11/02/2021
Agadic convoca as axudas a festivais audiovisuais para o 2021
A Axencia Galega das Industrias Culturais (AGADIC) ven de publicaro hoxe no Diario oficialde Galicia unha nova convocatoria de axudas, neste caso dirixidas a apoiar a celebración de festivais audiovisuais en Galicia. A axencia gubernamental dedica este ano 200.000 euros de orzamento a estas subvencións para festivais de carácter profesional, o que inclúe aqueles certames, semanas e mostras que teñan por obxecto a promoción e difusión da produción cinematográfica e audiovisual e se celebren na comunidade autónoma. O orzamento aumenta en 10.000 euros respecto á convocatoria do pasado ano, mantendo a liña ascendente dos pasados exercizos..
Amplía a nova>>
10/02/2021
O Festival Carballo Interplay pasa tamén á axenda de setembro
O festival de Contidos Dixitais Carballo Interplay seguirá o mesmo camino que outros eventos audiovisuais coma Play-Doc e o Festival de Cans e fará a súa edición deste ano no mes de setembro. O evento organizado polo Concello de Carballo desbotou facer a súa oitava edición nas que, ata o pasado 2020, eran as súas datas habituais na primavera e moveuse para setembro, algo máis adiantado que no 2020 cando tras verese adiado polo confinamento, celebrouse xa en novembro, no outono , e de xeito completamente virtual. A nova edición fo festival ven de facer públicas, a través do Boletín Oficial da oprovincia da Coruña, as bases da competición de series e do Premio a proxecto de serie en galego para este ano. Queda por ver se o desenvolvemento será completamente virtual ou ofrecerá un modelo híbrido que inclúa actividades presenciais, como xa se chegou a propor o pasado ano..
Amplía a nova>>
09/02/2021
O Festival de Cine escolar Olloboi achega novidades na súa edición 2021
Sen actividades presenciais, o Festival de Cine escolar Olloboi presenta a décima edición a ampliar a súa proposta. O habitual certame de curtametraxes mantense a engadir unha categoría, Xubiloi, dedicada ao profesorado xubilado. Ademais, o encontro propón obradoiros gratuítos en liña para alumnado de primaria ou secundaria e para docentes. A conmemorar a primeira década de existencia do proxecto, vaise presentar o documental
Cadernas de Olloboi, unha película coa que "pretendemos dar unha visión sobre a evolución do uso do audiovisual nas aulas, rendendo tributo a toda a comunidade cómplice que apoia este modelo educativo-cultural tan transversal, altruísta e rebelde". .
Amplía a nova>>
08/02/2021
O 20 por cento das proxeccións dos festivais de cine galegos no ano pasado foron estreas mundiais
Vinte e oito festivais, mostras ou certames de cinema de 18 localidades participaron nun estudo estatístico promovido desde a asociación Proxecta, a Coordinadora Galega de Festivais de Cinema co obxectivo analizar e dar visibilidade á labor e impacto que os festivais de cinema veñen desenvolvendo en Galicia. Co patrocinio de AGADIC e a axuda da área de cultura da Deputación de A Coruña, o Departamento de Estatística e Investigación Operativa do Campus Vida da USC fíxose cargo da súa elaboración e os resultados da primeira fase dese estudo veñen de facerse públicos. A investigación e recollida de datos estrutúrase en dez apartados diferentes que amosa datos sobre as características dos eventos; as súas estruturas de organización; producións que programa; actividades paralelas ás proxeccións; composición de equipos; impacto económico; impacto social; fontes de financiamento; asistencia de público e importancia da sustentabilidade. As series de datos que este estudo achega dan resultados complexos marcados pola grande asimetría e diferencia de natureza entre eventos grandes e moi pequenos que entran xuntos nas series comparativas. En todo caso pódese extraer coma debuxo maioritario o feito de que o 90% son eventos urbanos e que son maioritariamente de recente creación, xa que o 60% ten menos de 10 edicións desenvolvidas. Ademais o traballo sinala que nas programacións os eventos galegos chegaron a ofrecer no 2020 un 20% de estreas mundiais, con gran presenza de produción audiovisual galega. Máis do 60% do público asisten con amigos e case un 20%, en familia. En parella e dende centros educativos son as categorías máis minoritarias. .
