo dos mesmos, que habitualmente nunha media dunhas 110 persoas, pasaría a un tope de 50 persoas e non se fomentaría a rotación entre jalpóns. O mesmo público asistiría ás proxeccións a concurso sen moverse da mesma sala e cunha pausa intermedia, na que se aplicarían medidas de hixiene e ventilación do espazo, ó que accederían con máscara..
Amplía a nova>>
09/07/2020
Agadic adxudica as 19 axudas para a promoción do talento audiovisual
A Axencia galega de Industrias Culturais (Agadic) ven de facer pública a adxudicación das subvencións á promoción do talento audiovisual galego, polas que recibirá apoio económico a escrita de oito novos guións, así como a realización de oito curtas e de tres longametraxes con dirección novel. A convocatoria destas subvencións foi ampliada a partir da crise sanitaria tanto en orzamento como en número de proxectos beneficiarios de acordo co Plan de Reactivación dos Sectores Cultural e Turístico cun incremento dun 14% que colocou en 178.000 euros a súa dotación final. Do orzamento 40.000 euros irán para oito guións de longametraxes cinematográficas en galego, 48.000 para a produción de oito curtas en versión orixinal galega e 90.000 para contribuír ao financiamento de tres longas. A película
Cando toco un animal de Ángel Filgueira (Redondela, 1992),
Verbena de Rafael de los Arcos (Vigo, 1979) e Carlos Martínez-Peñalver Mas (Vigo, 1991) coa película
Serra da Estrela son os tres proxectos de longametraxes “óperas primas” que contarán coa achega de 30.000 euros nesta adxudicación. As subvencións á promoción do talento audiovisual galego teñen como obxectivo favorecer a incorporación da nova creación á industria e promover a xeración de propostas narrativas de especial valor cinematográfico, así como contribuír ao enriquecemento cultural de Galicia mediante as distintas formas de expresión audiovisual. .
Amplía a nova>>
