06/10/2025
'San Simón' gaña a Calpurnia galega do XXX OUFF
O Auditorio Municipal de Ourense acolleu este sábado a gala de clausura da 30ª edición do Ourense Film Festival (OUFF), conducida por Lucía Rodríguez e Secun de la Rosa. A cerimonia combinou humor, dinamismo e momentos de emoción para recoñecer o mellor do audiovisual galego e internacional, cun total de 14 premios entregados. O filme 'San Simón' de Miguel Ángel Delgado, acadou a Calpurnia a Mellor Película na Sección Oficial Panorama Galicia, mentres que o Premio á Mellor Curtametraxe Galega foi para Hippocampus, de Xaime Miranda. Na Sección Oficial Internacional o filme croata 'Sandbag Dam' levou a Calpurnia a Mellor Película..
Amplía a nova>>
03/10/2025
Unha mostra didáctica repasa a produción de videoxogos en galego
Dar conta dos videoxogos que están dispoñibles na nosa lingua, tanto por se teren elaborado no noso país como por contar con traducións. Esta é a proposta de
O videoxogo en galego, exposición que abría as súas portas este 1 de outubro no IES Politécnico de Vigo e que percorrerá diferentes centros de ensino secundario da provincia de Pontevedra..
Amplía a nova>>
01/10/2025
'Decorado' de Alberto Vázquez obtén unha Mención do xurado en Austin
'Decorado', a nova película do premiado ilustrador e realizador Alberto Vázquez ven de obter un importante recoñecemento na súa estrea mundial no Fantastic Fest de Austin (Texas, EE.UU.). Dentro da Sección Oficial do certame internacional o xurado decidiu outorgar unha Mención Especial á longametraxe de animación. Este filme, baseado na curtametraxe homónima de 2016 de Vázquez, combina animación para adultos, comedia negra e drama fantástico. Tras o seu paso por Austin agora prepárase para novas citas en festivais europeos, incluíndo Fantastic Strasbourg e o Festival de Sitges 2025, no que terá lugar a estrea española. A chegada a salas comerciais está prevista para o 24 de outubro..
Amplía a nova>>
30/09/2025
'US-HER' gaña o premio a mellor curtametraxe galega no Galician Freaky Festival
A película 'US-HER' de David Salgado Marcote (A Coruña, 1979) ven de gañar o Premio do público á mellor curtametraxe galega no Galician Freaky Film Festival de Vigo. Esta adaptación libre do conto de Edgar Allan Poe, 'A caída da Casa Usher' é a quinta curtametraxe de David Salgado, baixo o seu propio selo creado en 2012, Dama Negra Films. O festival vigués de cine de terror, ciencia ficción e fantasía pechou a súa novena edición proclamando o seu palmarés de premiados con alcance internacional. O Gran premio desta edición vai para a curta polaca de animación 'Martyr's Guidebook' de Maks Rzontkowski. .
Amplía a nova>>
29/09/2025
A Semana de Cine de Lugo entregou o seus galardóns
Este sábado 27 de setembro fechaba as súas portas, coa concesión de galardóns, a 47 Semana de Cine de Lugo. No palmarés destaca como Premio do Público á Mellor Película da Sección Oficial a española
Las chicas de la estación, de Julieta Tobío. As votacións seleccionaron tamén
París 70 como mellor curtametraxes e
O interrogatorio como mellor curta galega..
Amplía a nova>>
29/09/2025
Morre o investigador e documentalista Carlos Fernández Santander
Con oitenta anos de idade falecía onte na Coruña o historiador, xornalista, realizador e mariño Carlos Fernández Santander (A Coruña, 1944 -2025). Fai menos dun ano que recollía na súa cidade o Premio Sellier de Cine "pola súa contribución invalorable ao cine documental en Galicia, con máis de medio ceno de títulos (avalados por premios) e a súa dedicación á preservación da nosa historia, coa intención de que o seu legado cinematográfico sexa coñecido tan ben como o literario, de forma que continúe inspirando a futuras xeracións de cineastas e historiadores". .