Amplía a nova>>
05/02/2021
Play-Doc e Festival de Cans poñen datas para setembro
A situación sanitaria e as súas previsións máis próximas, que fan case imposible a celebración de eventos na primeira metade do ano, fan que os organizadores busquen solucións prudentes que comezan situando as seguintes edicións nas datas que ven máis viables. Así esta semana, no eido audiovisual, tanto o festival Play-Doc de Tui coma o Festival de Cans veñen de sinalar cara o mes de setembro para as súas citas anuais. Ambos eventos repetiran por tanto o mes co que se puideron celebrar o pasado 2020, cando tiveron que cancelar as tradicionais datas primaverais nas que se ían celebrar. .
Amplía a nova>>
05/02/2021
O CCG presenta unha visita guiada audiovisual á exposición "Afonso X e Galicia"
O peche dos espazos culturais ordenado pola Xunta por mor da situación sanitaria obrigou a que houbera que cancelar o horario de visita á exposición "Afonso X e Galicia", organizada polo Consello da Cultura Galega, ao pouco de ser inaugurada en xaneiro de 2021. Pero a exposición continúa doutros xeitos. Hoxe o Consello da Cultura estrea unha "visita guiada" audiovisual coa cal o comisario da mostra, o musicólogo Antoni Rossell, explica a concepción da exposición e os seus contidos, permitindo coñecer a vida de Afonso X e o seu impacto na cultura e na literatura galegas. O documental está realizado por Nós TV. .
Amplía a nova>>
02/02/2021
A cinematografía en formato curto busca mercados en Clermont-Ferrand
A versión renovada e ampliada do catálogo Shorts from Galicia, editado cada ano pola Xunta para a promoción exterior da máis recente produción galega no ámbito das curtametraxes, ven de iniciar a súa difusión internacional no Festival de Court Métrage de Clermont-Ferrand, que se desenvolve integramente en liña estes días e ata o 6 de febreiro. Para favorecer a súa promoción en liña, o catálogo conta este ano cun formato máis amplo e con novos contidos, como o acceso aos "video-pitching" nos que son os propios directores os que explican as súas creacións. Ofrécese tamén o visionado das curtametraxes, baixo demanda e previa solicitude de contrasinal, para os axentes culturais interesados..
Amplía a nova>>
28/01/2021
Longa Noite opta ao Premio Gaudí ao mellor filme europeo
A Academia de Cinema Catalán, que organiza os Premios Gaudí, facía pública na mañá deste 28 de xaneiro a listaxe de nomeamentos á XIII edición destes galardóns. Na mesma, o filme
Longa Noite aparece como unha das catro producións que opta a se facer co premio á mellor película europea. O traballo de Eloy Enciso compite con
Little Joe de Jessica Hausner,
Sobre lo infinito de Roy Andersson e con
Sorry We Missed You, dirixida por Ken Loach. O actor Mario Casas está tamén como finalista na categoría da mellor interpretación masculina polo seu traballo en
No Matarás. Os resultados dos premios daranse a coñecer o vindeiro 21 de marzo..
Amplía a nova>>
27/01/2021
A Deputación de Pontevedra adquire parte do arquivo de Xosé Velo
O 22 de xaneiro de 1961, un grupo de opositores ao réxime franquista e salazarista secuestraron o trasatlántico "Santa María", protagonizando un sonado incidente internacional. Un dos líderes era o celanovés Xosé Velo Mosquera, máis coñecido como Pepe Velo, unha figura importante na defensa da identidade galega no exilio republicano de Venezuela. Agora, a Deputación de Pontevedra informa de que adquiriu parte do seu arquivo persoal ao seu fillo Victor, composto por fotografías, cartas e outros escritos. A Deputación está dixitalizando todo o material e confía en poñelo a disposición dos cidadáns a principios de 2022. Tamén fixo público un documental producido por Arraianos Produccións que presenta os feitos do trasatlántico "Santa María", alcumado durante o secuestro como "Santa Liberdade". .
Amplía a nova>>
27/01/2021
A Asociación de Actores e Actrices reclama un plan de rescate para o sector
Un plan de rescate que vaia alén do apoio ás empresas e que achegue axudas directas a traballadores e traballadoras do sector escénico. Esta é a reclamación que facía este 26 de xaneiro a Asociación de Actores e Actrices de Galicia nun comunicado dirixido ás consellerías de Cultura e de Emprego e Igualdade. Segundo a entidade, "a evolución da pandemia e as medidas restritivas sanitarias lévannos a un punto no que se fai inviable a actividade escénica neste momento e imposibilita as opcións dos/as profesionais dos espectáculos ao vivo de gañar o seu sustento". .
Amplía a nova>>
