05/05/2010
A antiga cadea da Coruña albergará unha mostra de cine en Súper 8
Naceu para o mercado doméstico, para que os afeccionados captasen as súas celebracións familiares pero pronto quedou en desuso ata que caeu na man de cineastas e videoartistas que buscaban unha estética diferente ao vídeo. Agora todos eles teñen unha cita na Coruña. Será na Mostra de Cinema Periférico que se desenvolve do 3 ao 6 de xuño nun contorno moi especial, a antiga cadea que se estrea como recinto cultural e se acondicionará como sala de proxección e albergar distintas performances. Ciclos de películas, retrospectivas, mesas redondas e debates ao redor de distintas temáticas relacionas co cine performativo, expanded cinema, cine-ensaio ou cine documental conforman a programación desta atípica mostra. Luis Tosar e Oliver Laxe teñen confirmada a súa presenza a este contro que conta co apoio da Xunta, a Deputación, o CGAI, o ICAA e a Fundación Caixa Galicia..
Amplía a nova>>
04/05/2010
As mulleres do audiovisual reúnense en Santiago para mellorar a súa presenza no sector
Só o 7% dos directores de cine que hai en España son mulleres, dos guionistas só o 15% e das produtoras só o 20%. Estas son as cifras que motivaron que CIMA, a asociación que reúne a todas as profesionais do sector (agora tamén actrices), organizase un congreso para coñecer se a situación é igual en toda Europa e que se pode facer para mellorala. O caso da televisión, as políticas públicas de igualdade nesta materia, o eido cinematográfico, os novos medios e formatos son algunhas das sete áreas temáticas nas que se agrupa este encontro que arrinca mañá. Dous días abertos ao público cuxos resultados se plasmarán na
Carta de Compostela, que conterá as peticións e demandas concretas das mulleres do sector..
Amplía a nova>>
04/05/2010
Dous traballos galegos compiten na sección oficial de Documenta Madrid
Hai unha semanas apuntamos a presenza de
American Greyhound na competición oficial de Documenta Madrid. A ese traballo hai que lle sumar outra participación galega, trátase da última película de Lois Patiño (Vigo, 1983)
Recordando os Rostros da Morte, no marco da sección de non-ficción, deste certame que se desenvolve en Madrid do 7 ao 16 de maio. O documental achégase, en clave poética, ao instante dramático no que se produce a morte. Non será o único traballo do vigués que se poderá ver en Madrid estes días, xa que no marco do concurso
EN PEZAS de Caja Madrid se proxectará a peza de videoarte
Paisaje-Duración. Trigal..
Amplía a nova>>
30/04/2010
Un documental recupera a historia do nacionalismo galego
Do Rexionalismo do século XIX ata o pasado recente.
Memoria do nacionalismo galego é un documental que percorre os 170 anos da historia política, social e cultural de Galicia a través dos testemuños de vinte e sete historiadores, teóricos, sindicalistas, políticos e intelectuais. Un percorrido polas ideas e as organización políticas que creaon o nacionalismo galego que se sintetizan en hora e media e foi dirixido por Xabier Macías, Comba Campoy e Xosé Zapata. A estrea deste traballo, promovido pola Fundación Galiza Sempre no marco do seu décimo aniversario terá lugar hoxe venres ás 20:30 horas no Teatro Principal (Rúa Nova, 21). .
Amplía a nova>>
30/04/2010
As academias de cine galega e catalá intercambian as proxeccións dos seus premios audiovisuais
As curtametraxes finalistas aos Mestre Mateo deste ano exhibíronse en Barcelona grazas a un convenio entre a entidade que concede eses premios, a Academia Galega do Audiovisual (AGA) e a súa homóloga catalá, Acadèmia del Cinema Catàla. Agora, esa iniciativa volve repetirse con esa mesma dobre dirección: o CGAI proxectará (do 3 ao 10 de maio) os traballos finalistas aos premios do cinema catalán, os Gaudí; e a sede da SGAE en Barcelona ofrecerá as producións galegas. Desta forma, a AGA continúa co seu cometido de promoción e exportación exterior dos traballos producidos en Galicia..
Amplía a nova>>
30/04/2010
A Xunta avala a Dygra Films para rescatala da súa crise
Na reunión do goberno galego que se celebra cada xoves, acordouse concerder un aval de 1.5 millóns de euros á empresa coruñesa Dygra Films S.L para que garanta un préstamo de tres millóns. En todo caso, a Xunta asegurou que este aval substitúe a outro da mesma contía que xa concedeu o IGAPE, Instituto Galego de Promoción Económica, e prorroga así por dous anos o prazo do préstamo..
Amplía a nova>>
29/04/2010
Morre o actor Tuto Vázquez
Despois dunha longa enfermidade, hoxe faleceu o actor Tuto Vázquez. Nado en Ribeira, este licenciado en arte dramática, tiña unha ampla experiencia en cine, radio e dobraxe. Malia que comezou a súa carreira profesional no teatro, desenvolveu a maior parte da súa traxectoria na televisión, onde foi o popular Ramón Couto de
Mareas Vivas. O seu último traballo foi
Padre Casares onde interpretou a Don Crisanto na primeira temporada, ata que a enfermidade lle impediu continuar e foi substituído por Gonzalo Rey Chao. Na súa filmografía figuran as películas
Camiño de Santiago: A Orixe (2004),
O lapis do carpinteiro (2002),
Blanca Madison (2000), e ademais das series citadas,
Avenida de América (2001)e
Pratos combinados(1995)..
Amplía a nova>>
29/04/2010
Unha sesión analiza as novas formas de explotación das salas de cine
Houbo un tempo no que as salas de cine eran só espazos para a proxección de películas. Agora, xa se poden ver óperas e retransmisións deportivas. ¿É este o futuro das salas? As respostas a esta pregunta están na conferencia que mañá pronunciará Ángela Álvarez Rilla, produtora executiva e responsable do programa audiovisual do Teatro Real de Madrid baixo o título
As salas de cine e espacios públicos como pantallas de acontecimentos en directo: unha nova forma de explotación comercial para o sector audiovisual?. Con esta cita ábrese unha nova edición do Curso de Comercialización Internacional de Contidos Audiovisuais que desenvolve o Máster en Produción e Xestión Audiovisual (MPXA) en colaboración co Consorcio Audiovisual de Galicia e o Instituto de Comercio Exterior. A cita é de balde e está aberta a profesionais e interesados na materia..
Amplía a nova>>
27/04/2010
O elixido e A nena que tiña unha soa orella gañan o festival de curtas de Sada
Interpretado por Sonia Castelo, Antonio Mourelos e baseado na obra teatral “Un conto de Nadal” de Raúl Dans é o traballo gañador da III edición do Festival Galego de Curtas, que organiza o concello de Sada. O premiado traballo
A nena que tiña unha soa orella de Álvaro León sumou un novo galardón ao seu palmaré ao ganar na categoría de animación. Pola súa banda, o público recoñeceuo traballo
Instalación de José Díaz. .
Amplía a nova>>
26/04/2010
The End gaña o premio do xurado do Festival de Redondela
O Festival de Redondela dáselle ben a Eduardo Chapero-Jackson que volveu repetir o éxito acadado na edición anterior, ao gañar o premio do xurado polo seu traballo
The End, unha curta de case media hora de duración. As preferencias do público, dotado con 500 euros máis trofeo, inclináronse a favor de
A historia de sempre por José Luis Montesinos. Malia a reducción de sesións, o certame contou cunha boa acollida de público e a organización estima de 2.000 persoas acudiron a algunha das sesións do certame. .
Amplía a nova>>