Amplía a nova>>
25/09/2025
Todo listo para o 30 Ourense Film Festival
A 30ª edición do OUFF • Ourense Film Festival xa está a punto de comezar e tras meses de anuncios a organización xa ven de presentar o programa completo co que comezará este venres, 26 de setembro. Dous filmes de cineastas vinculados co festival e que poderán verse por primeira vez en Galicia serán os que inaugurarán e clausurarán esta edición. 'Playa de lobos', comedia escrita e dirixida por Javier Veiga, inaugurará o certame o día 26, mentres que 'La deuda', o último traballo de Daniel Guzmán, o clausurará o día 5 de outubro. Guzmán recibirá, ademais, a Calpurnia de Honra do festival durante a gala de clausura. O OUFF • Ourense Film Festival está coorganizado pola Deputación de Ourense e a Asociación Luarada. Entre as moitas novidades para esta edición, destacan a residencia audiovisual para creadores mozos Faíscas, a composición dun tema musical propio a cargo de Jose Manuel Cancela, novas seccións como Xeración OUFF, Agarimo, Colleita e Made in OU, ou o redeseño da Calpurnia polo escultor Manuel Buciños.Como sempre a programación co0mplétase con outras actividades literarias, artísticas e musicais..
Amplía a nova>>
23/09/2025
Lugo será a sede dos XXIV Premios Mestre Mateo
O novo Auditorio Fuxan os Ventos, de Lugo, acollerá a gala da XXIV edición dos Premios Mestre Mateo o vindeiro 21 de marzo de 2026.Así o anunciou hoxe a Academia Galega do Audiovisual nunha rolda de prensa celebrada nese mesmo espazo e, na que participaron , ademais de membros da academia, Efrén Castro, vicepresidente da Deputación de Lugo; Iria Castro, deputada provincial de Cultura; Rubén Arroxo, tenente alcalde do Concello de Lugo; e Maite Ferreiro, concelleira de Cultura, Turismo e Promoción da Lingua. Esta celebración supón un fito ao será primeira vez que a entrega destes galardóns da excelencia audiovisual galega se dan na provincia de Lugo, a única na que aínda non tivera lugar ningunha gala nestes vintetres anos de edicións. A deputada provincial de Cultura, Iria Castro, cualificou o anuncio de "día histórico para Lugo". e quixo lembrar que Lugo, "a pesar de ser periferia da periferia", é lugar de orixe de moitas figuras do audiovisual coma os irmáns Coira, Melania Cruz, Margarita Ledo ou de Carmen Méndez..
Amplía a nova>>
19/09/2025
Fernanda del Nido recibirá o IV Premio de Honra Dolores Ben
A produtora executiva Fernanda del Nido foi recoñecida este 19 de setembro co IV Premio de Honra Dolores Ben que outorga anualmente a AGAPI (Asociación Galega de Produtoras Independentes). O galardón, que leva o nome da que fora presidenta da entidade, recoñece "as persoas e institucións que encarnan os valores de loita e defensa do ben común que ela mesma representaba". .
Amplía a nova>>
18/09/2025
O Galician Freaky Film inaugura mañá a súa novena edición
O certame internacional de cine
freak e fantástico de Vigo celebra a súa novena edición do 19 ao 27 de setembro nos Cines Tamberlick da Praza Elíptica, cunha programación que vai máis alá das proxeccións habituais. A proposta da sección oficial chega con cifras de récord: 74 curtametraxes procedentes de 34 países. Máis de 14 horas de cine freak que converterán Vigo na capital internacional do cinema fantástico e de terror. Este ano, o festival consolida a súa vontade de expandir fronteiras e tecer alianzas con outros festivais de xénero, tanto do panorama nacional como internacional. Nesta liña o Galician Freaky Film Festival contará con tres actividades especiais: o II Encontro Irmandades do Norte, con mesa redonda e sesión de curtas de festivais galegos, vascos, navarros e cataláns; unha selección de curtametraxes do ToHorror Fantastic Film Fest de Turín; e, dentro da sección Pequefreak, a chegada do Lobo Mau de MotelX desde Lisboa, cun programa de animación infantil titulado Sustos Curtos. .
Amplía a nova>>
